Bira Ministernan Progresivo y Adaptabel

“Mi a bira tur cos pa tur hende, pa di tur manera mi por salba algun.”—1 CORINTIONAN 9:22.

1, 2. (a) Den ki maneranan apostel Pablo tawata un minister efectivo? (b) Con Pablo mes a describi su actitud pa cu su asignacion?

E TAWATA sinti su mes comodo serca intelectualnan sofistica y serca trahadonan humilde di tent. Su manera di papia a combence dignatarionan Romano y tambe campesinonan di Frigia. Su cartanan a motiva Griegonan liberal y Hudiunan conservativo. Su logica tawata irefutabel y su manera di papia tawatin un atraccion emocional poderoso. El a purba haya puntonan en comun cu tur hende di manera cu lo e por a yuda algun di nan pone fe den Cristo.—Echonan 20:21.

² E homber ei tawata apostel Pablo, kende sin duda tawata un minister efectivo y progresivo. (1 Timoteo 1:12) El a haya di Hesus e encargo pa “hiba [Cristo su] nomber na e paganonan y reinan y e yiunan di Israel.” (Echonan 9:15) Ki actitud e tawatin pa cu su asignacion? El a declara: “Mi a bira tur cos pa tur hende, pa di tur manera mi por salba algun. Y mi ta haci tur cos pa causa di evangelio, pa mi por tuma parti den dje.” (1 Corintionan 9:19-23) Kico nos por siña for di e ehempel di Pablo cu por yuda nos ser mas efectivo den nos trabou di predica y siña hende?

Un Homber Transforma Tawatin Exito den un Asignacion Dificil

3. Kico tawata Pablo su sintimento pa e cristiannan prome cu el a comberti?

³ Ta semper Pablo tawata un persona bondadoso, cu gran pasenshi, apto pa e asignacion cu el a haya? Definitivamente cu no! Fanatismo religioso a haci Saulo (manera Pablo tawata conoci anteriormente) un persiguido violento di e siguidonan di Cristo. Como hoben, el a aproba e asesinato di Esteban. Mas despues, Pablo a persigui e cristiannan sin misericordia. (Echonan 7:58; 8:1, 3; 1 Timoteo 1:13) El a sigui ta “yen di menasa y gusto pa mata e disipelnan di Señor.” Siendo cu e no a keda satisfecho cu persigui solamente e creyentenan na Herusalem, el a cuminsa plama su campaña di odio y a yega te den parti nort na Damasco.—Echonan 9:1, 2.

4. Ki ahustenan Pablo tawatin cu haci pa cumpli cu su asignacion?

⁴ E causa basico di Pablo su odio intenso pa cristianismo probablemente tawata e conviccion cu e fe nobo aki lo a corumpi hudaismo door di mescl’e cu ideanan djafo indeseabel. De echo, Pablo tawata “un farizeo”, y e nomber ei mes ta nifica “esun separa.” (Echonan 23:6) Nos por imagina con geshock Pablo lo mester a keda ora cu el a haya sa cu Dios a scohe e pa predica Cristo na net e hendenan no Hudiu! (Echonan 22:14, 15; 26:16-18) Figura bo cu farizeonan a nenga di asta come cu hende cu nan a considera di ta pecado! (Lucas 7:36-39) Sin duda Pablo lo mester a haci gran esfuerso pa reevalua su punto di bista y pon’e na harmonia cu e boluntad di Dios, kende su boluntad ta cu tur clase di hende mester ser salba.—Galationan 1:13-17.

5. Con nos por imita Pablo den nos ministerio?

⁵ Kisas nos tambe mester haci mescos. Segun cu nos ta topa cu un variedad cada bes mas grandi di hende di diferente pais y di otro idioma den nos teritorionan, nos tin cu haci un esfuerso conciente pa analisa nos actitud y kita cualkier prehuicio cu nos lo por tin. (Efesionan 4:22-24) Sea cu nos ta realisa esei of no, nos ta ser forma door di nos educacion social y escolar. Eseinan por inculca den nos puntonan di bista y  actitudnan cu ta basa riba prehuicio y cu ta inflexibel. Nos tin cu vence tal sintimentonan pa nos por tin exito den haya y yuda hende manso manera carne. (Romanonan 15:7) Esei ta loke Pablo a haci. El a acepta e reto di expande su ministerio. Motiva pa amor, el a desaroya habilidadnan di siña hende cu ta digno di imitacion. De echo, un analisis di e ministerio di e “apostel di e paganonan” ta mustra cu den e trabou di predica y siña hende, Pablo tawata atento, adaptabel y ingenioso. *—Romanonan 11:13.

Un Minister Progresivo den Accion

6. Con Pablo a pone atencion na e background di su oyentenan, y cu ki resultado?

⁶ Pablo tawata atento na e creencianan y background di su oyentenan. Papiando cu rei Agripa II, Pablo a reconoce cu e rei tawata “un experto den tur custumber y cuestion cu tin den e Hudiunan.” Anto Pablo habilmente a uza loke e tawata sa di Agripa su creencianan y a papia cu ne tocante asuntonan cu e rei a compronde hopi bon. Pablo su rasonamento tawata asina cla y combencente cu Agripa a bisa: “Casi bo ta combence mi pa bira cristian.”—Echonan 26:2, 3, 27, 28.

7. Con Pablo a demostra di ta adaptabel ora el a predica na un multitud na Listra?

⁷ Tambe Pablo tawata adaptabel of flexibel. Tuma nota con el a uza completamente un otro metodo ora el a purba descurasha un multitud den e stad di Listra di adora e cu Barnabas como dios. A yega di ser bisa di e hendenan aki, cu a papia e idioma Licaonica, cu nan tawata entre esnan menos educa y mas supersticioso di e poblacion. Segun Echonan 14:14-18, Pablo a señala na e creacion y su abundancia di provisionnan natural como prueba di e superioridad di e Dios berdadero. E argumento ei tawata facil pa  compronde, y aparentemente esei a “stop e multitudnan di ofrece sacrificio” na Pablo y Barnabas.

8. Den ki maneranan Pablo a mustra cu e tawata adaptabel apesar di e sintimentonan fuerte cu tin biaha e tawatin?

⁸ Claro cu Pablo no tawata perfecto, y tawatin biaha cu e tawatin sintimentonan fuerte contra cierto cosnan. Por ehempel, na un ocasion ora cu nan a atac’e na un manera humiyante y inhusto, el a papia bruto cu un Hudiu cu yama Ananias. Pero ora nan a bisa Pablo cu inconcientemente el a insulta e sumo sacerdote, el a pidi despensa mesora. (Echonan 23:1-5) Na Atenas, e tawata na prome instante “perturba [of, “irita”, NW] ora cu el a mira e stad yen di idolo.” Sinembargo, den su discurso riba Areopago, Pablo no a demostra cu e tawata irita. En bes di esei, el a papia cu e hendenan di Atenas den nan foro, y a uza un punto en comun pa rasona cu nan door di referi na nan altar dedica “Na un Dios Desconoci” y door di cita un di nan poetanan.—Echonan 17:16-28.

9. Con Pablo a demostra di ta ingenioso ora di trata cu diferente auditorio?

⁹ Ora di trata cu diferente auditorio, Pablo a demostra di ta masha ingenioso. El a tene cuenta cu e cultura y ambiente cu a forma e mentalidad di su auditorio. Ora el a skirbi e cristiannan na Roma, e tawata bon conciente di e echo cu nan a biba den e capital di e poder politico di mas grandi di e tempo ei. Un punto principal di Pablo su carta pa e cristiannan na Roma tawata cu e poder di corumpi di Adam su pica ta ser conkista door di Cristo su poder di rescata. El a papia cu e cristiannan Romano y esnan rond di nan den un manera cu lo a touch nan curason.—Romanonan 1:4; 5:14, 15.

10, 11. Con Pablo a adapta su comparacionnan na su oyentenan? (Wak tambe e nota na pia di pagina.)

¹⁰ Kico Pablo a haci ora cu e kier a splica berdadnan biblico profundo na su oyentenan? E apostel tawata experto den uza comparacionnan comun y facil pa compronde pa clarifica ideanan spiritual complica. Por ehempel, Pablo tawata sa cu e hendenan na Roma tawata familiarisa cu e sistema di sclabitud cu tawatin den henter e Imperio Romano. De echo, hopi di e personanan cu el a skirbi probablemente tawata catibo. Pesei Pablo a uza e comparacion di sclabitud pa reforsa su argumento poderoso tocante e escohencia cu un persona ta haci pa somete su mes sea na pica of na husticia.—Romanonan 6:16-20.

¹¹ Un buki di consulta ta bisa: “Entre e Romanonan . . . un doño por a libra un catibo sin ningun condicion, of e catibo por a cumpra su libertad door di paga su doño. Tambe por a haci areglo pa e catibo haya libertad, si a pasa e catibo over pa un dios.” Un catibo libera por a sigui traha pa su doño pa un salario. Probablemente Pablo a referi na e practica aki ora el a skirbi tocante e escohencia cu un persona tin encuanto cua doño lo e obedece: pica of husticia. Cristiannan na Roma a ser libra di pica y awor Dios a bira nan doño. Nan tawata liber pa sirbi Dios, sinembargo ainda nan por a scohe pa sirbi pica—nan exdoño—si nan a desea esei. E comparacion simpel ei pero bon conoci lo a motiva e cristiannan na Roma pa puntra nan mes: ‘Ta cua doño ami ta sirbiendo?’ *

Siña for di Pablo Su Ehempel

12, 13. (a) Ki esfuerso nos tin cu haci awe pa por yega na curason di nos auditorio cu ta hopi mixto? (b) Kico abo a haya ta duna bon resultado ora di predica na hende di diferente background?

¹² Mescos cu Pablo, nos mester ta atento,  adaptabel y ingenioso pa nos por yega na curason di nos auditorio cu ta hopi mixto. Pa yuda nos oyentenan capta e sentido di e bon nobo, nos ta desea di haci mas cu djis un bishita superficial, entrega un mensahe prepara of laga literatura biblico. Nos ta haci esfuerso pa saca afo kico ta nan necesidad- y precupacionnan, loke nan ta gusta y no ta gusta, y nan temor- y prehuicionan. Aunke esaki ta rekeri cu mester pensa hopi y haci basta esfuerso, rond mundo publicadonan di Reino ansiosamente ta haci esei. Por ehempel, e sucursal di Testigonan di Yehova na Hungria ta informa: “E rumannan ta demostra respet pa e custumbernan y estilo di bida di hende di otro nacion y nan no ta spera di nan cu nan mester adapta na custumbernan local.” Testigonan na otro parti ta purba haci mescos.

¹³ Den un pais na Lehano Oriente, mayoria hende ta precupa cu salud, educacion di yiu y enseñansa. E publicadonan di Reino einan ta purba enfatisa e topiconan aki en bes di papia tocante asuntonan manera condicionnan mundial cu ta empeora of problemanan social complica. Asina tambe, publicadonan den un stad grandi na Merca a ripara cu hende den un cierto bario den nan teritorio tawata precupa cu asuntonan manera corupcion, trafico pega y criminalidad. E Testigonan ta uza e topiconan aki pa cuminsa combersacionnan biblico, anto cu exito. Maestronan di Bijbel efectivo ta haci sigur cu sin importa ki topico nan scohe, nan keda positivo y alentador, enfatisando e balor practico di aplica principionan biblico awor y e perspectivanan felis cu Dios ta ofrece pa futuro.—Isaias 48:17, 18; 52:7.

14. Describi maneranan den cua nos por adapta na e diferente necesidadnan y circunstancianan di hende.

¹⁴ Ta bon tambe pa nos varia nos manera di aborda hende den e ministerio, siendo cu e hendenan tin background cultural, educativo y religioso masha distinto. Nos manera di aborda hende cu ta kere den un Creador pero no den Bijbel lo ta distinto for di e manera cu nos ta papia cu esnan cu no ta kere cu Dios ta existi. E presentacion cu nos lo uza cu un hende cu ta haya cu tur literatura religioso ta un instrumento di indoctrinacion lo ta diferente for di esun cu nos ta uza cu un persona cu ta acepta loke Bijbel ta siña. Ta necesario pa nos ta adaptabel tambe ora di trata cu e variedad grandi di nivel di educacion di e hendenan cu nos ta papia cu ne. Maestronan habil lo uza rasonamento y comparacionnan cu ta pas cu e situacion cu nan ta confronta.—1 Huan 5:20.

 Yudansa pa Ministernan Nobo

15, 16. Dicon tin e necesidad di entrena ministernan nobo?

¹⁵ Pablo no tawata interesa solamente den mehora su propio metodonan di siña hende. El a mira tambe e necesidad di entrena y prepara cristiannan di un generacion mas hoben, manera Timoteo y Tito, pa nan bira ministernan efectivo. (2 Timoteo 2:2; 3:10, 14; Tito 1:4) Awe tambe ta mescos, tin un necesidad urgente pa duna y ricibi entrenamento.

¹⁶ Na aña 1914, tawatin aproximadamente 5.000 publicado di Reino rond mundo; awe, tur siman rond di 5.000 persona nobo ta ser batisa! (Isaias 54:2, 3; Echonan 11:21) Ora cu hende nobo cuminsa asocia cu e congregacion cristian y ta desea di participa den e ministerio, nan tin mester di entrenamento y guia. (Galationan 6:6) Ta masha importante pa nos uza e metodonan di e Shon, Hesus, ora di siña y entrena disipelnan. *

17, 18. Con nos por yuda publicadonan nobo haya confiansa den e ministerio?

¹⁷ Hesus no a djis busca un multitud y bisa su apostelnan pa cuminsa papia cu nan. Prome, el a enfatisa pakico e trabou di predica ta necesario y a anima nan pa persisti den oracion relaciona cu nan ministerio. Caba el a percura tres cos basico: un compañero, un asignacion di teritorio y un mensahe. (Mateo 9:35-38; 10:5-7; Marco 6:7; Lucas 9:2, 6) Nos por haci mescos. Sea cu nos ta yudando nos propio yiu, un studiante nobo of un persona cu pa un tempo no a participa den e actividad di predica, ta bon pa nos haci esfuerso pa percura entrenamento den e manera aki.

¹⁸ Publicadonan nobo tin mester di basta yudansa pa nan haya confiansa den presenta e mensahe di Reino. Abo por yuda nan prepara y practica un presentacion simpel y atractivo? Den veld, laga nan siña for di bo ehempel segun cu bo ta papia na e prome casnan. Bo por sigui e patronchi di Gideon, kende a bisa su compañeronan di bataya: “Wak mi y haci mescos.” (Huesnan 7:17) Caba duna e persona nobo e oportunidad di participa. Elogia publicadonan nobo calurosamente pa nan esfuerso, y ora ta apropiado, duna nan sugerencianan cortico con pa mehora.

19. Kico ta bo determinacion segun cu bo ta haci esfuerso pa “cumpli cu bo ministerio” plenamente?

¹⁹ Pa nos por ‘cumpli cu nos ministerio’ plenamente, nos ta determina pa bira mas adaptabel den nos manera di aborda hende, y nos kier entrena ministernan nobo pa haci mescos. Ora nos pensa riba e importancia di nos meta, esta, di comparti e conocemento di Dios cu ta hiba na salbacion, nos ta keda combenci cu ta bale la pena tur e esfuerso cu nos tin cu haci pa bira “tur cos pa tur hende, pa di tur manera [nos] por salba algun.”—2 Timoteo 4:5; 1 Corintionan 9:22.

[Nota]

Bo Ta Corda?

• Den ki maneranan nos por imita Pablo den nos ministerio?

• Ki cambionan den nos manera di pensa probablemente ta necesario?

• Con nos por mantene nos mensahe positivo?

• Kico ministernan nobo tin mester pa nan por desaroya confiansa?

[Preguntanan di Estudio]

[Comentario na pagina 29]

Ora di predica y siña hende, apostel Pablo tawata atento, adaptabel y ingenioso

[Comentario na pagina 31]

Hesus a percura tres cos basico pa su disipelnan: un compañero, un asignacion di teritorio y un mensahe

[Plachi na pagina 28]

Pablo a logra yega na curason di diferente auditorio door di ser adaptabel

[Plachi na pagina 30]

Ministernan efectivo ta tuma na cuenta e background cultural di nan oyentenan

[Plachi na pagina 31]

Ministernan progresivo ta yuda esnan nobo prepara pa e ministerio