E Dianan di Fiesta Lo Cumpli cu Bo Expectativanan?

“Peter [e Grandi] a duna ordo pa tene un sirbishi special di Aña Nobo den tur misa dia 1 di januari. Ademas, el a duna instruccion pa uza taki di mata semperberde pa decora kozijnnan parti paden di cas. El a manda tambe pa tur ciudadano di Moscu ‘manifesta nan felicidad door di desea otro tur cos bon na bos halto’ riba e dia di Aña Nobo.”—Peter the Great—His Life and World.

KICO ta bo expectativanan pa loke hopi hende ta yama dianan di fiesta? Rond mundo nan ta bisa cu e temporada aki ta enfoca riba Pasco, e dia tradicional di nacemento di Cristo, pero e ta inclui tambe e celebracion di Aña Nobo. Pues ta trata aki di un periodo festivo di hopi dia. Den e dianan ei kisas tanto mayornan como yiunan tin vakantie, pesei e ta parce di ta un ocasion ideal pa famianan por ta hunto. Pero otronan ta referi na e dianan ei como “e temporada di Pasco di Nacemento”, ya cu nan ta recorda Cristo su nacemento y ta desea di honr’e rond di e tempo di aña aki. Talbes bo tambe ta haya cu esaki ta e aspecto di mas importante di e temporada ei.

Sea ta pa honra Cristo, pa pasa ratonan ameno cu famia, of ambos, rond mundo miyones di esposo, esposa y yiu ta spera riba e tempo aki cu gran expectativa. Kico di e aña aki? Lo e resulta di ta e tempo special ei pa e famia, y e ta special pa Dios? Si bo famia ta bini hunto, lo e cumpli cu bo expectativanan, of lo bo keda desapunta?

Hopi hende cu ta spera di mira e aspecto religioso den e celebracionnan di tanto Pasco como Aña Nobo ta ripara cu mayoria biaha esakinan no ta refleha at all e spirito di Cristo. Mas bien, e dianan di fiesta ta bira djis un tempo pa haya regalo, un capa pa haci fiesta caminda tin conducta cu ta juist deshonra Cristo, of principalmente un motibo pa e famia bini hunto. Hopi bes, cos ta daña na e ocasionnan ei ora un of mas miembro di famia come y bebe di mas, locual ta causa pleitonan cu hopi biaha ta hiba na violencia domestico. Kisas bo a yega di observa esei, of kisas bo mes a pasa den algo asina.

Si ta asina, aparentemente casi nada no a cambia anto desde e tempo di e tsar Ruso Peter e Grandi, menciona den e introduccion. Awe, hopi hende ta precupa cu e tendencia actual. Pesei nan ta desea pa e dianan di fiesta por ta un tempo di reflexion religioso profundo y pa famianan por ta den compania di otro na un manera sano. Algun asta ta boga pa un cambio, y nan ta uza lemanan manera “Jesus is the reason for the season”, pa recorda hende cu ta pa motibo di Hesus tin e dianan di fiesta. Pero por bin un cambio den esaki? Y si e bin mes, lo e realmente trece honor pa Cristo? Tin motibo pa haya un otro punto di bista di e dianan di fiesta?

Pa haya contestanan satisfactorio, laga nos mira e situacion for di e punto di bista di un nacion cu lo mester tin motibo special pa aprecia e temporada di aña aki.