Un Mundo Inhusto

KEN por nenga cu nos ta bibando den un mundo inhusto? Echo ta cu maske cuanto talento nos tin y maske con sabi nos plania nos bida, nos no tin ningun garantia cu nos lo haya prosperidad, exito of cuminda. Hopi bes ta sosode manera Salomon, e rei sabi di antiguedad, a bisa: “Pan no ta pa hende sabi, rikesa no ta pa hende inteligente, y exito no ta pa hende habil.” Con bin? Pasobra, manera Salomon a agrega, “tur hende ta depende di tempo y casualidad.”—Eclesiastes 9:11, The New English Bible.

‘Ora Tempo Malo Bini Diripiente’

Si, “tempo y casualidad”—locual hopi bes ta nifica cu bo ta na e luga robes na e momento robes—hopi biaha ta frustra nos plannan bon prepara y e mihor expectativanan. Segun Salomon, ‘ora tempo malo bini diripiente’, nos ta ‘manera pisca gara den reda, y parha gara den trampa.’ (Eclesiastes 9:12, NE) Por ehempel, miyones di hende ta traha incansablemente pa cultiva nan tereno pa haya cuminda pa nan famia. Pero diripiente nan ta haya nan den “un tempo malo” ora awasero no cai y secura caba cu tur loke nan a planta.

Otronan ta purba yuda, pero hopi bes asta e yudansa cu e resto di mundo ta duna pa victimanan di “un tempo malo” ta parce inhusto. Por ehempel, den e lucha contra scarsedad di cuminda, den un aña resien, “henter e continente [di Africa] a ricibi na yudansa un suma cu ta igual na un kinta parti so di e placa cu a ser destina pa e guera di Golfo”, segun un organisacion principal di yudansa. Tawata husto cu e paisnan cu tin e recursonan a gasta cinco biaha mas tanto placa pa bringa un guera den un pais na comparacion cu loke nan a gasta pa alivia e dolor y sufrimento causa pa scarsedad di cuminda den henter un continente? Y ta husto cu den un tempo caminda hopi hende tin prosperidad material, 1 di cada 4 habitante di tera ainda ta biba den miseria completo, of cu miyones di mucha ta muri tur aña di enfermedadnan cu por wordo preveni? Claro cu no!

Claro cu ‘ora tempo malo bini diripiente’, esei no ta debi na solamente “tempo y casualidad.” Actonan di violencia completamente fuera di nos control tambe ta domina nos bida  y pone nos pasa den cierto cosnan. Esei ta loke a sosode na Beslan, Alania, den e herfst di 2004, ora cientos di hende, di cua hopi mucha chikito riba nan prome dia di scol, a perde nan bida den un conflicto violento entre teroristanan y forsanan di siguridad. Ken exactamente a muri y ken a sobrevivi e tragedia ei tawata un asunto di puro casualidad. Pero e causa fundamental di e “tempo malo” ei tawata conflicto humano.

Semper Lo Ta Asina?

Ora algun hende ta papia di inhusticia, nan ta bisa: “Pero ta asina bida ta. Semper tawata asina, y semper lo keda asina tambe.” Segun nan, semper esnan fuerte lo oprimi e debilnan, y semper e riconan lo abusa di e pobernan. Nan ta bisa cu esei, combina cu “tempo y casualidad”, lo sigui afecta nos tanten cu e famia humano ta existi.

Pero ta asina cosnan mester ta realmente? Lo yega e dia cu esnan cu ta uza nan habilidadnan di un manera inteligente y sabi lo por haya un recompensa husto pa tur nan trabou duro? Tin un persona cu por haci algo pa trece un cambio permanente y duradero na un mundo inhusto? Wak kico e siguiente articulo ta bisa encuanto e tema aki.

 [Reconocemento pa Potret na pagina 2]

COVER: Homber cu un mucha: UN PHOTO 148426/McCurry/Stockbower

[Reconocemento pa Potret na pagina 3]

MAXIM MARMUR/AFP/Getty Images