Un Testimonio di Amor, Fe y Obediencia

E MAINTA di 16 di mei 2005 tawatin un temperatura agradabel y un solo briyante na Watchtower Farms na Wallkill, New York. E yerbanan nechi corta y e areanan di flor tawata briya di e awasero cu a yobe den marduga. Un pato cu su ocho yiunan tawata landa trankil di nan na rand di un tanki di awa (vijver). Bishitantenan a admira e bunita bista. Nan tawata papia cu un tono suave, como si fuera pa no kibra e trankilidad di mainta.

E bishitantenan tawata Testigonan di Yehova cu a bini for di 48 pais rond mundo. Pero no ta paisahe bunita nan a bin admira. Nan tawata interesa den loke tawata tumando luga den un edificio espacioso traha di baksteen, cu ta e extension mas resien di e compleho di Betel di Merca na Wallkill. Ora nan a drenta den e edificio ei nan a keda un biaha mas impresiona, aunke e esena si no tawata nada keto ni trankil.

For di un balcon e bishitantenan por a contempla abou un area yen di mashin. Cinco mashin di imprenta grandisimo ta ocupa un vloer di cement bon gewax, mas grandi cu seis veld di bala. Aki ta caminda ta imprimi Bijbel, buki y revista. Rolnan inmenso di papel, di cua cada un ta pisa 1.700 kilo, ta drei manera wiel di un truck cu ta core na velosidad halto. Cada rol di papel ta 23 kilometer largo y e papel ta pasa door di e imprenta den apenas 25 minuut. Durante e tempo ei, e mashin ta aplica e inkt y sec’e, caba e ta fria e papel pa esaki por wordo dobla den forma di revista cu ta pasa na velosidad halto riba fahanan di transporte cu ta core na laira pa wordo hinca den caha y manda na e congregacionnan. Otro mashinnan ta imprimi seccionnan di buki, cuanan ta wordo transporta rapidamente pa un deposito cu ta ocupa  henter un area di vloer te blafon. Despues ta manda nan pa e departamento di encuaderna, of di bind in buki. Henter e proceso ta ser dirigi pa computer cu un precision harmonioso.

Despues cu e bishitantenan a sali for di e drukkerij, nan a pasa pa e departamento di encuaderna buki. Aki mashinnan ta produci buki cu kaft duro y Bijbel di luho. Nan por produci te cu 50.000 pa dia. Ta pega e seccionnan di buki den e orden corecto, cose nan y corta e randnan. Despues ta pega e kaftnan, caba hinca nan den caha di carton. Anto ta seya e cahanan, pone etiket riba nan y stapel nan riba palet. Henter e sistema aki ta automatisa. Banda di tur esaki tin un lopende band cu ta traha y paketa un 100.000 buki cu kaft moli pa dia. Esaki tambe ta consisti di tur tipo di mashin—masha hopi motor, faha di transporte, gear, wiel y fambel—y tur ta moviendo na un velosidad asombroso pa produci literatura biblico.

E drukkerij cu su ekipo supermoderno, di alta velosidad y cu ta traha cu e precision di un holoshi bon diseña ta un maraviya di tecnologia avansa. Manera nos lo mira, e ta alabes un testimonio di e amor, fe y obediencia di e pueblo di Dios. Ma dicon a muda e drukkerij for di Brooklyn, New York, pa Wallkill?

Un motibo principal tawata pa simplifica e trabounan di imprenta y mandamento di carga door di centralisa tur cos na un solo sitio. Pa hopi aña tawata imprimi y manda buki for di Brooklyn, y tawata imprimi y manda revista for di Wallkill. Door di combina tur cos na e mesun sitio por a reduci personal y haci mihor uzo di fondonan di contribucion. Ademas, ya cu e mashinnan di imprenta na Brooklyn tawata birando bieu, a manda busca dos mashin di imprenta nobo marca MAN Roland Lithoman for di Alemania. E mashinnan aki tawata mucho grandi pa pas den e drukkerij na Brooklyn.

Yehova Ta Respalda e Obra

E meta di e trabou di imprimi semper tawata pa plama e bon nobo di e Reino di Dios. For di cuminsamento caba tawata bisto cu e bendicion di Yehova tawata riba e trabounan aki. Di aña 1879 pa 1922 a imprimi e bukinan na drukkerijnan comercial. Na 1922 a huur un edificio di seis piso na Concord Street 18, Brooklyn, y a cumpra ekipo pa imprimi buki. E tempo ei algun persona tawata duda si e rumannan por a haci e trabou.

Un di nan tawata e director di e compania cu tawata imprimi mayoria di nos bukinan. Ora el a bishita Concord Street, el a bisa: “Aki boso tin un facilidad di imprenta di primera clase, y no tin ni un hende den e luga aki cu sa kico pa haci cu ne. Den seis luna henter e cos aki lo ta un monton di hero bieu; y boso lo bin mira cu e hendenan cu mester imprimi pa boso ta esnan cu semper a hacie y cu ta den e negoshi di imprenta.”

E superintendente di e drukkerij di e tempo ei, Robert J. Martin, a remarca: “Esei a zona basta logico, pero e no a tene cuenta cu Señor; y semper Señor tawata cu nos. ... No a dura mucho cu nos a cuminsa produci buki.” Durante e 80 añanan cu a sigui, Testigonan di Yehova a imprimi miles di miyones di literatura cu nan propio mashinnan di imprenta.

Anto dia 5 di october 2002, na e reunion anual di Watch Tower Bible and Tract Society of Pennsylvania, a anuncia cu e Cuerpo Gobernante a aproba pa muda e actividadnan di imprenta di e sucursal di Merca pa Wallkill. A bestel dos mashin di imprenta nobo cu lo a ser entrega na februari 2004. E rumannan lo mester a diseña y amplia e drukkerij y prepara tur cos pa den 15 luna ricibi e mashinnan nobo.  Anto despues, den nuebe luna lo mester a completa instalacion di e departamento nobo di encuaderna buki y e facilidadnan di distribucion. Kisas algun persona tawatin nan dudanan ora nan a tende den cuanto tempo tur cos lo mester tawata cla—un tarea cu a parce casi imposibel. Pero e rumannan tawata sa cu nan lo a alcans’e cu Yehova su bendicion.

“Un Dushi Spirito di Cooperacion”

Sabiendo cu Yehova su sirbidonan lo a ofrece nan mes boluntariamente, e rumannan a cuminsa e proyecto. (Salmo 110:3) Su magnitud a rekeri mas trahado cu tawatin disponibel den Betel su departamentonan di construccion. For di Merca y Canada mas cu 1.000 ruman homber y mohe cu tin ofishi di construccion a ofrece pa sirbi entre un siman pa tres luna como parti di un programa di boluntario temporal. Otronan cu ta forma parti di e programanan di sirbido y boluntario internacional a ser invita pa participa den e proyecto. Comitenan Regional di Construccion tambe a contribui grandemente.

Hopi ruman cu a bin traha como boluntario riba e proyecto di Wallkill a haci gasto grandi pa biaha y mester a tuma dia liber di trabou. Pero nan a haci e sacrificionan aki cu goso. E esfuersonan pa hospeda y alimenta e gran cantidad di boluntarionan adicional aki a duna e famia di Betel oportunidad pa apoya e proyecto. Mas cu 535 miembro di e famia di Betel di Brooklyn, Patterson y Wallkill a ofrece pa traha riba e proyecto riba diasabra, banda di nan asignacionnan normal di den siman. E apoyo formidabel cu e pueblo di Dios a duna e proyecto historico aki tawata posibel unicamente pasobra Yehova tawata tras di dje.

Otronan a contribui financieramente. Por ehempel, e rumannan a ricibi un carta di Abby di nuebe aña di edad. E hobensita aki a skirbi: “Mi ta masha gradicido pa tur e trabou cu boso ta haci, pa tur e bunita bukinan cu boso ta traha. Por ta lo mi bishita boso pronto. Mi tata a bisa mi otro aña! Lo mi bisti un badge pa boso sa ken mi ta. Ata 20 dollar aki pa e mashinnan nobo! Ta mi zakgeld, pero mi kier duna boso.”

Un ruman mohe a skirbi: “Por fabor acepta mi mutsnan gehak como regalo cu mi a traha cu mi dos mannan humilde. Mi kier pa boso entrega e mutsnan aki na e rumannan cu ta trahando riba e proyecto di Wallkill. Un almanak a bisa cu lo bai tin un winter hopi friu. Mi no sa si ta berdad, pero loke si mi sa ta cu gran parti di e trabou na Wallkill lo tuma luga pafo, y mi kier haci sigur cu mi rumannan por tene nan cabes bon tapa. Mi no tin ni un di e ofishinan cu e rumannan ta buscando, pero mi por hak si, pesei mi a dicidi di uza e habilidad aki pa contribui cu loke mi tawata por.” Hunto cu e carta tawatin 106 muts gehak!

 E rumannan a completa e drukkerij segun schedule. John Larson, superintendente di e drukkerij, a bisa: “Tawatin un dushi spirito di cooperacion. Ken por duda cu Yehova a bendiciona e obra? Cosnan a cana lihe. Mi ta corda con na mei 2003 mi tawata para den lodo ta wak e rumannan basha e fundeshi di e edificio. Menos cu un aña despues, mi tawata para na e mesun luga ta wak un mashin di imprenta funciona.”

Programa di Dedicacion

E programa pa dedica e drukkerij nobo, hunto cu tres edificio di residencia, a ser teni na Wallkill riba dialuna 16 di mei 2005. E complehonan di Betel na Patterson y Brooklyn, y tambe Betel di Canada tawata conecta pa mira y scucha e programa via e sistema di video. En total, 6.049 persona a disfruta di e programa. Theodore Jaracz, miembro di e Cuerpo Gobernante di Testigonan di Yehova, a sirbi como presidente y a repasa brevemente e historia di e trabounan di imprenta. Pa medio di entrevista- y presentacionnan di video, e miembronan di Comite di Sucursal John Larson y John Kikot a repasa e historia di tanto e proyecto di construccion como e trabounan di imprenta na Merca. John Barr di e Cuerpo Gobernante a duna e discurso final, dedicando e drukkerij nobo y tres compleho di residencia na Yehova Dios.

Den e siman cu a sigui e betelitanan di Patterson y Brooklyn a haya chens di bishita e facilidadnan nobo. En total, 5.920 di nan a probecha di e oportunidad ei.

Con Nos Ta Mira e Drukkerij?

Den e discurso di dedicacion, Ruman Barr a recorda su oyentenan cu pa impresionante cu e drukkerij por ta, no ta mashin ta e cos di mas importante. Ta hende ta importante. E literatura cu nos ta imprimi tin un impacto profundo riba bida di hende.

 Cada un di e mashinnan di imprenta nobo por imprimi un miyon tratado den poco mas cu un ora! Sinembargo, un solo tratado por tin un efecto duradero riba bida di un persona. Por ehempel, na 1921 un grupo di homber encarga cu mantencion di spoorbaan na Sur Africa tawata traha riba parti di un spoorbaan. Un di nan, yama Christiaan, a mira un pida papel pega bou di un rail. Tawata un di nos tratadonan. Christiaan a les’e cu sumo interes. Despues el a core bai serca su yerno y a bis’e cu un tono emociona: “Awe mi a haya e berdad!” Poco despues, nan a skirbi pa pidi mas informacion. E sucursal di Sur Africa a manda mas literatura biblico. E dos hombernan aki a studia Bijbel, batisa y comparti e berdad biblico cu otro hende. Como resultado, hopi ta esnan cu a acepta e berdad. De echo, pa cuminsamento di decada di 1990, mas cu shen di nan desendientenan tawata Testigo di Yehova—tur esei como resultado di un simpel tratado cu un homber a descubri riba un spoorbaan!

Ruman Barr a bisa cu e literatura cu nos ta imprimi ta trece hende den e berdad, ta tene nan den e berdad, ta motiva nan na un celo mas grandi y ta uni e hermandad. Y mas importante cu tur cos, e literatura cu nos tur ta yuda distribui ta glorifica nos Dios, Yehova!

Con Yehova Ta Mira e Drukkerij?

Ruman Barr a pidi esnan presente tambe pa pensa riba con Yehova ta mira e drukkerij. Yehova sigur no ta depende di dje. Si e kier e por pone piedra mes predica e bon nobo! (Lucas 19:40) Ademas, ni e complehidad, tamaño, velosidad of capasidad di e mashinnan no ta impresion’e. Corda cu ta El a crea universo! (Salmo 147:10, 11) Yehova conoce sistemanan mas sofistica pa produci literatura, sistemanan cu hende no a inventa, ni sikiera imagina. Kico Yehova ta mira anto cu di berdad tin hopi balor p’e? Sin duda e ta mira den e drukkerij aki e cualidadnan precioso di su pueblo, esta, nan amor, fe y obediencia.

Ruman Barr a ilustra e aspecto di amor den e siguiente manera. Un hobensita ta traha un bolo pa su mayornan. Probablemente esei lo conmove e mayornan. Si, maske con e bolo sali, loke ta conmove e mayornan ta e amor cu nan yiu ta demostra cu su gesto. Mescos tambe, ora Yehova wak e drukkerij nobo aki, e ta mira mas aleu cu e edificio y mashinnan. Na prome luga, e ta mir’e como un muestra di amor pa su nomber.—Hebreonan 6:10.

Ademas, mescos cu Yehova a mira e arca como un muestra di e fe di Noe, e ta mira e drukkerij aki como un prueba palpabel di nos fe. Fe den kico? Noe tawatin fe cu loke Yehova a profetisa lo cumpli. Nos tin fe cu nos ta bibando den e ultimo dianan, cu e bon nobo ta e mensahe di mas importante cu ta ser proclama riba tera, y cu ta sumamente importante pa hende tend’e. Nos sa cu e mensahe di Bijbel por salba bida.—Romanonan 10:13, 14.

Sin duda, Yehova ta mira den e drukkerij aki tambe un muestra di nos obediencia. Manera nos sa, su boluntad ta pa e bon nobo ser predica rond mundo prome cu e fin yega. (Mateo 24:14) E drukkerij aki, hunto cu esnan den otro regionnan di mundo, lo hunga un papel clave den realisacion di e encargo ei.

Si, e amor, fe y obediencia demostra den e financiamento, construccion y funcionamento di e facilidadnan aki ta ser refleha tambe den e actividad celoso di e pueblo di Yehova na tur parti di mundo segun cu nan ta sigui proclama e berdad na tur hende cu ta dispuesto pa scucha.

[Cuadro/Plachi na pagina 11]

EXPANSION DI E TRABOUNAN DI IMPRENTA NA MERCA

1920: A cuminsa imprimi revista cu e prome ekipo ‘rotary’ na Myrtle Avenue 35, Brooklyn.

1922: A muda e drukkerij pa un edificio di seis piso na Concord Street 18. A cuminsa imprimi buki tambe.

1927: A muda e drukkerij pa un edificio nobo construi na Adams Street 117.

1949: Un edificio nobo di nuebe piso a redobla capasidad di e drukkerij.

1956: Edificio nobo construi na Sands Street 77 a bolbe redobla capasidad di e drukkerij na Adams Street.

1967: A construi un edificio di dies piso y conect’e cu esnan existente; e drukkerij a bira dies biaha mas grandi cu esun cu tawata den e edificio original.

1973: A construi un drukkerij ausiliar na Wallkill, principalmente pa produccion di revista.

2004: A consentra tur trabou di imprenta, encuadernacion y distribucion na Wallkill.