Pregunta di Lector

Un cristian por keda cu un bon consenshi si e acepta un empleo cu ta encera cu e mester carga arma?

Testigonan di Yehova rond mundo ta tuma na serio e responsabilidad cu Dios a duna nan di percura materialmente pa nan famia. (1 Timoteo 5:8) Sinembargo, cierto tipo di empleo claramente ta viola principionan biblico y mester ser evita. Esakinan ta encera empleo conecta cu gamblemento, maluzo di sanger of cu ta promove productonan di tabaco. (Isaias 65:11; Echonan 15:29; 2 Corintionan 7:1; Colosensenan 3:5) Otro tipo di trabou, aunke Bijbel no ta condena nan directamente, lo por viola un persona su consenshi of e consenshi di otro hende.

Acepta un trabou cu ta rekeri pa bo carga un arma di candela of cualkier otro arma ta un decision personal. Sinembargo, e tipo di empleonan ei ta expone bo na e posibilidad di bira culpabel di sanger si situacion presenta cu bo tin cu uza bo arma. Pues, un cristian tin cu pensa bon y haci oracion tocante e asunto pa wak si e ta dispuesto pa acepta e peso di mester tuma un decision rapido den cua bida di hende ta envolvi. Tambe cargamento di arma ta expone un persona na e peliger di ser herida of mata durante un atake of como represaya.

Bo decision lo por afecta otro hende tambe. Por ehempel, un cristian su responsabilidad principal ta di predica e bon nobo di e Reino di Dios. (Mateo 24:14) Ta posibel pa siña otronan pa ta “na pas cu tur hende”, mientras cu na mesun tempo bo ta gana bo pan door di carga arma? (Romanonan 12:18) Kico di bo yiunan of otro miembronan di famia? E echo cu tin un arma di candela den cas lo por pone nan bida na peliger? Ademas, ta posibel cu otro hende ta trompica door di e posicion cu abo a tuma relaciona cu e asunto?—Romanonan 14:21.

Den e “ultimo dianan” aki, mas y mas hende ta feros of “grosero, odiado di loke ta bon.” (2 Timoteo 3:1, 3) Acaso un persona sabiendo esaki lo por keda liber di acusacion of “sin reproche” si e mester scohe un empleo di carga arma cu lo por trec’e den conflicto cu e tipo di hendenan ei? (1 Timoteo 3:10) Sigur cu no. Pa e motibo aki, e congregacion lo no considera e persona ei como “sin reproche” si e sigui carga arma despues cu bondadosamente a dun’e conseho biblico. (1 Timoteo 3:2; Tito 1:5, 6) Pues, tal hende homber of mohe lo no bin na remarca pa ningun privilegio special den e congregacion.

Hesus a sigura su disipelnan cu si nan pone interesnan di Reino na prome luga den nan bida, nan no tin nodi ta demasiado precupa tocante con pa haya e necesidadnan di bida. (Mateo 6:25, 33) En berdad, si nos pone nos pleno confiansa den Yehova, “e lo sostene [nos]; nunca e lo no permiti pa e husto wordo movi.”—Salmo 55:22.