Con Firme Bo Confiansa den Dios Ta?

“Ma busca prome e reino.”—MATEO 6:33.

1, 2. Un homber hoben a dal ki paso relaciona cu su empleo, y dicon?

UN HOMBER hoben kier tawata mas util den su congregacion. Pero e problema tawata cu su trabou a strob’e di asisti cu regularidad na e reunionnan. Con el a resolve e situacion? El a simplifica su bida, kita for di su trabou y cu tempo a haya un trabou cu no tawata strob’e den su actividadnan cristian. Awe, e ta gana hopi menos cu antes, pero toch e por percura ainda pa e necesidadnan di su famia y ta den mihor posicion pa yuda e congregacion.

² Abo ta compronde dicon e homber hoben ei a dal un paso asina? Bo por mira bo mes ta dal un paso similar si bo tawata den mesun situacion cu ne? Ta di elogia cu hopi cristian a dal pasonan similar, y nan accion ta demostra nan confiansa den e promesa aki di Hesus: “Ma busca prome e reino di Dios y Su husticia, y tur e cosnan aki lo wordo añadi na boso.” (Mateo 6:33) Nan ta confia den Yehova como esun cu lo duna nan siguridad en bes di confia den e mundo.—Proverbionan 3:23, 26.

3. Dicon kisas tin algun hende ta puntra nan mes si ta practico awe pa pone e Reino di Dios na prome luga?

³ En bista di e tempo dificil cu nos ta bibando aden, tin hende kisas ta puntra nan mes si e homber ei a tuma un decision sabi. Awe, un parti di humanidad ta biba den pobresa extremo, mientras cu un otro parti ta gosa di e nivel di bida di mas halto den historia. Mayoria hende den paisnan pober lo probecha di cualkier chens cu nan haya pa haci nan bida un poco mas facil. Di otro banda, hopi hende den paisnan cu ta mas rico ta sinti e presion pa mantene nan nivel di bida apesar di economia suak, cambionan riba mercado laboral y doñonan di trabou cu ta mas y mas exigente. Mirando e presion cu tin pa hende gana nan pan di cada dia, tin cristian ta puntra nan mes: ‘Ta practico ainda pa busca e Reino prome?’ Pa yuda contesta e pregunta ei, ban wak ta cu ken Hesus tawata papia.

“No Precupa Boso Mes”

4, 5. Ki ilustracion Hesus a uza pa mustra cu ta rasonabel pa e pueblo di Dios no ta demasiado precupa cu asuntonan di bida diario?

⁴ Hesus tawata na Galilea, papiando cu un multitud grandi di hende for di hopi luga. (Mateo 4:25) Masha poco, y kisas ningun, di e hendenan ei no tawata rico. Probablemente, mayoria tawata pober. Pero toch, Hesus a urgi nan pa no duna prioridad na ganamento di rikesa material sino mas bien pa nan montona algo hopi mas balioso, esta, tesoro spiritual. (Mateo 6:19-21, 24) El a bisa: “No precupa boso mes pa boso bida, kico boso lo come of kico boso lo bebe; tampoco pa boso curpa, kico boso lo bisti. Bida no ta mas cu cuminda, y curpa mas cu paña di bisti?”—Mateo 6:25.

⁵ Pa hopi di esnan cu tawata scucha Hesus, e palabranan ei kisas a zona impractico. Nan tawata sa cu si nan no traha duro, nan famia lo a sufri. Sinembargo, Hesus a recorda nan di e parhanan. Tur dia parha tin cu busca cuminda, pero Yehova ta cuida nan. Tambe Hesus a mustra riba e manera cu Yehova ta percura pa e flornan di mondi, y nan beyesa a surpasa esun di Salomon ora e tawata den tur su gloria. Si Yehova ta percura pa parha y flor, cuanto mas lo e percura pa nos? (Mateo 6:26-30) Manera Hesus  a bisa, nos bida y curpa ta hopi mas importante cu e cuminda cu nos ta cumpra pa sostene nos bida y tambe e pañanan pa tapa nos curpa. Si nos dedica tur nos energia solamente na busca cos pa alimenta nos mes y pa tapa nos curpa, sin laga nada substancial keda pa sirbi Yehova, nos ta pasa por halto di loke ta precisamente e proposito di bida.—Eclesiastes 12:13, NW.

Un Punto di Bista Balansa

6. (a) Ki responsabilidad cristiannan tin? (b) Cristiannan ta pone nan pleno confiansa den ken?

⁶ Claro cu Hesus no a anima su oyentenan pa stop di traha, anto warda pa Dios, di un manera of otro, percura e necesidadnan di bida pa nan famia. Asta e parhanan tin cu busca cuminda pa nan mes y pa nan yiunan. Pues, e prome cristiannan tawatin cu traha si nan kier a come. Nan tawatin cu percura pa responsabilidadnan familiar. Cristiannan cu tawata sirbido of catibo tawatin cu traha diligentemente pa nan shon. (2 Tesalonicensenan 3:10-12; 1 Timoteo 5:8; 1 Pedro 2:18) Apostel Pablo a traha hopi biaha como trahado di tent pa mantene su mes. (Echonan 18:1-4; 1 Tesalonicensenan 2:9) Sinembargo, e cristiannan ei no a depende riba nan trabou pa duna nan siguridad. Nan a confia den Yehova. Como resultado, nan a disfruta di un pas interno cu tawata desconoci pa otro hende. E salmista a bisa: “Esnan cu ta confia den SEÑOR ta manera Sero Sion, cu no por wordo movi, ma cu ta permanece pa semper.”—Salmo 125:1.

7. Kico kisas ta e punto di bista di un persona cu no ta confia firmemente den Yehova?

⁷ Ken cu no ta confia firmemente den Yehova kisas ta pensa otro. Mayoria hende ta mira rikesa material como e yabi principal pa haya siguridad. Pesei tin mayornan cu a anima nan yiunan pa inverti gran parti di nan añanan como hoben adulto na educacion mas avansa, sperando cu esei lo prepara nan pa empleonan cu ta paga bon. Lamentablemente, algun famia cristian a sufri gran perdida door di inverti tanto tempo asina den esei, ya cu nan yiunan a perde nan enfoke spiritual y a bai sigui tras di metanan materialista.

8. Ki balansa cristiannan ta mantene?

⁸ Pues, cristiannan sabi ta realisa cu e conseho di Hesus ta mesun aplicabel awe cu e tawata den prome siglo, y nan ta purba keda balansa.  Asta si nan tin cu pasa hopi ora na trabou afin di por cumpli cu responsabilidadnan biblico, nunca nan no ta laga e echo cu nan mester traha pa gana placa pone nan pasa por halto di asuntonan spiritual cu ta mas importante.—Eclesiastes 7:12.

Mas Conseho pa “No Precupa”

9. Ki garantia Hesus a duna esnan cu ta confia plenamente den Yehova?

⁹ Hesus a urgi su oyentenan den su Sermon Riba Sero: “No precupa boso mes anto, bisando: ‘Kico nos lo come?’ of ‘Kico nos lo bebe?’ of ‘Kico nos lo bisti?’ Pasobra tur e cosnan aki e paganonan ta busca; ma boso Tata celestial sa cu boso tin mester di tur e cosnan aki.” (Mateo 6:31, 32) E palabranan aki ta hopi animador! Si nos ta confia plenamente den Yehova, semper lo e t’ei pa sostene nos. Pero e palabranan di Hesus ta pone nos para pensa un rato tambe. Nan ta recorda nos cu si nos ta “busca” cosnan material cu empeño, nos manera di pensa ta mescos cu di “e paganonan”, esta, hendenan cu no ta cristiannan berdadero.

10. Ora un homber hoben a acerca Hesus pa conseho, con Hesus a revela loke e homber hoben tawata stima mas tanto?

¹⁰ Na un ocasion un homber hoben cu tawata hopi rico a puntra Hesus kico e mester haci pa haya bida eterno. Hesus a record’e di e rekisitonan di e Lei, cu e tempo ei ainda tawata na vigor. E homber hoben a sigura Hesus: “Tur e cosnan aki mi a warda. Kico mas mi falta?” Hesus su contesta kisas a zona impractico pa hopi hende. E di: “Si bo kier ta perfecto, bai y bende bo propiedadnan y duna na hende pober, y lo bo tin tesoro den shelo; y bin, sigui mi.” (Mateo 19:16-21) E homber hoben a bai tur tristo, pasobra e no por a biba cu e pensamento di perde su rikesa. Maske cuanto e tawata stima Yehova, el a stima su propiedadnan mas cu Yehova.

11, 12. (a) Ki palabranan cu ta pone nos para pensa Hesus a expresa relaciona cu rikesa? (b) Con un hende su propiedad por strob’e di sirbi Yehova?

¹¹ E suseso ei a pone Hesus bisa algo inespera: “Ta dificil pa un hende rico drenta e reino di shelo. ... Ta mas facil pa un camel pasa door di wowo di un hangua, cu pa un hende rico drenta e reino di Dios.” (Mateo 19:23, 24) Acaso Hesus tawata kiermen cu ningun hende rico lo hereda e Reino? No, no ta esei e tawata kiermen, pasobra el a sigui bisa: “Serca Dios tur cos ta posibel.” (Mateo 19:25, 26) Si, cu Yehova su yudansa algun hende rico den e tempo ei a bira cristian ungi. (1 Timoteo 6:17) Sinembargo, Hesus a bisa e palabranan sorprendente ei pa un bon motibo. E tawata dunando un spiertamento.

¹² Si un persona pega su curason na e propiedadnan cu e tin, mescos cu e homber hoben rico ei a haci, e cosnan ei lo por bira un barera cu ta strob’e di sirbi Yehova di henter curason. Esei por ta e caso tanto cu un hende cu ta rico caba como cu un hende cu “kier bira rico.” (1 Timoteo 6:9, 10) Demasiado confiansa den cosnan material por pone un persona bira menos ‘conciente di su necesidad spiritual.’ (Mateo 5:3, NW) Como resultado, kisas e no ta sinti tanto mester mas di Yehova su sosten. (Deuteronomio 6:10-12) Lo e por cuminsa spera cu e mester haya trato special den e congregacion. (Santiago 2:1-4) Y lo e por cuminsa dedica mayor parti di su tempo na gosa di su rikesa en bes di na sirbi Yehova.

Cultiva e Punto di Bista Corecto

13. Ki punto di bista robes e cristiannan di Laodicea tawatin?

¹³ Un grupo cu tawatin un punto di bista robes pa cu propiedad tawata e congregacion di prome siglo na Laodicea. Hesus a bisa nan: “Bo ta bisa: ‘Mi ta rico, mi ta bon para y no tin mester di nada’, y bo no sa cu bo ta deplorabel y miserabel, pober, ciego y sunu.” No ta e rikesa di e cristiannan di Laodicea a hiba nan na tal condicion spiritual lamentabel. Tawata e echo cu nan a confia mas den rikesa cu den Yehova. Como resultado, nan a bira lou den sentido spiritual, y Hesus tawata serca di ‘scupi’ nan for di su boca.—Revelacion 3:14-17.

14. Dicon e cristiannan Hebreo a merece Pablo su palabranan di elogio?

 ¹⁴ Di otro banda, Pablo a elogia e cristiannan Hebreo pa nan actitud durante un periodo di persecucion cu a tuma luga mas prome. El a bisa nan: “Boso a compadece di e presonan y a acepta cu goso e confiscacion di boso propiedad, sabiendo cu boso tin pa boso mes un mihor pocesion y un cu ta permanece.” (Hebreonan 10:34) E cristiannan ei no a keda destrosa door cu nan a perde nan propiedadnan. Nan a keda cu nan goso pasobra nan tawatin gara riba nan pocesion di mas balioso, “un mihor pocesion y un cu ta permanece.” Mescos cu e comerciante cu a sacrifica tur cos pa un perla balioso den Hesus su comparacion, nan tawata determina pa no perde nan gara riba e speransa di Reino, cueste loke cueste. (Mateo 13:45, 46) Ki un actitud excelente!

15. Con un mucha mohe cristian na Liberia a pone interesnan di Reino na prome luga?

¹⁵ Hopi cristian awe a cultiva e mesun actitud excelente ei. Por ehempel, na Liberia, un mucha mohe cristian a haya e oferta pa studia na universidad. Den e pais ei, hende ta mira un oferta asina como un manera pa alcansa un futuro sigur. Sinembargo, e tawata un pionero, es decir, un predicado di tempo completo, y el a caba di haya un invitacion pa sirbi como pionero special temporal. El a dicidi di busca e Reino prome y a keda den sirbishi di tempo completo. El a bai su asignacion y a cuminsa 21 estudio di Bijbel den tres luna. E ruman mohe hoben aki y miles di otronan mescos cu ne ta busca prome e Reino, asta a costo di posibel bentahanan material. Con nan ta logra mantene un actitud asina den e mundo materialista aki? Door cu nan a cultiva varios cualidad excelente. Laga nos trata algun di nan.

16, 17. (a) Pakico modestia ta importante si nos kier confia den Yehova? (b) Dicon nos mester cultiva confiansa den e promesanan di Dios?

¹⁶ Modestia. Bijbel ta bisa: “Confia den SEÑOR cu henter bo curason, y no depende riba bo mes comprondemento. Den tur bo camindanan reconoc’e, y e lo dirigi bo bereanan. No sea sabi den bo mes bista.” (Proverbionan 3:5-7) Tin biaha, un cierto rumbo lo por parce practico desde e punto di bista di mundo. (Yeremias 17:9) Pero toch, un cristian sinsero ta acudi na Yehova pa haya guia. (Salmo 48:14) ‘Den tur su camindanan’—den asuntonan di congregacion, educacion, trabou, recreo of cualkier otro cos—e ta busca modestamente e conseho di Yehova.—Salmo 73:24.

 ¹⁷ Confiansa den e promesanan di Yehova. Pablo a bisa: “Esun cu bin serca Dios mester kere cu e ta, y cu e ta Esun cu ta recompensa esnan cu ta busc’e.” (Hebreonan 11:6) Si nos ta duda cu Yehova lo cumpli cu su promesanan, lo por parce logico e ora ei pa ‘haci uzo completo di e cosnan di mundo.’ (1 Corintionan 7:31) Di otro banda, si nos fe ta fuerte, nos lo ta determina pa busca e Reino prome. Con nos por cultiva un fe fuerte? Door di hala serca Yehova den oracion constante y sinsero, y mediante estudio personal regular. (Salmo 1:1-3; Filipensenan 4:6, 7; Santiago 4:8) Mescos cu rei David, nos por bisa den oracion: “Mi ta confia den bo, o SEÑOR; mi ta bisa: ‘Bo ta mi Dios.’ Ki grandi ta bo bondad!”—Salmo 31:14, 19.

18, 19. (a) Con diligencia ta fortalece nos confiansa den Yehova? (b) Dicon un cristian mester ta dispuesto pa haci sacrificio?

¹⁸ Sea diligente den e sirbishi di Yehova. Pablo a conecta confiansa den e promesanan di Yehova cu ser diligente ora el a skirbi: “Nos ta desea cu cada un di boso lo mustra e mesun diligencia pa asina realisa e siguransa completo di speransa te na fin.” (Hebreonan 6:11) Si nos ta ocupa den e sirbishi di Yehova, lo e sostene nos. Cada biaha cu nos experencia e sosten ei, nos confiansa den dje ta bira mas fuerte, nos ta bira “firme, constante.” (1 Corintionan 15:58) Nos fe ta ser renoba, y nos speransa ta keda confirma.—Efesionan 3:16-19.

¹⁹ Dispuesto pa haci sacrificio. Pablo a sacrifica un carera prometedor pa e por a sigui Hesus. Claramente el a tuma e decision corecto, aunke tawatin biaha cu su bida tawata dificil desde un punto di bista material. (1 Corintionan 4:11-13) Yehova no ta priminti un bida di luho, y tin biaha su sirbidonan ta soporta dificultadnan. E echo cu nos ta dispuesto pa simplifica nos estilo di bida y haci sacrificio ta duna prueba con fuerte nos determinacion ta pa sirbi Yehova.—1 Timoteo 6:6-8.

20. Dicon pasenshi ta masha importante pa un persona cu ta pone interesnan di Reino na prome luga?

²⁰ Pasenshi. Disipel Santiago a urgi e otro cristiannan: “Tene pasenshi, rumannan, te na e binida di Señor.” (Santiago 5:7) Den e mundo cu ta move cu paso rapido aki, ta dificil pa tene pasenshi. Nos kier pa cosnan sosode lihe lihe. Pero Pablo ta urgi nos pa imita esnan cu “pa medio di fe y pasenshi ta hereda e promesanan.” (Hebreonan 6:12) Sea dispuesto pa warda riba Yehova. Bida eterno den un paradijs riba tera; definitivamente ta bale la pena pa warda riba esei!

21. (a) Kico nos ta demostra ora nos ta pone interesnan di Reino na prome luga? (b) Kico nos lo trata den e siguiente articulo?

²¹ Si, Hesus su conseho pa busca prome e Reino ta practico. Ora nos ta haci esei, nos ta demostra cu realmente nos ta confia den Yehova y nos ta scohe e unico manera safe pa un cristian biba. Sinembargo, Hesus a conseha nos tambe pa sigui ‘busca prome Dios su husticia.’ Den e siguiente articulo, nos lo mira dicon e animacion ei ta necesario specialmente awe.

Bo Por Splica?

• Hesus a anima nos pa nos tin ki balansa relaciona cu cosnan material?

• Kico nos ta siña for di Hesus su comparacion di e camel y e wowo di hangua?

• Cua cualidadnan cristian ta yuda nos busca prome e Reino di Dios?

[Preguntanan di Estudio]

[Plachi na pagina 21]

Hopi di e hendenan cu a tende Hesus su palabranan tawata pober

[Plachi na pagina 23]

E homber hoben rico tawata stima su propiedadnan mas cu el a stima Dios

[Plachi na pagina 23]

E comerciante den Hesus su comparacion a sacrifica tur cos pa un solo perla balioso

[Plachi na pagina 24]

Si nos ta ocupa den e sirbishi di Yehova, lo e sostene nos