Yehova Ta Nos Wardador

“SEÑOR ta mi wardado, lo mi no tin falta di nada.” —SALMO 23:1.

1-3. Dicon no ta un sorpresa cu David a compara Yehova cu un wardado di carne?

SI UN hende pidi bo describi e manera cu Yehova ta percura pa su pueblo, con lo bo a hacie? Cu kico lo bo compara e cuido tierno cu e ta duna su fiel sirbidonan? Mas cu 3.000 aña pasa, rei David a skirbi den un salmo un bunita descripcion di Yehova, uzando un comparacion basa riba e ocupacion cu David tawatin den su hubentud.

² Como hoben, David tawata un wardado di carne, pues e tawatin conocemento di cuidamento di carne. E tawata sa cu si laga carne pa nan cuenta, facilmente nan lo a dual y bira victima di ladron of bestia salbahe. (1 Samuel 17:34-36) Sin un wardado cu ta cla pa cuida nan, nan lo no por haya luganan caminda tin suficiente yerba pa nan come. Mas despues den su bida, David sin duda tawatin grato recuerdo di e tantisimo oranan cu el a pasa ta guia, proteha y alimenta carne.

³ No ta un sorpresa anto cu David a corda riba e trabou di un wardado di carne ora el a ser inspira pa describi e cuido cu Yehova ta demostra na su pueblo. Salmo 23, skirbi door di David, ta cuminsa cu e palabranan: “[Yehova] ta mi Wardador, lo mi no tin falta di nada.” Laga nos considera dicon e declaracion aki ta na su luga. Anto caba, cu yudansa di Salmo 23 nos lo mira den ki maneranan Yehova ta cuida su adoradonan mescos cu un wardado ta cuida su carnenan.—1 Pedro 2:25.

Un Comparacion Apropiado

4, 5. Con Bijbel ta describi e caracteristicanan di carne?

⁴ Yehova tin hopi titulo den e Scritura, pero esun di “Wardador” ta un di esnan cu ta transmiti mas ternura. (Salmo 80:1) Pa nos por compronde mihor dicon ta na su luga cu Bijbel ta yama Yehova un Wardador, ta util pa nos sa dos cos: di prome, e caracteristicanan di carne y di dos, e debernan y cualidadnan di un bon wardado.

⁵ Hopi bes Bijbel ta referi indirectamente na e caracteristicanan di carne door di describi cu nan ta cla pa reacciona riba e cariño di un wardado (2 Samuel 12:3), cu nan no ta agresivo (Isaias 53:7) y cu nan ta indefenso. (Mikeas 5:8) Un escritor cu a cria carne pa varios aña a comenta: “Carne no ta ‘djis percura  pa nan mes’ manera algun hende kisas ta kere. Mas cu cualkier otro sorto di bestia di cria, nan ta rekeri atencion continuo y cuido minusioso.” Pa sobrevivi, e criaturanan indefenso aki tin mester di un wardado cu ta cla pa cuida nan.—Ezekiel 34:5.

6. Con un diccionario biblico ta describi un dia normal den bida di un wardado di carne di antiguedad?

⁶ Con un dia normal pa e wardado di carne di antiguedad tawata? Un diccionario biblico ta splica: “Mainta tempran el a saca e tou for di cura, canando na cabes di e tou y a hiba nan caminda nan lo mester come yerba. Einan el a vigila nan henter dia, haciendo sigur cu ningun carne a dual, y si un temporalmente a perde for di su bista y a cana bai for di e resto di e tou, el a busc’e diligentemente te ora el a hay’e y trec’e bek ... Anochi el a trece e tou bek den cura, y a conta nan segun cu nan tawata pasa bou di e bara na e porta pa e haci sigur cu no tawata falta ningun ... Hopi bes e tawatin cu proteha e cura durante anochi contra di e atakenan di bestia salbahe, of di e intentonan tramposo di ladronnan cu a sluip rond.” *

7. Dicon un wardado tin biaha mester a mustra extra pasenshi y ternura?

⁷ Tawatin ocasionnan cu carne, specialmente e embranan na estado y e lamchinan, a rekeri extra pasenshi y ternura. (Genesis 33:13) Un buki di consulta biblico ta declara: “Hopi bes nacemento di yiu den un tou a tuma luga leu aya na bahada di sero. E wardado atentamente ta proteha e mama durante su momentonan indefenso y ta hisa e lamchi y hib’e den cura. Durante un par di dia, te ora cu e lamchi por cana, kisas e ta carg’e den su brasa of den e plooinan di su mantel.” (Isaias 40:10, 11) Ta bisto anto cu un bon wardado mester tawatin un combinacion di forsa y ternura.

8. Menciona e tres motibonan cu David a cita pa su confiansa den Yehova.

⁸ ‘Yehova ta mi Wardador.’ Acaso esei no ta un bon descripcion di nos Tata celestial? Segun cu nos ta analisa Salmo 23, nos lo mira con Dios ta cuida nos cu e forsa y ternura di un wardado di carne. Den versiculo 1, David a expresa su confiansa cu Dios lo haci tur e areglonan necesario pa Su carnenan, di manera cu nan lo no tin “falta di nada.” Den e versiculonan cu ta sigui, David a cita tres motibo pa e confiansa aki: Yehova ta guia, proteha y alimenta Su carnenan. Laga nos trata e motibonan aki un pa un.

“E Ta Guia Mi”

9. Ki esena pacifico David a describi, y con carne lo a haya nan mes den un ambiente asina?

⁹ Na prome luga,Yehova ta guia su pueblo. David a skirbi: “E ta pone mi drumi den luganan di yerba berde; e ta hiba mi canto di awanan keto. E ta restaura mi alma; e ta guia mi den e camindanan di husticia pa motibo di su nomber.” (Salmo 23:2, 3) Un tou drumi abou den trankilidad meimei di abundancia. Cu e palabranan aki David a describi un esena di carnenan satisfecho, refresca y den siguridad. E palabra Hebreo traduci “luganan di yerba berde” por nifica “luga agradabel.” E carnenan riba nan mes probablemente lo no a haya un luga refrescante pa cai drumi na pas. Ta nan wardado tin cu guia nan na un “luga agradabel” asina.

10. Con Dios ta demostra su confiansa den nos?

¹⁰ Con Yehova ta guia nos awe? Un manera cu e ta haci esei ta pa medio di su ehempel. Su Palabra ta urgi nos pa bira “imitadonan di Dios.” (Efesionan 5:1) E contexto di e palabranan ei ta menciona cariño, pordon y amor. (Efesionan 4:32; 5:2) Un cos ta sigur, Yehova ta pone e mihor ehempel den desplega e cualidadnan atractivo ei. Acaso ta irealista di su parti pa pidi nos imit’e? No. En realidad, e conseho inspira ei ta un expresion maraviyoso di su confiansa den nos. Con asina? Nos ta  traha den Dios su imagen, locual ta nifica cu nos ta crea cu cualidadnan moral y e capasidad pa compronde cosnan spiritual. (Genesis 1:26) Pues, Yehova sa cu apesar di nos imperfeccionnan, nos tin den nos e potencial pa cultiva e mesun cualidadnan cu e mes ta desplega como un ehempel. Djis pensa, nos Dios amoroso tin e confiansa cu nos por ta mescos cu ne. Si nos sigui su ehempel, lo e guia nos, na moda di papia, na un “luga agradabel.” Meimei di e mundo violento aki, nos lo “biba den siguridad” y experencia e pas cu ta bin door cu nos sa cu nos tin Dios su aprobacion.—Salmo 4:8; 29:11.

11. Segun cu Yehova ta guia su carnenan, kico e ta tene cuenta cu ne, y con esaki ta wordo refleha den loke e ta pidi di nos?

¹¹ Segun cu Yehova ta guia nos, e ta desplega ternura y pasenshi. Un wardado ta tene cuenta cu e limitacionnan di su carnenan, pesei e ta guia nan segun nan ritmo, “segun e bestianan por.” (Genesis 33:14, BPK) Yehova di igual manera ta guia su carnenan ‘segun cu nan por.’ E ta tene cuenta cu nos habilidad- y circunstancianan. De echo, e ta ahusta e ritmo, y nunca ta pidi mas di loke nos por duna. Loke si e ta pidi ta pa nos duna di henter nos alma. (Colosensenan 3:23) Pero kico si bo ta un hende di edad y no por haci loke bo tawatin custumber di haci? Of kico si bo tin un malesa grave cu ta limita locual bo por haci? Ta specialmente den e circunstancianan ei cu e rekisito pa duna di henter bo alma ta masha bunita. No tin dos hende precis mescos. Sirbi di henter nos alma ta nifica uza tur bo forsa y energia den Dios su sirbishi te na e grado mas completo cu ta posibel pa abo. Apesar di e debilidadnan cu kisas ta afecta nos ritmo, Yehova ta duna balor na nos adoracion di henter nos curason.—Marco 12:29, 30.

12. Ki ehempel for di e Lei di Moises ta ilustra con Yehova ta guia su carnenan ‘segun cu nan por’?

¹² Pa ilustra con Yehova ta guia su carnenan ‘segun cu nan por’, wak kico e Lei di Moises a bisa tocante cierto ofrendanan pa culpa. Yehova tawata kier ofrendanan excelente, motiva pa curasonnan gradicido. Na mesun tempo, e ofrendanan a ser clasifica segun e capasidad di e persona cu a ofrece nan. E Lei a bisa: “Si e no por duna un lamchi, e ora ei e mester hiba ... dos tortelduif of dos pichon.” Y kico si e no por a afford ni sikiera dos pichon? E ora ei lo e por a trece poco “hariña fini.” (Levitico 5:7, 11) Esaki ta mustra cu Dios no a exigi di e persona cu a haci e ofrenda algo cu tawata fuera di su alcanse. Siendo cu Dios no ta cambia, ta un consuelo pa sa cu nunca e ta pidi mas di loke nos por duna; mas bien, gustosamente e ta acepta loke ta na nos alcanse. (Malakias 3:6) Ki un placer di ser guia pa un Wardador asina comprensivo!

“Mi No Tin Miedo di Maldad, Pasobra Abo Ta cu Mi”

13. Con David a cuminsa papia mas intimamente na Salmo 23:4, y dicon esaki no ta un sorpresa?

¹³ David a duna un di dos motibo pa su confiansa: Yehova ta proteha su carnenan. Nos ta lesa: “Maske mi cana den e vaye di sombra di morto, mi no tin miedo di maldad, pasobra  abo ta cu mi; bo bara y bo garoti ta consola mi.” (Salmo 23:4) David a cuminsa papia awor mas intimamente, dirigiendo su mes na Yehova cu e pronomber “abo.” Esaki no ta un sorpresa, pasobra David tawata papia tocante e manera cu Dios a yud’e soporta adversidad. David a pasa door di hopi vaye scur, esta, ocasionnan cu su propio bida tawata na peliger. Pero e no a laga miedo domin’e, pasobra el a sinti cu Dios—cu Su “bara” y “garoti” cla pa actua—tawata cu ne. Siendo conciente di e proteccion aki, David a sinti un consuelo y esei sin duda a hal’e mas serca Yehova. *

14. Ki siguransa Bijbel ta duna nos relaciona cu Yehova su proteccion, pero kico esaki no ta nifica?

¹⁴ Con Yehova ta proteha su carnenan awe? Bijbel ta sigura nos cu ningun opositor—demoño ni humano—hamas lo logra elimina su carnenan for di riba tera. Yehova lo no permiti esei nunca. (Isaias 54:17) Sinembargo, esaki no ta nifica cu nos Wardador lo proteha nos di tur calamidad. Nos ta experencia e pruebanan cu ta comun pa hende, y nos ta confronta e oposicion cu tur cristian berdadero ta haya nan cu ne. (2 Timoteo 3:12; Santiago 1:2) Tin biaha cu nos lo por haya nos, na moda di papia, ta “cana den e vaye di sombra di morto.” Por ehempel, nos por hera muri debi na persecucion of un crisis di salud. Of podise un ser keri ta hera muri of asta ta muri mes. Durante loke ta parce e momentonan di mas scur, nos Wardador ta cu nos, y lo e proteha nos. Con?

15, 16. (a) Den ki maneranan Yehova ta yuda nos trata cu e obstaculonan cu kisas nos ta confronta? (b) Conta un experencia cu ta mustra con Yehova ta yuda nos den tempo di prueba.

¹⁵ Yehova no ta priminti intervencion milagroso. * Pero nos por tin sigur di esaki: Yehova lo yuda nos surpasa cualkier obstaculo cu nos ta confronta. E por duna nos e sabiduria pa trata cu “diferente pruebanan.” (Santiago 1:2-5) Un wardado di carne ta uza su bara of garoti no solamente pa core cu bestia yagdo sino tambe pa pusha su carnenan suavemente den e direccion corecto. Yehova por “pusha” nos suavemente—podise mediante un otro ruman den fe—pa aplica conseho basa riba Bijbel cu lo por haci un diferencia grandi den nos situacion. Ademas, Yehova por duna nos e forsa pa persevera. (Filipensenan 4:13, NW) Mediante su spirito santo, e por ekipa nos cu “poder mas aya di loke ta normal.” (2 Corintionan 4:7, NW) Dios su spirito por capasita nos pa soporta cualkier prueba cu Satanas lo por trece riba nos. (1 Corintionan 10:13) No ta un consuelo pa sa cu Yehova ta semper cla pa yuda nos?

¹⁶ Si, sin importa ki vaye scur nos por haya nos mes aden, nos no tin nodi cana pasa door di dje nos so. Nos Wardador ta cu nos, yudando nos den maneranan cu kisas na prome instante nos no ta completamente conciente di dje. Considera e experencia di un anciano cristian kende a wordo diagnostica cu un tumor maligno den celebro. El a bisa: “Mi tin cu admiti cu na prome instante mi tawata puntra mi mes si ta rabia Yehova tawata cu mi of si asta el a stima mi. Pero mi tawata determina pa no kita for di Yehova. En bes di esei, mi a cont’e mi precupacionnan. Anto Yehova a yuda mi, hopi bes door di duna mi consuelo mediante mi rumannan cristian. Hopi di nan a comparti cu mi puntonan util basa riba nan propio experencia den trata cu malesa grave. Nan comentarionan balansa a recorda mi cu loke mi tawata pasa aden no tawata un cos fuera di lo comun. Yudansa practico, incluso algun oferta di bondad masha conmovedor, a sigura mi cu Yehova no tawata malcontento cu mi. Claro cu mi tin cu sigui lucha cu mi malesa, y mi no sa kico e resultado lo ta. Pero mi ta combenci cu Yehova ta cu mi y cu lo e sigui yuda mi atrabes di e prueba aki.”

 “Bo Ta Prepara un Mesa Mi Dilanti”

17. Con David a describi Yehova na Salmo 23:5, y dicon esaki no ta contradeci e comparacion di un wardado di carne?

¹⁷ Awor David a cita un di tres motibo pa su confiansa den su Wardador: Yehova ta alimenta su carnenan, y e ta haci esei na abundancia. David a skirbi: “Bo ta prepara un mesa mi dilanti den presencia di mi enemigonan; bo ta ungi mi cabes cu azeta; mi copa ta yen te basha over.” (Salmo 23:5) Den e versiculo aki, David ta describi su Wardador como un anfitrion generoso cu ta percura cos di come y di bebe na abundancia. E dos comparacionnan—un wardado di carne cla pa duna cuido y un anfitrion generoso—no ta contradictorio. En realidad, un bon wardado mester sa unda pa haya luganan cu hopi yerba y suficiente awa di bebe di manera cu su tou lo “no tin falta di nada.”—Salmo 23:1, 2.

18. Kico ta mustra cu Yehova ta un anfitrion generoso?

¹⁸ Nos Wardador tambe ta un anfitrion generoso? No tin duda di esei! Djis pensa riba e calidad, cantidad y variedad di cuminda spiritual cu nos ta disfruta di dje actualmente. Mediante e esclabo fiel y prudente, Yehova a percura publicacionnan practico pa nos y tambe programanan instructivo na reunion-, asamblea- y congresonan; anto nan tur ta satisface nos necesidadnan spiritual. (Mateo 24:45-47) Definitivamente no tin scarsedad di cuminda spiritual. “E esclabo fiel y prudente” a produci miyones di Bijbel y publicacion pa yuda hende studia Bijbel, y eseinan ta disponibel awor na 413 idioma. Yehova a percura e cuminda spiritual aki na gran variedad—for di “lechi”, siñansanan biblico basico, te na “cuminda solido”, informacion spiritual mas profundo. (Hebreonan 5:11-14) Como resultado, ora nos ta confronta problema of tin cu tuma decision, nos por haya generalmente precis loke nos tin mester. Unda nos lo tawata sin tal cuminda spiritual? Nos Wardador en berdad ta percura na un manera masha generoso pa nos!—Isaias 25:6; 65:13.

‘Lo Mi Biba den e Cas di Yehova’

19, 20. (a) Ki confiansa David a expresa na Salmo 23:6, y con nos por tin e mesun confiansa ei? (b) Kico nos lo trata den e siguiente articulo?

¹⁹ Despues cu David a contempla e manera di trata di su Wardador y Percurador, el a conclui: “Siguramente bondad y misericordia lo sigui mi tur e dianan di mi bida, y lo mi biba den e cas di SEÑOR pa semper.” (Salmo 23:6) David a papia for di un curason yen di gratitud y fe; gratitud ora cu el a recorda pasado y fe ora el a wak den futuro. E exwardado di carne aki a sintie sigur, sabiendo cu tanten cu e keda serca di su Wardador celestial, como si fuera bibando den Su cas, lo e ricibi semper Yehova su cuido amoroso.

²⁰ Nos por ta realmente gradicido pa e bunita palabranan cu tin para skirbi na Salmo 23! David no por a haya un manera mas apropiado pa describi e manera cu Yehova ta guia, proteha y alimenta su carnenan. David su expresionnan caluroso a keda conserva pa duna nos e confiansa di cu nos tambe por acudi na Yehova como nos Wardador. Si, tanten cu nos keda serca Yehova, lo e cuida nos manera un Wardador amoroso “pa semper.” Sinembargo, como su carnenan, nos tin e responsabilidad di cana cu nos gran Wardador, Yehova. Den e siguiente articulo nos lo trata kico esaki ta encera.

[Nota]

Bo Ta Corda?

• Dicon tawata na su luga cu David a compara Yehova cu un wardado di carne?

• Con Yehova ta guia nos cu comprension?

• Den ki maneranan Yehova ta yuda nos soporta prueba?

• Kico ta mustra cu Yehova ta un anfitrion generoso?

[Preguntanan di Estudio]

[Plachi na pagina 18]

Mescos cu un wardado di carne na Israel, Yehova ta guia Su carnenan