E Arte di Scucha cu Amor

“DANKI pa a scucha mi.” Bo a haya un comentario asina resientemente? Esei ta un compliment pa bo! Casi tur hende ta aprecia un bon scuchado. Door di scucha cu atencion, nos por ta un fuente di animacion pa hende afligi of carga cu problema. Y e echo cu nos ta un bon scuchado no ta yuda nos aprecia otro hende? Den e congregacion cristian, un manera principal pa “stimula otro pa stima y haci bon obra” ta door di scucha cu amor.—Hebreonan 10:24.

Sinembargo, hopi hende no ta bon scuchado. Nan ta gusta duna conseho, conta nan mes experencianan of duna nan punto di bista en bes di scucha loke otro hende tin di bisa. Scuchamento realmente ta un arte. Con nos por siña scucha cu amor?

Un Factor Importante

Yehova ta nos Magnifico “Maestro.” (Isaias 30:20, BPK) E por siña nos hopi cos tocante scuchamento. Wak con Yehova a yuda profeta Elias. E menasanan di reina Jezabel a spanta Elias y pon’e hui bai den desierto y pidi pa muri. Ei e angel di Dios a papia cu ne. Segun cu e profeta tawata splica su temornan, Yehova a scuch’e y despues a demostra Su gran poder. Cu ki resultado? Elias no tawatin miedo mas y el a bolbe bek na su asignacion. (1 Reinan 19:2-15) Pakico Yehova ta tuma tempo pa scucha e precupacionnan di su sirbidonan? Pasobra e ta interesa den nan. (1 Pedro 5:7) Esaki ta un factor clave pa ser un bon scuchado: Bo mester ta sinseramente interesa den otro hende y demostra esei.

Ora un homber na Bolivia a comete un malecho serio, el a aprecia e interes sinsero ei cu un compañero di fe a mustra den dje. E homber a splica: “E tempo ei mi tawata den un di e etapanan mas miserabel di mi bida. Si no tawata pa un ruman homber cu a tuma su tempo pa scucha mi, facilmente lo mi por a stop di haci esfuerso pa sirbi Yehova. E no a papia hopi, pero sabiendo cu e tawata berdaderamente interesa pa scucha mi a echt fortalece mi. Mi no tawatin mester di un solucion; mi tawata sa kico mi mester a haci. Djis mi kier a sa cu tin un hende interesa den con mi ta sinti. E echo cu el a scucha mi a pone cu desesperacion no a caba cu mi.”

Un gran Ehempel di e arte di scucha cu amor ta Hesucristo. Un poco despues di Hesus su morto, dos di su disipelnan tawata canando di Herusalem pa un pueblo cu tawata keda mas o menos 11 kilometer leu. Sin duda nan tawata desanima. Pues, Hesucristo resusita a cuminsa cana hunto cu nan. El a haci nan algun pregunta bon formula pa saca afo kico tawata nan precupacion, y e disipelnan a responde. Nan a expresa e speransanan cu nan tawatin y con desilusiona y confundi nan a keda awor. Hesus tawata interesa den nan, y e echo cu el a scucha cu amor a prepara e dos disipelnan pa scucha. E ora ei Hesus “a splica nan e cosnan tocante di su mes den tur e Scrituranan.”—Lucas 24:13-27.

 Un manera amoroso pa pone otro hende scucha nos ta ora nos ta scucha nan prome. Un señora di Bolivia a conta: “Mi mayornan y mi suegronan a cuminsa reclama e manera cu mi tawata cria mi yiunan. Nan comentarionan a molestia mi, pero di otro banda, mi no tawata sigur di mi mes como mayor. Rond di e tempo ei mi a haya bishita di un Testigo di Yehova. El a papia cu mi tocante e promesanan di Dios. Pero ta e manera cu el a puntra mi mi opinion a pone mi realisa cu e persona aki tawata dispuesto pa scucha. Mi a invit’e pa drenta, y un poco despues mi a cuminsa splic’e mi problema. El a scucha mi cu pasenshi. Despues el a puntra mi kico mi a desea pa mi yiunan y kico mi esposo a pensa di esei. Tawata un alivio pa haya un persona cu tawata dispuesto pa purba compronde mi. Ora el a cuminsa mustra mi kico Bijbel ta bisa tocante bida di famia, mi tawata sa cu mi tawata papiando cu un persona cu tawata interesa den mi situacion.”

Bijbel ta bisa: “Amor ... no ta busca su propio interes.” (1 Corintionan 13:4, 5) Pues, scucha cu amor ta encera sacrifica nos mes interesnan. Kisas esaki ta nifica paga television, pone corant un banda of paga telefon cellular ora otro hende ta papia cu nos tocante un asunto serio. Scucha cu amor ta nifica mustra interes profundo den loke e otro persona ta pensa. Consecuentemente nos lo evita di cuminsa papia tocante nos mes door di bisa por ehempel: “Esei ta pone mi corda loke a pasa mi algun tempo pasa.” Aunke tal intercambio di idea ta aceptabel den un combersacion amigabel, ora un persona ta papia di un problema serio cu nos, nos tin cu pone nos interesnan personal un banda. Pero tin un manera mas cu nos por manifesta berdadero interes den otro hende.

Scucha pa Compronde Loke Otro Ta Sinti

E compañeronan di e homber cu yama Job a tende por lo menos dies di su discursonan. Toch Job a sclama: “Ai, mare mi tawatin un hende pa scucha mi!” (Job 31:35, BPK) Pakico? Pasobra nan manera di scucha no tawata un consuelo pa Job. Nan no tawata interesa den dje ni kier a compronde su sintimentonan. Nan sigur no a sinti p’e, manera hende cu ta scucha cu compasion. Pero apostel Pedro ta conseha: “Boso tur sea di acuerdo cu otro, teniendo compasion cu otro, stimando manera ruman, y sea misericordioso y humilde den spirito.” (1 Pedro 3:8) Con nos por mustra compasion of empatia? Nos por haci esei door di mustra interes den e sintimentonan di e otro persona y purba compronde nan. Un manera pa demostra nos interes ta door di bisa den un forma compasivo: “Esei lo mester a traha riba bo” of “Lo bo mester a sinti cu nan no ta compronde bo.” Un otro manera ta pa ripiti loke e persona a bisa nos den nos mes palabranan, mustrando asina cu nos a compronde loke el a bisa. Scucha cu amor ta nifica presta atencion no solamente na e palabranan sino tambe na e emocionnan expresa indirectamente.

Robert, * kende ta un Testigo di Yehova cu pa hopi aña a sirbi tempo completo, a conta: “Na un dado momento mi a cuminsa sinti mi  frustra cu mi sirbishi. Pesei mi a pidi pa papia cu e superintendente biahero. El a echt scucha mi y a purba compronde mi sintimentonan. Aparentemente, el a asta compronde e miedo cu mi tawatin di cu lo el a critica mi pa mi actitud. E ruman a sigura mi cu e por a compronde pa mi pasobra un tempo e mes tawatin e sintimentonan ei. Esaki a echt yuda mi sigui padilanti.”

Nos por scucha sin cu nos mester ta di acuerdo cu loke ta ser bisa? Nos por bisa un persona cu nos ta aprecia cu el a bisa nos kico e ta sinti? Si. Como mayor, kico lo bo haci si bo yiu homber chikito bringa na scol of si bo yiu mohe teenager yega cas y bisa bo cu e ta verliefd? No ta mihor bo scucha y trata na compronde kico ta biba den mente di e hoben prome cu bo splic’e kico ta comportacion apropiado y kico no ta?

Proverbionan 20:5 ta bisa: “Plan [“conseho”, NW] den curason di un hende ta manera awa hundo, ma un hende di comprondemento ta saca esaki afo.” Si un persona prudente y cu tin experencia no ta inclina pa duna conseho sin cu a pidie, nos lo tin cu pidie su conseho. Mescos ta conta ora nos ta scucha cu amor. Nos mester uza discernimento pa saca afo kico ta biba den un persona. Ta bon pa haci pregunta, pero nos mester tene cuidou pa nos preguntanan no mete den nan asuntonan priva. Kisas ta bon pa sugeri esun cu ta papia pa e cuminsa menciona cosnan cu e ta sinti su mes comodo cu ne. Por ehempel, un esposa cu kier papia tocante problema den su matrimonio por haya cu ta mas facil pa cuminsa papia tocante con el a conoce su casa y con nan a casa. Un persona cu a bira inactivo den e sirbishi cristian por haya cu ta mas facil pa cuminsa splica con el a haya e berdad.

Ta un Reto pa Scucha cu Amor

Por ta un reto pa scucha ora un persona ta rabia cu nos pasobra nos inclinacion natural ta pa defende nos mes. Con nos por enfrenta e reto aki? Proverbionan 15:1 ta bisa: “Un contesta suave ta kita rabia.” Algo cu por yuda nos responde cu suavidad ta di invita e persona bondadosamente pa papia anto scucha cu pasenshi segun cu e ta expresa loke ta molesti’e.

Hopi bes dos persona cu ta discuti fuertemente ta djis ripiti loke nan a bisa caba. Cada un ta haya cu e otro no ta scucha. Lo ta bon si un di nan por stop di papia y echt scucha! Claro cu ta importante pa eherce dominio propio y expresa nos mes den un manera discreto y amoroso. Bijbel ta bisa nos: “Esun cu frena su lipnan ta sabi.”—Proverbionan 10:19.

E capasidad pa scucha cu amor no ta bini di mes. Sinembargo, e ta un arte cu nos por siña cu esfuerso y disiplina. Sin duda, ta bale la pena pa domina e arte aki. Ta un muestra di amor pa echt scucha ora otro hende ta papia. Esaki ta contribui tambe na nos felicidad. Ta sabi anto pa cultiva e arte di scucha cu amor!

[Nota]

[Plachi na pagina 11]

Ora nos ta scucha nos tin cu pone nos mes interesnan un banda

[Plachi na pagina 12]

Por ta un reto pa scucha ora un persona ta rabia