Pregunta di Lector

E arca di aliansa tawatin solamente e dos tablanan di piedra den dje, of tawatin otro articulonan tambe?

Ora cu a dedica e tempel di Salomon na aña 1026 prome cu nos era, “no tawatin nada den e arca sino solamente e dos tablanan cu Moises a pone den dje na Horeb, caminda SEÑOR a sera un aliansa cu e yiunan di Israel, tempo cu nan a sali for di Egipto.” (2 Cronicanan 5:10) Sinembargo, esei no tawata semper asina.

“Den e di tres luna despues cu e yiunan di Israel a sali for di tera di Egipto”, nan a drenta e desierto di Sinai. (Exodo 19:1, 2) Poco despues, Moises a subi Sero Sinai y a haya e dos tablanan di piedra di e Lei. El a conta: “E ora ei mi a bira y a baha for di e sero y a pone e tablanan den e arca cu mi a traha; y aya nan a keda, manera SEÑOR a ordena mi.” (Deuteronomio 10:5) Esaki tawata un arca of caha temporal cu Yehova a bisa Moises traha pa carga e tablanan di e Lei. (Deuteronomio 10:1) Ta te na fin di aña 1513 prome cu nos era numa e arca di aliansa, of arca di pacto, tawata cla pa ser uza.

Un poco despues di e Israelitanan su liberacion for di Egipto, nan a cuminsa murmura tocante cuminda. Pues, Yehova a percura mana pa nan. (Exodo 12:17, 18; 16:1-5) Na e ocasion ei, Moises a instrui Aron: “Cohe un butishi y pone un omer di mana aden, y pone esaki dilanti di SEÑOR, pa e keda warda durante di tur boso generacionnan.” E relato ta declara: “Manera SEÑOR a ordena Moises, asina Aron a pon’e dilanti di e Testimonio [un archivo pa proteha documentonan importante], pa e keda warda.” (Exodo 16:33, 34) Aunke na e ocasion ei Aron sin duda a pone e mana den un butishi, nan mester a warda te ora Moises a traha e Arca y pone e tablanan den dje pa nan por a pone e mana dilanti di e Testimonio.

Manera nos a menciona caba, e arca di aliansa a ser construi na final di aña 1513. Hopi mas despues, nan a pone e bara di Aron den e Arca ei, despues di e rebelion di Core y otronan. Apostel Pablo ta menciona “e arca di aliansa . . . , den cual tawatin un butishi di oro cu e mana aden, y Aron su bara cu a floria y e tablanan di e aliansa.”—Hebreonan 9:4.

E mana tawata algo cu Dios a percura pa e Israelitanan durante nan estadia di 40 aña den desierto. Dios no a provee mana mas pa nan ora cu ‘nan a cuminsa come di loke e tera priminti a produci.’ (Hosue 5:11, 12) A pone e bara di Aron den e arca di aliansa pa un proposito, esta, pa e sirbi como un señal of un prueba contra e generacion rebelde. Esaki ta indica cu e bara a keda einan por lo menos durante e tempo cu nan tawata den desierto. Pues anto, ta parce logico pa conclui cu poco despues cu Israel a drenta e Tera Priminti y prome cu a dedica e tempel di Salomon, nan a saca e bara di Aron y e butishi di oro cu mana aden for di e arca di aliansa.