‘E Amor di Boso Ta Bira Mas y Mas Grandi’

UN CANTIDAD di desaster natural a asota Japon durante aña 2004. Entre nan tawatin horcan, inundacion y temblor. Nan a afecta bida di hopi hende drasticamente, incluso di Testigonan di Yehova. (Eclesiastes 9:11, NW) Sinembargo, e adversidadnan aki a duna e Testigonan oportunidad di demostra nan amor di ruman pa otro.—1 Pedro 1:22.

Por ehempel, awasero pisa cu a yobe den juli a pone un riu den e parti central di Japon pasa over. Inundacion a daña mas cu 20 cas di Testigonan di Yehova. Den un Salon di Reino, awa a subi un meter for di vloer. Mesora, Testigonan di e congregacionnan biciña a bin duna un man. Centenares di boluntario a limpia e casnan yen di lodo. Nan a limpia y drecha e Salon di Reino completamente den apenas dos siman.

Dia 23 di october, un temblor cu a midi 6,8 riba e escala di Richter a asota e mesun area. Por lo menos 40 hende a perde nan bida, y mester a evacua mas cu 100.000 persona for di nan cas. No tawatin awa, gas ni coriente. Aunke e epicentro di e temblor tawata apenas 50 kilometer leu, e Salon di Reino cu nan a caba di renoba no a sufri daño. Mesora e salon a bira un centro temporal pa cordina yudansa. Superintendentenan cristian rapidamente a percura pa wak si nan rumannan den fe tawata sano y salvo, y nan a sinti un alivio ora nan a haya sa cu ni un no a sufri lesion ni perde nan bida. E siguiente mainta tempran, seis Testigo cu tawata victima di e inundacion den juli a presenta na e centro, ansioso pa bai entrega cuminda y awa na e area afecta. Un par di ora despues di e temblor, ya tawatin articulonan di prome necesidad cu a ser poni disponibel.

Un superintendente a declara: “E rumannan cu tawata victima di e inundacionnan a considera e trabounan di duna yudansa na esnan afecta door di e temblor como un oportunidad pa expresa nan aprecio pa e yudansa cu nan mes a ricibi. Nan a traha duro for di mainta tempran te anochi laat. Anto nan caranan tawata briya di felicidad!”

Ni inundacion ni temblor ta forma un menasa pa e laso di amor cu ta uni e hermandad cristian di Testigonan di Yehova. Al contrario, ora desasternan asina tuma luga, cristiannan ta experencia loke apostel Pablo a bisa su rumannan den fe na Tesalonica: “E amor di cada un di boso pa otro ta bira mas y mas grandi.”—2 Tesalonicensenan 1:3.