Bon Ta Rondona pa Loke Ta Malo

DEN e mundo djawe, por parce cu masha poco hende ta dispuesto pa duna di nan mes. Sinembargo, ainda tin hende cu ta desea di “haci un diferencia”, esta, pa den un of otro manera haci bon na otro hende. Tur aña hopi hende ta duna miles di miyones di florin na loke pa nan ta un bon causa. Por ehempel, na Gran Bretania, donacionnan pa obranan di caridad a alcansa un cifra record di 23 mil miyon florin na 2002. Desde 1999, dies filantropo generoso a duna of priminti di duna mas cu 64 mil miyon florin pa yuda hende den necesidad.

Algun di e obranan di caridad ta inclui paga gastonan medico di famianan cu tin poco entrada, duna guia na yiunan di mayornan soltero, financia programanan di vacunacion den paisnan den desaroyo, duna muchanan nan prome buki, duna cunukeronan den paisnan pober animalnan pa cuminsa crio di bestia y entrega suministro di yudansa na victimanan di desasternan natural.

E echonan aki ta mustra cu hende tin e capasidad pa haci bon na otro. Pero lamentablemente, tin hende tambe cu ta comete cosnan sumamente teribel.

Maldad Ta Aumentando

Desde fin di Segundo Guera Mundial, tawatin casi 50 incidente registra di genocidio y matansa masal pa motibonan politico. Segun e revista American Political Science Review, “e susesonan aki a costa bida di por lo menos 12 miyon combatiente y 22 miyon civil. Esaki ta mas tanto cu tur victima di guera civil y guera internacional hunto desde 1945.”

Durante e di dos mitar di siglo 20, rond di 2,2 miyon hende a ser mata na Cambodia pa motibonan politico. Odio entre diferente grupo etnico na Ruanda a causa morto di mas cu 800.000 homber, mohe y mucha. Asesinatonan pa motibonan religioso y politico na Bosnia a resulta den mas cu 200.000 morto.

Referiendo na actonan mas resien di maldad, e secretario general di Nacionnan Uni a bisa na 2004: “Na Irak, nan ta masacra civilnan cu sanger friu, mientras esnan cu ta duna yudansa, periodistanan y otro personanan cu no tin nada di aber cu e combatenan ta ser secuestra y mata den e formanan di mas cruel. Na mesun tempo, presonan Iraki a ser maltrata di un forma bergonsoso. Na Darfur,  poblacionnan completo ta haya nan forsa ta hui for di nan luga, nan casnan ta ser destrui y nan ta bira victima di e tactica di violacion sexual. Na parti nort di Uganda, muchanan ta ser mutila y forsa pa participa den actonan sumamente horendo. Na Beslan, muchanan a ser secuestra y brutalmente masacra.”

Asta den e asina yama paisnan desaroya, ta parce cu crimennan pa motibo di odio ta aumentando. Por ehempel na 2004, Independent News a informa cu na Gran Bretania tawatin “un aumento di diesun biaha mas tanto victima di atake of maltrato pa motibonan racial durante e ultimo decada.”

Pakico hende cu tin e capasidad pa haci asina tanto bon ta comete e tipo di maldadnan ei? Lo bini un fin na maldad un dia? Manera e siguiente articulo ta mustra, Bijbel ta duna contestanan satisfactorio riba e preguntanan aki cu ta tolondra hende.

 [Reconocemento pa Potret na pagina 2]

COVER: Mark Edwards/Still Pictures/Peter Arnold, Inc.