Awor Ta Tempo pa Tuma Accion Decisivo

“Cuanto tempo mas boso ta keda duda entre dos opinion?”—1 REINAN 18:21.

1. Kico ta haci nos tempo asina diferente for di pasado?

ABO ta kere cu Yehova ta e unico Dios berdadero? Bo ta kere tambe cu profecianan biblico ta señala nos tempo como “e ultimo dianan” di e mundo malbado di Satanas? (2 Timoteo 3:1) Si ta asina, lo bo ta di acuerdo sin duda cu awor, mas cu nunca, ta necesario pa actua na un manera decisivo. Nunca prome den historia humano tawatin asina tanto bida na peliger.

2. Kico a pasa den e reino di dies tribu di Israel durante reinado di rei Acab?

² Den siglo 10 prome cu nos era, e nacion di Israel tawatin cu tuma algun decision hopi serio. Ken nan lo sirbi? Rei Acab, bou di influencia di su esposa pagano, Jezabel, a promove adoracion di Baal den e reino di dies tribu di Israel. Baal tawata un dios di fertilidad cu supuestamente lo mester a percura awasero y cosecha abundante. Hopi adorado di Baal probablemente tawata tira sunchi of buig dilanti di un imagen di nan dios. Baal su adoradonan a participa den orgianan sexual cu prostitutanan di tempel pa asina persuadi e dios pa bendiciona nan cosecha y bestianan di cria. Nan tawatin tambe e custumber di corta nan curpa pa laga sanger basha.—1 Reinan 18:28.

3. Ki efecto adoracion di Baal tawatin riba Dios su pueblo?

³ Un resto di mas o menos 7.000 Israelita a nenga di tuma parti den e forma di adoracion idolatra, inmoral y violento aki. (1 Reinan 19:18) Nan a pega fielmente na nan relacion cu Yehova Dios basa riba e aliansa cu nan tawatin cu ne, y pa motibo di esaki nan a ser persigui. Por ehempel, reina Jezabel a asesina hopi profeta di Yehova. (1 Reinan 18:4, 13)  Debi na e condicionnan dificil aki, mayoria Israelita a practica union di fe door di purba agrada tanto Yehova como Baal. Pero ora un Israelita kita for di Yehova y bai adora un dios falso, el a comete apostasia. Yehova a priminti di bendiciona e Israelitanan si nan a stim’e y a obedece su mandamentonan. Sinembargo, el a spierta nan cu si nan no dun’e “debocion exclusivo”, nan lo a ser destrui.—Deuteronomio 5:6-10, NW; 28:15, 63.

4. Hesus y su apostelnan a profetisa cu lo sosode kico entre cristiannan, y con esaki a cumpli?

⁴ Un situacion similar ta existi awe den cristiandad. Miembronan di iglesia ta pretende di ta cristian, pero nan dianan di fiesta, comportacion y creencianan ta na conflicto cu e siñansanan di Bijbel. Clero di cristiandad, mescos cu Jezabel, ta encabesa e persecucion di Testigonan di Yehova. Clero di cristiandad tin tambe un registro largo di ta apoya guera y pues nan ta responsabel pa e morto di miyones di miembro di iglesia. Bijbel ta identifica e apoyo ei cu religion ta duna gobiernonan di mundo como fornicacion of inmoralidad spiritual. (Revelacion 18:2, 3) Ademas cristiandad mas y mas ta tolera fornicacion literal, asta entre su clero. Hesucristo y su apostelnan a profetisa e gran apostasia aki. (Mateo 13:36-43; Echonan 20:29, 30; 2 Pedro 2:1, 2) Kico lo ta e resultado final pa mas cu mil miyon siguido di cristiandad? Y ki responsabilidad berdadero adoradonan di Yehova tin pa cu e hendenan aki y pa cu tur otro cu a ser engaña door di religion falso? Nos ta haya un contesta bon cla riba e preguntanan ei door di analisa e susesonan dramatico cu a hiba na e ‘eliminacion di Baal for di Israel.’—2 Reinan 10:28.

Dios Su Amor pa Su Pueblo Rebelde

5. Con Yehova a demostra interes amoroso den su pueblo rebelde?

⁵ Yehova Dios no tin placer den castiga hende cu bira infiel na dje. Como un Tata amoroso, e ta desea pa malbadonan repenti y bolbe bek na dje. (Ezekiel 18:32; 2 Pedro 3:9) Prueba  di esaki ta cu Yehova a uza hopi profeta den e dianan di Acab y Jezabel pa spierta Su pueblo di e consecuencianan di adoracion di Baal. Elias tawata un di e profetanan ei. Despues di un secura devastador, cu a wordo anuncia di antemano, Elias a bisa rei Acab pa reuni e Israelitanan y profetanan di Baal hunto riba Sero Carmelo.—1 Reinan 18:1, 19.

6, 7. (a) Con Elias a saca na cla e causa basico di Israel su apostasia? (b) Kico e profetanan di Baal a haci? (c) Kico Elias a haci?

⁶ E reunion a tuma luga caminda tawatin un altar di Yehova cu a ser “basha abou”, probablemente pa agrada Jezabel. (1 Reinan 18:30) Lamentablemente, e Israelitanan presente no tawata sa sigur ta ken—Yehova of Baal—tawata den mihor posicion pa produci e awasero tan necesario. Baal a wordo representa pa 450 profeta, mientras cu Elias tawata e unico profeta cu a representa Yehova. Elias a bai na raiz di nan problema, y a puntra e pueblo: “Cuanto tempo mas boso ta keda duda entre dos opinion?” Anto cu palabranan mas cla ainda, el a pone e cuestion dilanti nan: “Si Yehova ta e Dios berdadero, bai siguie; pero si ta Baal, bai siguie.” [NW] Pa motiva e Israelitanan indeciso pa rindi debocion exclusivo na Yehova, Elias a propone un test cu lo duna prueba ken ta e Dios berdadero. Nan mester a mata dos buey of toro como sacrificio, un pa Yehova y e otro pa Baal. E Dios berdadero lo a consumi su sacrificio cu candela. E profetanan di Baal a prepara nan sacrificio, anto despues pa oranan largo nan a keda grita: “O Baal, contesta nos.” Ora Elias a cuminsa haci bofon di nan, nan a corta nan curpa te ora sanger tawata basha, y nan tawata grita na bos halto. Ma no tawatin ningun contesta.—1 Reinan 18:21, 26-29.

⁷ Awor tawata Elias su beurt. Prome, el a drecha e altar di Yehova y a pone e pidanan di e buey jong riba dje. Caba el a duna ordo pa basha cuater tinashi grandi di awa riba e sacrificio. Nan a haci esaki tres biaha te ora cu e roi rond di e altar a yena cu awa. E ora ei Elias a pidi den oracion: “O SEÑOR, e Dios di Abraham, Isaak y Israel, laga ta conoci awe cu ta abo ta Dios na Israel, y cu ami ta bo sirbido y cu mi a haci tur e cosnan aki conforme bo palabra. Contesta mi, o SEÑOR, contesta mi, pa e pueblo aki sa cu ta abo, [o Yehova], ta Dios, y cu ta abo a haci nan curason bolbe atrobe.”—1 Reinan 18:30-37.

8. Con Dios a reacciona riba e oracion di Elias, y ki accion e profeta a tuma?

⁸ E Dios berdadero a reacciona door di consumi tanto e sacrificio como e altar cu candela cu a baha for di shelo. E candela ei a consumi  asta e awa den e roi rond di e altar! Imagina ki efecto esei tawatin riba e Israelitanan. “Nan a tira nan curpa abou cu nan cara te na suela; y nan a bisa: ‘Yehova ta e Dios berdadero! Yehova ta e Dios berdadero!’” [NW] E ora ei Elias a dal mas pasonan decisivo, ordenando e Israelitanan: “Gara e profetanan di Baal; no laga ni un di nan scapa.” Tur e 450 profetanan di Baal a wordo ehecuta na pia di Sero Carmelo.—1 Reinan 18:38-40.

9. Con adoradonan berdadero a bolbe ser poni na prueba?

⁹ Riba e mesun dia inolvidabel ei, Yehova a laga awasero yobe riba e tera pa prome biaha den tres aña y mei! (Santiago 5:17, 18) Bo por imagina cuanto papiamento lo tawatin entre e Israelitanan segun cu nan a regresa nan cas; Yehova a vindica su mes como e Dios berdadero. Sinembargo, e adoradonan di Baal no a entrega. Jezabel a sigui cu su campaña di persigui e sirbidonan di Yehova. (1 Reinan 19:1, 2; 21:11-16) Pues e integridad di Dios su pueblo a bolbe ser poni na prueba. Nan lo ta dunando debocion exclusivo na Yehova ora cu su dia di huicio contra e adoradonan di Baal yega?

Actua na un Manera Decisivo Awor

10. (a) Den tempo moderno, kico cristiannan ungi a bin ta haci? (b) Obedece e mandamento cu tin na Revelacion 18:4 ta encera kico?

¹⁰ Den tempo moderno, cristiannan ungi a haci un trabou paresido na esun di Elias. Cu boca y mediante pagina imprimi, nan a spierta hende di tur nacion paden y pafo di cristiandad di e peliger di religion falso. Como resultado, miyones di hende a actua na manera decisivo pa stop di ta miembro di religion falso. Nan a dedica nan bida na Yehova y a bira disipelnan batisa di Hesucristo. Si, nan a haci caso di Dios su apelacion urgente relaciona cu religion falso: “Sali for di dje, mi pueblo, pa bo no participa den su picanan y pa bo no ricibi di su plaganan.”—Revelacion 18:4.

11. Kico ta necesario pa un hende tin Yehova su aprobacion?

¹¹ Ademas tin miyones di hende cu ta gusta e mensahe basa riba Bijbel cu Testigonan di Yehova ta plama, pero toch nan no sa sigur kico nan lo mester haci. Tin di nan ta asisti de bes en cuando na reunionnan cristian, manera na conmemoracion di e Cena di Señor of na algun sesion di un congreso di districto. Nos ta urgi tur e personanan ei pa considera cu sumo atencion e palabranan aki di Elias: “Cuanto tempo mas boso ta keda bula djaki p’aya?” (1 Reinan 18:21, BPK) En bes di tarda, nan tin cu tuma accion decisivo awor y traha cu celo pa alcansa e meta di bira adoradonan dedica y batisa di Yehova. Nan perspectiva di bida eterno ta den wega!—2 Tesalonicensenan 1:6-9.

12. Den ki condicion peligroso algun cristian batisa a cai, y kico nan lo mester haci?

¹² Lamentablemente, tin algun cristian batisa cu a bira iregular of inactivo den nan adoracion. (Hebreonan 10:23-25; 13:15, 16) Tin di nan a perde nan celo debi na miedo di persecucion, debi na e precupacionnan pa gana nan pan di cada dia, debi na esfuersonan pa bira rico of debi na coremento tras di placernan egoista. Hesus a spierta cu e cosnan aki lo trompica, hoga y coi algun di su siguidonan den trampa. (Mateo 10:28-33; 13:20-22; Lucas 12:22-31; 21:34-36) En bes di “duda entre dos opinion”, na moda di papia, e personanan ei mester ta “ferviente y repenti” door di tuma accion decisivo pa cumpli cu nan dedicacion na Dios.—Revelacion 3:15-19.

E Fin Repentino di Religion Falso

13. Describi e situacion na Israel ora cu Jehu a wordo ungi como rei.

¹³ E motibo pakico ta urgente pa hende tuma accion decisivo awor ta bira bisto debi na loke a pasa na Israel un 18 aña despues cu a dicidi e cuestion di ken ta e Dios berdadero riba Sero Carmelo. Yehova su dia di huicio contra adoradonan di Baal a bin repentinamente y onverwacht durante e ministerio di Elias su susesor, Eliseo. Joram, yiu homber di rei Acab, tawata goberna Israel, y Jezabel  ainda tawata na bida como reina mama. Keto keto Eliseo a manda su sirbido bai ungi Jehu, e hefe di ehersito di Israel, como e rei nobo. E tempo ei Jehu tawata na e banda oost di Riu Yordan na Ramot-galaad, dirigiendo un guera contra e enemigonan di Israel. Rei Joram tawata na Jezreel den e vaye di yanura serca di Meguido, recuperando di un herida di bataya.—2 Reinan 8:29–9:4.

14, 15. Ki encargo Jehu a ricibi, y con el a reacciona?

¹⁴ Esaki ta loke Yehova a manda Jehu haci: “Bo mester dal e cas di bo shon Acab, pa mi venga e sanger di mi sirbidonan e profetanan, y e sanger di tur e sirbidonan di SEÑOR, kendenan a muri na man di Jezabel. Pasobra henter e cas di Acab lo perece . . . E cachonan lo come Jezabel den e teritorio di Jezreel y ningun hende lo no der’e.”—2 Reinan 9:7-10.

¹⁵ Jehu tawata un homber cu ta actua na un manera decisivo. Sin tarda, el a subi den su garoshi y a core bai pura den direccion di Jezreel. Un guardia na Jezreel a reconoce e manera di core garoshi di Jehu y a informa rei Joram. Joram e ora ei a subi su garoshi y a sali bai contra cu su hefe di ehersito. Ora nan a topa, Joram a puntra: “Ta na pas bo ta bin, Jehu?” Jehu a contesta: “Con por tin pas, tanten cu e fornicacionnan di bo mama Jezabel y su bruherianan ta asina hopi?” Anto prome cu rei Joram por a hui bai, Jehu a span su boog y a mata Joram cu un flecha cu a bora su curason.—2 Reinan 9:20-24.

16. (a) Ki situacion Jezabel su oficialnan di palacio a confronta diripiente? (b) Con Yehova su palabra relaciona cu Jezabel a cumpli?

¹⁶ Sin perde tempo, Jehu a core bai pura den su garoshi na e stad. Mirando abou for di un bentana, Jezabel, pinta cu hopi makiyahe, a cuminda Jehu cu un menasa serio. Jehu a ignor’e y a yama pidi apoyo: “Ken ta na mi banda? Ken?” E sirbidonan di Jezabel awor tawatin cu actua na un manera decisivo. Dos of tres oficial di palacio a saca nan cabes for di bentana. Mesora, nan lealtad a ser poni na prueba. “Bent’e abou”! Jehu a ordena. E oficialnan  a benta Jezabel abou riba caya, caminda e cabainan di Jehu y su garoshi a pasa riba dje. Pues, e instigado di adoracion di Baal den Israel a haya su fin mereci. Prome cu nan a haya chens di der’e, cachonan a come su carni, precis manera a ser profetisa.—2 Reinan 9:30-37.

17. Dios su huicio contra Jezabel mester fortalece nos fe den ki suseso benidero?

¹⁷ E prostituta simbolico cu ta carga e nomber ‘Babilonia e Grandi’ tambe lo tin casi mesun fin horibel. E prostituta ta representa e religionnan falso di e mundo di Satanas, cuanan a origina den e stad antiguo di Babilonia. Despues di e fin di religion falso, Yehova Dios lo dirigi su atencion na resto di humanidad cu ta forma parti di e mundo di Satanas. Esakinan tambe lo ser destrui, preparando asina e caminda pa un husto mundo nobo.—Revelacion 17:3-6; 19:19-21; 21:1-4.

18. Despues di e morto di Jezabel, kico a pasa cu adoradonan di Baal den Israel?

¹⁸ Despues di e morto di Jezabel, rei Jehu no a perde tempo pa ehecuta tur desendiente di Acab y nan apoyadonan principal. (2 Reinan 10:11) Pero hopi Israelita adorado di Baal a keda den e pais. Relaciona cu esakinan, Jehu a tuma accion decisivo pa mustra cu e “no ta tolera rivalidad pa cu Yehova.” (2 Reinan 10:16, NW) Jehu a haci como si fuera e ta un adorado di Baal y a organisa un fiesta grandi na e tempel di Baal cu Acab a laga traha na Samaria. Tur adorado di Baal den Israel a bin e fiesta. Unabes atrapa paden di e tempel, e hombernan di Jehu a mata nan tur. Bijbel ta conclui e relato cu e palabranan: “Asina Jehu a elimina Baal for di Israel.”—2 Reinan 10:18-28.

19. Ki perspectiva maraviyoso ta spera e “multitud grandi” di adoradonan leal di Yehova?

¹⁹ Adoracion di Baal a wordo elimina completamente for di Israel. Den mesun manera sigur, e religionnan falso di e mundo aki lo yega na un fin repentino y horibel. Na ken su banda abo lo ta durante e gran dia di huicio ei? Actua awor na un manera decisivo, y lo bo por tin e privilegio di ta entre e “multitud grandi” di sobrevivientenan humano di “e gran tribulacion.” E ora ei lo bo por wak atras cu goso, y lo bo alaba Dios pa e huicio cu el a ehecuta contra “e gran prostituta cu tawata corumpi tera cu su inmoralidad.” Uni hunto cu otro adoradonan berdadero, lo bo ta di acuerdo cu e palabranan emocionante cu bosnan celestial ta canta: ‘Aleluya! Pasobra Yehova nos Dios Todopoderoso ta reina.’—Revelacion 7:9, 10, 14; 19:1, 2, 6.

Pregunta pa Medita Ariba

• Con Israel di antiguedad a bira culpabel di adoracion di Baal?

• Ki gran apostasia Bijbel a profetisa, y con e profecia ei a cumpli?

• Con Jehu a elimina adoracion di Baal?

• Kico nos tin cu haci pa nos sobrevivi Dios su dia di huicio?

[Preguntanan di Estudio]

[Mapa na pagina 25]

(Pa e texto den su formato completo , wak e publicacion)

Soco

Afek

Helkat

Jokneam

Meguido

Taanak

Dotan

SAMARIA

Endor

Sunem

Ofra

Jezreel

Ibleam (Gat-rimon)

Tirsa

Bet-semes

Bet-sean (Bet-san)

Jabes-galaad?

Abel-mehola

Bet-arbel

Ramot-galaad

Seronan

Sero Carmelo

Sero Tabor

More

Sero Gilboa

[Awanan]

Lama Mediteraneo

Lama di Galilea

[Riu]

Riu Yordan

Fuente di Harod

[Reconocemento]

Basa riba mapanan reproduci cu permit di Pictorial Archive (Near Eastern History) Est. and Survey of Israel

[Plachi na pagina 26]

Participacion regular den e predicacion di Reino y asistencia na reunionnan cristian ta aspectonan importante di adoracion berdadero

[Plachi na pagina 28, 29]

Mescos cu Jehu, tur cu kier sobrevivi e dia di Yehova mester tuma accion decisivo