Ken Abo Ta Obedece, Dios of Hende?

“Nos mester obedece Dios mas cu hende.”—ECHONAN 5:29.

1. (a) Cua ta e texto central pa e estudio aki? (b) Dicon nan a aresta e apostelnan?

E HUESNAN di e corte supremo Hudiu lo mester tawata furioso. E presonan a disparce. Nan tawata apostel di Hesucristo, un homber cu algun siman prome e corte supremo a condena na morto. Awor e corte tawata cla pa regla cuenta cu su siguidonan di mas intimo. Pero ora e guardianan a bai busca nan, nan a haya e celnan bashi, aunke e portanan tawata na lok. Un poco despues e guardianan a tende cu e apostelnan tawata na e tempel na Herusalem y cu sin miedo nan tawata siña e hendenan tocante Hesucristo. Figura bo, haciendo e mesun actividad pa cua nan a ser aresta! E guardianan a bai stret na e tempel, bolbe aresta e apostelnan y trece nan dilanti di e corte.—Echonan 5:17-27.

2. Un angel a manda e apostelnan haci kico?

² Ta un angel a libra e apostelnan for di prizon. Acaso esaki tawata pa evita cu nan ta haya mas persecucion? No. Tawata pa e habitantenan di Herusalem tende e bon nobo tocante Hesucristo. E angel su instruccion na e apostelnan tawata pa nan sigui “papia cu e pueblo tur e palabranan di e bida aki.” (Echonan 5:19, 20) Ta pesei ora cu e guardianan di tempel a topa nan, nan a haya e apostelnan ta cumpli obedientemente cu e mandamento ei.

3, 4. (a) Ora cu a ordena Pedro cu Huan pa stop di predica, con nan a reacciona? (b) Con e otro apostelnan a reacciona?

 ³ Dos di e predicadonan tenaz ei, apostel Pedro y apostel Huan, ya tawata un biaha caba dilanti corte, manera e presidente di e corte supremo, Hose Caifas, a recorda nan severamente. El a bisa: “Nos a taha boso strictamente pa no sigui siña den e nomber [di Hesus], y mira, boso a yena Herusalem cu boso siñansa.” (Echonan 5:28) Caifas lo no mester tawata sorprendi di mira Pedro cu Huan atrobe dilanti corte. Ora a taha nan e prome biaha pa no predica, e dos apostelnan a contesta: “Boso husga si ta corecto den bista di Dios pa scucha na boso mas cu na Dios; pasobra nos no por laga di papia loke nos a mira y tende.” Mescos cu profeta Yeremias di pasado, Pedro cu Huan no por a keda sin cumpli cu nan encargo di predica.—Echonan 4:18-20; Yeremias 20:9.

⁴ Pero awor, no tawata Pedro cu Huan so, sino tur e apostelnan—incluso Matias cu nan a scohe resientemente—tawatin e oportunidad di declara publicamente nan posicion pa cu e ordo di e corte. (Echonan 1:21-26) Ora a ordena nan pa stop di predica, nan tambe a contesta cu curashi: “Nos mester obedece Dios mas cu hende.”—Echonan 5:29.

Obedece Dios of Hende?

5, 6. Dicon e apostelnan no a obedece e ordo di e corte?

⁵ E apostelnan tawata hombernan cu ta respeta lei y cu normalmente lo no a desobedece un ordo di corte. Sinembargo, ningun hende, sin importa con poderoso e ta, tin e autoridad pa ordena un otro hende desobedece un di Dios su mandamentonan. Yehova ta “e Haltisimo riba henter tera.” (Salmo 83:18) No solamente e ta “e Hues di henter mundo” sino tambe cu e ta e Dunador di Lei of Legislador Supremo y ademas Rei di eternidad. Desde Dios su punto di bista, cualkier ordo di corte cu ta purba anula un di Su mandamentonan ta invalido.—Genesis 18:25; Isaias 33:22.

⁶ Algun di e mihor expertonan legal a yega di confirma e echo aki. Por ehempel, e hurista renombra di siglo 18, William Blackstone, a skirbi cu no mester permiti ningun lei humano contradeci “e lei revela” cu ta ser haya den Bijbel. Pues e Consilio, of corte supremo Hudiu, a surpasa su autoridad ora cu el a ordena e apostelnan pa stop di predica. E apostelnan simplemente no por a obedece e ordo ei.

7. Dicon e predicacion a haci e sacerdotenan principal furioso?

⁷ E apostelnan su determinacion pa sigui predica a haci e sacerdotenan principal furioso. Cierto miembronan di e sacerdocio, incluso Caifas mes, tawata saduceo, y nan no a kere den resureccion. (Echonan 4:1, 2; 5:17) Sinembargo, e apostelnan tawata insisti cu Hesus a resusita for di morto. Ademas, algun di e sacerdotenan principal a haci hopi esfuerso pa gana fabor di e autoridadnan Romano. Durante Hesus su huicio, ora a ofrece e sacerdotenan principal e oportunidad di acepta Hesus como nan rei, nan a bai te asina leu di grita: “Nos no tin otro rei, sino solamente Cesar.” (Huan 19:15) * E apostelnan no solamente tawata afirma cu Hesus a resusita sino tambe cu nan tawata siña hende cu fuera di e nomber di Hesus, “no tin bou di shelo ningun otro nomber cu a wordo duna na hende, pa medio di cual nos mester wordo salba.” (Echonan 2:36; 4:12) E sacerdotenan tawatin miedo cu si e pueblo cuminsa mira Hesus resusita como nan Lider, e Romanonan lo por bin y e lidernan Hudiunan lo por perde ‘tanto nan luga como nan nacion.’—Huan 11:48.

8. Ki conseho sabi Gamaliel a duna e corte supremo?

⁸ Futuro tawata pinta scur pa e apostelnan di Hesucristo. E huesnan di e corte supremo tawata determina pa mata nan. (Echonan  5:33) Sinembargo, e situacion a coi un rumbo inespera. Gamaliel, un experto di e Lei, a lanta para y a spierta su coleganan pa nan no actua pura. El a haci e siguiente observacion sabi: “Si e plan of trabou aki ta di hende, e lo wordo destrui, ma si ta di Dios e ta, boso lo no por tumba nan.” Anto el a agrega e punto importante aki: “Asta boso por haya boso ta bringa contra Dios.”—Echonan 5:34, 38, 39.

9. Kico ta duna prueba cu e trabou di e apostelnan tawata di Dios?

⁹ Sorprendentemente, e corte a acepta Gamaliel su conseho. Nan a “yama e apostelnan bin paden, nan a suta nan y a taha nan pa no papia mas den e nomber di Hesus, y a pone nan den libertad.” Pero en bes di ser intimida, e apostelnan tawata determina pa obedece e mandamento di e angel pa predica. Pesei, despues cu nan a sali liber, “tur dia, den tempel y di cas pa cas, [e apostelnan] tawata sigui siña hende y predica Hesus como e Cristo.” (Echonan 5:40, 42) Yehova a bendiciona nan esfuerso. Te na ki grado? “E palabra di Dios a sigui plama; y e cantidad di disipel a sigui aumenta masha hopi mes na Herusalem.” De echo, “un cantidad grandi di e sacerdotenan tawata bira obedecido na e fe.” (Echonan 6:7) Ki devastador esei lo mester tawata pa e sacerdotenan principal! Evidencia tawata acumula: E trabou di e apostelnan tawata en berdad di Dios!

Hende Cu Ta Bringa Contra Dios No Por Tin Exito

10. Desde un punto di bista humano, dicon Caifas kisas a sintie sigur den su posicion, pero dicon su confiansa tawata robes?

¹⁰ Den prome siglo, ta autoridadnan Romano tawata nombra e sumo sacerdotenan Hudiu. Hose Caifas, kende tawata un homber rico, a wordo nombra door di Valerio Grato, y el a keda den e puesto ei pa mas tanto tempo cu hopi di su predecesornan. Caifas probablemente a atribui e logro aki na su habilidad como diplomatico y na su amistad personal cu Pilato mas bien cu na Dios su intervencion. En todo caso, su confiansa den hende a  resulta di ta robes. Apenas tres aña despues cu e apostelnan a presenta dilanti di e corte supremo, Caifas a perde aprobacion di autoridadnan Romano y nan a kit’e for di e puesto di sumo sacerdote.

11. Ki resultado final tawatin pa Poncio Pilato y e sistema di cosnan Hudiu, y ki conclusion abo ta saca for di esaki?

¹¹ E ordo pa kita Caifas for di su puesto a bin di Pilato su superior, Lucio Vitelio, gobernado di Siria. Ni Caifas su amigo intimo, Pilato, no por a evita esei. De echo, apenas un aña despues di Caifas su caida, Pilato mes a perde su puesto y nan a yam’e bek na Roma pa e bin duna cuenta relaciona cu algun acusacion serio. Pa loke ta e lidernan Hudiu cu a pone nan confiansa den Cesar, e Romanonan a bin y a kita ‘tanto nan luga como nan nacion.’ Esaki a sosode na aña 70 di nos era, ora cu e ehersito Romano a destrui e stad di Herusalem completamente, incluso e tempel y e sala di corte supremo. E palabranan di e salmista definitivamente a resulta berdad den e caso aki: “No confia den prinsnan, den yiu di hende, den kende no tin salbacion.”—Huan 11:48; Salmo 146:3.

12. Con e caso di Hesus ta duna prueba cu obedece Dios ta e caminda di sabiduria?

¹² Na contraste, Dios a nombra Hesucristo resusita como Sumo Sacerdote di un gran tempel spiritual. Ningun hende no por anula e nombramento ei. De echo, Hesus no tin susesor, e “ta keda cu su sacerdocio permanentemente.” (Hebreonan 2:9; 7:17, 24; 9:11) Tambe Dios a nombra Hesus como Hues di e bibo- y mortonan. (1 Pedro 4:5) Den e capasidad ei, ta Hesus lo determina si Hose Caifas y Poncio Pilato lo tin un chens di haya bida den futuro.—Mateo 23:33; Echonan 24:15.

Predicadonan di Reino di Tempo Moderno Cu No Tin Miedo

13. Den tempo moderno, cua trabou a resulta di ta di hende, y cua a resulta di ta di Dios? Con bo por sa?

¹³ Den nos tempo, mescos cu den prome siglo, tawatin hopi hende cu “ta bringa contra Dios.” (Echonan 5:39) Por ehempel, ora cu Testigonan di Yehova na Alemania a nenga di reconoce Adolf Hitler como nan Führer, of Lider, Hitler a hura di extermina nan. (Mateo 23:10, NW) Su organisacion eficiente cu tawata manera un mashin destructivo a parce hopi capas di logra esei. E nazinan a logra aresta miles di Testigo y a manda nan camponan di consentracion. Nan a asta logra mata algun Testigo. Pero e nazinan no a logra kibra e Testigonan su determinacion pa adora Dios so, ni nan no a logra elimina e sirbidonan di Dios como grupo. E trabou di e cristiannan aki tawata di Dios, no di hende, y hende no por tumba trabou di Dios. Sesenta aña despues, fiel sobrevivientenan di Hitler su camponan di consentracion ainda ta sirbiendo Yehova ‘cu henter nan curason, alma y mente’, mientras cu Hitler y su partido Nazi no t’ei mas y ta ser recorda solamente pa nan actonan horibel.—Mateo 22:37.

14. (a) Ki esfuerso opositornan a haci pa calumnia Dios su sirbidonan, y cu ki resultado? (b) E esfuersonan ei lo trece cualkier daño permanente na e pueblo di Dios? (Hebreonan 13:5, 6)

¹⁴ Den e añanan cu a pasa desde e intento di nazismo, tawatin otro hende cu a join e bataya perdi contra Yehova y su pueblo. Den varios pais na Europa, astutamente elementonan  religioso y politico a haci esfuerso pa clasifica Testigonan di Yehova como un ‘secta peligroso’, e mesun acusacion cu nan a lanta contra cristiannan di prome siglo. (Echonan 28:22) Pero echo ta cu Corte Europeo di Derechonan Humano a reconoce Testigonan di Yehova como un religion, y no un secta. Opositornan mester sa esei, pero toch nan ta sigui calumnia e Testigonan. Debi na tal descripcion engañoso, algun di e cristiannan aki a ser kita for di trabou. Muchanan Testigo a ser molestia na scol. Doñonan di luga cu a haya miedo a cansela contractnan di huur di edificionan cu e Testigonan tawatin hopi tempo ta uza como luganan di reunion. Den algun caso, representantenan gubernamental asta a nenga ciudadania na cierto personanan djis pasobra nan ta Testigo di Yehova! Pero toch e Testigonan ta sigui padilanti.

15, 16. Con Testigonan di Yehova na Francia a reacciona riba e oposicion contra nan trabou cristian, y dicon nan ta sigui predica?

¹⁵ Por ehempel na Francia, hende por lo general ta rasonabel y imparcial. Sinembargo, algun opositor a promove leinan cu tin e meta pa stroba e trabou di Reino. Con e Testigonan di Yehova na e pais ei a reacciona? Nan a intensifica nan actividad di predica mas cu nunca prome y cu resultadonan emocionante. (Santiago 4:7) Figura bo cu den un periodo di apenas seis luna, e cantidad di estudionan di Bijbel conduci den e pais ei a aumenta cu 33 porshento! Diabel lo mester ta furioso pa mira con personanan di curason honrado na Francia ta reacciona faborablemente riba e bon nobo. (Revelacion 12:17) Nos rumannan cristian na Francia tin sigur cu e palabranan di profeta Isaias lo resulta cierto den nan caso: “Ningun arma cu wordo forma contra bo lo no prospera; y tur lenga cu lanta contra bo den husgamento lo bo condena.”—Isaias 54:17.

¹⁶ Testigonan di Yehova no ta gusta ser persigui. Sinembargo, obedeciendo Dios su mandamento na tur cristian, nan no por y nan lo no stop di predica tocante e cosnan cu nan a tende. Nan ta haci esfuerso pa ta bon ciudadano. Pero ora tin un conflicto entre e lei di Dios y e lei di hende, nan tin cu obedece Dios como nan gobernante.

No Tene Miedo di Nan

17. (a) Dicon nos no mester tin miedo di nos enemigonan? (b) Kico mester ta nos actitud pa cu nos persiguidonan?

¹⁷ Nos enemigonan ta den un posicion masha peligroso. Nan ta bringando contra Dios. Pesei, na harmonia cu e mandamento di Hesus, nos ta haci oracion pa esnan cu ta persigui nos en bes di tene miedo di nan. (Mateo 5:44) Nos ta pidi den oracion pa si cualkier un di nan ta opone Dios debi na ignorancia, mescos cu Saulo di Tarso a haci, pa Yehova sea asina bon di habri nan wowo pa e berdad. (2 Corintionan 4:4) Saulo a bira e apostel cristian Pablo y a sufri hopi na man di e autoridadnan di su tempo. Pero toch el a sigui recorda su rumannan den fe “pa ta sumiso na gobernantenan y na autoridadnan, pa ta obedecido, y dispuesto pa haci tur bon obra, pa no calumnia ningun hende [ni sikiera nan persiguidonan di mas ferviente], pa no ta pleitado, ma suave, mustrando tur consideracion pa tur hende.” (Tito 3:1, 2) Testigonan di Yehova na Francia y na otro luga ta haci esfuerso pa aplica e conseho aki.

18. (a) Den ki maneranan Yehova lo por libra su pueblo? (b) Kico lo ta e resultado final?

 ¹⁸ Dios a bisa profeta Yeremias: “Ami ta cu bo pa libra bo.” (Yeremias 1:8) Con Yehova lo por libra nos di persecucion awe? Lo e por lanta un hues imparcial manera Gamaliel. Of lo e por percura pa un funcionario corupto of hostil keda remplasa pa uno mas rasonabel. Pero tin biaha, Yehova por permiti e persecucion di su pueblo sigui su rumbo. (2 Timoteo 3:12) Si Dios ta permiti pa nos ser persigui, lo e duna nos semper e fortalesa pa soporta persecucion. (1 Corintionan 10:13) Y sin importa kico Dios permiti, nos no tin duda di e resultado final: Hende cu ta bringa contra e pueblo di Dios ta bringando contra Dios, y esnan cu ta bringa contra Dios lo no tin exito.

19. Cua ta e texto di aña pa 2006, y dicon e ta apropiado?

¹⁹ Hesus a bisa su disipelnan pa spera tribulacion. (Huan 16:33) En bista di esaki, e palabranan cu tin para skirbi na Echonan 5:29 ta mas oportuno cu nunca: “Nos mester obedece Dios mas cu hende.” Pa e motibo ei a scohe e palabranan emocionante aki como e texto di aña di Testigonan di Yehova pa 2006. Laga nos determinacion pa e aña benidero y pa eternidad ta cu nos lo obedece Dios como Gobernante a todo costo!

[Nota]

Bo Por Contesta?

• Ki ehempel animador e apostelnan a pone pa nos den e manera cu nan a confronta oposicion?

• Dicon semper nos mester obedece Dios mas cu hende?

• En realidad, ta contra ken nos opositornan ta bringando?

• Ki resultado nos por spera pa esnan cu wanta persecucion?

[Preguntanan di Estudio]

[Comentario na pagina 23]

E texto di aña pa 2006 lo ta: “Nos mester obedece Dios mas cu hende.”—Echonan 5:29

[Plachi na pagina 19]

“Nos mester obedece Dios mas cu hende”

[Plachi na pagina 21]

Caifas a pone su confiansa den hende en bes di den Dios