Tin un Persona Cu di Berdad Por Cambia Mundo?

“Hende pober ta bisa nos cu, na prome luga, nan kier pas y siguridad—y na di dos luga, oportunidad pa bai dilanti den bida. Nan tin gana di mira un politica nacional y internacional husto cu no ta permiti e podernan dominante di paisnan rico ni companianan rico frustra nan esfuersonan.”

ASINA e director di un organisacion di yudansa internacional a describi e speransa- y aspiracionnan di hende pober. De echo, su palabranan lo por ta un bon descripcion di loke tur victima di e tragedia- y inhusticianan di e mundo aki ta desea. Nan tur ta anhela un mundo di berdadero pas y siguridad. E mundo ei lo bira realidad algun dia? Tin un persona cu di berdad tin e poder y tambe e habilidad pa cambia loke ta basicamente un mundo inhusto?

 Esfuersonan pa Trece Cambio

Hopi ta esnan cu a purba. Por ehempel, Florence Nightingale, un señora Britanico di siglo 19, a dedica su bida na e causa di percura un cuido limpi y compasivo pa hende enfermo. Den su tempo—prome cu tawatin productonan antiseptico y antibiotica—cuido den hospital no tawata loke nos lo spera awe. Segun un buki, “nursenan no tawata hende educa ni higienico; y nan tawata notorio pa nan buracheria y inmoralidad.” Florence Nightingale tawatin exito den su esfuersonan pa trece cambio den e mundo di enfermeria? Si, definitivamente. Mescos tambe, hopi otro hende, motiva pa nan amor y bondad, tawatin exito riba varios tereno, manera den area di alfabetisacion, educacion, medicina, vivienda, alimentacion, djis pa menciona algun. Como resultado, cambionan significativo a tuma luga den e calidad di bida di miyones di hende menos pudiente.

Toch nos no por ignora e realidad cruel aki, esta cu ainda cientos di miyones di hende ta sufriendo e consecuencianan di guera, crimen, enfermedad, hamber y otro calamidadnan. Segun e organisacion Irlandes di yudansa Concern, “tur dia 30.000 hende ta muri di pobresa.” Asta sclabitud, e causa di asina tanto reforma den transcurso di siglonan, ta existi ainda. “Awe tin mas esclabo na bida cu tur e hendenan horta for di Africa den e tempo di e negoshi transatlantico di sclabitud”, segun Disposable People—New Slavery in the Global Economy.

Kico a stroba e esfuersonan di hende pa trece cambio completo y duradero? Esei ta simplemente e forsa dominante di hende rico y di esnan cu tin poder, of tin mas cos tras di e asunto aki?

Loke Ta Obstaculisa Cambio

Segun e Palabra di Dios, e obstaculo di mas grandi cu ta stroba cualkier esfuerso humano pa produci un mundo berdaderamente husto ta Satanas e Diabel. Apostel Huan ta bisa nos cu “henter mundo ta bou di control di e malbado.” (1 Huan 5:19) Echo ta cu aworaki mes Satanas ta ‘gañando henter mundo.’ (Revelacion 12:9) Mientras cu no elimina su influencia malbado, keto bai lo tin victima di maldad y inhusticia. Kico a causa e situacion lamentabel aki?

Nos prome mayornan, Adam cu Eva, a haya un tera cu tawata diseña pa ta un paradijs, un hogar perfecto pa henter e famia humano—un mundo cu tawata “masha bon.” (Genesis 1:31) Ken a trece cambio den esaki? Esei tawata Satanas. El a cuestiona e derecho di Dios pa establece regla cu homber y mohe mester a tene nan mes na dje. El a insinua cu Dios su manera di goberna tawata inhusto. El a tenta Adam cu Eva pa scohe e caminda di independencia pa nan mes por a dicidi kico ta bon y kico ta malo. (Genesis 3:1-6) Esaki a resulta den e di dos obstaculo contra esfuerso humano pa produci un mundo husto: pica y imperfeccion.—Romanonan 5:12.

 Pakico Dios A Permitie?

Algun hende lo puntra: ‘Pero pakico Dios a laga pica y imperfeccion desaroya? Pakico e no a uza su poder sin limite pa elimina e rebeldenan y cuminsa di nobo?’ Esei ta zona masha simpel. Pero uzo di poder ta lanta pregunta serio. Acaso no ta mal uzo di poder ta un di e causanan principal di sufrimento di hende pober y oprimi aki na mundo? Ora un dictado uza poder pa elimina ken cu no ta di acuerdo cu su politica, esei no ta lanta pregunta den mente di hende di curason recto?

Pa garantisa hende di curason honrado cu E no ta manera un dictado cu ta haci maluzo di su poder, Dios a laga Satanas y hende rebelde actua independientemente di su lei- y principionan—solamente pa un periodo di tempo limita. Tempo lo a demostra cu Dios su manera di goberna ta e unico manera corecto, y cu cualkier restriccion cu e pone riba nos ta pa nos mes bon. De echo, e resultadonan tragico di rebelion contra e gobernacion di Dios a demostra esei caba. Y esakinan a demostra cu Dios tin tur rason pa na su debido tempo uza su gran poder pa elimina maldad completamente. Esei lo ta masha pronto.—Genesis 18:23-32; Deuteronomio 32:4; Salmo 37:9, 10, 38.

Mientrastanto, nos ta atrapa den un mundo inhusto, ‘kehando y sufriendo e dolornan hunto.’ (Romanonan 8:22) Maske kico nos haci pa trece cambio, nos no por caba cu Satanas, ni elimina e imperfeccion basico cu ta causando tur e sufrimento cu nos ta pasando aden. Simplemente, riba nos mes nos no por kita e efectonan di pica hereda for di Adam.—Salmo 49:7-9.

Hesucristo Lo Trece Cambio Duradero

Esaki ta nifica cu nos ta den un situacion sin speransa? Claro cu no. Un persona mucho mas poderoso cu simpel hende mortal a haya e encargo pa trece un cambio permanente. Ken e ta? Esei ta Hesucristo. Bijbel ta describie como Dios su Prins y Salbador di e famia humano.—Echonan 5:31.

Actualmente e ta wardando riba Dios su “tempo” stipula pa e actua. (Revelacion 11:18) Kico exactamente lo e haci? Lo e realisa e “restauracion di tur cos, di cua Dios a papia pa medio di boca di su profetanan santo for di antiguedad.” (Echonan 3:21) Por ehempel, Hesus lo “libra esun den necesidad ora cu e sclama pa yudansa, esun afligi tambe y esun cu no tin ningun hende pa yud’e ... E lo rescata nan bida for di opresion y violencia.” (Salmo 72:12-16) Pa medio di Hesucristo, Dios ta priminti di “haci gueranan stop te na e fin di tera.” (Salmo 46:9) Un otro promesa di dje ta cu “ningun habitante [di su tera haci limpi] lo no bisa: ‘Mi ta malo.’” Hende ciego, sordo, coho—tur cu ta sufri di enfermedad—lo haya un salud perfecto. (Isaias 33:24; 35:5, 6; Revelacion 21:3, 4) Asta hende cu a muri den pasado lo beneficia. E ta priminti di trece bek na bida e victimanan di inhusticia y opresion.—Huan 5:28, 29.

E cambio cu Hesucristo lo trece no ta uno parcial of temporal. Lo e elimina tur obstaculo pa un mundo berdaderamente husto. Lo e elimina pica y imperfeccion y destrui Satanas e Diabel y tur esnan cu ta siguie den su caminda di rebeldia. (Revelacion 19:19, 20; 20:1-3, 10) E sufrimento cu Dios a permiti pa un tempo limita “lo no lanta [un di] dos biaha.” (Nahum 1:9) Ta esei Hesus tawatin na mente ora el a siña nos pidi pa e Reino di Dios bini y pa e boluntad di Dios tuma luga “na tera mescos cu den shelo.”—Mateo 6:10.

Podise bo ta bisa, ‘pero Hesus mes no a bisa cu “semper nos lo tin e pobernan serca nos”? Esei no ta nifica cu semper lo tin inhusticia y pobresa?’ (Mateo 26:11) Si, ta berdad cu Hesus a bisa cu semper lo tin hende pober. Ma e contexto di su palabranan hunto cu e promesanan di e Palabra di Dios ta mustra cu aki e tawata kiermen cu tanten cu e sistema di cosnan aki ta existi, semper lo tin hende  pober. E tawata sa cu ningun hende lo no por elimina pobresa ni inhusticia for di mundo. E tawata sa tambe cu ta e mes lo bin trece cambio den tur esei. Pronto lo e trece un sistema di cosnan completamente nobo—“shelonan nobo y un tera nobo” den cua dolor, enfermedad, pobresa y morto lo no existi mas.—2 Pedro 3:13; Revelacion 21:1.

“No Laga di Haci Bon”

Esaki ta nifica cu no tin sentido pa haci tur loke nos por pa yuda otro hende? Di ningun manera. Bijbel ta anima nos pa yuda otro personanan ora nan ta pasa den prueba- y circunstancianan dificil. Rei Salomon di antiguedad a skirbi: “No laga di haci bon na esnan cu merece esaki, si ta den bo poder pa hacie.” (Proverbionan 3:27) Apostel Pablo a urgi: “No laga di haci bon y di comparti cu otro.”—Hebreonan 13:16.

Hesucristo mes a anima nos pa haci tur loke ta na nos alcanse pa yuda otro hende. El a conta e ilustracion di un Samaritano cu a topa un homber cu a ser maltrata y horta. Hesus a bisa cu e homber Samaritano a “sinti compasion” p’e, y door di esei el a uza su mes recursonan pa mara e heridanan di e homber maltrata y yud’e pa e recupera. (Lucas 10:29-37) E Samaritano compasivo ei no a cambia mundo, pero el a haci un gran diferencia den bida di un otro hende, locual nos tambe por haci.

Sinembargo, Hesucristo por haci mas cu djis yuda algun hende. E por trece un berdadero cambio, y lo e haci esei masha pronto. Ora yega asina leu, e victimanan di e condicionnan inhusto djawe lo por mehora nan bida y disfruta di berdadero pas y siguridad.—Salmo 4:8; 37:10, 11.

Mientras cu nos ta spera pa esei tuma luga, laga nos nunca basila pa haci tur loke nos por den sentido spiritual y material pa “haci bon” na tur hende cu ta victima di un mundo inhusto.—Galationan 6:10.

[Plachi na pagina 5]

Florence Nightingale a trece berdadero cambionan den e mundo di enfermeria

[Reconocemento]

Pa cortesia di National Library of Medicine

[Plachi na pagina 7]

Siguidonan di Cristo ta haci bon pa otro hende

[Plachi na pagina 4]

The Star, Johannesburg, S.A.