Storia di Bida

Yehova A Yuda Mi Hay’e

SEGUN E RELATO DI FLORENCE CLARK

Mi tawata tene man di mi esposo cu tawata gravemente malo. Siendo anglicano, mi a resa na Dios pa mi esposo por recupera, y mi a priminti Dios cu si e no muri, lo mi busca Dios te ora mi hay’e. E ora ei lo mi pertenece na dje.

MI A nace como Florence Chulung dia 18 di september 1937, den e Comunidad Aborigen Oombulgurri den e region aleha di Kimberley Plateau den West Australia.

Mi tin masha grato recuerdo di mi infancia, un tempo felis y sin ni un precupacion. Na e centro di misionero di un misa, mi a siña un par di cos basico tocante Dios y Bijbel, pero ta mi mama tawata esun cu a siña mi principionan cristian. E tawata lesa Bijbel pa mi regularmente, y for di chikito mi a desaroya un amor pa siña tocante Dios. Tambe mi tawata admira un tanta di mi cu tawata un misionero di su misa. Den mi curason mi tawata sa cu lo mi kier a sigui den su pasonan.

Nos comunidad, conoci anteriormente como Mision Forrest River, tawatin areglo pa duna educacion di klas uno pa klas cinco. Mi tawata bai scol tur mainta pa dos ora so. Esaki a nifica cu mi formacion escolar tawata basta limita, loke a precupa mi tata. E tawata kier pa su yiunan tin un mihor educacion, pesei el a dicidi di bandona Oombulgurri y muda nos famia pa e stad chikito di Wyndham. E dia cu nos a bai tawata un dia tristo pa mi, pero na Wyndham mi por a bai scol henter dia pa e siguiente cuater añanan, for di 1949 te cu 1952. Mi ta masha gradicido cu mi tata a haci posibel cu mi por a haya e educacion ei.

 Mama tawata traha pa e docter local, y ora cu mi a caba scol na edad di 15 aña, e docter aki a ofrece mi un trabou como verpleegster na e hospital di Wyndham. Gustosamente mi a acept’e, pasobra e tempo ei tawata masha dificil pa haya trabou.

Algun aña despues mi a topa Alec, un homber blanco, cuidado di bestia. Nos a casa na 1964 den e stad chikito di Derby, caminda mi tawata asisti regularmente na e Iglesia Anglicano. Un dia Testigonan di Yehova a yama na mi porta. Mi a bisa nan cu definitivamente mi no tawata interesa y a pidi nan pa no pasa mas. Sinembargo, un cos cu nan a bisa mi a intriga mi, esta cu Dios tawatin un nomber personal, Yehova.

“Bo Mes No Por Haci Bo Oracion?”

Na 1965 bida a cuminsa bira masha dificil. Mi casa a haya tres accidente basta serio; dos cu su cabai y un cu su auto. Afortunadamente, el a recupera di e lesionnan aki y a bai traha atrobe. Pero poco despues, el a bolbe haya un accidente cu su cabai. E biaha aki, el a sufri lesionnan grave na su cabes. Ora mi a yega hospital, e docter a bisa mi cu mi casa lo no scapa. Mi a keda hopi kibra. Un verpleegster a pidi e pasto catolico local pa bin wak mi, pero e di: “Aworaki no. Lo mi bin mañan!”

Mi tawata kier e pasto na mi lado pa resa cu mi y mi a bisa e soeur esaki. E di: “Ta ki falta bo? Bo mes no por haci bo oracion?” Pues mi a cuminsa resa na e imagennan di e misa pidiendo nan yudansa, pero en vano. Tawata parce cu mi casa tawata muriendo. Mi a pensa: ‘Con mi ta haci si mi casa muri?’ Mi tawata precupa tambe pa mi tres yiunan, Christine, Nanette y Geoffrey. Ki clase di bida nan lo tin sin un tata? Felismente, tres dia despues mi casa a recobra conocemento, y el a sali for di hospital dia 6 di december 1966.

Aunke mi casa a recupera remarcablemente bon, el a keda cu daño celebral. El a perde un parti di su memoria y tawata mas inclina na violencia y cambio di beis. E tawatin dificultad pa trata cu e muchanan y tawata bira masha agresivo si nan no reacciona manera hende grandi. Tawata dificil pa cuid’e. Mi tawatin cu haci casi tur cos p’e. Asta mi a siñ’e lesa y skirbi atrobe. E tension di atende cu ne plus cu mi otro debernan di cas a afecta mi, y mi a haya un inzinking. Shete aña despues di mi casa su accidente, nos a dicidi di separa pa un tempo pa mi por a recupera mi salud.

Ami cu e muchanan a muda bai suit na e stad Perth. Prome cu nos a muda, mi ruman mohe a cuminsa studia Bijbel cu Testigonan di Yehova na Kununurra, un pueblito den parti West di Australia. El a mustra mi un plachi den e buki E berdad cu ta hiba na bida eterna, * cu ta mustra e promesa biblico di e tera transforma den un paradijs. For di e buki aki el a mustra mi tambe cu Dios tin un nomber, Yehova, y esaki a atrae mi. Como cu nunca mi misa no a siña mi e cosnan aki, mi a dicidi cu lo mi bel e Testigonan di Yehova ora mi establece mi mes na Perth.

Sinembargo, mi a basila un poco pa tuma contacto cu nan. Anto un anochi, un hende a primi bel di porta. Mi yiu homber a bai wak ta ken y a core bin bek serca mi, bisando: “Mami, e hendenan cu bo ta bisa cu bo tin cu bel ta akinan.” Mi tawata un tiki sorprendi y mi di cu ne: “Bisa nan mi no t’ei!” Pero el a contesta: “Mami, bo sa cu mi no tin mag di gaña.” M’a sinti mi malo ora mi yiu a bisa mi asina y a dicidi di bai na porta. Segun cu mi a cuminda e bishitantenan, mi a ripara cu nan a keda wak mi un poco confundi. Luga, nan a bin pa papia cu un otro persona, pero el a muda. Mi a invita nan bin  paden y a bombardia nan cu pregunta y a haya contesta satisfactorio for di Bijbel.

E siguiente siman, mi a cuminsa studia Bijbel regularmente cu e Testigonan, uzando e buki E berdad cu ta hiba na bida eterna. E estudio a bolbe lanta mi amor pa siña tocante Dios. Dos siman despues mi a asisti na e Conmemoracion di e morto di Cristo Hesus. Mi a cuminsa asisti na reunion tur diadomingo, y no a tarda hopi cu mi a cuminsa asisti tambe na e reunionnan den siman. Tambe mi a cuminsa comparti cu otro hende loke mi tawata siña. Mi a ripara cu yuda otro hende siña berdadnan biblico a mehora mi salud mental y emocional. Seis luna despues mi a batisa na un congreso di districto na Perth.

Segun cu mi conocemento di Bijbel a aumenta, mi a bin compronde Yehova su punto di bista di e santidad di matrimonio, incluso e principio biblico cu tin na 1 Corintionan 7:13, cu ta bisa: “Un mohe cu tin un esposo cu no ta un creyente, y e ta bai di acuerdo pa biba hunto cu ne, e no mester manda su esposo bai.” E texto biblico aki a motiva mi pa bai bek serca Alec.

Di Regreso na Derby

Mi a yega Derby bek dia 21 di juni 1979, despues di tawata separa pa mas cu cinco aña for di mi casa. Claro cu mi tawatin sintimentonan mixto y tawata puntra mi mes con lo e reacciona riba mi regreso. Pa mi sorpresa, e tawata contento cu mi a bolbe bek serca dje, aunke e tawata un poco decepciona cu mi a bira un Testigo di Yehova. Mesora el a sugeri pa mi cuminsa bai su misa, esun cu antes mi tawata asisti na dje prome cu mi a bai Perth. Mi a splic’e cu mi no por haci esei. Mi a haci mi best pa respeta su posicion como cabes di cas y pa ser un bon esposa cristian. Mi a purba papia cu ne tocante Yehova y su promesanan maraviyoso pa futuro, ma e no a mustra ningun interes.

Pero cu tempo Alec, no solamente a acepta mi estilo nobo di bida sino tambe a cuminsa yuda mi financieramente di manera cu mi por a asisti na congreso y asamblea, y tambe na e reunionnan semanal. Mi a keda masha gradicido ora cu el a cumpra un auto pa mi uza den e ministerio cristian. Den e parti aleha aki di Australia un auto ta un pocesion masha balioso. Hopi biaha rumannan homber y mohe, incluso e superintendente di sircuito, tawata keda drumi varios anochi na nos cas. Esaki a yuda Alec siña conoce varios Testigo, y parce cu el a gusta nan compania.

Mi A Sinti Mi Manera Ezekiel

Mi tawata gusta e bishitanan di e rumannan, pero mi tawatin un reto mi dilanti. Mi tawata e unico Testigo den e stad di Derby. E congregacion di mas serca tawata na Broome, 220 kilometer leu. Pues mi a dicidi di haci mi best pa plama e bon nobo. Cu Yehova su yudansa, mi a organisa mi mes y a cuminsa duna testimonio di cas pa cas. Mi a haya e tarea ei dificil, pero mi a keda recorda mi mes di e palabranan aki di apostel Pablo: “Pa tur cos mi tin e forsa den birtud di esun cu ta duna mi poder.”—Filipensenan 4:13, NW.

E clero local no tawata masha contento cu mi actividad, specialmente mi predicacion na hende aborigen mescos cu mi. Nan a purba intimida mi y stop mi actividad di predica. Nan oposicion simplemente a haci mi mas determina pa sigui, y cu regularidad mi tawata haci oracion na Yehova pa yuda mi. Hopi bes mi tawata corda e palabranan  di animacion cu Yehova a duna Ezekiel: “Mira, mi a haci bo cara mes duro cu nan cara, y bo frenta mes duro cu nan frenta. Manera djamanta, mas duro cu piedra, mi a haci bo frenta. No tene miedo di nan, ni desmaya den nan presencia.”—Ezekiel 3:8, 9.

Na varios ocasion, dos homber cu a pertenece na un grupo di iglesia tawata acerca mi ora mi tawata haci compras. Nan tawata haci bofon di mi na bos halto y cu hopi bochincha, den un intento pa hala atencion di e otro hendenan cu tawata cumpra cos. Mi tawata ignora nan. Un biaha, net ora cu mi tawata haciendo un rebishita serca un persona interesa, e pasto di e iglesia local a bin y a acusa mi di no ta kere den Hesus. El a ranca e Bijbel for di mi man, way’e bai bin den mi cara y push’e bek den mi man. Mi a wak e stret den su cara, anto suavemente pero firme mi a cita Huan 3:16 y a sigur’e cu mi tin fe den Hesus. El a keda pasma pa e manera yen di confiansa cu mi a contesta y el a cana bai sin bisa un pia di palabra.

Mi tawata gusta predica na e aborigennan den e area di Derby. Un pasto catolico local a purba stroba mi di papia cu e hendenan di un cierto comunidad, pero el a ser transferi. Pues toch mi por a hiba e mensahe di Bijbel pa nan. Semper mi kier a bira un misionero mescos cu mi tanta, y awor mi tawata haci trabou di misionero, yudando otro hende siña tocante e Palabra di Dios. Hopi di e hendenan aborigen a reacciona bon riba mi predicacion, y mi a cuminsa varios estudio di Bijbel.

Conciente di Mi Necesidad Spiritual

Cinco aña largo mi tawata e unico Testigo di Yehova na Derby. Tawata dificil pa mi keda spiritualmente fuerte sin e animacion di reunionnan regular hunto cu rumannan den fe. Na un ocasion mi tawata sinti mi  hopi down, y mi a sali bai dal un buelta cu auto. Ora mi a bolbe cas, casi na final di e atardi, tawatin un ruman mohe cu su shete yiunan ta warda mi. Nan a bin cu un stock di literatura pa mi for di e congregacion Broome, basta kilometer leu. Djei padilanti, e ruman mohe aki, Betty Butterfield, a haci areglo pa bin Derby un biaha pa luna y pasa weekend serca mi. Nos tawata bai predica hunto y despues studia E Toren di Vigilancia hunto na mi cas. Ami, na mi turno, tawata bai Broome un biaha pa luna.

E rumannan di Broome tawata cla pa yuda y de bes en cuando nan por a haci e biahe largo pa Derby pa yuda mi den sirbishi di veld. Nan a urgi tur ruman homber of mohe di otro stadnan cu mester a pasa door di Derby pa nan bishita mi y participa den e ministerio hunto cu mi. E biaheronan aki tambe tawata trece tape di discursonan publico pa mi. Algun di nan tawata studia E Toren di Vigilancia hunto cu mi. E bishitanan cortico aki tawata anima mi sin fin.

Mas Yudansa na Caminda

Durante algun aña, mi a haya mas estimulo di Arthur y Mary Willis, un pareha pensiona di e parti suit di West Australia. Nan tawata bin yuda mi pa tres luna durante e temporada mas fresco di aña. Ruman Willis tawata conduci mayoria di e reunionnan y tawata hiba delantera den e ministerio di veld. Hunto, nos tawata bai e partinan mas aleha di Kimberley Plateau, bishitando ranchonan di baca den e areanan leu ei. Cada biaha cu e pareha Willis bai cas, mi tawata sinti un bashi grandi den mi bida.

Finalmente, casi na fin di 1983, mi a haya e grato noticia cu tawatin un famia ta bin biba na Derby. Tawata Danny cu Denise Sturgeon hunto cu nan cuater yiu hombernan. Despues di nan yegada, nos por a tene reunionnan semanal regularmente y sali hunto den sirbishi di veld. Na aña 2001 nos a bira un congregacion. Awe, Derby tin un congregacion fuerte di 24 publicado di Reino, cu dos anciano y un sirbido ministerial kendenan ta percura bon pa nos necesidadnan spiritual. Tin biaha nos tin te cu 30 hende na reunion.

Ora mi wak bek na e añanan cu a pasa, mi curason ta yena cu goso ora mi corda con Yehova a yuda mi sirbie. Aunke cu ainda mi casa no a join mi den fe, e ta sigui sostene mi den otro maneranan. Cinco miembro di mi famia mas serca a bira Testigo batisa: mi dos yiu mohenan, dos nieta y un subrina. Ademas, varios famia di mi ta studiando Bijbel cu e pueblo di Yehova.

Mi ta realmente gradicido cu Yehova a yuda mi hay’e. Mi ta determina pa keda serca dje pa semper.—Salmo 65:2.

[Nota]

[Mapa/Plachi na pagina 15]

(Pa e texto den su formato completo , wak e publicacion)

AUSTRALIA

Wyndham

Kimberley Plateau

Derby

Broome

Perth

[Reconocemento]

Cangaru y liervogel: Lydekker; koala: Meyers

[Plachi na pagina 14]

Trahando como verpleegster na hospital di Wyndham, 1953

[Plachi na pagina 15]

Congregacion Derby, 2005