‘E Camindanan di Yehova Ta Recto’

“E camindanan di SEÑOR ta recto, y e husto lo cana den nan.”—OSEAS 14:9.

1, 2. Yehova a duna e Israelitanan ki clase di comienso, pero kico a pasa cu nan?

YEHOVA a duna e Israelitanan un comienso husto den e dianan di profeta Moises. Sinembargo, ya pa cuminsamento di siglo 8 prome cu nos era, nan situacion a bira asina malo cu Dios a haya nan culpabel di malecho serio. Oseas capitulo 10 te cu 14 ta mustra esaki bon cla.

² Israel su curason a bira hipocrita. E hendenan di e reino di dies tribu ei “a ploeg maldad” y a cosecha inhusticia. (Oseas 10:1, 13) Yehova a bisa: “Tempo cu Israel tawata mucha, mi tawata stim’e, y for di Egipto mi a yama mi yiu homber.” (Oseas 11:1) Aunke Dios a libra e Israelitanan for di sclabitud na Egipto, nan a pag’e bek cu engaño y mentira. (Oseas 11:12) Pa e motibo ei Yehova a duna nan e conseho aki: “Bolbe serca bo Dios, tene misericordia y haci husticia.”—Oseas 12:6.

3. Kico lo a bai pasa cu e stad rebelde di Samaria, pero con e Israelitanan lo por a haya misericordia?

³ E stad rebelde di Samaria y su rei lo a topa un fin desastroso. (Oseas 13:11, 16) Sinembargo, e ultimo capitulo di e profecia di Oseas ta habri cu e suplica: “Bolbe, o Israel, serca SEÑOR bo Dios.” Si e Israelitanan lo a repenti y haci esfuerso pa haya pordon, Dios lo a mustra misericordia na nan. Ta claro si cu nan lo mester a reconoce cu ‘e camindanan di Yehova ta recto’, y cana den nan.—Oseas 14:1-6, 9.

4. Ki principionan for di e profecia di Oseas nos lo considera?

⁴ E seccion aki di e profecia di Oseas ta contene hopi principio cu por yuda nos cana cu Dios. Nos lo considera esnan aki: (1) Yehova ta rekeri adoracion sin hipocresia, (2) Dios ta desplega amor leal na su pueblo, (3) nos tin cu spera continuamente riba Yehova, (4) Yehova su camindanan semper ta recto y (5) pecadonan por bolbe na Yehova.

Yehova Ta Rekeri Adoracion sin Hipocresia

5. Ki clase di sirbishi Dios ta spera di nos?

⁵ Yehova ta spera di nos cu nos ta rindi sirbishi sagrado na dje den un manera limpi y sin hipocresia. Sinembargo, Israel a bira manera un “mata di wendruif carga [“cu ta degenerando”, NW]”, esta, cu ta produci mal fruta. E habitantenan di Israel tawata ‘traha mas altar’ pa uza den adoracion falso. E apostatanan aki a lanta asta pilarnan, locual talbes tawata den forma di obelisco diseña pa uza den adoracion impuro. Yehova tawata bai kibra e altarnan aki y destrui e pilarnan ei.—Oseas 10:1, 2.

6. Pa cana cu Dios, nos mester ta liber di ki caracteristica?

⁶ Entre Yehova su sirbidonan no tin mag di tin hipocresia. Pero kico a sosode cu e Israelitanan? Wel, ‘nan curason a bira infiel’, hipocrita! Aunke un tempo nan a sera un aliansa cu Yehova como un pueblo dedica na dje, el a haya nan culpabel di hipocresia. Kico nos por siña for di esaki? Si nos a dedica nos mes na Dios, nos no mester ta hipocrita. Proverbionan 3:32 ta spierta: “E hende perverso [“tramposo”, NW] ta un abominacion pa SEÑOR, ma E tin comunion intimo cu e hende recto.” Pa nos por cana cu Dios, nos tin cu desplega amor “for di un curason puro y un  bon consenshi y un fe sinsero”, es decir, sin hipocresia.—1 Timoteo 1:5.

Dios Ta Desplega Amor Leal na Su Pueblo

7, 8. (a) Bou di ki circunstancianan nos por disfruta di Dios su amor leal? (b) Kico nos mester haci si nos a peca seriamente?

⁷ Si nos ta adora Yehova den un manera recto y sin hipocresia, nos lo ricibi su bondad amoroso of amor leal. A ser bisa na e Israelitanan rebelde: “Sembra den husticia, cosecha den misericordia [“bondad amoroso”, NW]; prepara bo tera cu no ta cultiva, pasobra ta tempo pa busca SEÑOR, te ora cu e bin y yobe husticia riba boso.”—Oseas 10:12.

⁸ E Israelitanan su situacion lo tawata mucho mas mihor si nan a repenti y busca Yehova! E ora ei Yehova gustosamente lo a ‘yobe husticia riba nan’, es decir, “duna nan instruccion den husticia.” [NW] Si personalmente nos a peca seriamente, laga nos busca Yehova, pidie pordon den oracion y busca yudansa spiritual di ancianonan cristian. (Santiago 5:13-16) Tambe nos mester busca e guia di Dios su spirito santo, pasobra “esun cu sembra pa su mes carni lo cosecha corupcion for di e carni, ma esun cu sembra pa e spirito lo cosecha bida eterno for di e spirito.” (Galationan 6:8) Si nos ‘sembra cu e spirito na bista’, nos lo sigui disfruta di Dios su amor leal.

9, 10. Con Oseas 11:1-4 ta aplica na Israel?

⁹ Nos por tin e confiansa cu Yehova semper ta trata su pueblo cu amor. Nos ta haya evidencia di esaki na Oseas 11:1-4, caminda nos ta lesa: “Tempo cu Israel tawata mucha, mi tawata stim’e, y for di Egipto mi a yama mi yiu homber ... Nan a sigui ofrece sacrificio na e Baalnan y kima sencia na idolonan. Toch ta ami ta esun cu a siña Efrain [e Israelitanan] cana, mi a cohe nan den mi brasa; ma nan no tawata sa cu mi a cura nan. Mi a guia nan cu cordonnan di hende, cu lasonan di amor, y mi a bira pa nan manera un hende cu ta kita e yugo for di nan cachete; y mi a buk abou y a cria nan.”

¹⁰ Aki Yehova ta compara Israel cu un mucha chikito. Amorosamente el a siña e Israelitanan cana, tumando nan den su brasa. Anto el a sigui guia nan cu e “lasonan di amor.” Esta un descripcion conmovedor! Imagina cu bo ta un mayor cu ta yuda bo yiu chikito dal su prome stapnan. Bo tin bo brasanan habri. Den antiguedad, probablemente lo bo a uza un cabuya pa bo yiu chikito tene na dje pa e no cai. Wel, e amor cu Yehova tin pa bo ta mesun tierno. E tin delicia den guia bo cu e “lasonan di amor.”

11. Den ki manera Dios ‘a bira manera un hende cu ta kita un yugo’?

¹¹ Ora Yehova a trata cu e Israelitanan, el a “bira pa nan manera un hende cu ta kita e yugo for di nan cachete; y [el] a buk abou y a cria nan.” Dios a haci manera un hende cu ta kita un yugo for di cachete di un bestia of cu ta hal’e suficiente atras pa permiti e bestia come comodamente. Ta solamente ora cu e Israelitanan a kibra nan yugo di sumision na Yehova nan a bin cai bou di e yugo opresivo di nan enemigonan. (Deuteronomio 28:45, 48; Yeremias 28:14) Laga nos nunca cai den e gara di nos enemigo principal, Satanas, y sufri e dolornan di su yugo opresivo. Mas bien, laga nos sigui cana lealmente cu nos Dios amoroso.

 Spera Continuamente Riba Yehova

12. Segun Oseas 12:6, kico ta necesario pa nos por sigui cana cu Dios?

¹² Pa sigui cana cu Dios, nos tin cu spera continuamente riba dje. A ser bisa na e Israelitanan: “Bolbe serca bo Dios, tene misericordia y haci husticia, y spera continuamente riba bo Dios.” (Oseas 12:6) E habitantenan di Israel por a duna prueba cu nan a repenti y bolbe na Yehova door di desplega misericordia, haci husticia y ‘spera continuamente riba Dios.’ Sin importa cuanto tempo nos tin ta cana cu Dios, nos mester ta determina pa desplega misericordia, haci husticia y spera continuamente riba Dios.—Salmo 27:14.

13, 14. Con Pablo ta aplica Oseas 13:14, y esei ta duna nos ki motibo pa spera riba Yehova?

¹³ E profecia di Oseas cu tin di aber cu e Israelitanan ta duna nos un motibo special pa spera riba Dios. Yehova a bisa: “Lo mi rescata nan for di e poder di Seol; lo mi redimi nan for di morto. O Morto, unda bo sumpiñanan ta? O Seol, unda bo pui ta?” (Oseas 13:14) Yehova no tawatin intencion di rescata e Israelitanan for di morto literal e tempo ei, pero lo yega e dia cu lo e traga morto pa semper y anula su victoria.

¹⁴ Pablo a cita for di e profecia di Oseas ora cu e tawata dirigiendo su mes na otro cristiannan ungi y el a skirbi: “Ora e loke ta coruptibel aki bisti loke ta incoruptibel, y e loke ta mortal aki bisti loke ta inmortal, e ora ei e palabra cu ta para skirbi lo keda cumpli: ‘Morto ta traga den victoria. O morto, unda bo victoria ta? O morto, unda bo pui ta?’ E pui di morto ta pica, y e poder di pica ta Lei; ma gracia sea na Dios, kende ta duna nos e victoria pa medio di nos Señor Hesucristo.” (1 Corintionan 15:54-57) Yehova a lanta Hesus for di morto, y cu esei el a duna un garantia y gran consuelo cu e hendenan cu ta den e memoria di Dios lo ser resusita. (Huan 5:28, 29) Ki un motibo felis pa spera riba Yehova! Sinembargo, tin algo mas fuera di e speransa di resureccion cu ta motiva nos pa cana cu Dios.

E Camindanan di Yehova Semper Ta Recto

15, 16. Kico a wordo profetisa relaciona cu Samaria, y con e profecia a cumpli?

¹⁵ E echo cu nos ta combenci cu ‘e camindanan di Yehova ta recto’, ta yuda nos sigui cana cu Dios. E habitantenan di Samaria no a cana den e camindanan husto di Dios. Consecuentemente, nan lo a paga e prijs pa nan pica y pa nan falta di fe den Yehova. A wordo profetisa: “Samaria lo keda culpabel, pasobra el a rebela contra su Dios. Nan lo cai pa medio di spada, nan chikitonan lo wordo gespart na pida-pida, y nan mohenan na estado lo wordo habri for di otro.” (Oseas 13:16) Registronan historico ta mustra cu e Asirionan, kendenan a conkista Samaria, tawata capas di comete e crueldadnan teribel ei.

¹⁶ Samaria tawata e stad capital di e reino di dies tribu di Israel. Sinembargo, aki e nomber Samaria kisas ta aplica na henter e teritorio di e reino ei. (1 Reinan 21:1) E rei di Asiria, Salmanasar V, a sitia e stad di Samaria na aña 742 prome cu nos era. Ora cu finalmente Samaria a cai na aña 740, hopi di su residentenan prominente a wordo deporta pa Mesopotamia y Media. No ta sigur si ta Salmanasar V of ta su  susesor, Sargon II, a captura Samaria. (2 Reinan 17:1-6, 22, 23; 18:9-12) Sinembargo, e registronan di Sargon ta menciona e deportacion di 27.290 Israelita pa luganan cu ta keda na e parti mas ariba di e Riu Eufrates y na Media.

17. En bes di trata Dios su normanan cu desprecio, kico nos mester haci?

¹⁷ E habitantenan di Samaria a sufri e consecuencianan di no obedece Yehova y cana den su camindanan recto. Como cristiannan dedica, nos tambe lo sufri consecuencianan lamentabel si nos cuminsa practica pica y trata Dios su normanan husto cu desprecio. Laga nos nunca sigui un mal caminda asina! Mas bien, laga nos aplica e conseho aki di apostel Pedro: “No laga ningun di boso sufri como matado, of ladron of malechor, of un cu ta mete den asunto di otro; ma si un hende ta sufri como cristian, no lag’e sinti berguensa, ma den e nomber ei lag’e glorifica Dios.”—1 Pedro 4:15, 16.

18. Con nos por sigui “glorifica Dios”?

¹⁸ Nos ta sigui “glorifica Dios” door di cana den su camindanan recto en bes di haci cosnan na nos manera. Cain a comete asesinato pa motibo cu el a sigui su mes caminda y no a haci caso di Yehova su spiertamento cu e tawata serca di cai den gara di pica. (Genesis 4:1-8) Balam a acepta pago for di e rei di Moab pero a purba en vano di maldiciona Israel. (Numbernan 24:10) Y Dios a mata e Levita Core y otro personanan door cu nan a rebela contra e autoridad di Moises y Aron. (Numbernan 16:1-3, 31-33) Definitivamente nos lo no kier sigui e ‘caminda asesino di Cain’, ni core bai den “e eror di Balam”, ni perece den “e rebelion di Core.” (Hudas 11) Sinembargo, si nos a comete un pica, e profecia di Oseas ta duna nos consuelo.

Pecadonan Por Bolbe na Yehova

19, 20. Israelitanan cu a repenti tawata den posicion pa ofrece ki sacrificio?

¹⁹ Asta e personanan cu a trompica door di comete pica serio por bolbe na Yehova. Na Oseas 14:1 y 2, nos ta haya e suplica aki: “Bolbe, o Israel, serca SEÑOR bo Dios, pasobra bo a trompica pa motibo di bo inikidad. Hiba palabra cu boso, y bolbe serca SEÑOR. Bis’e: ‘Kita tur inikidad, y ricibi nos cu gracia, pa nos presenta e fruta di nos lipnan.’”

²⁰ E Israelitanan cu a repenti tawata den un posicion pa ofrece Dios ‘e fruta di nan lipnan.’ Esaki tawata sacrificionan di alabansa sinsero. Ta na e profecia aki Pablo a referi indirectamente ora el a urgi e cristiannan Hebreo pa “ofrece continuamente un sacrificio di alabansa na Dios, esta, e fruta di lipnan cu ta duna gradicimento [of, “haci declaracion publico”, NW] na su nomber.” (Hebreonan 13:15) Ta un gran honor di por cana cu Dios y ofrece e sacrificionan ei awe.

21, 22. Ki restauracion Israelitanan cu a repenti lo a experencia?

²¹ E Israelitanan cu a bandona nan caminda di desobediencia y a bolbe bek na Dios a ofrec’e ‘e fruta di nan lipnan.’ Como resultado di esei, nan a experencia un restauracion spiritual, net manera Dios a priminti. Oseas 14:4-7 ta bisa: “Lo mi [esta, Yehova] cura nan apostasia, lo mi stima nan abundantemente, pasobra mi rabia a kita for di riba nan. Lo mi ta manera serena pa Israel; e lo florece manera leli, y e lo saca su raiz manera e palonan di seda di Libano. Su takinan lo spruit, y su bunitesa  lo ta manera e palo di oleifi, y su holo dushi manera e palonan di seda di Libano. Esnan cu ta biba den su sombra lo bolbe planta maishi, y nan lo florece manera e mata di wendruif. Su fama lo ta manera e biña di Libano.”

²² E Israelitanan cu a repenti lo a ser cura spiritualmente y bolbe disfruta di e amor di Dios. Yehova lo a bira manera serena refrescante pa nan, den e sentido cu lo el a bendiciona nan na abundancia. Su pueblo restaura lo a haya dignidad y ‘bunitesa manera e palo di oleifi’, y nan lo a cana den e camindanan di Dios. Ya cu nos mes tambe ta determina pa cana cu Yehova Dios, kico e ta rekeri di nos?

Sigui Cana den e Camindanan Recto di Yehova

23, 24. E buki di Oseas ta conclui cu ki profecia alentador, y con e ta influencia nos?

²³ Pa sigui cana cu Dios, nos mester eherce “e sabiduria di ariba” y semper actua na harmonia cu Dios su camindanan recto. (Santiago 3:17, 18) E ultimo versiculo di e profecia di Oseas ta bisa: “Esun cu ta sabi, lag’e compronde e cosnan aki; esun cu tin discernimento, lag’e conoce nan. Pasobra e camindanan di SEÑOR ta recto, y e husto lo cana den nan, ma transgresornan lo trompica den nan.”—Oseas 14:9.

²⁴ En bes di laga e sabiduria y e normanan di e mundo aki guia nos, laga nos ta determina pa cana den e camindanan recto di Dios. (Deuteronomio 32:4) Oseas a haci esei pa 59 aña of mas. El a proclama e mensahenan di Dios fielmente, sabiendo cu esnan cu tawata sabi y discreto lo a compronde e palabranan ei. Kico di nos? Tanten cu Yehova ta permiti nos duna un testimonio, nos lo sigui busca hende cu sabiamente lo acepta su bondad inmereci. Anto nos ta contento di por haci esaki den pleno cooperacion cu “e esclabo fiel y prudente.”—Mateo 24:45-47.

25. Nos consideracion di e profecia di Oseas lo mester yuda nos cu kico?

²⁵ Nos consideracion di e profecia di Oseas lo mester yuda nos sigui cana cu Dios cu e speransa di haya bida eterno den su mundo nobo. (2 Pedro 3:13; Hudas 20, 21) Ki un speransa magnifico! E speransa ei lo bira un realidad pa cada un di nos si nos duna prueba cu echo y palabra cu nos ta para tras di loke nos ta bisa, esta, cu ‘e camindanan di Yehova ta recto.’

Con Lo Bo Contesta?

• Si nos ta rindi adoracion limpi na Dios, con lo e trata cu nos?

• Dicon nos mester spera riba Yehova continuamente?

• Dicon bo ta combenci cu e camindanan di Yehova ta recto?

• Con nos por sigui cana den e camindanan recto di Yehova?

[Preguntanan di Estudio]

[Plachi na pagina 28]

Acepta yudansa spiritual for di ancianonan cristian

[Plachi na pagina 29]

E profecia di Oseas ta duna nos motibo pa spera riba Yehova su promesanan di resureccion

[Plachi na pagina 31]

Sigui cana cu Dios cu e speransa di haya bida eterno