Diabel Ta Existi di Berdad?

CON bo ta mira Diabel? Bo ta kere cu di berdad ta existi un persona cu ta hinca hende den tentacion pa haci malo, of simplemente e ta un concepto di maldad? Nos tin cu tene miedo di Diabel of nos tin cu descart’e como un simpel idea supersticioso of un mito? E palabra “diabel” ta referi na un ke otro forsa destructivo den universo sin identidad spesifico? Acaso e expresion por ta simplemente un simbolo di e maldad cu tin den hende, manera hopi teologo moderno ta pretende?

No ta nada straño cu e opinionnan encuanto e identidad di Diabel ta dividi. Imagina bo con dificil lo ta pa haya sa e berdadero identidad di un persona cu ta un experto den disfrasa su mes, specialmente ora e ta dicidido pa keda scondi tras di un mascarada! Bijbel ta describi Diabel como un persona asina. Referiendo na dje como Satanas, Bijbel ta bisa: “Satanas mes ta disfrasa su mes como un angel di lus.” (2 Corintionan 11:14) Aunke e ta un malbado, e ta aparenta di ta bon pa e por logra gaña hende. Y si Diabel logra pone hende kere cu e no ta existi mes, esei ta cumbinie mas ainda.

Nos por puntra nos mes anto: Ta ken Diabel ta? Ki tempo y con el a cuminsa existi? Con e ta influencia hende awe? Tin algo cu nos por haci pa resisti e influencia ei? Bijbel ta conta nos e historia exacto di Diabel for di tempo cu el a cuminsa y e ta duna nos contestanan veridico riba e preguntanan aki.

[Plachi na pagina 3]

Ta hopi dificil pa identifica un persona cu ta dicidido pa keda scondi tras di un mascarada!