Haci Meditacion Algo Agradabel

ALGUN hende por haya cu ta dificil pa medita. Talbes nan ta mira esei como algo cu ta exigi un consentracion profundo. Kisas e personanan ei por sinti nan culpabel tambe door cu nan no ta medita, specialmente ora nan lesa con importante esei ta. (Filipensenan 4:8) Sinembargo, no tin nada mas agradabel cu e momentonan cu nos ta pasa reflexionando den silencio riba e berdadnan cu nos a siña tocante Yehova, su cualidadnan precioso, su hazañanan asombroso, su rekisitonan y su proposito glorioso. Dicon nos por bisa esei?

Yehova Dios ta e Gobernante Supremo di universo y ta trahando riba realisacion di su gran proposito. (Huan 5:17) Pero esei no ta kita cu e ta interesa den e pensamentonan di cada un di su adoradonan. E salmista David tawata sa esaki y a skirbi bou di inspiracion divino: “O SEÑOR, bo a samina mi y bo conoce mi. Bo sa ki ora mi ta sinta y ki ora mi ta lanta; bo ta compronde mi pensamentonan djaleu.”—Salmo 139:1, 2.

Na prome instante, kisas un hende ta mira e palabranan ei for di un punto di bista negativo. Talbes e ta rasona: ‘Aunke Dios Todopoderoso ta “leu”, e ta tuma nota di cada mal pensamento cu drenta mi mente.’ Claro cu ta bon pa nos ta conciente di esei. Lo e por yuda nos lucha contra mal pensamento y, ora nos haya e pensamentonan ei, confesa nan na Dios, cu e confiansa cu lo e pordona nos a base di nos fe den e sacrificio di rescate di Hesus. (1 Huan 1:8, 9; 2:1, 2) Sinembargo, na mes momento, nos mester corda cu Yehova ta examina su adoradonan na un manera positivo. E ta presta atencion ora nos ta pensa riba dje cu un curason gradicido.

Kisas bo ta puntra: “Di berdad Yehova ta tuma nota di tur bon pensamento di su miyones di adoradonan?” Si, sin duda. Hesus a enfatisa e interes cu Yehova tin den nos ora el a bisa cu Yehova ta tuma nota di asta un mofi chikito, y despues a agrega: “Boso bal mas cu un cantidad di mofi.” (Lucas 12:6, 7) Mofi no por pensa riba Yehova. Pues si Dios ta interesa den nan, cuanto mas lo e ta interesa den nos y haya deleite den e pensamentonan deboto di cada un di nos! Si, mescos cu David, nos por pidi Dios cu confiansa: “Laga e ... meditacion di mi curason ta aceptabel [“agradabel”, NW] den bo bista, o SEÑOR, mi baranca y mi Redentor.”—Salmo 19:14.

Otro prueba cu en berdad Yehova ta interesa den e meditacion di su adoradonan leal ta ser haya den e palabranan inspira di profeta Malakias. Papiando di nos tempo, el a profetisa: “Na e tempo ei, esnan den temor di Yehova a papia un cu otro, cada un cu su compañero, y Yehova a sigui presta atencion y scucha. Y un buki di recuerdo a cuminsa ser skirbi dilanti dje pa esnan den temor di Yehova y pa esnan cu ta pensa riba su nomber.” (Malakias 3:16, NW) Ora nos corda nos mes cu Yehova ta sigui “presta atencion” na momento cu nos ta pensa riba dje, esei en berdad por haci meditacion riba dje algo agradabel. Pesei, laga nos ripiti e palabranan di e salmista kende a skirbi: “Lo mi medita riba tur bo obranan, y keda pensa riba bo echonan.”—Salmo 77:12.