Yudando Hende Chines na Mexico

“DIES homber di tur e idiomanan di e nacionnan lo gara, si, nan realmente lo gara e saya di un homber cu ta un Hudiu, bisando: ‘Nos lo bai cu boso, pasobra nos a tende cu Dios ta cu boso.’” (Zacarias 8:23, NW) Awe, e bunita profecia aki ta cumpliendo na tur parti di mundo. Hende “di tur e idiomanan di e nacionnan” ta tene duro na e Israelitanan spiritual afin di adora Yehova Dios. Testigonan di Yehova ta masha interesa den cumplimento di e profecia aki. Hopi di nan ta siñando un otro idioma pa asina nan por participa den e predicacion mundial.

Testigonan di Yehova na Mexico no ta un excepcion. Segun calculo tin 30.000 hende di abla Chines ta biba na Mexico. Na aña 2003, 15 di nan a asisti na e Conmemoracion di e morto di Cristo na Ciudad di Mexico. Esei a haci e Testigonan na Mexico conciente di e potencial cu tin pa crecemento spiritual den e teritorio Chines. Pa por tin mas predicado pa atende e hendenan di abla Chines aki, a organisa un curso di tres luna pa siña Testigonan Mexicano algun presentacion simpel na Chines Mandarin. En total, 25 Testigo a sigui e curso. Na final di e curso, un funcionario di e comunidad di abla Mandarin di Ciudad di Mexico a asisti na e graduacion, demostrando asina e impacto cu e curso tawatin riba e poblacion di abla Chines. Un instituto local Chines a ofrece tres di e cursistanan un beca pa bai afo pa mehora nan Chines.

E curso di idioma a encera entrenamento practico. Despues cu e cursistanan a siña algun frase hopi basico, nan a bai predica mesora na Chines den e area comercial di Ciudad di Mexico. E cursistanan yen di celo a cuminsa 21 estudio di Bijbel. Un cos cu tawata di gran yudansa ta e foyeto Kico Dios Ta Rekerí di Nos? na Chines cu texto skirbi na alfabet Romano cu yama pinyin.

Con e Testigonan cu a caba di cuminsa cu e curso pa siña Chines tawata conduci estudio di Bijbel? Na principio, nan por a bisa solamente: “Qing Du [Lesa por fabor]” y a mustra un paragraf y caba e pregunta. Despues cu e persona a lesa y contesta na Chines, nan a bisa: “Shei shei [Danki]” y, “Hen Hao [Hopi bon].”

Un di e estudionan di Bijbel cu nan a cuminsa tawata cu un señora cu ta cristian pa nomber. Despues di e di tres estudio, e Testigo tawata puntra su mes si e señora realmente a compronde e informacion. Pesei e  siguiente biaha e Testigo a bai cu un ruman homber kende su idioma natal ta Chines. Ora e ruman homber a puntra e señora si e tawatin cualkier pregunta, e señora a puntra: “Mi mester por landa pa mi batisa?”

No a tarda hopi cu e rumannan a forma un Estudio di Buki di Congregacion cu un promedio di asistencia di 9 persona di abla Chines y 23 Testigo Mexicano. Entre esnan cu a asisti tawatin un docter Chines cu a haya e revistanan Toren di Vigilancia y Spierta! na Spaño serca un di su pashentnan. Como cu e no por a lesa Spaño, el a pidi un hende traduci un par di frase p’e. Ora el a realisa cu e revistanan a trata tocante Bijbel, el a pidi e pashent si e por a busca e revistanan na Chines p’e. E ruman mohe a haci esei, y via e sucursal di Testigonan di Yehova na Mexico, a haci areglo pa un Testigo di abla Chines bai bishit’e. E docter su mama na China tawatin un Bijbel, y e docter tawata gusta les’e. Ora el a dicidi di bin Mexico, su mama a bis’e pa e no stop di lesa Bijbel. Pesei e tawata pidi den oracion pa e haya un hende cu por a yud’e siña mas tocante e Dios di Bijbel. El a declara: “Dios a scucha mi oracion!”

Tawatin tambe un famia Chines cu a asisti na e estudio di buki. Nan tawata huur cuarto serca un señora Mexicano cu tawata studia Bijbel cu Testigonan di Yehova. Aunke e famia Chines tawata compronde masha tiki Spaño, toch nan tawata bin sinta durante di e consideracionnan biblico. Cu tempo, e famia a puntra e Testigo cu tawata conduci e estudio si e no tawatin ningun publicacion na Chines. Poco despues a cuminsa conduci un estudio di Bijbel cu e famia. No a tarda hopi cu e famia a expresa nan deseo di predica na nan paisanonan y di dedica nan bida na Yehova.

Si, Chines ta un idioma dificil pa siña. Pero manera nos por a mira den e experencianan aki, cu Yehova su yudansa hende di hopi idioma, incluso Chines, ta siñando e boluntad di Dios na Mexico, y tambe na otro partinan di tera.

[Plachi na pagina 17]

Un klas siñando Chines na Ciudad di Mexico

[Plachi na pagina 18]

Un Testigo Mexicano conduciendo un estudio di Bijbel na Chines

[Plachi na pagina 18]

Sirbishi di cas pa cas na Chines, Ciudad di Mexico