Lo Bo Cana cu Dios?
Lo Bo Cana cu Dios?
“Cana humildemente cu bo Dios.”—MIKEAS 6:8.
1, 2. Con nos por compara Yehova su sintimentonan pa nos cu esnan di un mayor cu ta siña un yiu cana?
UN BABY, ta para lenchi so y ta dal su prome pasonan den direccion di e brasanan habri di su mayor. Esei por parce un cos chikito, pero pa e mama cu e tata, e ta un logro importante, un momento yen di speransa pa futuro. E mayornan ansiosamente ta anticipa con nan lo cana cu nan yiu, man teni, den e lunanan y añanan benidero. Nan ta spera cu den hopi manera nan por sigui duna e yiu guia y sosten leu den futuro.
2 Yehova Dios tin sintimentonan similar pa cu su yiunan terenal. Un biaha el a bisa relaciona cu su pueblo Israel, of Efrain: “Ami ta Esun cu a siña Efrain cana, mi a cohe nan den mi brasa ... Mi a guia nan cu cordonnan di hende, cu lasonan di amor.” (Oseas 11:3, 4) Aki Yehova ta describi su mes como un mayor amoroso kende cu pasenshi ta siña un yiu cana, kisas tumand’e den Su brasa ora e cai. Yehova, e mihor Mayor cu tin, ta ansioso pa siña nos con pa cana. Tambe e tin placer den compaña nos segun cu nos ta sigui haci progreso. Manera nos texto central ta mustra, nos por cana cu Dios! (Mikeas 6:8) Pero kico cana cu Dios ta nifica? Pakico nos tin cu haci esei? Con esei ta posibel? Y ki bendicionnan nos ta haya door di cana cu Dios? Laga nos considera e cuater preguntanan aki un pa un.
Kico Cana cu Dios Ta Nifica?
3, 4. (a) Kico ta remarcabel tocante e descripcion di cana cu Dios? (b) Kico cana cu Dios ta nifica?
3 Ta mas cu claro cu un hende di carni y weso no por bai cana literalmente cu Yehova, un ser spiritual. (Exodo 33:20; Huan 4:24) Pues ora Bijbel ta papia di hende su canamento cu Dios, esei ta den sentido figurativo. De echo e ta describi un cuadro mental remarcabel, uno cu ta surpasa bareranan nacional y cultural y cu ta aplicabel na cualkier periodo di tempo. De echo, ta hende di cua luga of era lo no por compronde e concepto di un persona cu ta cana den compania di un otro? E descripcion aki ta duna e idea di un relacion di curason y intimo, no ta asina? E sintimentonan ei ta duna nos un comprondemento mas profundo ta kico cana cu Dios ta nifica. Pero laga nos ta mas spesifico.
4 Corda riba e hombernan fiel Enok y Noe. Dicon nan a ser describi como canando cu Dios? (Genesis 5:24; 6:9) Den Bijbel, e expresion “cana” hopi bes ta nifica sigui un cierto proceder of forma di actua. Enok y Noe a scohe un rumbo den bida cu tawata na harmonia cu e boluntad di Yehova Dios. Distinto for di e hendenan den e mundo rond di nan, nan si a acudi na Yehova pa haya guia y a obedece su instruccion. Nan a confia den Yehova. Acaso esaki a nifica cu ta Yehova tawata tuma decision pa nan? No. Yehova a duna hende boluntad liber, y e kier pa nos uza e don ei hunto cu nos propio “facultad di rasona.” (Romanonan 12:1, NW) Sinembargo, segun cu nos ta tuma decisionnan, nos ta permiti humildemente pa nos facultad di rasona ser guia pa Yehova su mente infinitamente superior. (Proverbionan 3:5, 6; Isaias 55:8, 9) De echo, segun cu nos ta cana den bida, nos ta haci e biahe ei den estrecho compania cu Yehova.
5. Dicon Hesus a papia di agrega un codo na e duracion di un hende su bida?
5 Bijbel hopi bes ta compara bida cu un biahe of un caminata. Den algun caso e comparacion ei ta direct, pero den otro casonan e ta indirect. Por ehempel, Hesus a bisa: “Cua di boso, door di ta ansha, por agrega un codo na e duracion di su bida?” (Mateo 6:27, NW) Podise un parti di e palabranan ei por ta dificil pa bo compronde. Dicon Hesus lo a papia di agrega “un codo”, cu ta un midi di distancia, na un persona su ‘duracion di bida’, cu ta ser midi na tempo? * Hesus evidentemente a presenta bida manera un biahe. De echo, el a siña hende cu precupacion lo no yuda bo agrega ni sikiera un stap chikito na e biahe ei di bida. Pero nos mester conclui anto cu no tin nada cu nos por haci tocante e duracion di nos caminata cu Dios? Al contrario! Esei ta trece nos na nos di dos pregunta: Pakico nos tin cu cana cu Dios?
Pakico Nos Tin Cu Cana cu Dios?
6, 7. Hende imperfecto tin mester di kico urgentemente, y dicon nos ta haci bon di acudi na Yehova pa satisface e necesidad ei?
6 Yeremias 10:23 ta splica un motibo pakico nos tin cu cana cu Yehova Dios: “O SEÑOR, mi sa cu e caminda di hende no ta di dje mes; tampoco no ta keda na hende pa dirigi su pasonan.” Pues nos como hende no tin e habilidad ni e derecho di dirigi nos propio rumbo di bida. Nos tin mester di guia urgentemente. Hende cu ta insisti di sigui nan propio caminda, independiente di Dios, ta comete e mesun eror cu Adam cu Eva a comete. E prome pareha a tuma den nan man e derecho di determina pa nan mes loke ta bon y loke ta malo. (Genesis 3:1-6) E derecho ei simplemente “no ta di” nos.
7 Abo no ta sinti e necesidad di tin guia durante e biahe di bida? Tur dia, nos tin cu tuma decisionnan grandi y chikito. Tin di nan ta dificil y por afecta nos futuro, y tambe futuro di nos sernan keri. Pero corda cu tin un persona infinitamente mas bieu y mas sabi cu nos cu gustosamente kier duna nos guia amoroso pa tuma e decisionnan ei! Lamentablemente, mayoria hende awe ta prefera di confia den nan propio huicio y guia nan propio pasonan. Nan ta pasa por halto di e berdad cu Proverbionan 28:26 ta declara: “Esun cu confia den su mes curason ta un bobo, ma esun cu cana cu sabiduria lo wordo libra.” Yehova kier spar nos di e desasternan cu ta resulta door di confia den e curason humano engañoso. (Yeremias 17:9) E kier pa nos cana den sabiduria, door di confi’e como nos Guia y Instructor sabi. Ora nos haci esei, nos caminata den bida ta duna nos siguridad, satisfaccion y un sintimento di logro.
8. Pica y imperfeccion di mes ta hiba hende na ki destinacion, pero kico Yehova kier pa nos?
8 Un otro motibo pakico nos tin cu cana cu Dios tin di aber cu e largura di e caminda cu nos kier cana. Bijbel ta declara un berdad tristo. Den un sentido, tur hende imperfecto ta canando den direccion di e mesun destinacion. Describiendo e pruebanan cu ta acompaña edad avansa, Eclesiastes 12:5 ta bisa: “Hende ta bai na su cas eterno, mientras cu yoradonan di morto ta cana rond den caya.” Kico ta e “cas eterno” aki? Nos graf, caminda pica y imperfeccion di mes ta hiba nos. (Romanonan 6:23) Sinembargo, Yehova kier mas pa nos cu djis un caminata cortico y yen di problema di nos wieg pa nos graf. (Job 14:1) Solamente door di cana cu Dios nos por tin e speransa di cana mesun largura cu tawata su intencion pa nos cana, esta, pa semper. No ta esei ta loke bo kier? Ta bisto anto cu bo tin cu cana cu bo Tata.
Con Nos Por Cana cu Dios?
9. Dicon tawatin biaha cu Yehova tawata scondi pa su pueblo, pero ki siguransa el a duna segun Isaias 30:20?
9 E di tres pregunta den nos consideracion ta merece nos pleno atencion. E ta: Con nos por cana cu Dios? Nos ta haya e contesta na Isaias 30:20 y 21: “Bo Siñador, lo no sconde su mes mas, ma bo wowonan lo mira bo Siñador. Bo horea lo tende un palabra tras di bo ta bisa: ‘Esaki ta e caminda, cana den dje’, ki ora cu boso bira na man drechi of na man robes.” Den e textonan alentador aki, e palabranan di Yehova cu tin para skirbi na versiculo 20 kisas a recorda su pueblo cu ora nan a rebela contra dje, Yehova de echo tawata scondi for di nan. (Isaias 1:15; 59:2) Pero aki e versiculo ta presenta Yehova, no scondi, sino para abiertamente dilanti di su pueblo fiel. Nos lo por pensa riba un instructor para dilanti di su studiantenan, demostrando nan kico e kier pa nan siña.
10. Den ki sentido bo por “tende un palabra tras di bo” for di bo Magnifico Siñador?
10 Isa 30 Versiculo 21, ta pinta un otro cuadro mental. E ta describi Yehova como si fuera canando tras di su pueblo, dunando nan instruccion encuanto cua ta e caminda corecto pa cana. Expertonan biblico a comenta cu e expresion aki lo por ta basa riba e manera cu un wardado tin biaha ta cana tras di su carnenan, y na bos halto e ta guia nan y ta percura pa nan no bai den e caminda robes. Con e descripcion aki ta aplica na nos? Wel, ora nos ta acudi na e Palabra di Dios pa haya guia, nos ta lesando palabranan cu a wordo registra miles di aña pasa. Ta como si fuera nan ta biniendo for di nos tras den e coriente di tempo. Sinembargo, nan ta mesun al caso awe cu nan tawata dia cu a skirbi nan. Conseho biblico por guia nos den nos decisionnan diario y por yuda nos plania e rumbo di nos bida pa e añanan den futuro. (Salmo 119:105) Ora cu nos sinseramente ta busca tal conseho y ta aplic’e, Yehova e ora ei ta nos Guia. Nos ta canando cu Dios.
11. Segun Yeremias 6:16, ki cuadro atractivo Yehova a describi pa su pueblo, pero con nan a reacciona?
11 Nos realmente ta permiti e Palabra di Dios guia nos asina estrechamente? Ta bale la pena pa de bes en cuando nos para keto un rato y analisa nos mes honestamente. Considera un versiculo cu lo yuda nos haci esei: “Asina SEÑOR ta bisa: ‘Para na e camindanan y mira, y puntra pa e bereanan antiguo, unda e bon caminda ta, y cana den dje; y boso lo haya descanso pa boso alma.’” (Yeremias 6:16) E palabranan aki kisas ta laga nos corda riba un biahero cu ta para na un crusada pa puntra ki direccion e tin cu sigui. Den un sentido spiritual, Yehova su pueblo rebelde na Israel tawatin cu haci algo similar. Nan tawatin cu busca manera pa bai bek na “e bereanan antiguo.” E “bon caminda” tawata e caminda den cua nan fiel antepasadonan a cana, e caminda for di cua e nacion a comete e bobedad di desvia. Lamentablemente, Israel a reacciona na un manera cabesura riba e recordatorio amoroso aki for di Yehova. E mesun versiculo ta sigui bisa: “Ma nan a bisa: ‘Nos no kier cana den dje!’” Pero e pueblo di Dios den tempo moderno si a reacciona otro riba tal conseho.
12, 13. (a) Con Cristo su siguidonan ungi a reacciona riba e conseho di Yeremias 6:16? (b) Con nos lo por analisa nos mes relaciona cu e manera cu nos ta cana awe?
12 For di e ultimo parti di siglo 19, Cristo su siguidonan ungi a aplica e conseho di Yeremias 6:16 na nan mes. Como grupo, nan a hiba delantera den regresa di henter nan curason na e caminda of “bereanan antiguo.” Distinto for di cristiandad apostata, nan si a pega fielmente na “e ehempel di palabranan sano” cu Hesucristo a establece y cu su fiel siguidonan di prome siglo a tene na dje. (2 Timoteo 1:13) Te cu awe, e unginan ta yuda otro y tambe nan compañeronan di ‘otro carne’ pa sigui e caminda di bida sano y felis cu cristiandad a bandona.—Huan 10:16.
13 Door di percura cuminda spiritual na e debido tempo, e grupo di esclabo fiel a yuda miyones di hende haya “e bereanan antiguo” y cana cu Dios. (Mateo 24:45-47) Abo ta un di e miyones ei? Si ta asina, kico bo por haci pa bo no drif bai y cuminsa sigui bo propio rumbo? Ta sabi pa bo stop periodicamente y analisa e manera cu bo ta cana den bida. Si fielmente bo ta lesa Bijbel y publicacionnan basa riba Bijbel y ta asisti na programanan di instruccion patrocina pa e unginan awe, e ora ei bo ta bezig ta ser entrena pa cana cu Dios. Anto ora cu humildemente bo ta aplica e conseho cu bo ta haya, bo ta canando en berdad cu Dios, siguiendo “e bereanan antiguo.”
Cana Como si Fuera Nos Ta “Mira Esun Cu Ta Invisibel”
14. Si Yehova ta real pa nos, con esei lo wordo refleha den e decisionnan personal cu nos ta tuma?
14 Pa nos cana cu Yehova, e mester ta real pa nos. No lubida cu Yehova a sigura esnan fiel den antiguo Israel cu e no tawata scondi for di nan. Awe tambe e ta revela su mes na su pueblo como nan Magnifico Siñador. Yehova ta asina real pa bo cu e ta como si fuera para bo dilanti ta instrui bo? Esei ta e clase di fe cu nos tin mester pa nos por cana cu Dios. Moises tawatin un fe asina, “pasobra el a keda firme, como si fuera e tawata mira Esun cu ta invisibel.” (Hebreonan 11:27) Si Yehova ta real pa nos, e ora ei nos lo tene cuenta cu su sintimentonan ora nos ta tuma decision. Por ehempel, nos lo no pensa mes di comete un malecho anto caba purba sconde nos pica for di ancianonan cristian of miembronan di famia. Mas bien, nos ta haci esfuerso pa cana cu Dios asta ora cu ningun otro hende por mira nos. Mescos cu rei David di pasado, nos ta determina: “Lo mi cana den mi cas den e integridad di mi curason.”—Salmo 101:2.
15. Con asociacion cu nos rumannan cristian ta yuda nos sinti cu Yehova ta real pa nos?
15 Yehova ta compronde cu nos ta criaturanan imperfecto y carnal y cu tin biaha ta un reto pa nos kere den loke nos no por mira. (Salmo 103:14) E ta haci hopi cos pa yuda nos vence tal debilidad. Por ehempel, el a trece hunto “un pueblo pa su nomber” for di tur nacion di mundo. (Echonan 15:14) Segun cu nos ta sirbi hunto den union, nos ta haya fortalesa for di otro. Ora nos tende con Yehova a yuda un ruman spiritual vence un of otro debilidad of pasa door di un prueba dificil, esei ta haci nos Dios asta mas real ainda pa nos.—1 Pedro 5:9.
16. Con siña tocante Hesus ta yuda nos cana cu Dios?
16 Mas cu tur cos, Yehova a duna nos e ehempel di su Yiu. Hesus a bisa: “Ami ta e caminda, y e berdad, y e bida; ni un hende no ta bin serca e Tata, sino pa medio di mi.” (Huan 14:6) Un di e mihor maneranan pa haci Yehova mas real pa nos ta di studia Hesus su bida riba tera. Tur loke Hesus a bisa of haci tawata un refleho perfecto di e personalidad y manera di actua di su Tata celestial. (Huan 14:9) Segun cu nos ta tuma decisionnan, nos tin cu pensa cuidadosamente riba e manera cu Hesus lo a atende e asunto. Ora cu nos decisionnan ta indica cu nos a tuma tempo pa pensa y haci oracion cuidadosamente, e ora ei nos ta siguiendo den e pasonan di Cristo. (1 Pedro 2:21) Como resultado, nos ta canando cu Dios.
Ki Bendicionnan Nos Lo Haya?
17. Si nos cana den e caminda di Yehova, ki “descanso” nos lo haya pa nos alma?
17 Cana cu Yehova Dios ta hiba na un bida bendiciona. Corda loke Yehova a priminti su pueblo si nan a busca “e bon caminda.” El a bisa: “Cana den dje; y boso lo haya descanso pa boso alma.” (Yeremias 6:16) Kico e “descanso” ei ta nifica? Acaso un bida facil, cu ta yena cu placer y luho? No. Yehova ta percura algo hopi mas mihor, algo cu asta e hendenan di mas rico na mundo rara bes ta haya. Haya descanso pa bo alma ta nifica haya pas interno, goso, satisfaccion y cu bo necesidadnan spiritual ta ser satisface. E descanso ei ta nifica cu bo por tin sigur cu bo a scohe e mihor caminda den bida. Tal pas mental ta un bendicion cu masha poco bo ta mira den e mundo yen di problema aki!
18. Ki bendicion Yehova kier duna bo, y kico ta bo determinacion?
18 Naturalmente bida riba su mes ta un gran bendicion. Asta un caminata cortico ta mihor cu nada. Sinembargo, nunca tawata Yehova su intencion pa bo canamento consisti di apenas un biahe cortico for di e vigor di hubentud pa e dolor di biehes. No, Yehova kier pa bo tin e bendicion di mas grandi cu tur. E kier pa bo cana cu ne pa semper! Esaki a wordo bon expresa na Mikeas 4:5: “Maske tur e pueblonan ta cana cada un den e nomber di su dios, ma pa loke ta nos, nos si lo cana den e nomber di [Yehova] nos Dios pa semper y semper.” Abo lo gara e bendicion ei? Abo lo biba loke Yehova atractivamente ta yama e “bida berdadero”? (1 Timoteo 6:19) Pues anto, sea dicidido pa cana cu Yehova awe, mañan y djei padilanti te den eternidad!
[Nota]
^ par. 5 Algun traduccion di Bijbel ta cambia “codo” den e versiculo aki pa un midi di tempo, manera por ehempel “un momento” (The Emphatic Diaglott) of “un solo minuut” (A Translation in the Language of the People, di Charles B. Williams). Sinembargo, e palabra uza den e texto original definitivamente ta nifica un codo, cu tawata mas o menos 45 centimeter largo.
Con Lo Bo Contesta?
• Kico cana cu Dios ta nifica?
• Dicon bo ta sinti un necesidad di cana cu Dios?
• Kico lo yuda bo cana cu Dios?
• Ki bendicionnan esnan cu cana cu Dios ta haya?
[Preguntanan di Estudio]
[Plachi na pagina 23]
Mediante e paginanan di Bijbel, nos ta tende Yehova su bos tras di nos ta bisa: “Esaki ta e caminda”
[Plachi na pagina 25]
Na reunion, nos ta haya cuminda spiritual na e debido tempo