Temporada di Pasco Riba Kico E Ta Enfoca?

PA MIYONES di hende e dianan di fiesta ta un tempo pa pasa cu famia y amigo, un tempo pa renoba lasonan di cariño y di amistad. Hopi otro hende ta considera e dianan aki como un tempo pa medita riba e nacemento di Hesucristo y e papel cu e ta hunga den e salbacion di humanidad. Na Rusia, distinto for di hopi otro pais, no ta semper e pueblo tawata liber pa celebra Pasco. Aunke pa hopi siglo miembronan di Iglesia Ortodox di Rusia a celebra Pasco abiertamente, pa gran parti di siglo 20 nan no tawatin mag di haci esei. Kico tawata e motibo?

Un poco despues di e revolucion comunista Bolshewiki di aña 1917, autoridadnan Sovietico a lansa un politica agresivo pa haci henter e nacion ateo. Nan tawata contra henter e temporada di fiesta di Pasco cu su implicacionnan religioso. Estado a cuminsa un campaña contra tanto e celebracion di Pasco como di Aña Nobo. Asta nan a condena abiertamente e simbolonan local di e temporada, cu ta e kerstboom y Ded Moroz, of Opa Frost, e ekivalente Ruso di Santa Claus.

Na 1935 a bin un cambio grandi den e manera cu e Rusonan a celebra e dianan di fiesta. Union Sovietico a reestablece Opa Frost, e palo di temporada y e celebracion di Aña Nobo, pero cu un gran diferencia. Nan a bisa cu Opa Frost lo a trece regalo, no riba dia di Pasco, sino Aña Nobo. Mescos tambe, lo no tawatin un kerstboom mas, sino un palo di Aña Nobo! Pues, tawatin un cambio grandi di enfoke na Union Sovietico. Basicamente, e celebracion di Aña Nobo a remplasa Pasco.

Oficialmente, e temporada di Pasco a bira un temporada di fiesta cu no tawatin ningun nificacion religioso mas. E hendenan tawata decora e palo di Aña Nobo cu cosnan cu no tawatin nada di aber cu religion, sino cu cosnan cu a ilustra e progreso di Union Sovietico. E revista Ruso Vokrug Sveta (Rond Mundo) a splica: “Nos por haya sa con un sosiedad comunista a forma for di su origen a base di e decoracionnan di e palo di Aña Nobo atrabes di varios aña di e era Sovietico. Hunto cu e decoracionnan comun den forma di coneu, gota di ijs y pan rondo, tawata traha decoracionnan den forma di machete, martiu y tractor. Despues a remplasa esakinan cu figuranan di minero y cosmonauta, boortoren, raket y vehiculo pa core riba luna.”

Kico di e dia di Pasco mes? Definitivamente, no tawata reconoce como tal. Mas bien, autoridadnan Sovietico a hacie djis un dia normal di trabou. Hende cu a desea di sigui cu e celebracion religioso di Pasco por a haci esei solamente den un forma masha scondi, coriendo e riesgo di perde fabor di Estado y sufri consecuencianan desagradabel. Si, den e Rusia di siglo 20 tawatin un cambio di enfoke di e dianan di fiesta. El a cambia for di un celebracion religioso pa uno cu no tawatin nada di aber cu religion.

Un Cambio Mas Resien

Na 1991 Union Sovietico a cai, locual a resulta den mas libertad pa e pueblo. A bin un fin na e politica estatal  di ateismo. Varios estado soberano resien forma tawata basicamente seglar, sin orientacion religioso, cu un separacion entre Iglesia cu Estado. Hopi hende cu tawatin inclinacion religioso a haya cu awor nan por a practica nan conviccionnan religioso. Nan a rasona cu un manera cu nan lo por a haci esaki ta door di celebra e fiesta religioso di Pasco. Sinembargo, hopi di e hendenan ei a bin haya nan cu un gran decepcion. Pakico?

Den transcurso di añanan e fiesta a bin haya un toke mas y mas comercial. Si, mescos cu den e mundo Occidental, e temporada di Pasco a bira un di e mihor maneranan pa fabricantenan, mayoristanan y comerciantenan gana placa. Vitrinanan di negoshi ta tur na decoracionnan di Pasco. Pacusnan ta toca musica y canticanan di Pasco di e mundo Occidental, algo cu anteriormente tawata desconoci na Rusia. Bendedonan ta cana cu tas grandi yen di pida pida cos di Pasco pa bende den trein y otro medionan di transporte publico. Esei ta loke bo ta haya awor.

Un otro caracteristica alarmante di e temporada aki cu ta molestia asta esnan cu no ta mira nada malo den e comercialismo abierto aki, ta e maluzo di alcohol cu tur su consecuencianan negativo. Un docter di sala di emergencia den un hospital na Moscu a splica: “Pa docternan, ta un echo estableci cu e celebracion di Aña Nobo ta trece cu ne gran cantidad di hende cu bolobonchi y lesion, y tambe cu herida di cuchiu y arma di candela. Mayoria di nan ta causa pa violencia domestico, pelea entre hende burachi y accidente di auto.” Un cientifico prominente di un sucursal di e Academia Ruso di Ciencia a bisa: “E cantidad di morto relaciona cu uzo di alcohol a aumenta drasticamente. Vooral den aña 2000 e tawata halto. E cantidad di suicidio y asesinato tambe a aumenta barbaramente.”

Lamentablemente, tin un otro factor cu ta empeora tur e tipo di comportacionnan ei durante e dianan di fiesta na Rusia. Bou di e titular “Rusonan Ta Celebra Pasco Dos Biaha”, e corant Izvestiya ta informa: “Casi 1 di cada 10 Ruso ta celebra Pasco dos biaha. Manera e encuesta di e centro di control di ROMIR a demostra, 8 porshento di e personanan entrevista a admiti cu nan ta celebra Pasco tanto dia 25 di december, segun e Pasco di e kalender catolico, como dia 7 di januari, segun esun ortodox ... Pa algun hende, obviamente e nificacion religioso di Pasco no ta dje importante ei; loke ta conta mas ta e oportunidad pa celebra.” *

 E Forma Actual di Celebra e Dianan di Fiesta di Berdad Ta Honra Cristo?

Ta bisto cu e dianan di fiesta ta bai acompaña cu hopi mal comportacion. Aunke e situacion aki ta molestia hopi hende, algun di nan kisas ta haya cu nan mester celebra Pasco toch debi na nan respet pa Dios y pa Cristo. Nan deseo di agrada Dios ta algo di aplaudi. Pero e temporada di Pasco realmente ta agrada Dios y Cristo? Laga nos wak di unda el a origina.

Por ehempel, sea loke sea ta bo punto di bista riba con Union Sovietico ta mira Pasco, lo ta dificil pa cuestiona e siguiente datonan historico cu e Great Soviet Encyclopedia ta trece dilanti: “A deriva Pasco ... for di e adoracion precristian di diosnan cu tawata ‘muri y lanta for di morto’, locual tawata masha comun specialmente entre e pueblonan cu tawata biba di agricultura kendenan, den un periodo generalmente limita na e solsticio di winter di 21 pa 25 di december, tawata celebra anualmente e ‘nacemento’ di e Dios-Salbador, cu ta duna bida nobo na naturalesa.”

Kisas bo ta haya relevante loke e enciclopedia ei a bisa corectamente: “Cristianismo di e prome siglonan no a conoce e celebracion di Pasco. ... For di meimei di siglo 4, cristianismo a tuma e celebracion di e solsticio di winter over for di e adoracion di Mitra, y a cambia esaki den e celebracion di Pasco. E promenan cu a celebra Pasco tawata e comunidadnan religioso di Roma. Den siglo 10, Pasco, hunto cu cristianismo, a plama bai Rusia, caminda el a bin mescla cu e celebracion di winter di e Eslavonan di antiguedad, dunando honor na e spiritonan di e antepasadonan.”

Kisas bo ta puntra: ‘Kico Bijbel, e Palabra di Dios, ta bisa tocante Hesus su nacemento dia 25 di december?’ Ta bon pa bo sa cu Bijbel no ta menciona fecha di Hesus su nacemento, y ningun caminda no tin para tampoco cu Hesus mes a papia di dje, corda pa e manda pa e wordo celebra. Di otro banda, loke Bijbel ta yuda nos determina si, ta den ki tempo di aña Hesus a nace.

Segun e Evangelio di Mateo, capitulo 26 y 27, Hesus a ser ehecuta dia 14 di nisan, laat riba e dia di Pasco Hudiu cu a cuminsa dia 31 di maart di aña 33 di nos era. E Evangelio di Lucas ta mustra cu Hesus tawatin rond di 30 aña ora el a batisa y cuminsa cu su ministerio. (Lucas 3:21-23) E ministerio ei a dura tres aña y mei. Pesei, Hesus tawatin rond di 33 aña y mei dia el a muri. Lo el a haci 34 rond di 1 di october di aña 33 di nos era. Lucas ta conta cu tempo Hesus a nace, e wardadonan tawata “keda den e sabananan, y cu anochi [nan] tawata tene warda riba nan tou di carne.” (Lucas 2:8) E wardadonan lo no tawata pafo cu nan tounan den e frialdad di december, dianan cu asta sneu por tawata cai den e area di Betlehem. Pero nan lo por tawata pafo cu nan tounan si, rond di 1 di october, cu segun evidencia ta e tempo cu Hesus a nace.

Pero awor kico di e celebracion di Aña Nobo? Manera nos a mira, e ta wordo caracterisa  pa libertinahe, es decir comportacion desenfrena y inmoral. Apesar di e esfuersonan pa saca e aspecto religioso for di dje, e tambe tin su origen cuestionabel.

Ta bon cla anto cu en bista di e echonan rond di e dianan di fiesta, lemanan cu ta mustra cu ta pa motibo di Hesus tin e temporada ei, ta zona fofo. Si e comercialismo y e mal comportacion durante e temporada di Pasco, y tambe su origen pagano repugnante, tin bo molestia, no desanima. Tin un manera apropiado den cua nos por mustra e debido respet  pa Dios y honra Cristo, y na mesun tempo, fortalece lasonan familiar.

Un Mihor Manera pa Honra Dios y Cristo

Bijbel ta bisa nos cu Hesucristo a bini “pa duna su bida como prijs di rescate pa hopi.” (Mateo 20:28) El a permiti su mes wordo ehecuta, y a muri boluntariamente pa nos picanan. Kisas algun hende kier honra Cristo, y nan ta pensa cu nan por haci esaki durante e temporada di Pasco. Pero manera nos a mira, Pasco y Aña Nobo no tin casi ni un conexion cu Cristo y nan tin nan origen den celebracionnan pagano. Ademas, e temporada di Pasco, pa dushi cu e ta pa algun hende, a haya un toke puramente comercial. Hunto cu esei, nos mester admiti cu e temporada di Pasco ta asocia cu comportacion bergonsoso cu ta desagrada Dios y Cristo.

Con un persona cu kier agrada Dios mester reacciona? En bes di pega na tradicionnan humano cu kisas ta satisface sintimentonan religioso pero cu ta bai contra e Scritura, un persona sinsero lo busca e manera corecto pa honra Dios y Cristo. Kico e manera corecto ei ta, y kico nos mester haci?

Cristo mes ta bisa nos: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.” (Huan 17:3) Si, e persona cu ta echt sinsero ta busca e conocemento exacto aki pa sa con e mester honra Dios y Cristo. Anto e ta aplica e conocemento aki no solamente durante un cierto tempo di aña, sino den su bida di tur dia. E esfuersonan sinsero ei ta cai masha na agrado di Dios, y esei por hiba na bida eterno.

Bo kier pa bo famia ta entre e hendenan cu di berdad ta honra Dios y Cristo na harmonia cu e Scritura? Testigonan di Yehova a yuda miyones di famia rond mundo haya conocemento importante for di Bijbel. Nos ta invita bo cordialmente pa tuma contacto cu Testigonan di Yehova den bo area of pa skirbi nan na e adres apropiado cu bo por haya na pagina 2 di e revista aki.

[Nota]

[Cuadro/Plachi na pagina 7]

Origen di e Celebracion di Aña Nobo

Un Monnik Ortodox di Georgia Ta Papia cu Curashi

“E dia di fiesta di Aña Nobo ta origina for di varios fiesta pagano di antiguo Roma. Dia 1 di januari tawata un dia di fiesta dedica na e dios pagano Jano, y e nomber di e luna ta deriva for di su nomber. E imagennan di Jano tawatin dos cara contrario na otro, locual a nifica cu e tawata mira tanto pasado como presente. Segun un dicho, ken cu a habri 1 di januari contento, cu alegria y cu abundancia lo a pasa henter e aña yen di dicha y felicidad. Hopi di nos compatriotanan ta celebra aña nobo cu e idea supersticioso ei na mente ... Durante cierto dianan di fiesta pagano, hende tawata trece sacrificio directamente na un dios falso. Algun dia di fiesta tawata notorio pa orgianan inmoral, adulterio y fornicacion. Na otro ocasion, por ehempel durante e dia di fiesta di Jano, tawatin exceso di comemento y bebemento, buracheria y tur sorto di impuresa cu ta compaña esakinan. Si nos corda con den pasado nos mes a celebra Aña Nobo, e ora ei nos tin cu admiti cu nos tur a participa den e celebracion pagano aki.”—Un corant di Georgia.

[Plachi na pagina 6]

Cristiandad a tuma over e adoracion di Mitra

[Reconocemento]

Museo di Wiesbaden

[Plachi na pagina 7]

Wardadonan lo no tawata pafo cu nan tounan den e frialdad di december