Armagedon​—Un Comienso Felis

E PALABRA “Armagedon” tin su origen den e expresion Hebreo “Har-Magedon”, es decir “Sero di Meguido.” E ta aparece na Revelacion 16:16, cu ta bisa: “Nan a reuni nan tur hunto na e luga cu na lenga Hebreo yama Armagedon.” Ken ta bini hunto na Armagedon, y cu ki proposito? Djis dos versiculo mas prome, na Revelacion 16:14, nos ta lesa: “E reinan di henter mundo” ta ser reuni hunto “pa e guera di e gran dia di Dios Todopoderoso.” Manera ta di spera, e declaracionnan ei ta lanta algun pregunta adicional hopi interesante. Unda e “reinan” aki lo bringa e guera? Riba ki cuestion nan lo bataya, y contra ken? Nan lo uza armanan di destruccion masal, manera hopi hende ta kere? Lo tin sobreviviente di Armagedon? Laga Bijbel contesta e preguntanan aki.

Acaso e referencia na “Sero di Meguido” ta nifica cu e guera di Armagedon lo tuma luga na un sero spesifico den Medio Oriente? No, pasobra na prome luga, no ta existi un sero asina mes. Caminda e antiguo Meguido tawata, tin solamente un serito cu ta mas o menos 20 meter mas halto cu e sabana pega cu ne. Na di dos luga, ta con e area rond di Meguido lo por contene tur “e reinan di tera y nan ehersitonan”? (Revelacion 19:19) Sinembargo, Meguido tawata e escenario di algun di e batayanan di mas feros y mas decisivo den historia di Medio Oriente. Pues, e nomber Armagedon ta simbolisa un bataya decisivo cu un solo ganado.—Wak e cuadro “Meguido Ta un Simbolo Apropiado”, na pagina 5.

Armagedon no por ta djis un bataya entre nacionnan riba tera, ya cu Revelacion 16:14 ta bisa cu “e reinan di henter mundo” ta forma un grupo uni na “e guera di e gran dia di Dios Todopoderoso.” Yeremias a declara den su profecia inspira cu “esnan cu SEÑOR mata” lo keda benta “for di esun extremo di mundo te na e otro.” (Yeremias 25:33) Pues, Armagedon no ta un guera humano limita na un sitio spesifico den Medio Oriente. Ta trata aki di e guera di Yehova, y lo e abarca henter mundo.

Pero tuma nota cu na Revelacion 16:16, Armagedon ta ser yama un “luga.” Den Bijbel, “luga” por nifica un condicion of un situacion—den e caso aki e ta un situacion den cua henter mundo lo ta uni contra Yehova. (Revelacion 12:6, 14) Na Armagedon tur e nacionnan riba tera lo sera cabes contra “e ehersitonan cu ta den shelo” bou di e mando militar di e “Rei di reinan y Señor di señornan”, Hesucristo.—Revelacion 19:14, 16.

Kico di e idea cu Armagedon lo ta un catastrofe cu ta envolve armanan di destruccion masal of un choke cu un ke otro cuerpo celestial? Un Dios amoroso lo laga humanidad y nan hogar, tera, yega na un fin spantoso asina? No. E ta bisa spesificamente cu e no a crea tera “pa e keda bashi” sino el a “form’e pa e wordo habita.” (Isaias 45:18; Salmo 96:10) Na Armagedon, Yehova lo no destrui nos planeta den un candela catastrofico. Mas bien, lo e “destrui esnan cu ta destrui e tera.”—Revelacion 11:18.

Na Ki Tempo Armagedon Lo Bini?

Un pregunta persistente cu den transcurso di siglonan a lanta masha hopi speculacion ta: Na ki tempo Armagedon lo bini? Un analisis di e buki di Revelacion cu yudansa di otro  partinan di Bijbel por yuda nos determina na ki tempo e bataya crucial aki lo tuma luga. Revelacion 16:15 ta conecta Armagedon cu Hesus su binida inespera manera un ladron. Hesus tambe a uza e ilustracion ei ora el a describi su binida pa ehecuta huicio contra e mundo aki.—Mateo 24:43, 44; 1 Tesalonicensenan 5:2.

Manera cumplimento di profecia biblico ta mustra, for di aña 1914 nos ta bibando den e ultimo dianan di e sistema di cosnan aki. * E periodo cu Hesus a yama e “gran tribulacion” lo marca e parti final di e ultimo dianan. Bijbel no ta bisa con largo e periodo ei lo ta, pero e calamidadnan cu e ta trece cu ne lo ta piyo cu tur loke mundo a yega di mira. E gran tribulacion ei lo culmina na Armagedon.—Mateo 24:21, 29.

Siendo cu Armagedon ta “e guera di e gran dia di Dios Todopoderoso”, no tin nada cu hende por haci pa pospon’e. Yehova tin su “tempo stipula” pa e guera ei cuminsa y “e lo no tarda.”—Habacuk 2:3.

Un Dios di Husticia Ta Bringa un Guera Husto

Pero pakico Dios lo bringa un guera mundial? Armagedon ta estrechamente liga cu un  di Dios su cualidadnan principal, esta, husticia. Bijbel ta declara: “SEÑOR ta stima husticia.” (Salmo 37:28) Yehova a mira tur e actonan di inhusticia cu a wordo cometi durante historia humano. Claro cu e ta desaproba tur y su repudio ta completamente hustifica. Pesei mes el a nombra su Yiu pa bringa un guera husto pa elimina henter e mundo malbado aki.

Ta Yehova so ta capas pa bringa un guera berdaderamente husto y selectivo den cua hende di bon curason, sin importa unda nan ta riba tera, lo wordo conserva. (Mateo 24:40, 41; Revelacion 7:9, 10, 13, 14) Y como Esun cu a crea tera, ta e so tin derecho di impone su soberania riba tera completo.—Revelacion 4:11.

Ki medionan di destruccion Yehova lo uza contra su enemigonan? Simplemente nos no sa. Loke si nos sa ta cu e tin e medionan na su disposicion pa destrui e nacionnan malbado por completo. (Job 38:22, 23; Sofonias 1:15-18) Sinembargo, Dios su adoradonan riba tera lo no participa den e bataya. E vision den Revelacion capitulo 19 ta indica cu ta e ehersitonan celestial so lo participa cu Hesucristo den e guera. Ni un sirbido cristian di Yehova riba tera lo no bringa.—2 Cronicanan 20:15, 17.

Un Dios di Sabiduria Ta Duna Hopi Spiertamento

Kico di sobreviviente? De echo, ni un hende no tin nodi muri na Armagedon. Apostel Pedro a remarca: ‘Yehova no kier pa ningun hende bai perdi, ma pa tur bin na repentimento.’ (2 Pedro 3:9) Y apostel Pablo a declara cu Dios “ta desea pa tur hende wordo salba y yega na conocemento di e berdad.”—1 Timoteo 2:4.

Cu e meta ei na mente, Yehova a percura na un manera sabi pa e ‘evangelio di e reino’ ser proclama na tur parti di tera, den centenares di idioma. Rond mundo hende ta hayando e oportunidad pa sobrevivi y ricibi salbacion. (Mateo 24:14; Salmo 37:34; Filipensenan 2:12) Esnan cu ta reacciona faborablemente riba e evangelio of bon noticia por sobrevivi Armagedon y biba pa semper den perfeccion den un paradijs riba tera. (Ezekiel 18:23, 32; Sofonias 2:3; Romanonan 10:13) No ta esaki ta loke bo por spera di un Dios cu ta amor?—1 Huan 4:8.

Un Dios di Amor Ta Bringa?

Sinembargo, hopi hende ta puntra nan mes pakico un Dios cu ta personifica amor ta bai causa morto y destruccion di gran parti di humanidad. Nos por compara e situacion cu esun di un cas pesta cu insecto. Bo no ta di acuerdo cu un doño di cas responsabel mester proteha e salud y bienestar di su famia door di caba cu e pest?

Di igual manera, ta pa motibo di e amor profundo cu Yehova tin pa hende, e mester bringa e bataya di Armagedon. E proposito di Dios ta pa haci tera un paradijs, y pa hende bira perfecto y biba na pas, sin ‘ningun hende pa spanta nan.’ (Mikeas 4:3, 4; Revelacion 21:4) Kico mester haci anto cu hende cu ta menasa e pas y siguridad di nan prohimo? Dios mester elimina e “pest” ei—e malbadonan incorigibel—pa beneficio di e hustonan.—2 Tesalonicensenan 1:8, 9; Revelacion 21:8.

Hopi di e conflictonan y dramamento di sanger djawe ta ser causa pa gobernacion humano imperfecto y nan empeñonan egoista pa promove interesnan nacionalista. (Eclesiastes 8:9) Den nan afan pa amplia nan influencia, gobiernonan humano no ta haci caso mes di e Reino estableci di Dios. No tin indicacion cu nan lo cede nan soberania na Dios y Cristo. (Salmo 2:1-9) Pesei mester elimina e gobiernonan ei pa habri caminda pa e gobernacion husto di e Reino di Yehova bou di Cristo. (Daniel 2:44) Pa resolve di unabes pa semper e cuestion di ken tin derecho di goberna e planeta aki y humanidad, mester bringa e guera di Armagedon.

 Yehova lo actua na Armagedon cu e bienestar di humanidad na pecho. Cu e condicionnan di mundo cu ta birando piyo, ta e gobernacion perfecto di Dios so por satisface e necesidadnan di hende completamente. Ta su Reino so lo por trece berdadero pas y prosperidad. Con e condicionnan di mundo lo bira si Dios no interveni den asuntonan humano? Odio, violencia y guera lo no sigui tormenta humanidad manera a sosode durante siglonan di gobernacion humano? En realidad, e bataya di Armagedon ta un di e mihor cosnan cu por tuma luga!—Lucas 18:7, 8; 2 Pedro 3:13.

E Guera pa Pone Fin na Tur Guera

Armagedon lo pone fin na tur guera, algo cu ni un otro guera no a logra nunca. Ken no ta anhela e tempo ora cu lo no tin guera mas? Sinembargo, tur esfuerso humano pa pone fin na guera a fracasa. Y cada bes cu hende faya den nan intento pa pone fin na guera, esei ta simplemente enfatisa e berdad di e palabranan di Yeremias: “O SEÑOR, mi sa cu e caminda di hende no ta di dje mes; tampoco no ta keda na hende pa dirigi su pasonan.” (Yeremias 10:23) En conexion cu loke Yehova lo realisa, Bijbel ta priminti: “E ta haci gueranan stop te na e fin di tera; e ta kibra boog y ta corta lansa na dos; e ta kima e garoshinan cu candela.”—Salmo 46:8, 9.

Ora e nacionnan cuminsa uza nan armanan mortifero contra otro y menasa di destrui e medioambiente, Esun cu a traha tera lo tuma accion—na e Armagedon di Bijbel! (Revelacion 11:18) Pesei, e guera aki lo cumpli cu loke hende cu a teme Dios atrabes di siglonan solamente por a spera. Lo e vindica e gobernacion husto di e Doño di tera, Yehova Dios, riba henter su creacion.

Pues, hende cu ta stima husticia no mester tin miedo di Armagedon. Al contrario, e ta duna base pa speransa. E guera di Armagedon lo caba cu tur maldad y corupcion riba tera y habri caminda pa un husto mundo nobo bou di e gobernacion di Dios su Reino Mesianico. (Isaias 11:4, 5) Armagedon no ta un fin catastrofico spantoso; lo e marca mas bien un comienso felis pa personanan husto cu lo biba pa semper den un paradijs riba tera.—Salmo 37:29.

[Nota]

[Cuadro/Plachi na pagina 5]

MEGUIDO TA UN SIMBOLO APROPIADO

Meguido di antiguedad tawata strategicamente situa, cu bista riba e parti west di e vaye fertil di Jezreel, den nort di Israel. E stad tawata controla e rutanan di comercio internacional y militar cu tawata crusa einan. Door di esei Meguido a bira un luga di batayanan decisivo. Profesor Graham Davies a skirbi den su buki Cities of the Biblical World—Megiddo (Stadnan di e Mundo Biblico—Meguido): “E stad di Meguido ... tawata facilmente accesibel pa comerciante- y imigrantenan for di tur direccion; pero na mes momento, si e tawata suficiente fuerte, lo e por a controla acceso pa medio di e rutanan aki y asina dirigi e avance di tanto comercio como guera. Nada straño anto cu e tawata ... un premio cu hende a bringa hopi p’e y ora nan a conkist’e, nan a defend’e fuertemente.”

E historia largo di Meguido a cuminsa den e di dos milenio prome cu nos era, ora e gobernante Egipcio Tutmosis III a derota e gobernantenan Cananeo einan. El a sigui atrabes di siglonan y yega te na aña 1918 ora e general Britanico Edmund Allenby a pone e ehersito Turco sufri un derota doloroso. Ta na Meguido Dios a permiti hues Barak aplasta e rei Cananeo Yabin. (Huesnan 4:12-24; 5:19, 20) Den e bicindario ei hues Gideon a caba cu e Madianitanan. (Huesnan 7:1-22) Ta einan tambe e reinan Ocozias y Yosias a ser mata.—2 Reinan 9:27; 23:29, 30.

Ta na su luga anto pa establece un conexion entre Armagedon y e area di Meguido pasobra e tawata e escenario di varios bataya decisivo. E ta un simbolo apropiado di Dios su victoria completo riba tur forsa enemigo.

[Reconocemento]

Pictorial Archive (Near Eastern History) Est.

[Plachi na pagina 7]

Rond mundo, hende ta hayando un spiertamento y e oportunidad pa sobrevivi Armagedon

[Plachi na pagina 7]

Armagedon lo marca un comienso felis