Busca Husticia Lo Proteha Nos

“Ma busca prome ... [Dios] su husticia.”—MATEO 6:33.

1, 2. Ki decision un hoben cristian a tuma, y dicon el a tuma e decision ei?

UN MUCHA mohe cristian na Asia tawata traha como secretaria na un oficina di gobierno. E tawata tuma su trabou na serio, percura pa yega tempran y no tawata perde tempo. Sinembargo, como cu e no tawata vast, a yega momento cu mester a evalua su posicion. Hefe di e departamento a bisa e mucha mohe cu lo e tum’e vast y asta dun’e un posicion mas halto, basta cu e acepta un relacion inmoral cu ne. E mucha mohe a nenga redondamente, maske esei a nifica cu e ta perde su trabou.

² E mucha mohe cristian aki tawata irealistico? No. Ta e siguiente palabranan di Hesus el a sigui cuidadosamente: “Ma busca prome ... [Dios] su husticia.” (Mateo 6:33) P’e, tawata hopi mas importante pa sigui principionan husto cu bai dilanti materialmente door di comete inmoralidad sexual.—1 Corintionan 6:18.

E Importancia di Husticia

3. Kico ta husticia?

³ “Husticia” ta indica un estado di integridad moral y honestidad. Den Bijbel, e palabranan Griego y Hebreo ta transmiti e idea di “rectitud” of di ta stret. E no ta nifica ser husto den bo mes bista, esta, husgando bo mes a base di bo propio normanan. (Lucas 16:15) E ta rectitud segun e normanan di Yehova. E ta referi na Dios su husticia.—Romanonan 1:17; 3:21.

4. Dicon husticia ta importante pa un cristian?

⁴ Dicon husticia ta importante? Pasobra Yehova, e “Dios husto”, ta trata su pueblo cu fabor ora nan ta practica husticia. (Salmo 4:1, NW; Proverbionan 2:20-22; Habacuk 1:13) Ken cu ta obra inhusticia no por tin un relacion intimo cu ne. (Proverbionan 15:8) Ta pesei apostel Pablo a urgi Timoteo: “Hui pa e pasionnan di hubentud, y busca husticia”, hunto cu otro cualidadnan sumamente importante. (2 Timoteo 2:22) Ta pesei tambe Pablo a inclui “e corasa di husticia” ora el a menciona e varios partinan di nos armadura spiritual.—Efesionan 6:14.

5. Con criaturanan imperfecto por busca husticia?

⁵ Claro cu ningun hende no ta husto den e sentido absoluto di e palabra. Tur hende a hereda imperfeccion for di Adam, y tur ta pecaminoso—inhusto—for di ora nan a nace. Sinembargo, Hesus a bisa cu nos mester busca husticia. Con esei ta posibel? E ta posibel door cu Hesus a entrega su bida perfecto como un rescate pa nos, y si nos eherce fe den e sacrificio ei, Yehova ta dispuesto pa pordona nos picanan. (Mateo 20:28; Huan 3:16; Romanonan 5:8, 9, 12, 18) Riba e base ei Yehova ta acepta nos adoracion, mientras cu nos ta siña su normanan husto y ta haci nos best pa cumpli cu nan, y ta pidi yudansa den oracion pa vence nos debilidadnan. (Salmo 1:6; Romanonan 7:19-25; Revelacion 7:9, 14) Ki un gran consuelo esei ta!

Husto den un Mundo Inhusto

6. Dicon mundo tawata un luga peligroso pa e cristiannan di prome siglo?

⁶ Ora e disipelnan di Hesus a haya e encargo pa ta su testigonan “te na e parti mas aleha di mundo”, nan tawatin un situacion dificil nan dilanti. (Echonan 1:8) Henter e teritorio  asigna na nan tawata “bou di control di e malbado”, Satanas. (1 Huan 5:19) Mundo tawata infecta cu e actitud di maldad cu Satanas a fomenta, y cristiannan lo a ser exponi na su influencia cu por a contamina nan. (Efesionan 2:2) E mundo tawata un luga peligroso pa nan. Ta solamente door di busca prome Dios su husticia nan lo por a persevera y mantene nan integridad intacto. Mayoria di nan a persevera tambe, pero un par a ser desvia for di “e caminda di husticia.”—Proverbionan 12:28; 2 Timoteo 4:10.

7. Ki responsabilidadnan cristiannan tin cu ta pone cu nan mester resisti influencianan dañino?

⁷ Mundo ta mas safe pa cristiannan djawe? Ningun momento so! E ta asta mas corumpi cu den prome siglo. Ademas, Satanas a ser benta abou riba tera y e ta hibando un guera feros contra cristiannan ungi, esta, “e resto di [e mohe] su desendientenan, kendenan ta warda e mandamentonan di Dios y tin e [trabou di duna] testimonio di Hesucristo.” (Revelacion 12:12, 17) Tambe Satanas ta ataca ken cu sostene e “desendientenan” ei. Sinembargo, cristiannan no por sconde pa e mundo. Aunke nan no ta parti di mundo, nan tin cu biba den dje. (Huan 17:15, 16) Y nan tin cu predica den dje pa busca hende cu tin e disposicion corecto y siña nan bira disipel di Cristo. (Mateo 24:14; 28:19, 20) Pesei, como cu cristiannan no por evita completamente e influencianan dañino cu tin den e mundo aki, nan tin cu resisti esakinan. Laga nos considera cuater di e influencianan ei.

E Trampa di Inmoralidad

8. Dicon e Israelitanan a bai adora e diosnan di e Moabitanan?

⁸ Casi na final di e Israelitanan su biahe trabahoso di 40 aña door di desierto, un cantidad grandi di nan a bandona e caminda di husticia. Nan tawata testigo di e tantisimo actonan di liberacion cu Yehova a haci, y lo no a tarda hopi pa nan a drenta e Tera Priminti. Sinembargo, na e tempo crucial ei, nan a bai sirbi e diosnan di e Moabitanan. Dicon? Nan a cai pa “e deseo di carni.” (1 Huan 2:16) E registro ta bisa: “E pueblo a cuminsa comete fornicacion cu e yiu mohenan di Moab.”—Numbernan 25:1.

9, 10. Ki situacion awe ta pone cu ta masha importante pa semper tene na mente con dañino mal deseonan carnal ta?

⁹ E suseso ei ta demostra e manera cu mal deseonan carnal por corumpi personanan cu no ta alerta. Ta bon pa nos siña for di esei, specialmente como cu hopi caminda hende a cuminsa mira inmoralidad como un estilo di bida aceptabel. (1 Corintionan 10:6, 8) Un informe di Merca ta bisa: “Prome cu 1970, biba compaña tawata ilegal den tur estado Mericano. Awor, e ta masha comun. Mas cu mitar di tur e hendenan cu ta bai casa pa prome bes a biba compaña prome cu nan casa.” Esaki y otro practicanan inmoral paresido no ta limita na un solo pais. Nos ta haya nan rond mundo, y lamentablemente, algun cristian a sigui e tendencia aki, y asta a perde nan posicion den e congregacion cristian.—1 Corintionan 5:11.

 ¹⁰ Ademas, ta parce cu tur caminda bo ta haya propaganda cu ta promove inmoralidad. Pelicula- y programanan di television ta duna e idea cu no ta nada malo pa hobennan haci sex prome cu matrimonio. Nan ta presenta relacionnan homosexual como normal. Y hopi di nan ta mustra actonan sexual cu mas y mas detaye. Riba Internet tambe ta masha facil pa haya acceso na potretnan detaya di actonan sexual. Por ehempel, un columnista di un corant a informa cu su yiu homber di shete aña a bin cas for di scol y tur entusiasma el a conta su tata cu un amigo di scol a haya un website riba Internet cu ta mustra hende mohe sunu ta haci actonan sexual. E tata a keda geshock, pero cuanto mucha no a topa e tipo di websitenan ei sin cu nan a conta nan mayornan? Ademas, cuanto mayor sa kico ta e contenido di e video gamenan cu nan yiunan ta hunga? Hopi game popular ta contene inmoralidad repugnante, y tambe demonismo y violencia.

11. Con un famia por ser proteha di e inmoralidad di e mundo?

¹¹ Con un famia por resisti tal “entretenimento” degrada? Door di busca prome Dios su husticia, y nenga di bira envolvi den cualkier cos inmoral. (2 Corintionan 6:14; Efesionan 5:3) Mayornan cu apropiadamente ta supervisa e actividadnan di nan yiunan y ta inculca den nan yiunan un amor pa Yehova y pa su leinan husto ta fortifica nan contra pornografia, video game pornografico, peliculanan inmoral y otro tentacionnan inhusto.—Deuteronomio 6:4-9. *

E Peliger di Presion di Comunidad

12. Ki problema a surgi den prome siglo?

¹² Ora cu Pablo tawata na Listra den Asia Menor, el a cura un homber milagrosamente. E relato ta bisa: “Ora cu e multitudnan a mira loke Pablo a haci, nan a halsa nan bos y a bisa na lenga Licaonica: ‘E diosnan a haya forma di hende y a baha bin serca nos.’ Y nan a yama Barnabas Jupiter, y Pablo nan a yama Mercurio, pasobra e tawata esun cu ta hiba palabra.” (Echonan 14:11, 12) Poco despues e mesun multitudnan ei kier a mata Pablo cu Barnabas. (Echonan 14:19) Ta bisto cu presion di comunidad a influencia e hendenan ei facilmente. Parce cu ora algun hende di e region ei a bira cristian, nan a keda tene na nan tendencianan supersticioso. Den su carta na e cristiannan na Colosas, Pablo a duna spiertamento contra “adoracion di angelnan.”—Colosensenan 2:18.

13. Cua ta algun custumber cu un cristian mester evita, y con e por haya e fortalesa pa haci esei?

¹³ Awe, cristiannan berdadero tambe tin cu evita custumbernan popularmente acepta cu ta basa riba ideanan religioso falso cu ta viola principionan cristian. Por ehempel, den algun pais hopi ceremonia cu hende tin custumber di haci relaciona cu nacemento y morto ta basa riba e mentira cu nos tin un  spirito cu ta keda na bida ora nos muri. (Eclesiastes 9:5, 10) Tin paisnan caminda ta custumber pa somete mucha mohe chikito na mutilacion genital femenino. * Esaki ta un practica cruel y innecesario cu no ta cuadra cu e cuido amoroso cu mayornan cristian debe nan yiunan. (Deuteronomio 6:6, 7; Efesionan 6:4) Con cristiannan por resisti presion di comunidad y bandona tal tipo di practica? Door di tin pleno confiansa den Yehova. (Salmo 31:6) E Dios husto lo fortalece y cuida esnan cu di curason ta bis’e: “[Bo ta] mi refugio y mi baluarte, mi Dios, den kende mi ta confia!”—Salmo 91:2; Proverbionan 29:25.

No Lubida Yehova

14. Ki spiertamento Yehova a duna e Israelitanan poco prome cu nan a drenta e Tera Priminti?

¹⁴ Poco prome cu e Israelitanan a drenta e Tera Priminti, Yehova a spierta nan pa nan no lubid’e. El a bisa: “Tene cuidou pa bo no lubida SEÑOR bo Dios door di keda sin warda su mandamentonan, su ordenansanan y su statutonan cu mi ta ordena bo awe, pa ora bo a come y a keda satisfecho y a traha bon casnan y a biba den nan, y ora bo crionan di baca y bo tounan di bestia chikito multiplica, y bo plata y oro multiplica, y tur loke bo tin multiplica, bo curason no bira orguyoso y bo lubida SEÑOR bo Dios.”—Deuteronomio 8:11-14.

15. Con nos por ta sigur cu nos no ta lubidando Yehova?

¹⁵ Algo similar lo por pasa awe? Si, den caso cu nos tin e prioridadnan robes. Sinembargo, si nos ta busca prome Dios su husticia, adoracion puro lo ta e cos di mas importante den nos bida. Manera apostel Pablo a anima nos pa haci, nos lo ‘cumpra e tempo oportuno’ y nos lo tin un sentido di urgencia den nos ministerio. (Colosensenan 4:5, NW; 2 Timoteo 4:2) Pero, si asistencia na reunion y sirbishi di veld ta menos importante pa nos cu recreo of buscamento di placer, nos lo por lubida Yehova den e sentido cu nos ta mira Yehova como secundario den nos bida. Pablo a bisa cu den e ultimo dianan, hende lo ta ‘stimado di placer mas bien cu stimado di Dios.’ (2 Timoteo 3:4) Cristiannan sinsero ta samina nan mes regularmente pa haci sigur cu nan no ta ser influencia pa e manera di pensa ei.—2 Corintionan 13:5.

Tene Cuidou cu un Actitud Independiente

16. Ki mal actitud tanto Eva como algun hende den tempo di Pablo a desplega?

¹⁶ Den Eden, Satanas a logra apela na Eva su deseo egoista pa independencia. Eva kier a tuma su propio decisionnan tocante loke ta bon y malo. (Genesis 3:1-6) Den prome siglo, algun hende den e congregacion di Corinto tawatin mesun actitud independiente. Nan tawata pensa cu nan sa mihor cu Pablo, y sarcasticamente el a yama nan “super-apostelnan.”—2 Corintionan 11:3-5; 1 Timoteo 6:3-5.

17. Con nos por evita di desaroya un actitud independiente?

¹⁷ Den e mundo djawe, hopi hende ta cabesura, “imprudente, soberbe”, y algun cristian a ser influencia door di e manera di pensa ei.  Tin di nan asta a bira opositor di e berdad. (2 Timoteo 3:4; Filipensenan 3:18) Den asuntonan di adoracion berdadero ta masha importante pa nos acudi na Yehova pa haya guia, y pa nos coopera cu “e esclabo fiel y prudente” y e ancianonan di congregacion. Esei ta un manera pa busca husticia, y e ta proteha nos pa nos no desaroya un actitud independiente. (Mateo 24:45-47; Salmo 25:9, 10; Isaias 30:21) E congregacion di e unginan ta un “pilar y sosten di e berdad.” Yehova a establec’e pa proteha nos y guia nos. (1 Timoteo 3:15) Ora nos ta reconoce e papel importante cu e ta hunga, esei lo yuda nos pa “no haci nada cu un actitud di egoismo” mientras cu nos ta somete nos mes humildemente na Yehova su boluntad husto.—Filipensenan 2:2-4; Proverbionan 3:4-6.

Sea Imitadonan di Hesus

18. Nos ta ser anima pa imita Hesus den ki maneranan?

¹⁸ Bijbel ta bisa profeticamente di Hesus: “Bo a stima husticia y a odia maldad.” (Salmo 45:7; Hebreonan 1:9) Ki un actitud excelente cu nos por imita! (1 Corintionan 11:1) Hesus no tawata djis conoce Yehova su normanan recto; el a stima nan. Pesei ora Satanas a tent’e den desierto, Hesus sin basila a rechas’e y na un manera firme el a nenga di dual for di “e caminda di husticia.”—Proverbionan 8:20; Mateo 4:3-11.

19, 20. Menciona e bon resultadonan di busca husticia.

¹⁹ Ta berdad cu e deseonan inhusto di e carni por ta fuerte. (Romanonan 7:19, 20) Sinembargo, si husticia ta algo balioso pa nos, esaki lo fortalece nos contra maldad. (Salmo 119:165) Un amor profundo pa husticia lo proteha nos ora nos ta confronta loke ta malo. (Proverbionan 4:4-6) No lubida cu ki ora cu nos entrega na tentacion, nos ta duna Satanas un victoria. Ta mucho mas mihor pa resistie y duna Yehova e victoria!—Proverbionan 27:11; Santiago 4:7, 8.

²⁰ Debi cu cristiannan berdadero ta busca husticia, nan ta “yena cu e fruta di husticia cu ta bin door di Hesucristo, pa e gloria y alabansa di Dios.” (Filipensenan 1:10, 11) Nan ta bisti “e hende nobo [of, personalidad nobo], cu a wordo crea segun Dios den husticia y santidad berdadero.” (Efesionan 4:24) Nan ta pertenece na Yehova y ta biba pa sirbie, no pa agrada nan mes. (Romanonan 14:8; 1 Pedro 4:2) Esei ta loke ta guia nan manera di pensa y nan accionnan. Ki contento nan ta haci e curason di nan Tata celestial!—Proverbionan 23:24.

[Nota]

Bo Por Splica?

• Dicon ta masha importante pa busca husticia?

• Con un cristian imperfecto por busca husticia?

• Kico ta algun cos den mundo cu un cristian tin cu evita?

• Con busca husticia ta proteha nos?

[Preguntanan di Estudio]

[Plachi na pagina 26]

Pa siguidonan di Hesus, e mundo tawata un luga peligroso

[Plachi na pagina 27]

Yiunan cu ser siña pa stima Yehova lo tin e fortalesa pa resisti inmoralidad

[Plachi na pagina 28]

Algun Israelita a lubida Yehova despues cu nan a bira rico den e Tera Priminti

[Plachi na pagina 29]

Mescos cu Hesus, cristiannan ta odia inhusticia