Nos Tin Mester di un Mesias?

KISAS bo ta haci bo mes e pregunta: “Nos tin mester di un Mesias?” Si, ta rasonabel pa bo puntra bo mes si un Mesias lo tin berdadero efecto riba bo.

Algun hende, kende nan opinion kisas bo ta respeta, lo sigura bo cu no cabe duda cu esei ta asina: Mescos cu tur otro hende, definitivamente abo tambe tin mester di un Mesias. Un experto den lei Hudiu den e prome siglo a skirbi tocante e Mesias: “[E] ta confirmacion di tur promesa cu Dios a haci.” Asina el a resalta e papel clave cu e Mesias ta hunga den e proposito di nos Creador pa bendiciona tur nacion di tera. (2 Corintionan 1:20, BPK) E funcion di e Mesias ta asina importante cu tur profecia di Bijbel ta drai rond di su binida y bida riba tera. Den un manual cu miyones di hende a uza durante e ultimo 70 añanan, Henry H. Halley a declara: “E Testament Bieu a ser skirbi pa crea expectativa pa e Binida di [e Mesias] y pa habri caminda p’e.” Pero su binida ta necesario? Pakico lo bo mester ta interesa den dje?

De echo, e palabra “Mesias” ta nifica “E Ungi” y e ta e ekivalente di e termino bon conoci “Cristo.” Esun Aki, na kende e Encyclopædia Britannica, Edicion di 1970, ta referi como “e mayor rescatado”, mester a bini pa motibo di e actonan di gran falta di respet di parti di e prome pareha humano, Adam cu Eva. Nan a ser crea perfecto, cu e speransa maraviyoso di biba pa semper den Paradijs. Pero nan a perde e speransa ei. Un angel rebelde, kende a bira conoci como Satanas e Diabel, a insinua cu nan Creador tawata mucho stricto y cu lo tawata mihor pa nan mes dicidi loke tawata bon y loke tawata malo.—Genesis 3:1-5.

Eva a ser engaña y a kere e mentira ei. Adam, kende aparentemente a duna mas balor na e compañerismo di su esposa cu na lealtad na Dios, a bira complice den e rebelion ei cu Diabel a instiga. (Genesis 3:6; 1 Timoteo 2:14) Cu nan accionnan, nan a desperdicia e chens di biba pa semper den condicionnan di paradijs. Ademas di esei, nan a laga e herencia di pica y morto como consecuencia pa nan yiunan cu no a nace ainda.—Romanonan 5:12.

Nos Creador, Yehova, a determina mesora kico lo mester a bira e medio pa elimina e mal efectonan di e serie di susesonan cu e rebelion a ocasiona. Lo el a logra un reconsiliacion pa medio di loke despues a bira un principio legal den e Lei di Moises, esta, bida pa bida. (Deuteronomio 19:21; 1 Huan 3:8) Mester a cumpli cu e principio legal aki pa asina cualkier desendiente desafortuna di Adam cu  Eva por ricibi bida eterno den un paradijs riba tera algun dia, manera tawata e proposito di e Creador pa e famia humano. Esaki ta hiba nos na e Mesias.

Den su sentencia contra Diabel, Yehova Dios a declara den e prome profecia di Bijbel: “Lo mi pone enemistad entre abo y e mohe, y entre bo simiña y su simiña; e lo herida bo cabes, y abo lo herida su hilchi di pia.” (Genesis 3:15) Un erudito di Bijbel a remarca cu “e relato di e promesanan relaciona cu e Mesias den e Scritura ta cuminsa cu e declaracion [aki].” Un otro a remarca cu e Mesias ta e instrumento di Dios cu “lo elimina henter e calamidad di e caimento den pica”, y na mesun momento trece bendicion pa humanidad.—Hebreonan 2:14, 15.

Sinembargo, lo bo ta conciente cu aworaki sigur humanidad no ta bendiciona. Al contrario, ta reina un gran desesperacion. Pesei, The World Book Encyclopedia ta bisa cu “ainda hopi Hudiu ta spera binida di un Mesias” y cu lo e “corigi loke ta robes y derota e enemigonan di e pueblo.” Pero Bijbel ta bisa cu e Mesias a bini caba. Tin motibo pa kere loke Bijbel ta bisa? E siguiente articulo lo contesta esei.