Storia di Bida

Mi A Haya ‘e Deseonan di Mi Curason’

SEGUN E RELATO DI DOMINIQUE MORGOU

Porfin, na december 1998, mi tawata na Africa! Un soño cu mi tawatin for di mucha, awor a bira realidad. Semper mi a haya emocionante pa pensa riba Africa su sabananan extenso y bestianan fasinante den naturalesa. Awor di berdad mi tawata einan! Na mesun momento, un otro soño a bira realidad. Mi tawata un predicado di tempo completo sirbiendo den un pais den estranheria. Pa hopi hende, esaki lo por a parce imposibel. Mi bista ta hopi malo, y mi ta cana den e camindanan di tera di pueblitonan Africano cu yudansa di un cacho pa guia hende ciego cu a ser entrena pa e cayanan di stadnan Europeo. Laga mi conta bo con a bira posibel pa mi sirbi na Africa y con Yehova a duna mi ‘e deseonan di mi curason.’—Salmo 37:4.

MI A nace dia 9 di juni 1966, den parti suit di Francia. Mi tawata esun mas jong di shete yiu—dos mucha homber y cinco mucha mohe—y nos a haya bon cuido di mayornan amoroso. Sinembargo, tawatin un mancha scur den mi bida hoben. Mescos cu mi wela, mi mama y un di mi ruman mohenan, mi ta sufri di un malesa hereditario cu pocopoco ta pone cu lo mi bira completamente ciego.

Como teenager, mi mester a soporta rasismo, prehuicio y hipocresia, locual a pone mi rebela contra sosiedad. Tawata durante e tempo dificil aki cu nos a muda pa e provincia di Hérault. Einan, algo maraviyoso a sosode.

Un diadomingo mainta, dos Testigo di Yehova a bin na nos porta. Mi mama tawata conoce nan y a invita nan bin paden. Un di e señoranan a puntra Mama si e ta corda cu el a  priminti cu un dia lo e acepta un estudio di Bijbel. Mama a corda esei y a puntr’e: “Ki dia nos ta cuminsa?” Nan a palabra pa reuni tur diadomingo mainta, y asina mi mama a cuminsa siña “e berdad di e evangelio.”—Galationan 2:14.

Mi Ta Haya Comprondemento Penetrante

Mama tawata haci tur su esfuerso pa compronde y corda loke e tawata siña. Siendo ciego, e mester a siña tur cos for di cabes. E Testigonan a siñ’e cu hopi pasenshi. Pa loke ta ami, ki ora cu e Testigonan a bin, mi tawata bai sconde den mi camber y a sali te ora nan a bai. Pero un atardi, Eugénie, un di e Testigonan, a topa mi y a papia cu mi. El a conta mi cu e Reino di Dios lo pone fin na tur hipocresia, odio y prehuicio den mundo. E di: “Ta Dios so tin e solucion.” Anto el a puntra mi si lo mi kier sa mas. E siguiente dia, mi a cuminsa cu mi estudio di Bijbel.

Tur cos cu mi a siña tawata nobo pa mi. Awor mi a bin compronde cu ta pa un bon motibo Dios ta permitiendo maldad temporalmente riba tera. (Genesis 3:15; Huan 3:16; Romanonan 9:17) Ademas, mi a siña cu Yehova no ta laga nos sin speransa. El a duna nos su promesa maraviyoso di bida eterno riba e tera transforma den un paradijs. (Salmo 37:29; 96:11, 12; Isaias 35:1, 2; 45:18) Den e Paradijs ei, lo mi recupera e don di bista, cu mi tawata perdiendo gradualmente.—Isaias 35:5.

Mi Ta Drenta den Sirbishi di Tempo Completo

Dia 12 di december 1985, mi a simbolisa mi dedicacion na Yehova pa medio di bautismo bou di awa, y asina mi a join mi ruman mohe Marie-Claire, kende ya a dal e paso aki caba. Poco despues a sigui mi ruman homber Jean-Pierre, y tambe mi mama stima.

Den e congregacion cu cua mi tawata asocia, tawatin varios pionero regular, esta predicadonan di tempo completo. Nan goso y entusiasmo pa e sirbishi a curasha mi. Asta Marie-Claire a drenta den e sirbishi di tempo completo, apesar cu e ta sufri di un malesa di wowo y ta bisti beugel na un pia. Te cu awe su ehempel ta un gran animacion pa mi den mi sirbishi na Yehova. Siendo rondona pa pionero den e congregacion y den famia a yuda mi desaroya un deseo intenso pa participa den e sirbishi di tempo completo. Pues na november 1990, mi a cuminsa sirbi den e stad Béziers como pionero.—Salmo 94:17-19.

Con Mi A Trata cu Desanimacion

Den sirbishi, e otro pioneronan atento tawata yuda mi. Asina mes, tempo tempo mi tawata sinti mi desanima debi na mi limitacionnan y tawata desea di por haci mas. Sinembargo, Yehova a sostene mi durante e periodonan ei di desanimacion. Mi a haci investigacion den e Index di Publicacionnan Watch Tower, y a busca relatonan di bida di pioneronan cu mescos cu mi tawatin problema cu bista. Mi a keda sorprendi cu tawatin asina tanto! E relatonan practico y alentador aki a siña mi aprecia loke mi por a haci y acepta mi limitacionnan.

Pa percura pa mi necesidadnan, mi a haci trabou di limpiesa na centronan comercial hunto cu otro Testigo. Un dia mi a ripara cu mi coleganan tawata bolbe limpia e areanan caminda mi a caba di limpia. Tawata bisto cu mi tawata laga hopi parti keda sushi. Mi a bai papia cu Valérie, kende tawata e pionero na encargo di nos team di limpiesa. Mi a pidie pa ta franco cu mi y bisa mi si mi tawata haci e trabou mas dificil pa e otronan. Bondadosamente el a laga na mi pa dicidi ki ora mi a sinti cu mi no por a haci e trabou mas. Na maart 1994, mi a stop cu mi trabou di limpiesa.

Un biaha mas, mi a sinti mi aplasta pa e sintimento di no ta sirbi pa nada. Mi a haci oracion ferviente na Yehova, y mi sa cu el a scucha mi peticionnan. Un biaha mas, studia Bijbel y publicacionnan cristian tawata un gran yudansa. Asina mes, mientras cu mi bista  tawata bira mas suak, mi deseo pa sirbi Yehova tawata bira mas fuerte. Kico mi por a haci?

Prome un Lista di Espera, Despues un Decision Rapido

Mi a inscribi pa haya entrenamento na e Centro di Rehabilitacion pa Hende Ciego y pa Esnan cu Incapasidad Visual na e stad Nîmes y cu tempo mi a haya chens di bai pa tres luna. E tempo cu mi a pasa einan tawata bale la pena. Mi a bin compronde e grado di mi incapasidad y a siña adapta mi na dje. Door di asocia cu hende cu tawata sufri di tur tipo di enfermedad mi a bin realisa con precioso mi speransa cristian ta. Ami por lo menos tawatin un meta y mi por a haci algo productivo. Ademas, mi a siña lesa Braille Frances.

Ora mi a bolbe cas, mi famia por a mira cuanto e entrenamento a yuda mi. Pero un cos si cu mi no tawata gusta tawata e baston blanco cu mi tawatin cu uza pa cana cu ne. Mi tawatin problema pa acepta cu mi mester a uza e “palo” ei. Mare mi por tawatin un otro yudansa, podise un cacho pa guia hende ciego.

Mi a yena un peticion pa un cacho pero nan a bisa mi cu tawatin un lista largo di espera. Ademas, e agencia lo mester a tene un investigacion. Nan no ta duna ken cu ta un cacho asina. Un dia un señora cu ta yuda dirigi un asociacion pa hende ciego a bisa mi cu un club di tennis local ta bai haci donacion di un cacho di guia na un persona ciego of parcialmente ciego cu ta biba den nos area. E señora di cu el a pensa riba mi. El a puntra mi si lo mi acepta e cacho. Mi por a mira Yehova su man den e asunto y a acepta e oferta bondadoso ei. Sinembargo, mi tawatin cu warda pa haya e cacho.

Pensando Keto Bai Riba Africa

Mientras mi tawata warda, mi a dirigi mi atencion den un otro direccion. Manera mi a  menciona anteriormente, for di mucha mi tawata hopi interesa den Africa. Apesar cu mi bista tawata bai atras, mi interes tawata mas fuerte cu nunca, specialmente ora mi a haya sa cu tin asina hopi hende na Africa interesa den Bijbel y den sirbi Yehova. Algun tempo prome, mi a bisa Valérie ariba ariba cu lo mi tin gana di bai bishita Africa y mi a puntr’e si lo e tin gana di compaña mi. El a bai di acuerdo, y nos a skirbi varios sucursal di abla Frances di Testigonan di Yehova na Africa.

Nos a haya un contesta di Togo. Emociona, mi a pidi Valérie lesa e carta pa mi. E carta tawata asina alentador, cu Valérie di: “Wel, dicon nos no ta ban?” Despues di a coresponde cu e rumannan na sucursal, nan a bisa mi pa tuma contacto cu Sandra, un pionero na Lomé, e ciudad capital. Nos a fiha nos fecha di partida dia 1 di december 1998.

Ki un contraste grandi, pero tambe ki un placer! Despues di a aterisa na Lomé, nos a sali for di avion y a sinti con e aire cayente Africano a tapa nos manera un clechi. Sandra a bin topa nos. Nunca prome nos no a mira otro, pero mesora nos a sinti manera nos tawata amiganan di hopi tempo. Poco despues di nos yegada, Sandra cu su partner, Christine, a wordo nombra como pionero special na Tabligbo, un pueblo chikito den interior di e pais. Awor nos tawatin e privilegio di compaña nan na nan asignacion nobo. Nos a keda rond di dos luna, y ora nos a bai, mi tawata sa cu lo mi bolbe.

Ta un Placer pa Regresa Togo

Unabes bek na Francia, mi a cuminsa prepara mesora pa mi di dos biahe pa Togo. Cu sosten di mi famia, mi a logra haci areglo pa keda seis luna. Pues na september 1999, mi tawata un biaha mas den avion rumbo pa Togo. Sinembargo, e biaha aki mi tawata mi so. Imagina bo con mi famia a sinti ora nan a mira mi bai riba mi mes apesar di mi incapasidad! Pero nan no tawatin nodi precupa. Mi a sigura mi mayornan cu mi amiganan, cu ya caba tawata pa mi manera mi famia, lo tawata warda mi na Lomé.

Tawata un gran placer di ta bek den un teritorio caminda asina tanto hende ta mustra interes den Bijbel! No ta straño pa mira hende lesa Bijbel riba caya. Na Tabligbo hende ta yama bo pa bin serca nan djis pa combersa tocante Bijbel. Anto ki un privilegio e tawata di por comparti alohamento modesto cu dos ruman mohe pionero special! Mi a siña conoce un otro cultura, un otro manera di mira cos. Principalmente mi a ripara cu nos rumannan cristian na Africa ta pone nan sirbishi na Dios na prome luga den nan bida. Por ehempel, e echo cu nan tin cu cana hopi kilometer pa yega Salon di Reino no ta stroba nan di asisti na reunion. Tambe mi a siña hopi les for di nan calor di amistad y hospitalidad.

Un dia cu nos tawata bayendo cas despues di sirbishi di veld, mi a conta Sandra den priva cu mi tin miedo di regresa Francia. Mi bista a bira piyo. Mi tawata pensa riba e cayanan  di Béziers yen di bochincha y di hende, e trapinan den edificionan di apartamento y tantisimo otro cos cu ta haci bida dificil pa un persona cu no ta wak bon. Na contraste, e cayanan na Tabligbo, aunke nan no ta asfalta, tawata keto; nan no tawatin cantidad grandi di hende ni hopi trafico. Con lo a bai cu mi na Francia awor cu mi a custumbra cu Tabligbo?

Dos dia despues mi mama a bel mi pa laga mi sa cu e scol di cacho di guia tawata spera mi. Nan tawatin un cacho jong di rasa Labrador retriever cu yama Océane cla pa bira mi “wowonan.” Un biaha mas, mi necesidadnan a ser atendi y mi ansiedadnan a ser elimina. Despues di seis luna di sirbishi felis na Tabligbo, mi tawata rumbo pa Francia pa sera conoci cu Océane.

Despues di varios luna di entrenamento, Océane a wordo confia na mi cuido. Na principio no tawata facil. Nos tawatin cu siña compronde otro. Pero pocopoco mi a bin realisa cuanto mi tawatin mester di Océane. En realidad, Océane ta awor un parti di mi. Con hende na Béziers tawata reacciona ora nan a mira mi yega na nan porta cu un cacho? Mi a topa cu hopi respet y bondad. Océane a bira e “heroe” di e bicindario. Siendo cu hopi hende ta sinti nan incomodo den presencia di un persona cu incapasidad, door di tin e cacho mi por a papia di mi malesa den un manera natural. Hende a relaha y scucha mi. Si, Océane a bira e mihor topico cu tawatin pa start combersacion.

Na Africa Hunto cu Océane

Mi no a lubida Africa, y awor mi a cuminsa haci preparacion pa mi di tres biahe. E biaha aki, Océane a bai cu mi. Tambe mi a ser acompaña pa un pareha hoben, Anthony y Aurore, y mi amiga Caroline; nan tur tawata pionero mescos cu mi. Dia 10 di september 2000, nos a yega Lomé.

Na principio, hopi hende tawatin miedo di Océane. Masha poco hende na Lomé a yega di mira un cacho grandi asina, ya cu mayoria cacho na Togo ta chikito. Ora nan a mira su harnas, algun hende a pensa cu lo e tawata un bestia feros y ta pesei mester ten’e mara. Océane di su parti, a adopta un actitud defensivo, cla pa proteha mi contra cualkier cos cu el a sinti como un menasa. Pero toch, no a tarda hopi cu Océane a sinti su mes na cas den e ambiente nobo. Ora e tin su harnas bisti, e ta na trabou, esta, e ta disiplina, responsabel y ta keda na mi lado. Ora mi los e, e ta cla pa hunga, y tin biaha ta haci cos di mala mucha. Nos ta pasa masha pret hunto.

Nos tur a haya e invitacion pa keda serca Sandra cu Christine na Tabligbo. Pa yuda e rumannan local custumbra cu Océane, nos a invita nan pa bishita nos y a splica nan e papel di un cacho di guia hende ciego, dicon mi tawatin mester di uno y con nan mester actua rond di dje. E ancianonan a bai di acuerdo cu Océane mester bin Salon di Reino hunto cu mi. Como cu e areglo aki tawata inusual na Togo, nan a haci un anuncio na e congregacion pa splica e asunto. Pa loke ta sirbishi di veld, Océane tawata compaña mi solamente ora cu mi tawata bai haci rebishita y conduci estudio di Bijbel, situacionnan caminda tawata mas facil pa hende compronde su presencia.

Predicacion den e teritorio aki ta sigui ta un placer. Loke semper a conmove mi tawata e consideracion cu e hendenan suave aki tawata demostra cu nan accionnan bondadoso. Por ehempel, semper nan ta ansioso pa trece un stul pa mi sinta. Na october 2001, mi mama a bin hunto cu mi riba mi di cuater biahe pa Togo. Despues di tres siman el a regresa Francia, felis y trankilisa cu mi ta bon.

Mi ta masha gradicido na Yehova cu mi por a sirbi na Togo. Mi tin e confiansa cu Yehova lo sigui duna mi ‘e deseonan di mi curason’ segun cu mi ta sigui uza tur loke mi tin den su sirbishi. *

[Nota]

[Plachi na pagina 10]

Semper mi a haya emocionante pa pensa riba Africa su sabananan extenso y bestianan fasinante den naturalesa

[Plachi na pagina 10]

Océane tawata compaña mi bai rebishita

[Plachi na pagina 11]

E ancianonan a bai di acuerdo pa mi bin reunion cu Océane