Un Administracion pa Cumpli cu Dios Su Proposito

“[Dios] ta obra tur cos segun e conseho di su boluntad.” —EFESIONAN 1:11.

1. Dicon tur congregacion di Testigonan di Yehova lo reuni dia 12 di april 2006?

DIARANSON anochi, 12 di april 2006, rond di 16 miyon hende lo reuni pa conmemora e Cena di Señor. Na cada luga di reunion lo tin un mesa drecha cu pan sin zuurdeeg, representando e curpa di Cristo, y biña cora, simbolisando su sanger cu el a drama. Casi na final di e discurso cu ta splica e nificacion di e Conmemoracion di Hesus su morto lo pasa e emblemanan aki entre tur esnan presente. Prome ta pasa e pan, caba e biña. Den relativamente poco congregacion di Testigonan di Yehova, un of mas persona presente lo tuma di e emblemanan. Sinembargo, den mayoria caso ningun persona presente lo tuma for di nan. Dicon ta solamente un par di cristian, esta, esnan cu tin speransa di biba den shelo, ta tuma di nan, mientras cu e mayoria, esta, esnan cu tin e speransa di biba pa semper riba tera, no ta tuma di nan?

2, 3. (a) Con Yehova a efectua e proceso di creacion segun su proposito? (b) Cu ki proposito Yehova a crea e tera y humanidad?

² Yehova ta un Dios di proposito. Ora di cumpli cu su proposito, e ta “obra tur cos segun e conseho di su boluntad.” (Efesionan 1:11) Prome, el a crea su Yiu unigenito. (Huan 1:1, 14; Revelacion 3:14) Despues, mediante e Yiu aki, Yehova a crea un famia di yiunan spiritual y cu tempo e universo material, locual a inclui e tera y hende riba dje.—Job 38:4, 7; Salmo 103:19-21; Huan 1:2, 3; Colosensenan 1:15, 16.

³ Yehova no a crea e tera como un tipo di luga pa test hende pa determina si nan ta cualifica pa ser agrega na su famia di yiunan spiritual den shelo, manera hopi iglesia di cristiandad ta siña. El a crea tera cu un proposito spesifico na mente, esta, “pa e wordo habita.” (Isaias 45:18) Dios a crea tera pa hende y hende pa tera. (Salmo 115:16) Henter e planeta lo mester a bira un paradijs, yena cu hende husto, kendenan lo a cultiv’e y cuid’e. Ningun momento so Dios no a ofrece e prome pareha humano e speransa cu nan lo a bai shelo cu tempo.—Genesis 1:26-28; 2:7, 8, 15.

Yehova Su Proposito Ta Ser Cuestiona

4. Con Yehova su manera di eherce soberania a ser cuestiona na comienso di humanidad su historia?

⁴ Un yiu spiritual di Dios a rebela y tawata determina pa stroba Yehova su proposito, haciendo asina maluzo di e don di boluntad liber cu Dios a dun’e. El a perturba e pas di tur esnan cu amorosamente ta somete nan mes na Yehova su soberania. Satanas a pone e prome pareha cuminsa cana den e caminda di independencia for di Dios. (Genesis 3:1-6) E no a nenga cu Yehova tin poder, pero si el a cuestiona  Yehova su manera di eherce soberania y como tal Yehova su derecho di goberna. Pues, e cuestion fundamental relaciona cu Yehova su soberania a lanta aki riba tera, na comienso di humanidad su historia.

5. Cua cuestion secundario a lanta, y como resultado e fieldad di ken mas a ser cuestiona?

⁵ Tin un cuestion secundario cu Satanas a lanta den e tempo di Job cu ta estrechamente liga cu e cuestion principal di soberania universal. Satanas a cuestiona e motibo pakico Yehova su criaturanan ta somete nan mes na Yehova y ta sirbie. Satanas a insinua cu nan tawata haci esei pa motibonan egoista y cu si pone nan na prueba, nan lo a bira contra Dios. (Job 1:7-11; 2:4, 5) Aunke e cuestion aki a lanta en conexion cu un sirbido humano di Yehova, e ta envolve tambe e yiunan spiritual di Dios, y asta Yehova su Yiu unigenito.

6. Con Yehova a duna prueba di ta fiel na su proposito y na su nomber?

⁶ Yehova, siendo fiel na su proposito y na e nificacion di su nomber, a haci su mes un Profeta y un Salbador. * El a bisa Satanas: “Lo mi pone enemistad entre abo y e mohe, y entre bo simiña y su simiña; e lo herida bo cabes, y abo lo herida su hilchi di pia.” (Genesis 3:15) Yehova lo a contesta e cuestion cu Satanas a lanta y duna e desendientenan di Adam e speransa di haya liberacion y bida pa medio di e Simiña di e “mohe”, esta, e parti celestial di Yehova su organisacion.—Romanonan 5:21; Galationan 4:26, 31.

“E Secreto Sagrado di Su Boluntad”

7. Ki proposito Yehova a revela mediante apostel Pablo?

⁷ Apostel Pablo a splica masha bunita den su carta na e cristiannan na Efeso con Yehova ta administra cosnan pa cumpli cu su proposito. Pablo a skirbi: “El a duna nos di conoce e secreto sagrado di su boluntad. Esei ta segun su gusto cu el a propone den su mes pa un administracion na e limite completo di e tempo señala, esta, pa recohe tur cos hunto atrobe den e Cristo, e cosnan den shelo y e cosnan riba tera.” (Efesionan 1:9, 10, NW) Yehova su proposito glorioso ta pa percura un universo uni, habita pa criaturanan cu amorosamente ta somete nan mes na su soberania. (Revelacion 4:11) Di e manera ei Dios su nomber lo ser santifica, lo keda demostra cu Satanas ta un mentiroso y Dios su boluntad lo wordo cumpli “na tera mescos cu den shelo.”—Mateo 6:10.

8. Kico e palabra traduci como “administracion” ta nifica?

⁸ Yehova su “gusto”, of proposito, lo a cumpli pa medio di “un administracion.” Pablo a uza aki un palabra cu literalmente ta nifica “maneho di un cas.” E ta referi, no na un gobierno, manera e Reino Mesianico, sino na  un manera di maneha cosnan. * E manera maraviyoso cu Yehova lo administra cosnan pa cumpli cu su proposito a encera un “secreto sagrado” cu lo a wordo revela progresivamente atrabes di siglonan.—Efesionan 1:10; 3:9, NW, nota na pia di pagina.

9. Con Yehova progresivamente a revela e secreto sagrado di su boluntad?

⁹ Pa medio di un serie di aliansa of pacto, Yehova gradualmente a revela con su proposito relaciona cu e Simiña of Desendiente priminti den Eden lo a cumpli. Yehova su promesa inclui den e aliansa cu el a sera cu Abraham a revela cu e Simiña priminti lo bin na tera via Abraham su desendencia y cu lo e ta e medio cu ta haci posibel pa “tur e nacionnan di e tera” bendiciona nan mes. E aliansa ei a duna di compronde tambe cu lo tin otro hende asocia cu e parti principal di e simiña. (Genesis 22:17, 18) E aliansa di Lei cu Yehova a sera cu e nacion di Israel carnal a revela su proposito di tin “un reino di sacerdotenan.” (Exodo 19:5, 6) E aliansa cu David a mustra cu e Simiña lo ta e Cabes di un Reino pa semper. (2 Samuel 7:12, 13; Salmo 89:3, 4) Unabes e aliansa di Lei a guia e Hudiunan na e Mesias, Yehova a revela mas faseta di e cumplimento di su proposito. (Galationan 3:19, 24) E hendenan cu lo mester ta asocia cu e parti principal di e simiña lo forma e “reino di sacerdotenan” cu a ser profetisa. Ademas, lo a inclui nan den “un aliansa nobo” como e “Israel” nobo, un Israel spiritual.—Yeremias 31:31-34; Hebreonan 8:7-9. *

10, 11. (a) Con Yehova a revela e Simiña priminti? (b) Dicon Dios su Yiu unigenito a bin na tera?

 ¹⁰ Na harmonia cu e administracion di Dios su proposito, e tempo a yega pa e Simiña priminti aparece riba tera. Yehova a manda angel Gabriel bisa Maria cu lo e duna lus na un yiu homber cu e mester yama Hesus. E angel a bisa Maria: “E lo ta grandi y lo wordo yama Yiu di e Haltisimo; y Señor Dios lo dun’e e trono di su tata David; y e lo reina riba e cas di Yacob pa semper, y su reino lo no tin fin.” (Lucas 1:32, 33) Pues, identidad di e Simiña priminti a wordo revela.—Galationan 3:16; 4:4.

¹¹ Yehova su Yiu unigenito lo a bin na tera y ser poni na prueba te na e limite. E contesta perfecto riba e cuestion di Satanas lo tawata den Hesus su man. Lo el a keda fiel na su Tata? Esaki a encera un secreto sagrado. Mas despues apostel Pablo a splica e papel di Hesus: “E secreto sagrado di e debocion piadoso aki ta ser reconoci como grandi: ‘El a ser manifesta den carni, a ser declara husto den spirito, a aparece na angel, a ser predica entre e nacionnan, a ser kere den mundo, a ser ricibi ariba den gloria.’” (1 Timoteo 3:16, NW) Si, Hesus pa medio di su integridad inkebrantabel te na morto a duna un contesta definitivo riba e cuestion cu Satanas a lanta. Pero otro detayenan di e secreto sagrado a keda pendiente pa ser revela.

“E Secreto Sagrado di e Reino di Dios”

12, 13. (a) Menciona un faseta di “e secreto sagrado di e reino di Dios.” (b) E echo cu Yehova a scohe un cantidad limita di hende pa bai shelo a encera kico?

¹² Durante un di su giranan di predicacion na Galilea, Hesus a indica cu e secreto sagrado tawata estrechamente liga cu su Reino Mesianico. El a bisa su disipelnan: “Ta duna na boso pa compronde e secretonan sagrado di e reino di shelo [“reino di Dios”, Marco 4:11].” (Mateo 13:11, NW) Un aspecto di e secreto ei tawata cu Yehova lo a scohe un “tou chikito” di 144.000 hende pa ta hunto cu su Yiu como parti di e simiña, pa reina hunto cu ne den shelo.—Lucas 12:32; Revelacion 14:1, 4.

¹³ Siendo cu hende a ser crea pa biba riba tera, Yehova lo mester a produci ‘criaturanan nobo’ pa asina algun hende por a bai shelo. (2 Corintionan 5:17) Papiando como un di esnan scohi pa comparti e speransa celestial excepcional aki, apostel Pedro a skirbi: “Bendiciona sea e Dios y Tata di nos Señor Hesucristo, kende, segun su gran misericordia, a haci nos nace di nobo den un speransa bibo pa medio di e resureccion di Hesucristo for di e mortonan, pa obtene un herencia cu ta incoruptibel y sin mancha y cu lo no marchita, cu ta reserva den shelo pa boso.”—1 Pedro 1:3, 4.

14. (a) Con hende no Hudiu tawata envolvi den “e secreto sagrado di e reino di Dios”? (b) Con bin nos por compronde e ‘cosnan profundo aki di Dios’?

¹⁴ Un otro faseta di e secreto sagrado relaciona cu e futuro gobierno di Reino tawata Dios su boluntad pa inclui hende no Hudiu entre e cantidad chikito di hende cu lo haya e yamada pa reina hunto cu Cristo den shelo. Pablo a splica e faseta aki di Yehova su “administracion” of manera di maneha e cumplimento di su proposito: “Den otro generacionnan [e secreto] no a wordo haci conoci na e yiunan di hende, manera el a wordo revela awor na su apostelnan y profetanan santo den spirito: cu e paganonan ta coherederonan y miembronan di e mesun curpa, y coparticipantenan di e promesa den Cristo Hesus pa medio di e evangelio.” (Efesionan 3:5, 6) Comprondemento di e parti aki di e secreto sagrado a wordo revela na e ‘apostelnan santo.’ Asina tambe awe, si no tawata pa e yudansa di e spirito santo, nos lo no a compronde e ‘cosnan profundo aki di Dios.’—1 Corintionan 2:10; 4:1; Colosensenan 1:26, 27.

15, 16. Dicon Yehova a scohe e gobernantenan pa reina hunto cu Cristo for di entre humanidad?

¹⁵ Bijbel ta bisa cu e “144.000” cu ta ser mira para hunto cu “e Lamchi” riba Sero Sion  celestial “a wordo cumpra for di tera”, “cumpra for di entre hende como e prome frutanan pa Dios y pa e Lamchi”, Cristo Hesus. (Revelacion 14:1-4) Yehova a scohe su prome yiu celestial pa bira e parti principal di e simiña priminti den Eden. Pero dicon el a scohe e socionan di Cristo for di entre humanidad? Apostel Pablo a splica cu e cantidad limita aki a ser “yama segun [Yehova] su proposito”, “segun e gusto di su boluntad.”—Romanonan 8:17, 28-30; Efesionan 1:5, 11, NW; 2 Timoteo 1:9.

¹⁶ Yehova su proposito ta pa santifica su nomber cu ta grandi y santo, y vindica su soberania universal. Mediante Yehova su “administracion” of manera incomparablemente sabi di maneha cosnan, el a manda su Yiu primogenito na tera, caminda el a ser poni na prueba te na morto. Ademas, Yehova a dicidi cu e Reino Mesianico di su Yiu lo inclui hende cu tambe a sostene Su soberania te na morto.—Efesionan 1:8-12, NW; Revelacion 2:10, 11.

17. Dicon nos por ta contento cu Cristo y su cogobernantenan un tempo a biba como hende?

¹⁷ Yehova a demostra gran amor pa e desendientenan di Adam door di laga su Yiu bin na tera y door di scohe for di entre humanidad esnan cu lo ta coheredero cu su Yiu den e gobierno di Reino. Con otro hendenan cu a duna prueba di ta fiel na Yehova, for di Abel en adelante, por a beneficia di esei? Siendo cu hende imperfecto ta nace catibo di pica y morto, lo mester cura nan den sentido spiritual y fisico y haci nan perfecto, di acuerdo cu Yehova su proposito original pa humanidad. (Romanonan 5:12) Pa tur hende cu ansiosamente ta spera di haya bida eterno riba tera ta un gran consuelo pa sa cu nan Rei lo mustra amor y comprension na nan mescos cu el a demostra esei na su disipelnan durante su ministerio riba tera. (Mateo 11:28, 29; Hebreonan 2:17, 18; 4:15; 7:25, 26) Loke tambe ta trankilisa nan hopi ta cu e personanan cu lo reina hunto cu Cristo como rei y sacerdote den shelo, un tempo tawata hende homber y mohe di fe kendenan mes tambe a lucha cu debilidadnan personal y a experencia e situacionnan dificil di bida mescos cu nos.—Romanonan 7:21-25.

Yehova Su Proposito Infalibel

18, 19. Dicon e palabranan di Pablo na Efesionan 1:8-11 ta mas cla pa nos awor, y kico nos lo considera den e siguiente articulo?

¹⁸ Awor nos por compronde mas mihor e nificacion di e palabranan di Pablo cu nos ta haya na Efesionan 1:8-11 [NW], cu el a dirigi na e cristiannan ungi. El a bisa cu Yehova a duna di conoce na nan “e secreto sagrado di su boluntad”, cu nan tawata “asigna como heredero” hunto cu Cristo, y cu nan tawata “predetermina segun e proposito di esun cu ta dirigi tur cos conforme cu e manera cu su boluntad ta conseha.” Nos ta ripara cu tur esaki ta pas den Yehova su maraviyoso “administracion” di cosnan pa cumpli cu su proposito. Esaki tambe ta yuda nos compronde dicon ta solamente un par di cristian cu ta asisti na e Cena di Señor ta tuma di e emblemanan.

¹⁹ Den e siguiente articulo, nos lo mira kico e Memorial of Conmemoracion di Cristo su morto ta nifica pa e cristiannan cu tin e speransa celestial. Tambe nos lo siña dicon e miyones di hendenan cu ta spera di biba pa semper riba tera mester ta sumamente interesa den loke e Memorial ta simbolisa.

[Nota]

[Preguntanan di Estudio]

[Plachi na pagina 20]

Como Repaso

• Dicon Yehova a crea e tera y pone hende riba dje?

• Dicon tawata necesario pa Yehova su Yiu unigenito ser poni na prueba riba tera?

• Dicon Yehova a scohe e gobernantenan cu lo reina hunto cu Cristo for di entre humanidad?