E Palabra di Yehova Ta Bibo

Puntonan Sobresaliente di e Buki di Segundo Cronicanan

NA COMIENSO di e buki biblico di Segundo Cronicanan, Salomon ta gobernando como rei riba Israel. E buki ta termina cu e siguiente palabranan di rei Ciro di Persia na e Hudiunan exilia na Babilonia: “[Yehova] a manda mi traha un cas p’e na Herusalem cu ta keda na Huda. Esun cu ta meimei di boso di henter su pueblo, cu SEÑOR su Dios sea cu ne, y lag’e subi bai [Herusalem].” (2 Cronicanan 36:23) E sacerdote Esdras a completa e buki na aña 460 prome cu nos era, y e buki ta abarca 500 aña—for di aña 1037 pa 537 prome cu nos era.

E decreto di Ciro ta habri caminda pa e Hudiunan regresa Herusalem y reestablece Yehova su adoracion einan. Sinembargo, e tantisimo añanan di cautiverio na Babilonia tawatin su efecto. E exiliadonan cu a bolbe bek no conoce nan historia nacional. Segundo Cronicanan ta duna nan un resumen bibo di susesonan cu a tuma luga bou di mando di e reinan di e liña di desendencia real di David. E naracion ta interesa nos tambe pasobra e ta resalta e bendicionnan cu ta bin di obedece e Dios berdadero y e consecuencianan di desobedec’e.

UN REI TA TRAHA UN CAS PA YEHOVA

(2 Cronicanan 1:1–9:31)

Yehova ta duna rei Salomon e peticion di Salomon su curason—sabiduria y conocemento—hunto cu rikesa y honor. E rei ta traha un cas magnifico pa Yehova den Herusalem, y e pueblo ta alegra y ta “contento di curason.” (2 Cronicanan 7:10) Salomon ta “surpasa tur e reinan di tera den rikesa y den sabiduria.”—2 Cronicanan 9:22.

Despues di a goberna Israel pa 40 aña, Salomon ‘ta bai sosega serca su tatanan, y su yiu homber Roboam ta cuminsa reina na su luga.’ (2 Cronicanan 9:31) Esdras no ta skirbi con Salomon a dual for di adoracion berdadero. E unico puntonan negativo cu ta ser menciona di e rei ta cu di un manera imprudente e ta adkiri hopi cabai for di Egipto y su matrimonio cu e yiu mohe di Farao. Pues, e cronista ta presenta e relato desde un punto di bista positivo.

 Contesta Riba Pregunta Biblico:

2:14—Dicon e liña di desendencia di e artesano describi akinan ta distinto for di esun na 1 Reinan 7:14? Prome Reinan ta referi na e artesano su mama como “un biuda for di e tribu di Neftali” pasobra e mama a casa cu un homber di e tribu ei. Pero e mama mes tawata for di e tribu di Dan. Despues cu su esposo a muri, el a casa cu un homber di Tiro, y e artesano tawata un yiu di e matrimonio ei.

2:18; 8:10—E versiculonan aki ta declara cu e cantidad di oficialnan principal cu a sirbi como supervisor di e proyecto y como forman riba e trahadonan tawata 3.600 plus 250, mientras cu segun 1 Reinan 5:16; 9:23 [NW], nan cantidad tawata 3.300 plus 550. Dicon e cifranan ta diferente? Parce cu e diferencia ta sinta den e manera cu a clasifica e oficialnan principal. Podise Segundo Cronicanan ta mustra e diferencia entre 3.600 forman no Israelita y 250 cu si ta Israelita, mientras cu Prome Reinan ta haci un distincion entre 3.300 forman y 550 hefe di un rango mas halto. En todo caso, e cantidad total di esnan cu tawata oficial principal ta 3.850.

4:2-4—Dicon a uza figura di buey of toro den e construccion di e base di e lama di metal basha? Den e Scritura, buey of toro ta un simbolo di forsa. (Ezekiel 1:10, NW; Revelacion 4:6, 7, NW) E decision pa traha figura di buey tawata apropiado pasobra e 12 bueynan di coper a carga e inmenso “lama”, cu a pisa un 30 tonelada. Trahamento di e bueynan pa e proposito aki di ningun manera a viola e di dos mandamento, pasobra esei a prohibi pa traha obhetonan di adoracion.—Exodo 20:4, 5.

4:5—Kico tawata e capasidad total di e lama di metal basha? Yen yen, e lama por a carga tres mil bato, esta, rond di 66.000 liter. Sinembargo, e nivel normal tawata probablemente rond di dos tercera parti di su capasidad. Prome Reinan 7:26 ta declara: “E [lama] por a contene dos mil bato [44.000 liter].”

5:4, 5, 10—Cua articulonan di e tabernakel original a bira parti di e tempel di Salomon? E unico articulo for di e tent di reunion original cu nan a warda den e tempel di Salomon tawata e Arca. Despues cu a traha e tempel, nan a hiba e tabernakel for di Gabaon pa Herusalem y aparentemente ei nan a ward’e.—2 Cronicanan 1:3, 4.

Les pa Nos:

1:11, 12. Salomon su peticion a mustra Yehova cu haya sabiduria y conocemento tawata den curason di e rei. Nos oracionnan na Dios en berdad ta revela kico tin den nos curason. Ta sabi di nos parti pa analisa e contenido di nos oracionnan.

6:4. Aprecio di curason pa Yehova su bondad amoroso mester motiva nos pa bendiciona Yehova, es decir, alab’e cu cariño y gratitud.

6:18-21. Aunke ningun edificio no por contene Dios, e tempel mester a sirbi como e centro di Yehova su adoracion. Awe, Salonnan di Reino di Testigonan di Yehova ta sirbi como centro di adoracion berdadero den comunidad.

6:19, 22, 32. Tur hende por a acudi na Yehova den oracion y e ta scucha nan, for di e rei te na e hendenan di mas insignificante den e nacion, asta un stranhero cu haci oracion cu sinseridad. *—Salmo 65:2.

SERIE DI REI DEN E LIÑA DI DESENDENCIA DI DAVID

(2 Cronicanan 10:1–36:23)

E reino uni di Israel ta wordo parti den dos: e reino di dies tribu den parti nort y e reino di e dos tribunan di Huda y Benjamin den parti suit. En bes di mustra nacionalismo, e sacerdotenan y e Levitanan den henter Israel ta keda leal na e aliansa di Reino door di sostene  e yiu homber di Salomon, Roboam. Un poco mas cu 30 aña despues cu a completa e tempel, nan ta horta tur su tesoronan.

Di e 19 reinan cu ta sigui Roboam, 5 ta fiel, 3 ta cuminsa bon pero ta bira infiel, y uno ta bandona su caminda malbado. E resto di gobernantenan ta haci loke ta malo den bista di Yehova. * E capitulonan ta enfatisa e actividadnan di e cinco reinan cu a pone nan confiansa den Yehova. E relato cu ta mustra con Ezekias a reanuda sirbishinan di tempel y esun con Yosias a haci areglo pa tene un Pasco Hudiu grandi, lo mester tawata un gran animacion pa e Hudiunan interesa den reestablece Yehova su adoracion na Herusalem.

Contesta Riba Pregunta Biblico:

13:5—Kico e expresion “un aliansa di salo” tawata kiermen? Debi na salo su capasidad di conserva, el a bira un simbolo di algo permanente y incambiabel. Pues anto, “un aliansa di salo” ta indica un acuerdo obligatorio.

14:2-5; 15:17—Rei Asa a kita tur “e luganan halto”? Aparentemente cu no. Kisas Asa a kita solamente e luganan halto conecta cu e adoracion di diosnan falso pero no esnan caminda hende tawata adora Yehova. Podise tambe e hendenan a bolbe traha luganan halto den e ultimo parti di Asa su reinado. E luganan halto aki su yiu homber Josafat a kita. De echo, e luganan halto no a disparce completamente, ni sikiera durante e reinado di Josafat.—2 Cronicanan 17:5, 6; 20:31-33.

15:9; 34:6—Kico tawata e posicion di e tribu di Simeon ora cu a parti e reino di Israel na dos? Siendo cu e tribu di Simeon a haya como herencia varios area den e teritorio di Huda, nan tawata geograficamente den e reino di Huda y Benjamin. (Hosue 19:1) Sinembargo, den e aspecto religioso y politico, e tribu a alinea su mes na banda di e reino den parti nort. (1 Reinan 11:30-33; 12:20-24) Pesei, Simeon a wordo conta hunto cu e reino di dies tribu.

16:13, 14—Asa a ser crema? No, e “candela masha grandi” cu nan a sende ta referi na e kimamento di specerij, no na cremacion di Asa.

35:3—For di unda Yosias a trece e Arca santo na e tempel? Bijbel no ta bisa si ta un di e reinan malbado anteriormente a kita e Arca of si ta Yosias a hib’e un otro caminda pa ten’e safe durante cu nan tawata haci trabounan extenso di reparacion na e tempel. E unico referencia historico na e Arca despues di e tempo di Salomon ta ora Yosias a trec’e den e tempel.

Les pa Nos:

13:13-18; 14:11, 12; 32:9-23. Ki un gran les nos por siña tocante e importancia di depende riba Yehova!

16:1-5, 7; 18:1-3, 28-32; 21:4-6; 22:10-12; 28:16-22. Aliansanan cu hende stranhero of cu esnan no creyente tin consecuencianan tragico. Ta sabi di nos parti pa evita cualkier envolvimento innecesario cu mundo.—Huan 17:14, 16; Santiago 4:4.

16:7-12; 26:16-21; 32:25, 26. Arogancia a pone rei Asa comporta su mes malo durante e ultimo añanan di su bida. Un actitud arogante a hiba na e caida di Uzias. Ezekias a actua imprudente y podise cu orguyo ora cu el a mustra e representantenan di Babilonia su cas di tesoro. (Isaias 39:1-7) Bijbel ta spierta nos: “Orguyo ta bin prome cu destruccion, y un spirito arogante prome cu caida.”—Proverbionan 16:18.

16:9. Yehova ta yuda esnan kende nan curason ta completo pa cu ne, y e ta ansioso pa uza su poder na nan fabor.

18:12, 13, 23, 24, 27. Mescos cu Micaias, nos mester demostra curashi pa papia tocante Yehova y su proposito.

19:1-3. Yehova ta busca e bon den nos asta ora nos dun’e motibo pa ta rabia cu nos.

 20:1-28. Nos por tin sigur cu Yehova lo laga nos hay’e ora cu humildemente nos ta acudi na dje pa guia.—Proverbionan 15:29.

20:17. Pa ‘mira e salbacion di Yehova’, nos tin cu “staciona” of posiciona nos mes activamente na banda di e Reino di Dios. En bes di tuma asuntonan den nos mes man, nos tin cu “para” keto door di pone nos pleno confiansa den Yehova.

24:17-19; 25:14. Idolatria a resulta di ta un trampa pa Joas y su yiu homber Amasias. Awe, idolatria por ta mesun destructivo, specialmente ora e ta den e forma sutil di cudishi, golosidad of nacionalismo.—Colosensenan 3:5; Revelacion 13:4.

32:6, 7. Nos tambe mester tin curashi y ser fuerte segun cu nos ta “bisti e armadura completo di Dios” y ta bringa e guera spiritual.—Efesionan 6:11-18.

33:2-9, 12, 13, 15, 16. Un persona ta demostra berdadero repentimento door di bandona un mal caminda y haci un esfuerso grandi pa haci loke ta corecto. A base di berdadero repentimento, asta un persona cu a haci asina tanto maldad manera rei Manases por haya Yehova su misericordia.

34:1-3. Ningun circunstancia negativo den nos infancia no tin nodi stroba nos di siña conoce Dios y sirbie. Un influencia positivo cu Yosias kisas tawatin durante su infancia lo por a bin di su welo cu a repenti, Manases. Sea cual sea e influencianan positivo cu Yosias lo por tawatin, cu tempo nan a produci excelente resultado. Esei por ta asina tambe den nos caso.

36:15-17. Yehova tin compasion y pasenshi. Sinembargo, su compasion y pasenshi no ta sin limite. Hende tin cu reacciona faborablemente riba e predicacion di e Reino pa nan por sobrevivi ora cu Yehova trece un fin na e mundo malbado aki.

36:17, 22, 23. Yehova su palabra semper ta cumpli.—1 Reinan 9:7, 8; Yeremias 25:9-11.

Motiva pa Actua Door di un Buki

Segun 2 Cronicanan 34:33: “Yosias a kita tur e abominacionnan for di tur e paisnan cu tawata pertenece na e yiunan di Israel, y a haci tur cu tawata presente na Israel sirbi SEÑOR nan Dios.” Kico a motiva Yosias pa haci esaki? Wel, ora cu Safan e secretario a trece e buki resien descubri di e Lei di Yehova pa rei Yosias, e rei a laga nan les’e na bos halto. Yosias a keda asina conmovi pa loke el a scucha, cu yen di celo el a promove adoracion puro durante henter su bida.

Pues, si nos lesa e Palabra di Dios y medita riba loke nos lesa, esei por tin un efecto profundo riba nos. Reflexionando riba e relato di e reinan den liña di desendencia di David no ta anima nos pa imita ehempel di esnan cu a haci Yehova nan confiansa y evita e conducta di esnan cu no a haci esei? Segundo Cronicanan ta stimula nos pa duna debocion exclusivo na e Dios berdadero y keda fiel na dje. Su mensahe definitivamente ta bibo y ta eherce poder.—Hebreonan 4:12.

[Nota]

[Plachi na pagina 18]

Bo sa dicon buey of toro tawata un representacion apropiado den e base di e lama di metal basha?

[Plachinan na pagina 21]

Aunke na mucha Yosias a haya masha tiki yudansa, toch el a crece bira un fiel sirbido di Yehova