Nan Ta Comparti Bon Noticia cu Hende Sordo

“NAN ta trece norma- y balornan spiritual pa bo!” Asina director di un cas pa anciano na Navalcarnero (Madrid, Spaña) a describi resientemente e bishitanan di Testigonan di Yehova na su centro. Kico a motiv’e pa bisa esei?

Varios habitante di e centro Rosas del Camino ta sordo. Sinembargo, como cu e Testigonan a haci e esfuerso pa siña Idioma di Seña Spaño, nan por comunica cu e habitantenan aki. E director a elogia e Testigonan pasobra gratuitamente nan ta ofrece nan tempo pa siña norma- y balornan spiritual na personanan cu necesidad special. El a observa e bon efecto cu siñamento di e bon noticia di Reino tawatin riba e habitantenan. Anto e habitantenan—specialmente esnan cu incapasidad di oido of di bista—tambe ta aprecia e bishitanan di e Testigonan masha hopi.

Eulogio, un di e habitantenan cu ta ciego y sordo, ta studiando Bijbel cu e Testigonan di Yehova. Un dia cu nan tawata bezig ta studia, un homber di edad a acerca e Testigo y a ofrec’e un poesia cu e habitantenan a compone como muestra di nan gratitud. E poesia tawata titula “Pa Ser un Testigo.” En parti el a bisa: “Nan ta hiba un bida recto y disiplina, y di Yehova nan ta haya sabiduria gososo. Nan ta bai y bin na e casnan pasobra nan ta confia den Yehova.”

Ta net e confiansa aki den Yehova a pone hopi Testigo rond mundo siña e idioma di seña cu hende sordo den nan pais ta uza. Di e manera aki nan por comparti cu e sordonan ei e mensahe alentador di speransa cu tin den Bijbel.