“Proclama Libertad na e Presonan”

NA CUMINSAMENTO di su ministerio, Hesus a declara cu parti di su encargo tawata pa “proclama libertad na e presonan.” (Lucas 4:18) Siguiendo e ehempel di nan Shon, cristiannan berdadero ta predica e bon nobo di Reino na “tur clase di hende”, y di e manera ei ta trece liberacion pa nan for di sclabitud spiritual y ta yuda nan mehora nan bida.—1 Timoteo 2:4, NW.

Awe, e obra aki ta encera predica na presonan literal, esta, hende cu ta sera den prizon pa varios crimen y cu ta duna balor na un liberacion spiritual. Disfruta di e informe alentador aki tocante e actividad di predica di Testigonan di Yehova den e prizonnan di Ucrania y otro parti di Europa.

Di Drogadicto pa Cristian

Di e 38 añanan di bida cu Serhii * tin, el a pasa 20 tras di trali. El a asta caba scol den prizon. El a bisa: “Hopi aña pasa, mi a bai sera pa motibo di asesinato y ainda mi tin hopi tempo mas pa bai. Den prizon mi tawata comporta mi mes manera un tirano, y otro presonan tawatin miedo di mi.” Esaki a laga Serhii sinti su mes liber? No. Pa hopi aña, e tawata esclabisa na droga, alcohol y tabaco.

Riba un bon dia un otro preso a papia cu ne tocante e berdad di Bijbel. Esei tawata manera un rayo di lus den scuridad. Den un par di luna, el a libra su mes di su adiccionnan, el a bira un predicado di e bon nobo y a batisa. Awor Serhii ta hopi activo den prizon, sirbiendo como un sirbido di Yehova di tempo completo. El a yuda shete criminal cambia nan bida y bira su rumannan spiritual. Seis di nan a sali liber, pero Serhii si ainda ta tras di trali. E no ta amarga pa motibo di esaki pasobra e ta contento cu e por yuda otro hende haya liberacion for di sclabitud spiritual.—Echonan 20:35.

Un di Serhii su studiantenan den prizon tawata Victor, kende antes tawata un adicto y drug dealer. Despues cu Victor a sali for di prizon, el a sigui progresa spiritualmente y cu tempo el a gradua for di e Scol di  Entrenamento Ministerial na Ucrania. Awor e ta sirbi como pionero special na Moldova. Victor a bisa: “Mi a cuminsa huma sigaria tempo mi tawatin 8 aña, uza alcohol tempo mi tawatin 12 aña y uza droga tempo mi tawatin 14 aña. Mi kier a cambia mi bida, pero tur mi intentonan a fracasa. Anto na 1995, net tempo ami cu mi casa tawata plania pa muda bai for di mi mal amigonan, un asesino maniatico a hinc’e mata. Esei a kibra mi completamente. Mi a keda puntra mi mes sin por a haya contesta: ‘Unda mi casa ta awor? Kico ta pasa ora un persona muri?’ Mi tawata uza mas y mas droga pa por a yena e bashi. Autoridadnan a aresta mi pa bendemento di droga y nan a sentencia mi na cinco aña. Den prizon, Serhii a yuda mi haya e contestanan. Varios biaha mi a yega di purba libra mi mes di droga, pero ta cu yudansa di Bijbel so mi a bin logra. E Palabra di Dios ta hopi poderoso!”—Hebreonan 4:12.

Criminal sin Heful Ta Cambia

Vasyl nunca no a uza droga, pero toch el a bai sera. El a conta: “Mi adiccion tawata kickboxing. Mi tawata train pa bati hende sin laga ni un marca.” Vasyl a uza violencia pa horta hende. “Mi a bai sera tres biaha. Esei a pone mi esposa divorcia for di mi. Durante e ultimo sentencia di cinco aña, mi a cuminsa lesa e literatura di Testigonan di Yehova. Esaki a motiva mi pa lesa Bijbel, pero ainda mi tawata envolvi den loke mi tawata stima hopi mes, esta kickboxing, bringa sin regla.

Sinembargo, despues cu mi a lesa Bijbel seis luna largo, algo a cambia den mi. Ganamento di un pelea ya no tawata duna mi e satisfaccion cu un tempo mi tawata haya. Pues mi a cuminsa analisa mi bida considerando loke Isaias 2:4 ta bisa y a realisa cu si mi no cambia mi manera di pensa, lo mi pasa e resto di mi bida den prizon. Pesei mi a deshaci di tur mi ekipo di bringa y a cuminsa traha riba mi personalidad. No tawata facil, pero gradualmente meditacion y oracion a yuda mi stop cu mi mal habitonan. Tin biaha cu awa na wowo mi tawata roga Yehova pa e duna mi e fortalesa pa mi libra mi mes di mi adiccion. Finalmente, mi a logra.

Despues cu mi a sali liber, mi a bai bek serca mi famia. Aworaki mi ta traha den un mina di carbon. Esaki ta duna mi suficiente tempo pa  participa den e trabou di predica hunto cu mi esposa y pa cumpli cu mi responsabilidadnan den e congregacion.”

Mykola cu su amigonan a horta varios banco na Ucrania. Esaki a resulta den un castigo di dies aña di prizon p’e. Prome cu su encarselacion, el a yega di bai misa un biaha so; pa wak con e por a horta e misa ei. Su intento a fracasa, pero e bishita ei a pone Mykola kere cu Bijbel lo mester ta yen di historia laf tocante pasto ortodox, bela y dianan di fiesta religioso. El a bisa: “Mi no sa exactamente con bin, pero mi a cuminsa lesa Bijbel. Mi a keda sorprendi ora mi a descubri cu e tawata hopi diferente for di loke mi a imagina!” El a pidi pa un estudio di Bijbel y a batisa na 1999. Ora bo wak e aworaki, lo bo no kere cu un tempo e sirbido ministerial humilde aki tawata un atracado di banco malicioso cu tawata cana arma!

Vladimir a haya castigo di morto. Mientras cu e tawata warda riba su ehecucion, el a resa na Dios y a primintie cu si nan spar su bida lo e sirbie. Entretanto, e lei a cambia, y na luga di castigo di morto el a haya sentencia di bida largo. Pa cumpli cu su promesa, Vladimir a cuminsa busca e religion berdadero. El a cuminsa un curso di corespondencia y a ricibi diploma di un iglesia adventista, pero e no a keda satisfecho.

Sinembargo, despues cu Vladimir a lesa e revistanan Toren di Vigilancia y Spierta! den e biblioteca di prizon, el a skirbi e sucursal di Testigonan di Yehova na Ucrania, y pidi pa un hende bishit’e. Ora rumannan local a bishit’e, e tawata considera su mes un Testigo caba y tawata predica den prizon. Nan a yud’e cualifica como un publicado di Reino. Na momento cu a skirbi e articulo aki, Vladimir y shete otro persona den e prizon ei tawata wardando riba un chens di batisa. Pero nan tin un problema. Siendo cu presonan cu tin sentencia di bida largo ta ser sera hunto den cel segun nan creencianan religioso, Vladimir cu e otro presonan di su cel ta di e mesun religion. Pues na ken nan por predica? Wel, nan ta comparti e bon nobo cu e wardadonan di preso y tambe cu otro hende pa medio di carta.

Nazar a muda di Ucrania bai Republica Checo, caminda el a join un gang di ladron. Esaki a hiba na un castigo di tres aña y mei di prizon. Den prizon, el a acepta bishita di Testigonan di Yehova di e stad di Karlovy Vary, el a siña e berdad y a ser rehabilita completamente. Mirando esaki, un di e guardianan di siguridad a bisa Nazar su compañeronan di cel: “Si boso tur bira manera e Ucraniano ei, finalmente lo mi por cambia di trabou.” Un otro a bisa: “E Testigonan di Yehova ei si ta experto. Un hende ta drenta prizon como criminal; e ta sali como un persona decente.” Awor Nazar ta bek na cas. El a siña e ofishi di carpinte y a casa, y e cu su esposa ta den e sirbishi di tempo completo. E ta masha gradicido cu e Testigonan di Yehova a bishit’e den prizon!

Reconocemento Oficial

No ta presonan so ta gradicido pa e servicio cu Testigonan di Yehova ta percura. Miroslaw Kowalski, bosero di un di e prizonnan na Polonia, a bisa: “Nos ta aprecia nan bishitanan masha hopi. Algun preso a lanta den un ambiente hopi deplorabel. Probablemente nunca nan a haya un trato humano ... E yudansa [di e Testigonan] ta hopi balioso pasobra nos tin un scarsedad di personal y educado.”

E director di un otro prizon na Polonia a skirbi e sucursal di e pais, pidiendo e Testigonan pa aumenta nan actividad den su prizon. Pakico? El a splica: “Bishitanan mas frecuente di parti di representantenan di Watchtower por yuda e presonan desaroya cualidadnan cu ta haci nan mas social, locual ta suprimi agresion entre nan.”

Un corant Ucraniano a duna informe di un preso deprimi cu a trata na comete suicidio pero cu despues a ricibi yudansa di Testigonan di Yehova. E informe ta bisa: “Actualmente e homber aki ta recuperando emocionalmente. E ta somete su mes na e reglanan di prizon y e ta un ehempel pa otro preso.”

 Beneficionan Ta Extende Pafo di e Portanan di Prizon

E beneficionan di e obra di Testigonan di Yehova no ta limita na den prizon so. E presonan ta sigui haya beneficio despues cu nan sali liber. Pa algun aña caba dos cristian, Brigitte y Renate, ta yudando hende mohe cu tawata preso den e manera aki. Un corant Aleman, Main-Echo Aschaffenburg, a bisa di nan: “Nan ta sigui bishita e presonan tres pa cinco luna despues cu nan sali liber, pa anima nan pa haya un proposito den bida ... Nan ta ser reconoce oficialmente como funcionario di reclassering cu ta traha a base boluntario ... Ademas, nan contacto cu e personal di prizon ta constructivo y positivo.” Varios hende cu tawata preso a dedica nan bida na Yehova como resultado di e tipo di yudansa aki.

Asta funcionarionan di prizon ta beneficia di e obra di educacion biblico di Testigonan di Yehova. Por ehempel, Roman tawatin e rango militar di mayor y e tawata un psicologo den un prizon na Ucrania. Ora e Testigonan a bishita su cas, el a acepta un estudio di Bijbel. Anto el a haya sa cu caminda e tawata traha e Testigonan no tawatin mag di bishita e presonan. Pesei el a pidi e director permit pa e uza Bijbel den su trabou cu e presonan. E director a bai di acuerdo, y rond di dies preso a mustra interes. Segun cu Roman mes tawata siña mas di Bijbel, e tawata comparti esaki regularmente cu e presonan aki, y su esfuerso a duna bon resultado. Algun di nan, despues cu nan a sali liber, a sigui progresa y a batisa como cristian. Mirando e poder di e Palabra di Dios, Roman a tuma su estudio mas na serio. El a bandona servicio militar y a sigui den su actividadnan di educacion biblico. Awor e ta participa den e trabou di predica hunto cu un persona cu tawata preso.

Un preso a skirbi: “Akiden nos ta biba di Bijbel, di e publicacionnan di Bijbel y di estudio di Bijbel.” E palabranan aki ta duna un bon idea di e necesidad cu ta existi den algun prizon pa literatura di Bijbel. Un congregacion na Ucrania a skirbi tocante e trabou den un prizon local: “Gerencia ta masha gradicido pa e literatura cu nos ta percura. Nos ta duna nan 60 ehemplar di cada edicion di E Toren di Vigilancia y Spierta!” Un otro congregacion a skirbi: “Nos ta percura pa un instituto di coreccion cu tin 20 biblioteca chikito. Nos a duna cada biblioteca nos publicacionnan principal. En total, tawata trata aki di 20 caha di literatura.” Den un prizon, e wardadonan ta mantene un file di nos revistanan den e biblioteca pa e presonan por beneficia di cada edicion.

Na 2002 e sucursal na Ucrania a lanta un Departamento di Prizon. Te asina leu e departamento aki a tuma contacto cu rond di 120 instituto di coreccion y a asigna congregacionnan pa percura pa nan. Tur luna e departamento ta ricibi rond di 50 carta for di presonan, mayoria di nan pa pidi literatura of pa un estudio di Bijbel. Sucursal ta manda buki, revista y foyeto pa nan te ora e rumannan di e area ei por bishita nan.

Apostel Pablo a skirbi su compañeronan cristian: “Corda riba e presonan.” (Hebreonan 13:3) E tawata referiendo na esnan cu tawata encarsela pa motibo di nan fe. Awe, Testigonan di Yehova ta corda riba esnan cu ta encarsela, ta bishita prizonnan y ta “proclama libertad na e presonan.”—Lucas 4:18.

[Nota]

[Plachi na pagina 9]

Muraya di prizon, L’viv, Ucrania

[Plachi na pagina 10]

Mykola

[Plachi na pagina 10]

Vasyl hunto cu su esposa, Iryna

[Plachi na pagina 10]

Victor