Cana den e Berea di Lus cu Ta Briya Mas y Mas Cla

“E berea di e husto ta manera lus di aurora, cu ta briya mas y mas te ora cu bira di dia cla.”—PROVERBIONAN 4:18.

1, 2. Kico e pueblo di Dios a experencia como resultado di mas y mas lus spiritual cu ta bin di Yehova?

KEN ta den e mihor posicion pa describi ki efecto solo cu ta sali tin riba e scuridad di anochi? Ningun otro cu no ta Yehova Dios, e Fuente di lus! (Salmo 36:9) Dios ta bisa cu ‘ora lus di mainta ta tene e finnan di tera’, e tera “ta wordo cambia manera klei bou di seyo, y ta tuma aparencia di un bisti.” (Job 38:12-14) Segun cu solo ta briya mas cla, e aparencia di e tera ta haya forma y ta bira mas cla, mescos cu klei moli ta wordo transforma ora primi e emblema di un seyo riba dje.

² Ademas, Yehova ta e Fuente di lus spiritual. (Salmo 43:3) Mientras cu mundo ta keda den scuridad profundo, e Dios berdadero ta sigui laga lus briya riba su pueblo. Cu ki resultado? Bijbel ta contesta: “E berea di e husto ta manera lus di aurora, cu ta briya mas y mas te ora cu bira di dia cla.” (Proverbionan 4:18) Mas y mas lus ta bin di Yehova y ta sigui ilumina e caminda di su pueblo. E lus ei ta refina nan riba tereno di organisacion, di doctrina y di moralidad.

Mas Lus Spiritual Ta Hiba na Mehoramento den e Organisacion

3. Kico Isaias 60:17 a priminti?

³ Mediante profeta Isaias, Yehova a predeci: “Na luga di brons lo mi trece oro, y na luga di hero lo mi trece plata, na luga di palo, brons, y na luga di piedra, hero.” (Isaias 60:17) Mescos cu ora bo remplasa un material inferior pa uno superior esei ta indica un mehoramento, asina Testigonan di Yehova a experencia mehoramento den e areglonan di nan organisacion durante e periodo aki di “fin di tempo” of di “e ultimo dianan.”—Mateo 24:3; 2 Timoteo 3:1.

4. Ki areglo a drenta na vigor na 1919, y con el a resulta probechoso?

⁴ Na comienso di e ultimo dianan, e congregacionnan di Studiantenan di Bijbel, manera Testigonan di Yehova tawata conoci e tempo ei, tawata eligi nan anciano- y diacononan democraticamente. Sinembargo, algun anciano no tawatin e berdadero spirito di evangelisa. Algun di nan no solamente no kier a participa den e trabou di predica, sino tambe tawata descurasha otro rumannan di participa den dje. Pesei na aña 1919 a institui un funcion nobo den tur congregacion, e funcion di un director di sirbishi. E director di sirbishi no a ser eligi  door di e congregacion. Mas bien tawata e oficina di sucursal di e pueblo di Dios cu a nombr’e teocraticamente. Algun responsabilidad di e director di sirbishi tawata pa organisa e trabou di predica, asigna teritorio y stimula participacion den sirbishi di veld. Durante e añanan cu a sigui, e trabou di predica e Reino a haya un tremendo estimulo.

5. Ki refinamento a bira un realidad den decada di 1920?

⁵ Tur ruman den congregacion a haya mas animacion ainda door di e apelacion urgente pa “anuncia, anuncia, anuncia e Rei y su reino”, cu a ser duna na 1922 na e congreso di e Studiantenan di Bijbel na Cedar Point, Ohio, Merca. Ya pa 1927 sirbishi di veld tawata asina bon organisa cu nan a considera diadomingo como e mihor dia pa participa den e trabou di predica di cas pa cas. Dicon e dia ei? Pasobra diadomingo tawata e dia cu mayoria hende tawata liber. Testigonan di Yehova djawe ta manifesta e mesun spirito door di purba bishita hende na oranan cu tin mas chens cu nan ta na cas, manera den fin di siman y parti anochi.

6. Na 1931, ki resolucion a wordo adopta, y ki efecto esei tawatin riba e trabou di proclama e Reino?

⁶ E trabou di proclama e Reino a haya un estimulo mas grandi ainda riba diadomingo atardi, 26 di juli 1931, ora cu un resolucion a wordo adopta, inicialmente na un congreso na Columbus, Ohio, y despues rond mundo. Un parti di e resolucion a declara: “Nos ta sirbidonan di Yehova Dios, encarga pa haci un trabou den su nomber y, den obediencia di su mandamento, entrega e mensahe cu Hesucristo a predica, y duna di conoce na e hendenan cu Yehova ta e Dios berdadero y Todopoderoso; por lo tanto gososamente nos ta acepta e nomber cu e boca di Señor Dios a menciona, y nos ta desea di ta conoci como, y ser yama pa e nomber, testigonan di Yehova.” (Isaias 43:10, NW) Esta cla e nomber nobo ei a defini e actividad principal di tur esnan cu ta carg’e! Si, Yehova tawatin un trabou pa tur su sirbidonan participa den dje. E reaccion por lo general tawata di gran entusiasmo!

7. Ki cambio a wordo introduci na 1932, y dicon?

⁷ Hopi anciano humildemente a dedica nan mes na e trabou di predica. Pero na algun luga, ancianonan eligi tawata rechasa redondamente e idea cu tur hende den congregacion mester participa den e ministerio publico. Sinembargo, tawatin mas mehoramento na caminda. Na 1932 e congregacionnan a haya instruccion mediante E Toren di Vigilancia pa  stop di eligi anciano y diacono. Na luga di esei, nan mester a eligi un comite di sirbishi cu a consisti di hombernan spiritual cu tawata participa den e predicacion publico. Pues, asina supervision a ser confia na esnan cu tawata participa activamente den e ministerio, y e trabou a bai dilanti.

Mas Lus Ta Nifica Mas Mehoramento

8. Ki refinamento a tuma luga na 1938?

⁸ E lus tawata “briya mas y mas.” Na 1938 a stop di uza eleccion completamente. Tur sirbido den congregacion mester a ser nombra teocraticamente bou di supervision di “e esclabo fiel y prudente.” (Mateo 24:45-47) Casi tur congregacion di Testigonan di Yehova a acepta e cambio di buena gana, y e trabou di duna testimonio a sigui produci fruta.

9. Na 1972, ki areglo a wordo institui, y dicon e tawata un mehoramento?

⁹ Cuminsando dia prome di october 1972, un otro ahuste den e supervision di congregacion a drenta na vigor. A institui den e congregacionnan di Testigonan di Yehova rond mundo e areglo di supervision na encargo di un cuerpo di anciano. Esei a remplasa e areglo di supervision cu tawata na encargo di un solo sirbido di congregacion, of superintendente. E areglo nobo aki tawata un tremendo estimulo pa hombernan maduro haci esfuerso pa cualifica pa hiba delantera den e congregacion. (1 Timoteo 3:1-7) Como resultado, un cantidad grandi di ruman homber a haya experencia den atende cu responsabilidadnan di congregacion. Nan yudansa a resulta masha balioso pa por a haci e trabou di pastorea e tantisimo hendenan nobo cu a acepta e berdad biblico.

10. Ki areglo a wordo implementa na 1976?

¹⁰ E miembronan di e Cuerpo Gobernante a ser organisa den seis comite, y cuminsando dia prome di januari 1976, tur e actividadnan di e organisacion y di e congregacionnan rond mundo a bin cai bou di supervision di e comitenan aki. En berdad esei a resulta di ta un bendicion! Pasobra awor tur aspecto di e obra di Reino tawata ser dirigi door di “hopi consehero.”—Proverbionan 15:22; 24:6.

11. Ki refinamento a wordo introduci na 1992, y dicon?

¹¹ Na aña 1992 tawatin un otro refinamento, uno cu por ser compara cu loke a sosode tempo cu e Israelitanan hunto cu otro hende a regresa for di exilio na Babilonia. E tempo ei, no tawatin suficiente Levita pa atende e sirbishi di tempel. Pesei a duna e sirbidonan di tempel no Israelita (e netineonan) mas cos di haci pa asina yuda e Levitanan. Pues, pa yuda e esclabo fiel y prudente atende cu su creciente responsabilidadnan pa cu e trabou riba tera, na 1992 algun di e “otro carnenan” a haya responsabilidadnan adicional di sirbishi. Nan a wordo nombra como ayudante di e comitenan di e Cuerpo Gobernante.—Huan 10:16.

12. Con Yehova a haci pas bira nos administradonan?

¹² Kico a resulta for di tur esaki? Yehova ta bisa: “Lo mi haci pas bira bo administradonan, y husticia bira bo mayordomonan.” (Isaias 60:17) Tin “pas” entre Yehova su sirbidonan awe. Anto amor pa “husticia” a bira nan ‘mayordomo’, es decir, e forsa cu ta motiva nan pa sirbi Dios. Nan ta bon organisa pa cumpli cu e trabou di predica e Reino y haci disipel.—Mateo 24:14; 28:19, 20.

Yehova Ta Ilumina e Berea Relaciona cu Doctrina

13. Den decada di 1920, con Yehova a ilumina e caminda di su pueblo relaciona cu doctrina?

¹³ Progresivamente Yehova ta ilumina tambe e berea di su pueblo relaciona cu doctrina. Revelacion 12:1-9 ta un ehempel. E relato ta referi na tres personahe simbolico: “un mohe” na estado y cu ta duna lus, un “dragon” y “un yiu homber.” Bo sa ken cada personahe ta representa? Nan a ser identifica den un articulo titula “Nacemento di e Nacion”, cu a sali den E Toren di Vigilancia di 1 di maart 1925.  E articulo ei a duna e pueblo di Dios un mihor comprondemento di e profecianan tocante e nacemento di e Reino, y esei a yuda nan mira mas cla cu ta existi dos organisacion distinto: esun di Yehova y esun di Satanas. Anto na aña 1927 pa 1928, Dios su pueblo a reconoce cu Pasco di nacemento y celebracion di hacimento di aña no ta cuadra cu principionan biblico, y nan a stop di celebra nan.

14. Ki berdadnan relaciona cu doctrina a wordo clarifica den decada di 1930?

¹⁴ Den decada di 1930 mas lus a briya riba tres berdad relaciona cu doctrina. Pa añanan, e Studiantenan di Bijbel tawata sa cu e “multitud grandi” cu Revelacion 7:9-17 ta papia di dje tawata distinto for di e 144.000, kendenan lo goberna cu Cristo como rei y sacerdote. (Revelacion 5:9, 10; 14:1-5) Sinembargo, e identidad di e multitud grandi a keda vago. Pero mescos cu segun cu mainta ta habri tin mas lus y e obhetonan cu tawata scur ta haya color y un aparencia mas cla, asina na 1935 e multitud grandi a wordo identifica como e hendenan cu lo sobrevivi “e gran tribulacion”, cu e speransa di biba pa semper riba tera. Mas despues den e mesun aña ei a bin un clarificacion cu tawatin efecto riba yiunan di Testigonan di Yehova di edad escolar den varios pais. Mientras cu rond mundo fervor patriotico tawata intenso, e Testigonan a reconoce cu e cuenta di saluda bandera ta mas cu un simpel formalidad. E siguiente aña, a bin e splicacion di un otro berdad relaciona cu doctrina, esta, cu Cristo a muri na staca, no na crus.—Echonan 10:39, NW.

15. Na ki tempo y con e asunto di santidad di sanger a ser enfatisa?

¹⁵ Durante Segundo Guera Mundial a bira normal pa duna soldanan herida transfusion di sanger. Den e periodo cu a sigui un poco despues di e guera ei, tawatin mas lus riba e santidad di sanger. E Toren di Vigilancia di 1 di juli 1945 a anima “tur adorado di Yehova cu ta haci esfuerso pa haya bida eterno den su mundo nobo di husticia pa respeta e santidad di sanger y adapta nan mes na Dios su reglanan husto relaciona cu e asunto sumamente importante aki.”

16. Na ki tempo e Traduccion di Mundo Nobo di e Santo Scritura a sali, y cua ta dos rasgo sobresaliente cu e tin?

¹⁶ Na 1946 a bira bisto cu tawatin mester di un traduccion nobo di Bijbel cu a haci bon uzo di e descubrimentonan mas resien riba tereno di investigacion biblico y cu no tawata mancha pa creencianan basa riba tradicionnan di cristiandad. Na december 1947 e rumannan a cuminsa traha riba un traduccion asina. Na 1950 nan a publica e Traduccion di Mundo Nobo di e Scritura Griego Cristian na Ingles. E Scritura Hebreo na Ingles a sali progresivamente den cinco volumen, cuminsando na 1953. E ultimo volumen a wordo presenta na 1960, un poco mas cu 12 aña despues cu e proyecto di traduccion a cuminsa. E Traduccion di Mundo Nobo di e Santo Scritura completo den un solo volumen a sali na 1961.E traduccion aki cu tin algun rasgo sobresaliente ta disponibel awor den hopi idioma. E ta restaura Dios su nomber, Yehova. Ademas, su traduccion literal di e scrituranan original a percura e base pa progreso continuo den e comprondemento di e berdad di e Palabra di Dios.

17. Cua lus a briya mas cla na 1962?

¹⁷ Na aña 1962 a bin e clarificacion di ken ta “e autoridadnan superior” di Romanonan 13:1 [NW] y te na ki grado un cristian mester ta sumiso na nan. Un analisis profundo di Romanonan capitulo 13 y di textonan manera  Tito 3:1, 2 y 1 Pedro 2:13, 17 a mustra bon cla cu e expresion “autoridadnan superior” no ta referi na Yehova Dios y Hesucristo, sino na autoridadnan gubernamental humano.

18. Menciona algun berdad cu a ser clarifica den decada di 1980.

¹⁸ Den e añanan cu a sigui, e berea di e hustonan a sigui briya mas y mas cla. Na 1985 e lus a briya riba loke ta nifica ser declara husto pa “bida” y husto como amigo di Dios. (Romanonan 5:18; Santiago 2:23) Na 1987 tawatin un splicacion cabal di loke e Hubileo cristian ta nifica.

19. Con Yehova a percura mas lus spiritual pa su pueblo den ultimo añanan?

¹⁹ Na 1995 tawatin un comprondemento mas cla di e separacion di “carne” for di “cabrito.” Na aña 1998 nos a haya un splicacion detaya di Ezekiel su vision di tempel, cu ya caba ta cumpliendo. Na 1999 a clarifica na ki tempo y con e “abominacion” of cos repugnante ta para den e luga santo. (Mateo 24:15, 16; 25:32) Anto na 2002 nos a haya mas perspicasia tocante kico ta nifica adora Dios cu “spirito y berdad.”—Huan 4:24.

20. Riba cua otro tereno e pueblo di Dios a experencia refinamento?

²⁰ Fuera di e refinamento riba tereno di organisacion y di doctrina, tawatin refinamento relaciona cu conducta cristian. Por ehempel, na 1973 nos a compronde cu uzo di tabaco tawata un “impuresa di carni” y mester a consider’e como un pica serio. (2 Corintionan 7:1) Un decada despues, E Toren di Vigilancia na Spaño di 1 di november 1983 a clarifica nos posicion relaciona cu e uzo di arma di candela.Esakinan ta djis algun ehempel di e lus cu a briya mas cla den nos tempo.

Sigui Cana den e Berea di Lus Cu Ta Briya Mas y Mas Cla

21. Ki actitud lo yuda nos sigui cana den e berea di lus cu ta briya mas y mas cla?

²¹ Un ruman cu tin hopi aña como anciano a admiti: “Tin biaha ta dificil pa acepta un cambio y adapta na dje.” Kico a yud’e acepta e tantisimo refinamentonan cu el a mira den e 48 añanan cu e ta un proclamado di Reino? El a contesta: “E clave ta cu bo mester tin e actitud corecto. Ora bo ta nenga di acepta un refinamento ta nifica cu bo ta keda atras segun cu e organisacion si ta bai dilanti. Si mi haya mi den un situacion caminda e cambionan ta parce duro pa acepta, mi ta reflexiona riba e palabranan cu Pedro a bisa Hesus: ‘Señor, serca ken nos lo bai? Abo tin e palabranan di bida eterno.’ Anto caba mi ta puntra mi mes: ‘Serca ken lo mi bai? Eifo den e scuridad di mundo?’ Esaki ta yuda mi tene firmemente na Dios su organisacion.”—Huan 6:68.

22. Con nos ta beneficia di cana den e lus?

²² E mundo rond di nos definitivamente ta den scuridad profundo. Segun cu Yehova ta sigui laga lus briya riba su pueblo, e diferencia entre su pueblo y e hendenan di mundo ta sigui bira mas grandi. Kico e lus aki ta haci pa nos? Wel, mescos cu ora un hende lusa riba un buraco den un caminda scur, esei no ta kita e buraco, asina tambe lus for di e Palabra di Dios no ta kita e trampanan. Sinembargo, e lus for di e Palabra di Dios definitivamente ta yuda nos evita nan y asina nos por sigui cana den e berea di lus cu ta briya mas y mas cla. Pues, laga nos sigui presta atencion na Yehova su palabra profetico mescos cu “na un lampi cu ta lusa den un luga scur.”—2 Pedro 1:19.

Bo Ta Corda?

• Yehova a trece ki mehoramento den e organisacion pa su pueblo?

• Lus cu ta briya mas cla a trece ki refinamento di doctrina?

• Ki ahustenan abo personalmente a mira, y kico a yuda bo acepta nan?

• Dicon bo kier sigui cana den e berea di lus cu ta briya mas y mas cla?

[Preguntanan di Estudio]

[Plachi na pagina 27]

E congreso di 1922 na Cedar Point, Ohio, a stimula e Studiantenan di Bijbel pa haci Dios su trabou

[Plachi na pagina 29]

E “Traduccion di Mundo Nobo di e Scritura Griego Cristian”, presenta na 1950 pa N. H. Knorr

[Reconocemento pa Potret na pagina]

© 2003 BiblePlaces.com