Berdadero Prosperidad den e Mundo Nobo di Dios

DAVID, * un esposo y tata cristian, a muda bai Merca, sigur di su mes cu el a haci esei pa bienestar di su famia. Aunke e no kier a bai laga su casa y yiunan atras, e tawata combenci cu si e tawatin mas placa, lo e por a percura un mihor bida pa nan tur. Pues el a acepta un invitacion di su famianan na New York y a haya un trabou hopi lihe einan.

Pero segun cu lunanan tawata pasa, David su optimismo a cuminsa mengua. Practicamente e no tawatin tempo mas pa actividadnan spiritual y dado momento casi el a perde fe den Dios. Ta te despues cu el a cai den un tentacion inmoral el a bin realisa finalmente den ki situacion e tawata. Su enfoke riba prosperidad material pocopoco pero sigur a aleh’e for di loke realmente tawata importante p’e. E mester a haci cambio.

Mescos cu David, tur aña hopi hende ta emigra for di paisnan pober cu e speransa di drecha nan condicion economico. Pero hopi bes, for di un punto di bista spiritual, nan ta paga caro pa esei. Algun a puntra nan mes:  ‘Un cristian por busca rikesa material y alabes ser rico pa cu Dios?’ Escritornan popular y lidernan religioso ta bisa cu esei ta posibel. Pero manera David y otro personanan a bin realisa, pa bo logra esun sin perde e otro por ta hopi dificil.—Lucas 18:24.

Placa No Ta Algo Malo

Placa naturalmente ta un invento humano. Mescos cu hopi otro invento, riba su mes e no ta nada malo. De echo, e ta djis un medio di intercambio, y ora uz’e na un manera adecuado, e por sirbi un bon proposito. Por ehempel, Bijbel ta reconoce cu “placa ta proteccion”, specialmente contra problemanan relaciona cu pobresa. (Eclesiastes 7:12) Aparentemente, por lo menos pa algun hende, “placa ta e contesta pa tur cos.”—Eclesiastes 10:19.

E Scritura ta condena flohera y ta boga pa trabou duro. Nos tin cu percura pa nos famianan mas serca, y si nos tin algo extra, nos tin “algo pa comparti cu esun cu ta den necesidad.” (Efesionan 4:28; 1 Timoteo 5:8) Ademas, Bijbel no ta promove un bida di rechasa tur comodidad; al contrario, e ta anima nos pa disfruta di nos pocesionnan. E ta bisa nos pa “ricibi [nos] recompensa” y gosa di e frutanan di nos trabou. (Eclesiastes 5:18-20) De echo, den Bijbel tin varios ehempel di homber- y mohenan fiel cu tawata rico.

Hombernan Fiel Cu Tawata Rico

Abraham, un fiel sirbido di Dios, a acumula tounan grandi di bestia, hopi plata y oro, y un famia grandi di cientos di cria. (Genesis 12:5; 13:2, 6, 7) E homber husto Job tambe tawatin hopi rikesa. Su rikesa tawata consisti di bestia, cria, oro y plata. (Job 1:3; 42:11, 12) Asta segun normanan djawe e hombernan aki tawata rico, pero nan tawata rico pa cu Dios tambe.

Apostel Pablo ta yama Abraham e ‘tata di tur esnan cu tin fe.’ Abraham no tawata ni pichiri ni mucho pega na loke e tawatin. (Romanonan 4:11; Genesis 13:9; 18:1-8) Di igual manera, Dios mes a describi Job como “perfecto [“sin culpa”, NW] y recto.” (Job 1:8) Semper e tawata cla pa yuda hende pober y afligi. (Job 29:12-16) Tanto Abraham como Job a confia den Dios y no den nan rikesa.—Genesis 14:22-24; Job 1:21, 22; Romanonan 4:9-12.

Rei Salomon ta un otro ehempel. Como heredero di e trono di Dios na Herusalem, Dios a bendicion’e no solamente cu sabiduria, sino tambe cu rikesa abundante y gloria. (1 Reinan 3:4-14) Pa e mayor parti di su bida, e tawata fiel. Pero ora Salomon a bira hende grandi su “curason no tawata completamente dedica na SEÑOR.” (1 Reinan 11:1-8) Realmente, su experencia tristo ta ilustra algun di e trampanan  comun di prosperidad material. Laga nos considera un par.

Trampanan di Prosperidad

E peliger di mas serio ta esun di bira un stimado di placa y loke placa por cumpra. Rikesa ta lanta un hamber insasiabel den algun hende. Salomon, na cuminsamento di su reinado, a tuma nota di e tendencia aki den hende. El a skirbi: “Esun cu ta stima placa lo no keda satisfecho cu placa, ni esun cu ta stima abundancia, cu su entrada. Esaki tambe ta banidad.” (Eclesiastes 5:10) Despues, tanto Hesus como Pablo a spierta cristiannan tocante e amor engañoso aki.—Marco 4:18, 19; 2 Timoteo 3:2.

Ora placa bira nos interes principal en bes di djis un medio pa yega na cierto cosnan, nos ta bira vulnerable pa tur tipo di tentacion moral, manera gañamento, ladronicia y traicion. Hudas Iscariot, un di Cristo su apostelnan, a traiciona su doño pa apenas 30 pida plata. (Marco 14:11; Huan 12:6) Tin hende cu tin asina tanto amor pa placa cu nan ta asta laga Dios y bai adora placa. (1 Timoteo 6:10) Pesei, semper cristiannan mester purba di ta franco cu nan mes tocante kico ta nan berdadero motivacion pa yega na mas placa.—Hebreonan 13:5.

Ademas, buscamento di rikesa ta presenta peligernan mas sutil. Na prome luga, ora un hende tin hopi rikesa, e tin e tendencia di confia den su mes. Hesus a menciona esaki ora el a referi na “e engaño di rikesa.” (Mateo 13:22) Di igual manera, e escritor di Bijbel Santiago a spierta cristiannan pa no lubida riba Dios ni ora nan ta plania nan actividadnan comercial. (Santiago 4:13-16) Siendo cu placa por parce di duna nos un midi di independencia, pa esnan cu tin e, semper ta existi e peliger di confia den nan placa en bes di den Dios.—Proverbionan 30:7-9; Echonan 8:18-24.

Na di dos luga, manera David (menciona anteriormente) a bin ripara, hopi bes buscamento di rikesa ta exigi asina tanto tempo y energia di un hende cu gradualmente e ta cuminsa aleha for di interesnan spiritual. (Lucas 12:13-21) Otro tentacion cu hende rico ta haya nan cu ne constantemente ta di uza loke nan tin principalmente pa actividadnan di placer of interesnan personal.

Ta Salomon su bida di luho desenfrena a pon’e perde sano huicio y cai den sentido spiritual? (Lucas 21:34) E tawata sa cu Dios a prohibi su pueblo bon cla di casa cu hende di e nacionnan stranhero. Toch, na un dado momento e tawatin en total rond di 1.000 casa y concubina. (Deuteronomio 7:3) Ansioso pa complace su esposanan stranhero, el a purba forma un union di fe pa acomoda nan. Manera a ser menciona anteriormente, pocopoco pero sigur, esei a aleha e curason di Salomon for di Yehova.

E ehempelnan aki ta mustra claramente cu Hesus su conseho ta veridico: “Boso no por sirbi Dios y rikesa.” (Mateo 6:24) Pues con un cristian por enfrenta cu exito e desafionan economico cu mayoria hende ta confronta awe? Mas importante ainda, ki speransa tin pa un mihor bida den futuro?

Berdadero Prosperidad na Caminda

Distinto di e patriarcanan Abraham y Job y e nacion di Israel, siguidonan di Hesus tin e encargo pa “haci tur e nacionnan disipel.” (Mateo 28:19, 20) Pa cumpli cu e encargo ei nan mester dedica tempo y energia cu di otro manera lo a bai na interesnan di e mundo aki. Pesei, e clave pa exito ta sinta den haci loke Hesus a bisa nos pa haci: “Busca prome e reino di Dios y su husticia, y tur e cosnan aki lo wordo añadi na boso.”—Mateo 6:33.

Despues cu David a hera perde su famia, su fe y su relacion cu Dios, el a logra haya stabilidad den bida atrobe. Manera Hesus a priminti, ora David a bolbe cuminsa pone estudio di Bijbel, oracion y sirbishi na prome luga den su bida, tur otro cos a cuminsa mehora. Su relacion cu su casa y yiunan a drecha gradualmente.  El a bolbe haya su goso y felicidad. Ainda e ta traha duro pasobra e no a bira rico. Pero su experencia doloroso a siñ’e algun les balioso.

David a conclui cu su decision pa muda bai Merca no tawata esun di mas sabi, y el a determina pa nunca mas laga placa domina su accionnan. Awor e sa cu e cosnan di mas balioso den bida—un famia amoroso, bon amigo y un relacion cu Dios—no ta cosnan cu por wordo cumpra cu placa. (Proverbionan 17:17; 24:27, NW; Isaias 55:1, 2) En berdad, integridad moral ta mucho mas balioso cu rikesa material. (Proverbionan 19:1; 22:1) Hunto cu su famia, David ta determina pa sigui pone e cosnan di mas importante na prome luga.—Filipensenan 1:10, NW.

Esfuersonan humano pa edifica un sosiedad berdaderamente prospero pero cu tin balornan moral a faya bes tras bes. Sinembargo, Dios a priminti cu su Reino lo percura pa un abundancia di e cosnan material y spiritual cu nos tin mester pa por tin un bida felis. (Salmo 72:16; Isaias 65:21-23) Hesus a siña cu pa un hende ta berdaderamente felis, na prome luga e mester ta conciente di su necesidad spiritual. (Mateo 5:3, NW) Pues, sea cu nos ta rico of pober, e mihor manera cu cualkier un di nos por prepara pa e mundo nobo di Dios den futuro cercano ta di pone cosnan spiritual na prome luga. (1 Timoteo 6:17-19) E mundo ei lo ta un sosiedad berdaderamente prospero tanto den sentido material como spiritual.

[Nota]

[Plachi na pagina 5]

Job a confia den Dios, no den su rikesa

[Plachi na pagina 7]

E cosnan di mas balioso den bida no ta cosnan cu por wordo cumpra cu placa