“Nos A Haya e Mesias”

“NOS a haya e Mesias.” “Nos a haya esun di kende Moises a skirbi den e Lei y di kende e Profetanan tambe a skirbi.” Dos Hudiu deboto di e prome siglo a haci e anuncionan asombroso ei. Porfin e Mesias tan spera a yega. Nan tawata combenci di esei!—Huan 1:35-45.

Ora bo tene cuenta cu e trasfondo historico y religioso di e tempo ei, nan conviccion ta bira mas remarcabel ainda. Un cantidad di supuesto libertado a aparece cu hopi buya y promesa, pero ora nan no a logra libera e Hudiunan for di dominacion Romano, tur speransa a caba na nada.—Echonan 5:34-37.

Sinembargo, e dos Hudiunan ei—Andres y Felipe—nunca a duda den nan conviccion cu nan a haya e berdadero Mesias. Al contrario, den e añanan cu a sigui nan confiansa a aumenta segun cu nan a presencia personalmente e obranan poderoso cu e homber aki a haci, cumpliendo cu loke a ser profetisa tocante e Mesias.

Pakico e dos hombernan aki y hopi otro hende a pone fe den dje, combenci cu e no tawata djis un Mesias falso of un gañado decepcionante? Ki evidencia tin cu e tawata sin duda e Mesias autentico?

Di acuerdo cu e relato historico, Andres y Felipe a identifica Hesus di Nazaret, e excarpinte, como e Mesias priminti y esun tan  spera. (Huan 1:45) Un historiado cuidadoso di e epoca ei, Lucas, ta declara cu e binida aki di e Mesias a tuma luga “den e di diessinco aña di e reinado di Tiberio Cesar.” (Lucas 3:1-3) E di 15 aña di e reinado di Tiberio a cuminsa den september di aña 28 di nos era y a termina den september di aña 29. Lucas ta bisa mas aleu cu e Hudiunan di e tempo ei “tawata spera yen di expectativa” riba yegada di e Mesias. (Lucas 3:15) Pakico nan tawata spera riba dje den e tempo particular ei? Laga nos mira.

Evidencia Cu E Ta e Mesias

En bista di e papel importante di e Mesias, ta logico cu e Creador Yehova lo a duna clavenan spesifico pa yuda hende alerta y fiel identifica e Mesias priminti. Pakico? Pa personanan alerta no ser engaña door di impostornan, manera asina tanto hende a ser engaña.

Ora un embahador presenta su mes na un otro gobierno, ta wordo spera di dje cu e ta presenta cu e documentonan necesario pa mustra cu e ta esun autorisa pa su gobierno. Mescos tambe, hopi tempo adelanta Yehova a laga registra e rekisitonan cu e Mesias lo a cumpli cu ne. Pues, ora “e Agente Principal” a aparece, ta como si fuera el a bini cu documento-, of credencialnan, cu lo a confirma su identidad.—Hebreonan 12:2, NW.

E rekisitonan cu e credencialnan ei mester a cuadra cu ne ta describi den hopi profecia di Bijbel siglonan adelanta. Nan a predeci den un forma detaya con e Mesias lo a bini, ki clase di ministerio e lo a cumpli cu ne, con e lo a sufri na man di otro hende y e tipo di morto cu e lo a experencia. Kisas bo ta interesa pa sa cu e profecianan confiabel ei a papia tambe di su resureccion, con el a ser halsa na e man drechi di Dios y finalmente di e bendicionnan cu su futuro Reino lo a trece. Den e manera aki, profecianan di Bijbel a duna un patronchi unico comparabel cu un fingerprint, cu por identifica un solo persona.

Claro cu ora Hesus a aparece riba esena na aña 29 di nos era, no ta tur profecia relaciona cu e Mesias a cumpli na e tempo ei. Por ehempel, den e aña ei ainda e no a ser mata ni resusita. Toch Andres, Felipe y hopi otro hende a pone fe den Hesus pa motibo di loke el a siña y haci. Nan a mira hopi prueba cu e tawata, de echo, e Mesias. Si bo a biba e tempo ei y por a studia e evidencia personalmente cu un mente habri, probablemente bo tambe lo a keda combenci cu Hesus tawata e Mesias.

Un Cuadra di Varios Parti

Kico lo a yuda bo yega na e conclusion ei? Durante siglonan, profetanan di Bijbel a suministra rekisitonan spesifico cu e Mesias lo mester a cumpli cu ne, y eseinan a identific’e indudablemente como tal. Segun cu e profetanan a suministra e detayenan aki den transcurso di siglonan, un cuadro di e Mesias a cuminsa forma. Henry H. Halley a remarca: “Supone cu un cantidad di hende di diferente pais, cu nunca no a mira otro ni comunica cu otro, cana drenta den un cuarto, y cada un presenta cu un pida marmer taya. Anto ora pone esakinan hunto, nan ta forma un estatua perfecto. E unico manera pa splica esei ta cu un persona a traha tur e spesificacionnan y despues manda un pida pa cada homber, no ta berdad?” Anto Halley ta puntra: “Kico otro por splica e cuadra asombroso aki di Hesus su bida y obra, hinca den otro door di diferente escritor di diferente siglo y epoca prome cu Hesus a bini, cu no ta UN MENTE SOBREHUMANO cu a supervisa e skirbimento?” Halley a conclui cu esei tawata “e milager di tur epoca!”

E “milager” aki a cuminsa den e prome buki di Bijbel. Ademas di e prome profecia di Bijbel cu a indica ki papel e Mesias lo tawatin, e escritor di Genesis a mustra cu e  Mesias lo a bini mediante e liña di desendencia di Abraham. (Genesis 3:15; 22:15-18) Un otro clave a revela cu e Mesias lo tawata di e tribu di Huda. (Genesis 49:10) Mediante Moises, Dios a bisa e Israelitanan cu e Mesias lo tawata un bosero y libertado mas grandi cu Moises mes.—Deuteronomio 18:18.

Den e tempo di rei David, profecia a revela cu e Mesias lo a bira heredero di e trono di David y cu Su Reino lo a ser “estableci pa semper.” (2 Samuel 7:13-16) E buki di Mikeas a revela cu e Mesias lo a nace na Betlehem, stad di David. (Mikeas 5:2) Isaias a profetisa cu lo El a nace di un birgen. (Isaias 7:14) Profeta Malakias a predeci cu un persona mescos cu Elias lo a anuncia Su yegada.—Malakias 4:5, 6.

E buki di Daniel ta contene un otro detaye spesifico tocante Mesias. Señalando na net e aña cu e Mesias lo a aparece, e profecia ta declara: “Sabi anto y compronde cu for di e momento cu e ordo a wordo duna pa restaura y reconstrui Herusalem te na e Mesias, e Prins, lo tin shete siman y sesentidos siman; e lo wordo traha atrobe, cu caya y roi, den tempo di angustia.”—Daniel 9:25.

Artaherhes, rei di Persia, a duna “e ordo” pa restaura y reconstrui Herusalem den e di 20 aña di su reinado. Su reinado a cuminsa na aña 474 prome cu nos era, di manera cu su di 20 aña lo tawata aña 455 prome cu nos era. (Nehemias 2:1-8) Pues, entre e ordo pa restaura y reconstrui Herusalem y e aparicion di e Mesias lo mester a pasa un periodo di 69 (7 plus 62) siman profetico. Claro cu sesentinuebe siman literal ta ekivalente na solamente 483 dia, of menos cu dos aña. Pero ora aplica e regla profetico di “un dia pa cada aña”, e ta revela cu e Mesias lo a aparece 483 aña despues, na aña 29 di nos era.—Ezekiel 4:6. *

Aunke un cantidad di hende cu a pretende di ta e Mesias a aparece den otro añanan, e unico cu a aparece riba esena di mundo na aña 29 di nos era ta Hesus di Nazaret. (Lucas 3:1, 2) Exactamente den e aña ei, Hesus a bini serca Huan Bautista y a ser batisa den awa. Na e momento ei Hesus a ser ungi cu spirito santo como e Mesias. Despues, Huan, esun cu a bai dilanti Hesus y cu a haci un trabou similar na esun di Elias, a introduci Hesus na Andres y un otro disipel, yamand’e “e Lamchi di Dios cu ta kita pica di mundo!”—Huan 1:29; Lucas 1:13-17; 3:21-23.

Genealogia y Identificacion di Mesias

E profecianan inspira a relaciona e Mesias cu cierto famianan Hudiu. Pues ta masha rasonabel cu e Creador omnisapiente lo a percura pa e Mesias a bini na un tempo cu e registronan genealogico tawata disponibel pa verifica su desendencia.

E Cyclopedia di McClintock y Strong ta declara: “Casi sigur e registronan di e tribunan y famianan Hudiu a bai perdi den e destruccion di Herusalem [na aña 70 di nos era], y no prome.” Tin tur indicacion cu Mateo y Lucas a skirbi nan Evangelionan prome cu aña 70 di nos era. Pesei, nan lo por a consulta e registronan aki ora nan a compila nan relato tocante e antepasadonan di Hesus.  (Mateo 1:1-16; Lucas 3:23-38) Y siguramente door cu tawata trata di un asunto asina importante, hopi di nan contemporaneonan mes lo kier a verifica ken tawata e antepasadonan di Hesus.

Ta pa Casualidad Hesus A Cumpli cu Nan?

Pero ta existi e posibilidad cu ta pa puro casualidad Hesus a cumpli cu e profecianan relaciona cu Mesias? Den un entrevista, un erudito a contesta: “No, esei no ta posibel. E echo cu tin asina tanto supuesto coinsidencia ta descarta e posibilidad ei. Un hende a haci e calculacion y a yega na e conclusion cu pa apenas ocho profecia cumpli den Hesus pa casualidad, ta un chens den shen mil biyon.” Pa ilustra esaki, el a declara: “Si bo tuma e cifra aki na [moneda di] dollar di plata, esakinan lo tapa e estado di Texas [un area di 690.000 kilometer cuadra] bou di un capa di mas cu mei meter. Si bo marca un di e monedanan aki y laga un persona cana un rato wowo tapa den henter e estado y sak abou y cohe un moneda, cuanto chens e tin di coi net esun marca?” Anto el a agrega cu esei ta “e mesun chens cu cualkier persona den historia tin pa por a cumpli cu apenas ocho di e profecianan relaciona cu Mesias.”

Pero, durante Hesus su ministerio di tres aña y mei, el a cumpli cu no solamente ocho sino hopi profecia di Bijbel. En bista di e evidencia combencente ei, e erudito ei a conclui: “Ta Hesus—y Hesus so den henter historia—por a logra esei.”

E ‘Binida’ di e Mesias

No tin duda cu e Mesias a bini na aña 29 di nos era den e persona di Hesus di Nazaret. Esei tawata su binida como un Rescatador humilde cu a pasa sufrimento. E no a bini como un Rei invencibel pa kibra e yugo opresivo di e Romanonan, manera mayoria Hudiu y asta su siguidonan aparentemente a verwacht. (Isaias, capitulo 53; Zacarias 9:9; Echonan 1:6-8) Sinembargo, segun profecia, su futuro binida si lo ta cu poder y gran autoridad.—Daniel 2:44; 7:13, 14.

Un estudio cuidadoso di profecia di Bijbel a combence hende rasonabel rond mundo cu e Mesias a bini den e prome siglo y cu e mester a bini bek. Segun evidencia, su segundo binida profetisa, esta cuminsamento di su “presencia”, a tuma luga na 1914. * (Mateo 24:3-14, NW) Den e aña ei, Hesus a ser entronisa invisiblemente den shelo como Rei di e Reino di Dios. Denter di poco, lo e drenta accion pa elimina for di tera tur e mal efectonan di e rebelion den Eden. Su Reino di Mil Aña cu lo sigui despues lo ta un bendicion pa tur hende cu ta manifesta fe den dje como e Simiña priminti, e Mesias, cu ta “kita pica di mundo!”—Huan 1:29; Revelacion 21:3, 4.

Gustosamente Testigonan di Yehova lo analisa e evidencia ei cu bo y mustra bo den Bijbel kico e gobernacion di e Mesias por nifica pa abo y bo sernan keri.

[Nota]

[Diagram/​Plachi na pagina, 7]

455 prome cu nos era, 29 di nos era, 1914, Pronto e Mesias lo

‘e ordo pa e Mesias e Mesias caba cu

restaura ta presenta ta ser entronisa maldad

Herusalem’ den shelo y haci tera

un paradijs

483 aña

(69 siman profetico)

—Daniel 9:25