Bo Ta Manera un Palo di Lagani Auna?

DEN un pueblo den e cunucunan di Port Moresby, Papua Nueva Guinea, dos predicado tawata regresando cas despues cu nan a caba di predica. Riba caminda, nan a mira un bunita palo. E homber di mas edad a bisa: “Ata, un lagani auna!” Cu cara pa e homber mas jong, el a agrega: “E nomber ei ta nifica ‘palo di tur aña.’ Distinto di hopi otro palo di e zona tropical, tur aña e ta perde su blachinan y ta parce di ta morto. Sinembargo, ora awa yobe, ta como si fuera e ta biba bek, e ta floria y briya den tur su splendor atrobe.”

Nos por siña un les for di e lagani auna, of palo di flamboyan, manera e ta ser yama. Segun algun experto, e ta ser conta entre e cinco palonan di flor di mas bunita na mundo. Aunke e ta perde su flornan y su blachinan durante secura, e palo ta mantene un reserva di awa. Su raiznan ta fuerte y por crece rond di baranca cu ta hundo den tera. Door di esaki e ta hancra su mes contra biento fuerte. Cu poco palabra, e ta bona door di saca lo maximo for di circunstancianan dificil.

Nos tambe por haya nos mes den circunstancianan cu ta pone e calidad di nos fe na prueba. Kico lo yuda nos persevera? Mescos cu e palo di lagani auna, nos por absorba y mantene un reserva di e awa di bida di e Palabra di Dios. Nos tambe mester pega fuertemente na ‘nos baranca’, Yehova, y na su organisacion. (2 Samuel 22:3) Berdaderamente, e palo di flamboyan of lagani auna ta un bon recordatorio cu si nos probecha di e provisionnan cu Yehova ta haci disponibel, asta den un ambiente desfaborabel nos por mantene nos fortalesa y bunitesa spiritual. Haciendo esei, nos lo “hereda e promesanan” cu el a haci, incluyendo esun di bida eterno.—Hebreonan 6:12; Revelacion 21:4.