E Profecia di Oseas Ta Yuda Nos Cana cu Dios

“Nan lo cana tras di SEÑOR.”—OSEAS 11:10.

1. Ki drama simbolico nos ta haya den e buki di Oseas?

BO TA gusta dramanan cu personahenan fasinante y historia intrigante? E buki biblico di Oseas ta contene un drama simbolico. * E drama ta bai tocante e bida di famia di Dios su profeta Oseas y tin di aber cu e enlace matrimonial figurativo cu Yehova a forma cu Israel di antiguedad mediante aliansa di e Lei di Moises.

2. Kico nos sa di Oseas?

² Den Oseas capitulo 1 nos ta haya e marco di circunstancia di e drama aki. Oseas aparentemente tawata biba den e teritorio di e reino di dies tribu di Israel (yama tambe Efrain, basa riba nomber di e tribu dominante). Oseas a profetisa durante e reinado di e ultimo shete gobernantenan di Israel y di e reinan di Huda—Uzias, Jotam, Acaz y Ezekias. (Oseas 1:1) Pues Oseas a profetisa pa por lo menos 59 aña. Aunke e buki cu ta carga su nomber a wordo completa un poco despues di aña 745 prome cu nos era, e ta al caso awe ya cu miyones di hende ta siguiendo un rumbo manera esun profetisa den e palabranan: “Nan lo cana tras di SEÑOR.”—Oseas 11:10.

Loke un Resumen Ta Revela

3, 4. Splica brevemente kico Oseas capitulo 1 te cu 5 ta trata.

³ Un resumen breve di Oseas capitulo 1 te cu 5 lo fortalece nos determinacion pa cana cu Dios door di eherce fe y sigui un proceder cu ta na harmonia cu su boluntad. Aunke e habitantenan di e reino di Israel a bira culpabel di adulterio spiritual, Dios lo a tene misericordia cu nan si nan a repenti. Esaki a wordo ilustra na e manera cu Oseas a trata cu su esposa, Gomer. Despues di a haya un yiu cu Oseas, Gomer aparentemente a haya dos yiu ilegitimo. Sinembargo, Oseas a tum’e bek, mescos cu Yehova tawata dispuesto pa mustra misericordia na Israelitanan cu a repenti.—Oseas 1:1–3:5.

⁴ Yehova tawatin un caso hudicial contra Israel pasobra no tawatin fieldad, cariño ni conocemento di Dios den e tera. Lo el a exigi cuenta y castiga tanto Israel—cu a practica idolatria—como e reino rebelde di Huda. Sinembargo, ora cu Dios su pueblo lo tawata den “afliccion”, nan lo a busca Yehova.—Oseas 4:1–5:15.

E Drama Ta Desaroya

5, 6. (a) Con extenso fornicacion tawata den e reino di dies tribu di Israel? (b) Dicon e spiertamento duna na Israel di antiguedad ta importante pa nos awe?

⁵ Dios a ordena Oseas: “Bai, tuma pa bo mes un esposa prostituta y haya yiunan di prostitucion, pasobra e tera a comete prostitucion na gran manera y a bandona SEÑOR.” (Oseas 1:2) Con extenso prostitucion of fornicacion tawata den Israel? Bijbel ta bisa nos: “Un spirito di prostitucion a haci [e pueblo di e reino di dies  tribu] dual, y nan a comete prostitucion door di bandona nan Dios ... Boso yiu mohenan ta comete prostitucion, y boso bruidnan ta comete adulterio ... E hombernan mes ta bai cu prostituta y ta ofrece sacrificio hunto cu prostitutanan di tempel.”—Oseas 4:12-14.

⁶ Tur caminda den Israel tawatin fornicacion, tanto den sentido literal como spiritual. Pesei Yehova lo pidi cuenta y “castiga” e Israelitanan. (Oseas 1:4; 4:9) E spiertamento aki ta importante pa nos pasobra Yehova lo pidi cuenta y castiga hende cu awe ta practica inmoralidad y participa den adoracion impuro. Sinembargo esnan cu ta cana cu Dios ta cumpli cu su normanan pa adoracion limpi y ta conciente cu “ningun fornicado ... no tin herencia den e reino di Cristo y Dios.”—Efesionan 5:5; Santiago 1:27.

7. Kico Oseas su matrimonio cu Gomer a simbolisa?

⁷ Ora cu Oseas a casa cu Gomer, aparentemente Gomer tawata birgen, y e tawata un esposa fiel ora cu el “a haya un yiu homber p’e.” (Oseas 1:3) Manera a wordo presenta den e drama simbolico, poco despues cu e Israelitanan a ser libra for di sclabitud den Egipto na aña 1513 prome cu nos era, Dios tambe a sera un aliansa cu nan cu tawata manera un contract pa un matrimonio limpi. Door di bai di acuerdo cu e aliansa, Israel a priminti di ta fiel na su doño “esposo”, Yehova. (Isaias 54:5) Si, e matrimonio figurativo aki entre Israel cu Dios a wordo simbolisa door di Oseas su matrimonio limpi cu Gomer. Pero ban wak con cos a cambia!

8. Con e reino di dies tribu di Israel a origina, y kico bo por bisa di su adoracion?

⁸ Oseas su esposa “a consebi atrobe y a duna lus na un yiu mohe.” Probablemente Gomer a consebi tanto e yiu mohe ei den adulterio como un otro yiu mas despues. (Oseas 1:6, 8) Siendo cu Gomer a representa Israel, kisas bo ta puntra: ‘Con Israel a bin cai den prostitucion?’ Na aña 997 prome cu nos era, dies tribu di Israel a separa nan mes for di e tribunan di Huda y Benjamin cu tawata den suit. Den e reino di dies tribu di Israel den nort nan a institui adoracion di bishe pa asina e hendenan no bai Huda pa adora Yehova na su tempel na Herusalem. Adoracion di e dios falso Baal, cu a inclui orgianan sexual, a bira hancra den Israel.

9. Manera Oseas 1:6 a profetisa, kico a pasa cu Israel?

⁹ Ora cu Gomer su di dos yiu a nace, cu probablemente tawata un yiu ilegitimo, Dios a bisa Oseas: “Yam’e Lo-ruhama, [cu ta nifica “No A Mustra Compasion na Dje”] pasobra lo mi no tin compasion mas cu e cas di Israel, pa mi no pordona nan nunca mas [of, “pasobra definitivamente lo mi kita nan”, NW].” (Oseas 1:6) Yehova ‘a kita nan’ ora cu e Asirionan a hiba e Israelitanan den cautiverio na aña 740 prome cu nos era. Sinembargo, Dios a mustra compasion cu e reino di dos tribu di Huda y a libra nan pero no pa medio di boog, spada, bataya, cabai of coredo di cabai. (Oseas 1:7) Den un solo anochi na aña 732, un angel a mata 185.000 solda Asirio cu tawata menasa e stad capital di Huda, esta, Herusalem.—2 Reinan 19:35.

Yehova Su Caso Hudicial Contra Israel

10. Kico Gomer su comportacion adultero a ilustra?

¹⁰ Gomer a bandona Oseas y a bira “un esposa prostituta”, bibando den adulterio cu un  otro homber. Esaki a ilustra con e reino di Israel a sera aliansanan politico cu nacionnan cu tawata practica idolatria y a cuminsa depende riba nan. En bes di duna merito na Yehova pa e bendicionnan material cu Israel a ricibi, nan a atribui esakinan na e diosnan di e nacionnan ei y a viola nan aliansa matrimonial cu Dios door di participa den adoracion falso. Pesei no ta straño cu Yehova tawatin un caso contra e nacion aki cu a comete adulterio spiritual!—Oseas 1:2; 2:2, 12, 13.

11. Kico a pasa cu e aliansa di Lei ora cu Yehova a permiti Israel y Huda bai den exilio?

¹¹ Ki castigo Israel a haya pa motibo cu el a bandona su Doño Esposo? Dios a pon’e bai “den desierto” di Babilonia, e nacion cu a conkista Asiria, caminda anteriormente e Israelitanan a keda exilia na aña 740 prome cu nos era. (Oseas 2:14) Pues anto, ora cu Yehova a causa e fin di e reino di 10 tribu, e no a anula su aliansa matrimonial cu e nacion di Israel original di 12 tribu. De echo, ora cu Dios a laga e Babilonionan destrui Herusalem na aña 607 y a permiti e pueblo di Huda bai den cautiverio, e no a aboli e aliansa di Lei di Moises mediante cua e Israel di 12 tribu a drenta den un matrimonio figurativo cu ne. Ta te despues cu e lidernan Hudiu a rechasa Hesucristo y a laga mat’e na aña 33 di nos era, e relacion aki a ser aboli.—Colosensenan 2:14.

Yehova Ta Conseha Israel Seriamente

12, 13. Kico ta e idea principal di Oseas 2:6-8, y con e palabranan ei a aplica na Israel?

¹² Dios a conseha Israel seriamente pa “kita su prostitucion”, pero Israel kier a bai tras di su amantenan. (Oseas 2:2, 5) Yehova a bisa: “Pesei mira, lo mi sera su caminda cu sumpiña; y lo mi traha un muraya contra dje, asina cu e no por haya su bereanan. Y e lo core tras di su amantenan, ma e lo no alcansa nan; y e lo busca nan, ma lo no haya nan. E ora ei e lo bisa: ‘Lo mi bai bek serca mi prome esposo, pasobra e tempo ei tawata mihor pa mi cu awor!’ Pasobra e no sa cu ta ami a dun’e e maishi, e biña nobo y e azeta, y cu ta ami a cubrie cu plata y oro, cu nan a uza pa Baal [of, cu “nan a forma den un imagen di Baal”, NW, nota na pia di pagina].”—Oseas 2:6-8.

¹³ Aunke Israel a busca e yudansa di nacionnan cu anteriormente tawata su “amantenan”, ningun di nan no por a yud’e. E tawata rondona como si fuera pa un trankera impenetrabel di sumpiña, di manera cu nan no por a acerc’e pa dun’e yudansa. Despues cu Asiria a sitia Israel su capital Samaria pa tres aña, e stad a cai na aña 740, y e reino di dies tribu nunca mas a ser reestableci. Ta solamente algun persona entre e Israelitanan den cautiverio lo a realisa con bon cos tawata tempo cu nan antepasadonan tawata sirbi Yehova. E resto ei lo a rechasa adoracion di Baal y trata di drenta di nobo den un aliansa cu Yehova.

Un Otro Bista Riba e Drama

14. Con bin Oseas a reanuda relacion matrimonial cu Gomer?

¹⁴ Pa compronde mas plenamente e conexion entre Oseas su asuntonan familiar y Israel su relacion cu Yehova, considera e palabranan aki: “SEÑOR a bisa mi: ‘Bai atrobe, stima un mohe cu ta stima door di su esposo, maske cu e  ta un adultera.’” (Oseas 3:1) Oseas a cumpli cu e mandamento aki door di cumpra Gomer bek for di e homber cu e tawata biba cu ne. Despues, Oseas a papia cu su esposa firmemente: “Bo mester keda serca mi pa hopi dia. Bo no mag di ta un prostituta, ni bo no mag di ta intimo cu ningun homber.” (Oseas 3:2, 3) Gomer a reacciona faborablemente riba e disiplina, y Oseas a reanuda relacion matrimonial cu ne. Con esaki ta aplica na Dios su trato cu e pueblo di Israel y Huda?

15, 16. (a) Bou di ki circunstancia Dios su nacion cu a ser disiplina lo por a haya su misericordia? (b) Con Oseas 2:18 a cumpli?

¹⁵ Mientras cu e exiliadonan for di Israel y Huda tawata den cautiverio na Babilonia, Dios a uza su profetanan pa “papia cariñosamente” cu nan pa asina touch nan curason. Pa Dios su pueblo haya su misericordia, nan tawatin cu manifesta repentimento y bai bek na nan Doño Esposo, mescos cu Gomer a regresa na su esposo. E ora ei Yehova lo a saca su nacion—cu a ser disiplina y cu tawata manera un esposa—for di e “desierto” di Babilonia y lo el a trec’e bek na Huda y Herusalem. (Oseas 2:14, 15) El a cumpli cu e promesa ei na aña 537 prome cu nos era.

¹⁶ Dios a cumpli tambe cu e promesa aki: “Den e dia ei lo mi traha tambe un aliansa pa nan cu e bestianan di mondi, e parhanan di shelo y e bestianan cu ta lastra abou na suela. Y lo mi kita boog, spada y guera for di riba tera, y lo haci nan drumi den siguridad.” (Oseas 2:18) E resto Hudiu cu a regresa nan tera a biba den siguridad, nan no tawatin nodi tene miedo di bestia. E profecia aki tawatin un cumplimento adicional na aña 1919 di nos era, ora cu e resto di Israel spiritual a ser libra for di ‘Babilonia e Grandi’, e imperio mundial di religion falso. Awor nan ta biba den siguridad y ta den un paradijs spiritual hunto cu nan compañeronan, kendenan tin e speransa di biba pa semper riba tera. No tin caracteristicanan manera di bestia entre e cristiannan berdadero aki.—Revelacion 14:8; Isaias 11:6-9; Galationan 6:16.

Tuma e Lesnan na Pecho

17-19. (a) Ki cualidadnan di Dios nos ta ser anima pa imita? (b) Ki efecto Yehova su misericordia y compasion mester tin riba nos?

¹⁷ Dios ta misericordioso y tin compasion, y ta asina nos mester ta. Esaki ta un les cu e prome capitulonan di Oseas ta siña nos. (Oseas 1:6, 7; 2:23) E echo cu Dios tawata dispuesto pa mustra misericordia na Israelitanan cu a repenti ta na harmonia cu e proverbio inspira: “Esun cu sconde su picanan lo no prospera, ma esun cu confesa y laga nan lo haya misericordia.” (Proverbionan 28:13) Un otro consuelo pa malechornan cu repenti ta e palabranan di e salmista: “E sacrificionan di Dios ta un spirito kibra; un curason repenti y kibra, o Dios, bo no ta desprecia.”—Salmo 51:17.

 ¹⁸ E profecia di Oseas ta enfatisa e compasion y misericordia di e Dios cu nos ta adora. Asta si algun hende desvia for di su camindanan husto, nan por repenti y bira bek. Si nan haci esei, Yehova lo ricibi nan gustosamente. El a demostra misericordia na miembronan cu a repenti di e nacion di Israel, un nacion cu cua anteriormente el a drenta den un matrimonio figurativo. Aunke cu nan a desobedece Yehova y ‘a haci Esun Santo di Israel tristo, e tawata misericordioso y a corda cu ta carni nan tawata.’ (Salmo 78:38-41) Tal misericordia mester motiva nos pa sigui cana cu Yehova, nos Dios yen di compasion.

¹⁹ Maske cu den Israel tawata reina casonan di matamento, hortamento y adulterio, Yehova a “papia cariñosamente cu ne” pa touch su curason. (Oseas 2:14; 4:2) Segun cu nos ta reflexiona riba Yehova su misericordia y compasion, esei mester touch nos curason y fortalece nos apego personal na dje. Pesei laga nos puntra nos mes: ‘Con mi por ta mas mihor den imita Yehova su misericordia y compasion den mi trato cu otro hende? Si un ruman cristian cu a ofende mi pidi mi pordon, mi ta mesun cla pa pordona manera Dios ta cla pa pordona?’—Salmo 86:5.

20. Duna un ehempel cu ta mustra cu nos mester tin confiansa den e speransa cu Dios ta duna.

²⁰ Dios ta duna berdadero speransa. Por ehempel, el a priminti: “Lo mi dun’e ... e vaye di Acor como un porta di speransa.” (Oseas 2:15) Yehova su organisacion di antiguedad cu tawata manera un esposa, tawatin e speransa sigur di ser restaura na su tera, caminda “e vaye di Acor” tawata situa. Cumplimento di e promesa ei na aña 537 prome cu nos era, ta duna nos bon motibo pa alegra den e speransa sigur cu Yehova ta pone nos dilanti.

21. Ki papel conocemento ta hunga den nos canamento cu Dios?

²¹ Pa sigui cana cu Dios, nos tin cu sigui haya conocemento di dje y aplic’e den nos bida. Tawatin gran falta di conocemento di Yehova den Israel. (Oseas 4:1, 6) Sinembargo, tawatin hende cu a duna hopi balor na e instruccion cu a bin for di Dios, nan a actua na harmonia cu ne y a haya gran bendicion. Oseas tawata un di nan. Esei tambe tawata e caso cu e 7.000 Israelitanan cu den tempo di Elias no a dobla rudia pa Baal. (1 Reinan 19:18; Romanonan 11:1-4) Nos gratitud pa Dios su instruccion lo yuda nos sigui cana cu ne.—Salmo 119:66; Isaias 30:20, 21.

22. Con nos mester mira apostasia?

²² Yehova ta spera cu e hombernan cu ta hiba delantera den su pueblo ta rechasa apostasia. Sinembargo, Oseas 5:1 ta bisa: “Tende esaki, o sacerdotenan! Paga tino, o cas di Israel! Scucha, o cas di rei! Pasobra e huicio ta toca boso, pasobra boso tawata un trampa na Mizpa, y un reda habri riba Tabor.” Lidernan apostata tawata un trampa y un reda pa e Israelitanan, seduciendo nan pa practica idolatria. Sero Tabor y un luga cu yama Mizpa probablemente tawata centronan di tal adoracion falso.

23. Con bo a beneficia door di analisa Oseas capitulo 1 te cu 5?

²³ Te asina leu, e profecia di Oseas a mustra nos cu Yehova ta un Dios misericordioso cu ta duna speransa y ta bendiciona esnan cu ta aplica su instruccion y ta rechasa apostasia. Mescos cu e Israelitanan di pasado cu a repenti, laga nos busca Yehova y semper haci esfuerso pa agrad’e. (Oseas 5:15) Door di haci esei nos lo cosecha loke ta bon y nos lo tin e goso y pas incomparabel cu tur hende cu ta cana fielmente cu Dios ta experencia.—Salmo 100:2; Filipensenan 4:6, 7.

[Nota]

Con Lo Bo Contesta?

• Kico Oseas su matrimonio cu Gomer a simbolisa?

• Dicon Yehova tawatin un caso hudicial contra Israel?

• Ki les den Oseas capitulo 1 te cu 5 a impresiona bo?

[Preguntanan di Estudio]

[Plachi na pagina 18]

Bo sa ken e esposa di Oseas a representa?

[Plachi na pagina 19]

E Asirionan a conkista e habitantenan di Samaria na aña 740 prome cu nos era

[Plachi na pagina 20]

Hende yen di goso ta regresa nan tera