Con Bon Lo Vence Malo

Rei David tawata un bon hende. E tawatin un amor profundo pa Dios, un sed pa husticia y un stimacion pa hende humilde. Toch, e mesun bon rei aki a comete adulterio cu e esposa di un di su hombernan di confiansa. Y despues cu David a haya sa cu e esposa, Betsabe, a sali na estado di dje, el a traha un plan pa laga mata su esposo. Anto pa purba tapa su malechonan, el a casa cu Betsabe.—2 Samuel 11:1-27.

TA OBVIO cu hende tin e capasidad pa haci hopi cos bon. Dicon anto nan ta culpabel di asina tanto maldad? Bijbel ta identifica varios motibo basico. E ta mustra tambe con Dios, pa medio di Cristo Hesus, lo elimina maldad di unabes pa semper.

Inclinacion pa Haci Malo

Rei David mes a identifica un di e motibonan pakico hende ta haci malo. Despues cu su malechonan a sali na cla, el a acepta tur responsabilidad pa su accionnan. Anto yen di remordimento el a skirbi: “Mira, den inikidad mi a wordo forma, y den pica mi mama a consebi mi.” (Salmo 51:5) Nunca tawata e proposito di Dios pa mamanan consebi yiunan cu lo comete pica. Sinembargo, ora Eva y despues Adam a scohe pa rebela contra Dios, nan no tawata capas mas pa produci yiu sin pica. (Romanonan 5:12) Segun cu hende imperfecto a aumenta na cantidad, a bira bisto cu nan inclinacion ta pa haci malo, ya cu Genesis 8:21 ta bisa cu “e intencion di curason di hende ta malo for di su hubentud.”

Ora hende no domina e inclinacion aki, e ta resulta den “inmoralidad, ... hostilidad,  bringamento, yalursheid, rabiamento, pleitamento, desacuerdo, doctrina falso, envidia” y otro comportacion destructivo cu Bijbel ta describi como “obranan di carni.” (Galationan 5:19-21) Den e caso di rei David, el a cede na debilidad carnal y a comete fornicacion, locual a resulta den conflictonan serio. (2 Samuel 12:1-12) Lo e por a resisti su inclinacion inmoral. Pero, door di keda pensa riba su deseo pa haya Betsabe, David a sigui e patronchi cu e disipel Santiago a describi despues: “Cada un ta wordo tenta ora cu e wordo atrai y seduci door di su mes pasion. Anto ora pasion consebi, e ta duna lus na pica; y ora pica keda cumpli, e ta produci morto.”—Santiago 1:14, 15.

E matansanan masal, violacionnan sexual y plundermento menciona den e articulo anterior ta ehempelnan extremo di loke ta sosode ora hende actua a base di nan mal deseonan.

Maldad pa Motibo di Ignorancia

E experencia di apostel Pablo ta resalta un di dos motibo pakico hende ta haci malo. P’e tempo cu Pablo a muri, e tawatin e reputacion di un homber manso y cariñoso. Sin ningun interes personal, el a haci hopi esfuerso pa sirbi su rumannan cristian. (1 Tesalonicensenan 2:7-9) Pero mas prome den su bida, tempo cu e tawata conoci como Saulo, e tawata “yen di menasa y gusto pa mata” contra e mesun grupo aki. (Echonan 9:1, 2) Pakico Pablo a consenti cu e maldad cu a ser cometi contra e prome cristiannan y asta a participa den esaki? El a bisa: ‘Pasobra mi a actua den ignorancia.’ (1 Timoteo 1:13) Si, anteriormente Pablo tawatin “un celo pa Dios, ma no segun conocemento.”—Romanonan 10:2.

Mescos cu Pablo, hopi hende sinsero a comete maldad pa motibo cu nan no tin conocemento exacto di e boluntad di Dios. Por ehempel, Hesus a spierta su siguidonan: “E ora ta bin cu ken cu mata boso lo kere cu e ta ofrece sirbishi na Dios.” (Huan 16:2) Testigonan di Yehova djawe sa di experencia ki cierto e palabranan aki di Hesus ta. Den hopi pais nan a ser persigui y asta mata door di hende cu ta pretende di sirbi Dios. Ta bon cla anto cu e celo mal dirigi ei no ta agrada e Dios berdadero.—1 Tesalonicensenan 1:6.

Esun Cu A Origina Maldad

Hesus a identifica e motibo principal pakico ta existi maldad. Dirigiendo su mes na e lidernan religioso cu tawatin intencion di mat’e, el a bisa nan: “Boso ta di boso tata e Diabel, y boso kier haci e deseonan di boso tata. E tawata un matado for di principio.” (Huan 8:44) Pa motibonan egoista, Satanas a tenta Adam cu Eva pa rebela contra Dios. E rebeldia ei a trece pica y tambe morto pa henter humanidad.

E caracter asesino di Satanas a bira bisto tambe den loke el a haci cu Job. Ora Yehova a dun’e permit pa pone e integridad di Job na prueba, Satanas no a keda satisfecho cu djis kita Job su pocesionnan. El a causa morto di su dies yiunan tambe. (Job 1:9-19) Den  decadanan resien, maldad a aumenta notablemente debi na imperfeccion y ignorancia di hende y tambe como resultado di e echo cu Satanas ta mete mas y mas den asuntonan humano. Bijbel ta revela cu Diabel a “wordo tira abou riba tera, y su angelnan a wordo tira abou hunto cu ne.” E mesun profecia ei a predeci cu exactitud cu e presencia di Satanas akibou lo a produci un “ai di tera” nunca bisto. Aunke Satanas no por obliga hende pa haci malo, e ta un experto den “gaña henter mundo.”—Revelacion 12:9, 12.

Eliminacion di e Inclinacion pa Haci Malo

Pa por caba cu maldad pa semper for di sosiedad humano, mester elimina hende su inclinacion natural pa haci malo, su falta di conocemento exacto y e influencia di Satanas. Na prome luga, con hende su inclinacion natural di haci pica por wordo elimina for di su curason?

No tin ningun ciruhano humano ni remedi cu hende a inventa cu por logra esei. Pero Yehova Dios si a percura un cura pa pica hereda y imperfeccion pa tur esnan cu ta dispuesto pa acept’e. Apostel Huan a skirbi: “E sanger di Hesus ... ta limpia nos di tur pica.” (1 Huan 1:7) Ora e homber perfecto Hesus a ofrece su bida boluntariamente, el a ‘carga nos picanan den su curpa na e staca, pa nos, siendo morto pa pica, por a biba pa husticia.’ (1 Pedro 2:24) Hesus su morto como sacrificio lo elimina e efectonan di Adam su maldad. Pablo ta declara cu Cristo Hesus a bira un “rescate pa tur hende.” (1 Timoteo 2:6) Si, e morto di Cristo a habri caminda pa humanidad completo bolbe haya e perfeccion cu Adam a perde.

Pero kisas bo ta puntra: ‘Si e morto di Hesus di un 2.000 aña pasa a haci posibel pa humanidad bolbe haya perfeccion, pakico maldad y morto ta existi te ainda?’ E contesta riba e pregunta ei por yuda elimina e di dos causa di maldad, esta, hende su ignorancia di e propositonan di Dios.

Conocemento Exacto Ta Stimula Loke Ta Bon

Ora un persona sinsero haya conocemento exacto di loke Yehova y Hesus ta haciendo awor pa elimina maldad, esaki probablemente lo evita cu e ta consenti inconcientemente cu maldad y, piyo ainda, “bringa contra Dios.” (Echonan 5:38, 39) Yehova Dios ta dispuesto pa pasa por halto e malechonan cu e persona aki a yega di comete den su ignorancia. Papiando den Atenas, apostel Pablo a bisa: “Dios, pasando por alto e temponan di ignorancia, awor ta declara na hende cu tur hende na tur caminda mester repenti, pasobra el a fiha un dia den cual e lo husga mundo cu husticia pa medio di un homber, kende el a apunta, dunando prueba na tur hende door di lant’e for di e mortonan.”—Echonan 17:30, 31.

Pablo tawata sa di experencia personal cu Hesus a ser lanta for di morto, pasobra ta Hesus resusita mes a papia cu Pablo y a stop e di persigui e prome cristiannan. (Echonan 9:3-7) Unabes Pablo a ricibi conocemento exacto di e propositonan di Dios, el a cambia y bira realmente un bon hende cu a imita Cristo. (1 Corintionan 11:1; Colosensenan 3:9, 10) Ademas, cu entusiasmo Pablo a predica “e evangelio aki di e reino.” (Mateo 24:14) Durante e casi 2.000 añanan desde Hesus su morto y resureccion, Cristo a selecta for di entre humanidad hende cu, mescos cu Pablo, lo goberna cu ne den su Reino.—Revelacion 5:9, 10.

For di den transcurso di siglo pasa te cu aworaki, Testigonan di Yehova ta cumpliendo celosamente cu e tarea cu Hesus a duna nan: “Bai y haci tur e nacionnan disipel di mi, y batisa nan den nomber di e Tata y di e Yiu y di e spirito santo, y siña nan pa cumpli cu tur loke mi a ordena boso.” (Mateo  28:19, 20) Esnan cu ta responde na e mensahe aki tin e speransa di biba pa semper riba tera bou di e gobierno celestial di Cristo. Hesus a bisa: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.” (Huan 17:3) E fabor di mas grandi cu un persona por haci su prohimo ta di yud’e haya e conocemento aki.

Esnan cu ta acepta e bon nobo di Reino aki ta desplega cualidadnan manera “amor, goso, pas, pasenshi, cariño, bondad, fieldad, mansedumbre [y] dominio propio”, apesar di tur e maldad cu ta rondona nan. (Galationan 5:22, 23) Nan ta imita Hesus door di “nunca paga malo cu malo na ningun hende.” (Romanonan 12:17) Cada un di nan ta haci esfuerso pa “vence malo cu bon.”—Romanonan 12:21; Mateo 5:44.

E Victoria Final Riba Maldad

Riba nan mes, hamas hende lo por vence e promotor basico di maldad, Satanas e Diabel. Pero pronto, Yehova lo uza Hesus pa plecha Satanas su cabes. (Genesis 3:15; Romanonan 16:20) Yehova lo dirigi Cristo Hesus tambe pa “garna y pone un fin” na tur sistema politico. Hopi di esakinan a comete tur tipo di maldad atrabes di historia. (Daniel 2:44; Eclesiastes 8:9) Durante e dia di huicio benidero aki, tur hende cu “no ta obedece e evangelio di nos Señor Hesus ... lo paga e castigo di perdicion eterno.”—2 Tesalonicensenan 1:8, 9; Sofonias 1:14-18.

Unabes Satanas y su apoyadonan ser elimina, Hesus, for di su posicion den shelo, lo yuda sobrevivientenan restaura tera na su estado original. Cristo lo resusita tambe tur esnan cu ta digno di e oportunidad pa biba riba e tera restaura. (Lucas 23:32, 39-43; Huan 5:26-29) Cu esei, lo e nulifica algun di e efectonan di e maldad cu humanidad a sufri.

Yehova lo no forsa hende pa obedece e bon nobo tocante Hesus. Sinembargo, e ta dunando hende e oportunidad pa haya e conocemento cu ta hiba na bida. Ta masha importante pa bo probecha di e oportunidad aki awor! (Sofonias 2:2, 3) Si bo haci esei, lo bo siña con pa enfrenta cualkier maldad cu ta afligi bo bida aworaki. Lo bo mira tambe con Cristo lo logra e victoria final riba maldad.—Revelacion 19:11-16; 20:1-3, 10; 21:3, 4.

[Plachi na pagina 5]

Saulo a consenti cu actonan di maldad pa motibo cu e no tawatin conocemento exacto

[Plachi na pagina 7]

E fabor di mas grandi cu un persona por haci su prohimo ta di yud’e haya conocemento exacto di Dios