Placa y Balornan Moral Historia Ta Siña Nos un Les

DIA 7 di april 1630, rond di 400 hende den cuater barco a sali for di Inglatera rumbo pa e Mundo Nobo. Entre nan tawatin hopi hende cu bon scol, comerciante exitoso y asta miembro di parlamento. E economia di nan pais, cu ya caba tawata den un crisis, a bai mas atras ainda durante e guera continuo di trinta aña na Europa (1618-48). Pues nan a tuma e risico di bandona cas, negoshi y famia y hisa bela bai en busca di un mihor porvenir.

Pero nan no tawata djis un grupo di comerciante oportunista yen di ilusion. Tawata trata aki di puritanonan celoso cu tawata hui pa persecucion religioso. * Nan meta real tawata pa establece un comunidad di hende deboto na Dios den cua nan cu nan yiunan por a prospera materialmente sin bai contra di e normanan di Bijbel. Un poco despues cu nan a yega tera na Salem, Massachusetts, nan a podera di un tereno chikito pega cu costa y nan a yama nan hogar nobo Boston.

Dificil pa Haya un Balansa

John Winthrop, nan lider y gobernado, a haci su best pa promove bienestar general y pa cada famia den e colonia nobo por a yega na prosperidad material. E tawata kier pa e hendenan tawatin tanto placa como balornan moral. Pero tawata dificil pa haya un balansa entre e dos cosnan aki. Anticipando desafionan, el a papia basta cu su compatriotanan tocante e papel cu rikesa ta hunga den un comunidad deboto.

Mescos cu otro lidernan puritano, Winthrop no tawata mira nada malo den busca prosperidad. Segun su rasonamento, e proposito principal di rikesa tawata pa yuda otro hende. Pues, mas rico un hende tawata, mas cos bon lo e por a haci. E historiado Patricia O’Toole a remarca: “Un di e topiconan cu mas a precupa e puritanonan tawata rikesa. E tawata un señal di e bendicion di Dios pero tambe un tentacion fuerte pa comete e pica di orguyo ... y e picanan di carni.”

 Pa evita e picanan cu rikesa y un bida di luho por produci, Winthrop a insisti riba moderacion y dominio propio. Pero no a tarda mucho cu e spirito di empresario di su conciudadanonan a cuminsa clash cu su intentonan pa obliga nan practica debocion na Dios y stima otro. Disidentenan a cuminsa protesta contra loke nan a mira como Winthrop su metemento pisa den nan bida priva. Algun a cuminsa boga publicamente pa bini cu un asamblea eligi cu lo a haya bos den tumamento di decision. Otronan, en bes di laga nan bos resona, simplemente a muda bai e estado biciña di Connecticut pa busca nan propio interesnan.

O’Toole a bisa: “Oportunidad, prosperidad, democracia, tur tawata forsanan poderoso den bida di e puritanonan di Massachusetts, y tur tawatin e tendencia di promove ambicionnan individual a costo di Winthrop su ideal colectivo.” Na 1649, Winthrop a muri casi sin ningun cen preto na edad di 61 aña. Aunke e colonia fragil a sobrevivi apesar di hopi dificultad, nunca Winthrop no a mira su soño bira realidad.

E Buskeda Ta Sigui

No ta John Winthrop so tawatin un vision idealista di un mihor mundo. Tur aña miles y miles di hende ta emigra for di Africa, Suitost Asia, Oost Europa y Latino America cu e speransa di haya un mihor bida. Algun di nan ta bini riba e idea aki a base di loke cientos di buki, seminario y website produci tur aña ta priminti, esta, di revela e secreto con pa bira rico. Sin duda, ainda tin hopi hende ta haci esfuerso y ta carga e speransa di yega na cen, sin perde nan balornan moral.

Francamente, e resultadonan tawata decepcionante. Hende cu ta busca rikesa hopi bes ta haya nan ta sacrifica nan principionan y tin biaha asta nan fe riba e altar di Mammon, of dios di rikesa. Pesei, bo tin bon motibo pa puntra bo mes: “Un hende por ta un cristian berdadero y alabes ser rico? Lo yega un dia cu lo existi un sosiedad di hende deboto na Dios cu tin tanto prosperidad material como spiritual?” Bijbel ta contesta e preguntanan ei, manera e siguiente articulo ta bai mustra.

[Nota]

[Reconocemento di Potret na pagina 3]

Botonan: The Complete Encyclopedia of Illustration/J. G. Heck; Winthrop: Brown Brothers