Bo Ta Corda?

Bo a disfruta di e edicionnan resien di E Toren di Vigilancia? Wel, wak si bo por contesta e siguiente preguntanan:

• Dicon por compara e prome pica, esta, e desobediencia di Adam, cu un enfermedad hereditario?

E ta manera un enfermedad pasobra Adam a pasa pica pa su yiunan. Pues nos a hereda e defecto di pica, mescos cu tin yiu ta hereda un enfermedad for di nan mayornan.—15/8, pagina 5.

• Kico ta e causanan basico di e creciente ola di violencia di awendia?

Satanas ta purba aleha hende for di Yehova door di sembra un spirito di violencia den nan curason, por ehempel mediante pelicula, musica y computer game cu ta laga e hungadonan imagina nan con nan ta comete brutalidad y matansa. Violencia cu medionan di comunicacion ta presenta a contribui na hopi acto di violencia.—1/9, pagina 29.

• Ken Poncio Pilato tawata?

E tawata un Romano di e clase noble di rango mas abou kende probablemente a sirbi den ehersito. Emperado Romano Tiberio a nombra Pilato como gobernado di e provincia di Hudea na aña 26 di nos era. Durante e huicio di Hesus, Pilato a tende e acusacionnan cu e lidernan Hudiu a presenta. Pa complace e multitud, el a aproba e ehecucion di Hesus.—15/9, pagina 10-12.

• Kico ta “e señal” menciona na Mateo 24:3?

E señal ta consisti di varios rasgo cu hunto ta identifica e tempo di Hesus su presencia. E señal ta inclui guera, hamber, pest y temblor, y lo a yuda Hesus su siguidonan reconoce su “presencia” [NW] y tambe “e fin di tempo.”—1/10, pagina 4-5.

• Kico tawata e Diaspora, y na unda tawata haya nan?

E palabra “Diaspora” ta referi na e Hudiunan cu a biba pafo di Palestina. Den prome siglo, e centronan principal di Hudiu tawata na Siria, Asia Menor, Babilonia y Egipto, y tawatin tambe comunidadnan mas chikito den e parti Europeo di e Imperio Romano.—15/10, pagina 12.

• Un cristian por keda cu un bon consenshi si e acepta un empleo cu e mester carga arma?

Acepta un trabou cu ta rekeri pa bo carga un arma di candela of cualkier otro arma ta un decision personal. Pero e tipo di empleonan ei ta expone bo na e posibilidad di bira culpabel di sanger si bo uza bo arma y tambe na e peliger di ser herida of mata durante un atake of como represaya. Un cristian cu ta carga tal arma lo no bin na remarca pa haya privilegio special den e congregacion. (1 Timoteo 3:3, 10)—1/11, pagina 31.

• Acaso e bataya di Armagedon lo ser bringa na un sero den Medio Oriente ya cu e palabra “Armagedon” ta bin di e expresion “Sero di Meguido”?

No. No ta existi un Sero di Meguido, solamente un serito cu ta un tiki mas halto cu e sabana pega cu ne den Israel. E area ei lo no por contene tur “e reinan di tera y nan ehersitonan.” E guera grandi di Dios lo ser bringa rond mundo, y lo pone fin na tur guera. (Revelacion 16:14, 16; 19:19; Salmo 46:8, 9)—1/12, pagina 4-7.