“Un Testimonio na Tur Nacion”

“Boso lo ta mi testigonan ... te na e parti mas aleha di mundo.”—ECHONAN 1:8.

1. Na ki tempo y na unda e disipelnan a tende e profecia di Mateo 24:14 pa prome biaha?

E PALABRANAN di Hesus cu ta para skirbi na Mateo 24:14 ta asina conoci cu hopi di nos sa nan for di cabes. Y ki un profecia realmente remarcabel esei ta! Imagina bo kico e disipelnan lo mester a pensa ora cu nan a tend’e pa prome biaha! Tawata aña 33 di nos era. E disipelnan tawatin rond di tres aña hunto cu Hesus, y awor nan a bin Herusalem hunto cu ne. Nan a mira su milagernan y a scucha su siñansanan. Aunke nan tawatin goso den e berdadnan precioso cu Hesus a siña nan, nan tawata sa bon bon cu no ta tur hende a comparti nan goso. Hesus tawatin enemigonan poderoso y cu hopi influencia.

2. Ki peliger- y retonan e disipelnan lo a confronta?

² Cuater disipel a cai sinta hunto cu Hesus riba Sero di Oleifi y a scucha cu sumo atencion segun cu el a papia tocante e peliger- y retonan cu nan lo confronta. Mas prome, Hesus a bisa nan cu lo e ser mata. (Mateo 16:21) Awor el a splica cu nan tambe lo experencia oposicion cruel y violento. El a bisa: “Nan lo entrega boso na tribulacion y lo mata boso, y tur nacion lo odia boso pa causa di mi nomber.” Pero esei no tawata tur cos. Profetanan falso lo gaña hopi hende. Otro hende lo trompica y lo traiciona otro y odia otro. Lo tin asta hende, de echo “hopi hende”, cu lo laga nan amor pa Dios y pa su Palabra fria.—Mateo 24:9-12.

3. Dicon e palabranan di Hesus na Mateo 24:14 ta realmente sorprendente?

³ Tawata despues di a menciona e circunstancianan negativo ei cu Hesus a haci un declaracion cu lo mester a straña su disipelnan. E di: “E evangelio aki di e reino lo wordo predica den henter mundo como un testimonio na tur nacion, y e ora ei e fin lo yega.” (Mateo 24:14) Si, e trabou cu Hesus a cuminsa den Israel, esta, di “duna testimonio di e berdad”, lo sigui y expande rond mundo. (Huan 18:37) Esei tawata un profecia realmente sorprendente! Pa extende e obra ei na “tur nacion” so caba lo tawata un reto; pa haci esei mientras cu “tur nacion lo odia” nan, lo no tawata nada otro cu un milager. Realisacion di e tarea inmenso aki lo a engrandece no solamente Yehova su supremacia y poder, sino tambe su amor, misericordia y pasenshi. Ademas, e obra ei lo duna su sirbidonan e oportunidad di demostra nan fe y debocion.

4. Ken a haya e tarea pa cumpli cu e trabou di predica, y ki consuelo Hesus a duna nan?

⁴ Hesus no a laga su disipelnan keda den ningun duda cu nan tawatin un trabou sumamente importante pa haci. Prome cu el a subi na shelo el a aparece na nan y a bisa: “Boso lo ricibi poder ora spirito santo bin riba boso, y boso lo ta mi testigonan na Herusalem y na henter Hudea y Samaria, y te na e parti mas aleha di mundo.” (Echonan 1:8) Claro cu pronto mas hende lo a join nan. Pero toch e cantidad di disipel tawata tiki. Ki un gran consuelo lo mester tawata ora nan a haya sa cu Dios su poderoso spirito santo lo capasita nan pa cumpli cu e asignacion divino aki!

5. Kico e disipelnan no tawata sa tocante e trabou di duna testimonio?

⁵ E disipelnan tawata sa cu nan mester a predica e bon nobo y ‘haci disipel di hende di tur nacion.’ (Mateo 28:19, 20) Pero nan no tawata sa con cabal e testimonio lo tawata ni ki  ora e fin lo bin. Nos tampoco no sa. Esakinan ta cosnan cu ta Yehova so ta dicidi. (Mateo 24:36) Unabes Yehova ta satisfecho cu e grado cu e testimonio a ser duna, lo e trece un fin na e mundo malbado aki. Ta e ora ei numa cristiannan lo ripara cu e trabou di predica a sosode te na e grado cu Yehova tawata kier. E disipelnan den prome siglo lo no por a imagina nan e magnitud di e testimonio cu lo a ser duna den e tempo di fin aki.

E Testimonio Duna den Prome Siglo

6. Kico a sosode na Pentecoste di aña 33 y poco despues?

⁶ Den prome siglo, e trabou di predica e Reino y di haci disipel a produci resultadonan asombroso. Riba e dia di Pentecoste di aña 33, rond di 120 disipel tawata den un camber ariba na Herusalem. Dios a drama su spirito santo riba nan, apostel Pedro a duna un discurso motivador cu a splica e nificacion di e milager aki, y rond di 3.000 hende a bira creyente y a ser batisa. Esei tawata apenas e principio. Apesar di esfuersonan dicidido di parti di e lidernan religioso pa para e predicacion di e bon nobo, ‘tur dia Yehova tawata agrega na e disipelnan esnan cu tawata wordo salba.’ Den poco tempo, “e cantidad di e hombernan a bira como cinco mil.” Despues di esei, “constantemente tawata bin mas y mas hende acerca cu tawata kere den Señor, multitudnan di homber y mohe.”—Echonan 2:1-4, 8, 14, 41, 47; 4:4; 5:14.

7. Dicon e combertimento di Cornelio tawata un desaroyo significativo?

⁷ Aña 36 a mira un otro desaroyo significativo, esta, combertimento y bautismo di Cornelio, un homber no Hudiu. Ora di dirigi apostel Pedro na e homber temeroso di Dios aki, Yehova a indica cu Hesus su mandamento pa ‘haci disipel di hende di tur nacion’ no tawata limita na Hudiunan den varios pais. (Echonan 10:44, 45) Kico tawata e reaccion di esnan cu tawata hiba delantera? Ora e apostelnan y ancianonan na Hudea a ripara cu mester a hiba e bon nobo na e paganonan tambe—esta na hende no Hudiu—nan a glorifica Dios. (Echonan 11:1, 18) Mientrastanto, e trabou di predica a sigui duna fruta entre e Hudiunan. Algun aña despues, posiblemente rond di aña 58, tawatin aparte di e creyentenan no Hudiu, ‘miles entre e Hudiunan cu a kere.’—Echonan 21:20.

8. Con e bon nobo ta influencia personanan individual?

⁸ Aunke e aumento den e cantidad di hende entre e cristiannan di prome siglo ta impresionante, nunca nos no mester lubida e personanan individual cu e cifranan ei ta representa. E mensahe biblico cu nan a tende tawata poderoso. (Hebreonan 4:12) El a cambia drasticamente e bida di esnan cu a acept’e. Hende a cuminsa hiba un bida moralmente limpi, a bisti e personalidad nobo y a wordo reconsilia cu Dios. (Efesionan 4:22, 23) Ta mescos awe. Anto tur esnan cu  acepta e bon nobo tin e speransa maraviyoso di biba pa semper.—Huan 3:16.

Dios Su Colaboradonan

9. Ki privilegio y responsabilidad e cristiannan di prome siglo a reconoce cu nan tawatin?

⁹ E cristiannan di prome siglo no a tuma e merito pa loke tawata ser logra. Nan a reconoce cu nan trabou di predica tawata ser sosteni door di “e poder di spirito santo.” (Romanonan 15:13, 19) Yehova tawata esun responsabel pa crecemento spiritual. Na mesun tempo, e cristiannan ei tawata sa cu nan tawatin e privilegio y responsabilidad di ser “Dios su colaboradonan.” (1 Corintionan 3:6-9) Pesei, na harmonia cu Hesus su conseho, nan a haci tur nan esfuerso den e asignacion cu nan a haya.—Lucas 13:24.

10. Ki esfuerso algun di e cristiannan di prome a haci pa duna un testimonio na tur nacion?

¹⁰ Pablo, como “apostel di e paganonan”, a biaha miles di kilometer riba tera y lama, estableciendo hopi congregacion den e provincia Romano di Asia y na Grecia. (Romanonan 11:13) Tambe el a biaha bai Roma y posiblemente asta te Spaña. Mientrastanto apostel Pedro, confia cu “e evangelio na esnan sircuncida”, a biaha bai den e otro direccion pa sirbi na Babilonia, cu e tempo ei tawata un luga caminda tawatin hopi Hudiu. (Galationan 2:7-9; 1 Pedro 5:13) Entre e tantisimo personanan cu a labora den e trabou di Señor tawatin mohenan manera Trifena y Trifosa. Bijbel ta bisa di un otro mohe cu yama Persida, cu el “a traha duro den Señor.”—Romanonan 16:12.

11. Con Yehova a bendiciona e esfuerso di e disipelnan?

¹¹ Yehova a bendiciona ricamente e esfuerso di e cristiannan ei y di otro trahadonan celoso. Menos cu 30 aña despues cu Hesus a profetisa cu lo duna un testimonio na tur nacion, Pablo a skirbi cu e “evangelio” a ser “proclama den henter creacion bou di shelo.” (Colosensenan 1:23) Acaso e fin a bin? Den un sentido, si. El a bin riba e sistema di cosnan Hudiu na aña 70 ora cu e ehersitonan Romano a destrui Herusalem hunto cu e tempel. Sinembargo, Yehova a dicidi cu lo mester a duna un testimonio hopi mas grandi prome cu e trece un fin na henter e mundo malbado di Satanas.

E Testimonio Duna Awe

12. Con na principio e Studiantenan di Bijbel a compronde e mandamento pa predica?

¹² Durante e ultimo parti di siglo 19 a reestablece adoracion puro, despues cu apostasia religioso a prevalece pa un periodo largo. E Studiantenan di Bijbel, manera Testigonan di Yehova tawata conoci e tempo ei, a compronde bon cla e mandamento pa bai haci disipel den henter e tera. (Mateo 28:19, 20) Pa aña 1914, tawatin rond di 5.100 persona cu tawata participa diligentemente den e actividad di predica, y e bon nobo a yega na 68 pais. Sinembargo, na principio e Studiantenan di Bijbel no a capta e pleno nificacion di Mateo 24:14. Pa fin di siglo 19, e Bijbel, cu ta contene e bon nobo of evangelio, a ser traduci  y imprimi na hopi idioma door di sosiedadnan di Bijbel y distribui rond mundo. Pesei durante algun decada e Studiantenan di Bijbel a rasona cu ya caba a duna un testimonio na e nacionnan.

13, 14. Ki comprondemento mas cla di Dios su boluntad y proposito a wordo presenta den un edicion di E Toren di Vigilancia di 1928?

¹³ Pocopoco, Yehova a duna su pueblo un comprondemento mas cla di su boluntad y proposito. (Proverbionan 4:18) E Toren di Vigilancia di 1 di december 1928, a bisa: “Acaso nos por bisa cu [e] distribucion di Bijbel a efectua e predicacion profetisa di e evangelio di e reino? Definitivamente cu no! Apesar di e distribucion aki di Bijbel ainda ta necesario pa Dios su grupo chikito di testigonan riba tera imprimi literatura cu ta splica Dios su [proposito] y bishita e casnan caminda a laga e Bijbelnan aki. Si no haci esaki, e hendenan ta keda ignorante di e echo cu e gobierno Mesianico a wordo estableci den nos tempo.”

¹⁴ E edicion ei di E Toren di Vigilancia a sigui bisa mas aleu: “Na 1920, . . . Studiantenan di Bijbel a yega na un comprondemento corecto di e profecia di nos Señor na Mateo 24:14. E ora ei nan a realisa cu ‘e evangelio aki’ cu mester a ser predica den henter mundo como un testimonio na e hendenan no Hudiu of na tur nacion, no tawata e evangelio di un reino cu tin cu bin ainda sino e evangelio cu ta declara cu e Rei Mesianico a cuminsa cu su reinado riba tera.”

15. Con e trabou di duna testimonio a expande desde e decada di 1920?

¹⁵ E “grupo chikito di testigonan” ei den e decada di 1920 no a keda chikito. Den e decadanan cu a sigui, nan a identifica “un multitud grandi” di ‘otro carne’ y a cuminsa trece nan hunto. (Revelacion 7:9; Huan 10:16) Awe tin rond di 6.613.829 proclamado di e bon nobo den 235 pais. Ki un cumplimento maraviyoso di profecia! Nunca prome “e evangelio aki di e reino” a ser predica na asina un gran escala. Nunca prome tawatin asina tanto sirbido fiel di Yehova riba tera.

16. Kico a ser logra den e aña di sirbishi cu a pasa? (Wak e raport na pagina 27-30.)

¹⁶ Hunto, e inmenso multitud aki di Testigonan a traha duro durante e aña di sirbishi 2005. Nan a dedica mas cu mil miyon ora na proclamacion di e bon nobo den 235 pais. Nan a haci miyones di rebishita, y a conduci miyones di estudio di Bijbel. E trabou aki a ser efectua door di Testigonan di Yehova cu a duna libremente di nan tempo y recurso pa comparti e Palabra di Dios cu otro hende. (Mateo 10:18) Yehova, pa medio di su poderoso spirito santo, ta sigui capasita su sirbidonan pa cumpli cu su boluntad.—Zacarias 4:6.

Trahando Duro pa Duna un Testimonio

17. Con e pueblo di Yehova ta reaccionando riba e palabranan di Hesus tocante predicacion di e bon nobo?

¹⁷ Aunke casi 2.000 aña a pasa desde cu Hesus a bisa cu e bon nobo lo ser predica, e celo cu Dios su pueblo tin pa e trabou no a  mengua. Nos sa cu door di persevera den haci loke ta bon, nos ta refleha Yehova su cualidadnan di amor, misericordia y pasenshi. Mescos cu Yehova, nos no kier pa ningun hende bai perdi ma pa nan repenti y wordo reconsilia cu Yehova. (2 Corintionan 5:18-20; 2 Pedro 3:9) Siendo ferviente cu e spirito di Dios, Testigonan di Yehova ta sigui proclama e bon nobo celosamente te na e finnan di tera. (Romanonan 12:11) Como resultado, hende na tur parti ta aceptando e berdad y ta ahusta nan mes na Yehova su guia amoroso. Considera un par di ehempel.

18, 19. Cua experencianan bo por conta di algun hende cu a reacciona faborablemente riba e bon nobo?

¹⁸ Charles tawata un cunukero den parti west di Kenia. Na aña 1998 el a bende mas cu 8.000 kilo di tabaco y a haya un certificado cu a nombr’e e Mihor Cunukero di Tabaco. Rond di e tempo ei el a cuminsa studia Bijbel. Poco despues el a bin realisa cu un persona envolvi den produccion di tabaco ta viola Hesus su mandamento di stima bo prohimo. (Mateo 22:39) Ora cu Charles a yega na e conclusion cu ‘e mihor cunukero di tabaco’ tawata en realidad ‘e mihor matado’, el a spuit su matanan di tabaco cu veneno. El a haci progreso, te el a dedica su mes y a batisa y awor e ta un pionero regular y un sirbido ministerial.

¹⁹ No tin duda cu Yehova ta sagudiendo e nacionnan pa medio di e testimonio mundial cu ta ser duna, anto hende—e rikesa of cosnan deseabel di e nacionnan—ta biniendo serca dje. (Hageo 2:7) Pedro, kende ta biba na Portugal, a drenta un seminario tempo cu e tawatin 13 aña. Su meta tawata pa bira un misionero y siña hende Bijbel. Sinembargo, despues di un tempo cortico el a bandona e seminario pasobra den e lesnan nan tawata siña masha tiki di Bijbel. Seis aña despues, e tawata studia psicologia na un universidad na Lisboa. E tawata biba serca su tanta cu tawata Testigo di Yehova, y e tanta a anim’e pa studia Bijbel. Na e tempo ei, Pedro no tawata sa sigur si Dios ta existi, ni e no por a dicidi si e mester tuma un estudio di Bijbel of no. El a papia cu su profesor di psicologia tocante hende indeciso. E profesor a bis’e cu un di e principionan di psicologia ta bisa cu hende cu no por tuma decision tin e inclinacion di ta autodestructivo. E ora ei Pedro a dicidi di acepta un estudio di Bijbel. El a batisa resientemente y awor e mes ta conduci estudio di Bijbel cu otro hende.

20. Dicon nos por ta contento cu testimonio na e nacionnan ta ser duna na asina un gran escala?

²⁰ Ainda nos no sa te con leu testimonio lo ser duna na e nacionnan, tampoco nos no sa e dia ni e ora cu e fin lo bin. Unico cos cu nos sa ta cu lo e ta pronto. Nos ta contento cu e predicacion di e bon nobo haci na asina un gran escala ta solamente un di e tantisimo indicacionnan cu e tempo ta serca pa e Reino di Dios remplasa gobiernonan humano. (Daniel 2:44) Cada aña cu pasa, miyones di hende ta haya e oportunidad di reacciona riba e bon nobo, y esaki ta glorifica nos Dios, Yehova. Laga nos ta determina pa keda fiel y pa hunto cu nos rumannan rond mundo nos keda ocupa den e trabou di duna testimonio na tur nacion. Haciendo esei, nos lo salba tanto nos mes como esnan cu scucha nos.—1 Timoteo 4:16.

Bo Ta Corda?

• Dicon Mateo 24:14 ta un profecia asina remarcabel?

• Ki esfuerso e cristiannan di prome siglo a haci pa predica, y cu ki resultado?

• Con e Studiantenan di Bijbel a bin compronde cu ta necesario pa duna testimonio na tur nacion?

• Kico ta impresiona bo ora cu bo considera e actividad di e pueblo di Yehova den e aña di sirbishi cu a pasa?

[Preguntanan di Estudio]

 [Tabel na pagina 27-30]

RAPORT DI AÑA DI SIRBISHI 2005 DI TESTIGONAN DI JEHOVA MUNDIALMENTE

 (Wak volumen)

[Mapa/Plachi na pagina 25]

Pablo a biaha miles di kilometer riba tera y lama afin di predica e bon nobo

[Plachi na pagina 24]

Yehova a dirigi Pedro pa bai predica na Cornelio y su famia