Un Confirmacion Antiguo di e Canon di Bijbel
Un Confirmacion Antiguo di e Canon di Bijbel
“TA PARCE cu cada liña a ser skirbi spesificamente pa lanta curiosidad di esnan cu ta interesa den con cristianismo a cuminsa.” Asina un revista a describi un documento antiguo. Bo tin un idea ta cua documento esei ta?
Ta un documento cu talbes bo a yega di tende di dje: e Fragmento di Muratori. Kisas bo ta puntra bo mes: ‘Kico ta haci e Fragmento di Muratori asina excepcional?’ E ta e canon, of lista confiabel di buki di e Scritura Griego Cristian, di mas bieu cu ta existi.
Talbes bo ta simplemente asumi cu cierto buki ta forma parti di Bijbel. Pero, lo bo keda sorprendi di sa cu un tempo algun hende tawata duda cua buki mester a forma parti di Bijbel? E Fragmento di Muratori ta contene un lista di scritura considera como inspira. Manera bo por compronde, e contenido exacto di Bijbel ta di sumo importancia. Pues, kico e documento ei a revela relaciona cu e bukinan cu aworaki ta forma parti di e Scritura Griego Cristian? Wel, na prome luga, laga nos considera algun detaye relaciona cu e documento mes.
Su Descubrimento
E Fragmento di Muratori ta parti di un codex di manuscrito di 76 blachi di percament. Cada un tawata midi 27 pa 17 centimeter. Ludovico Antonio Muratori (1672-1750), un historiado Italiano renombra, a descubrie den e Biblioteca Ambrosiano na Milan, Italia. Muratori a publica su hayasgo na 1740, pesei e fragmento ta carga e nomber Fragmento di Muratori. Aparentemente e codex a ser produci den siglo 8 den e monasterio antiguo di Bobbio, banda di Piacenza, den nort di Italia. Na cuminsamento di siglo 17 a traslad’e pa e Biblioteca di Ambrosiano.
E Fragmento di Muratori ta consisti di 85 liña di texto haya riba blachi 10 y 11 di e codex. E texto ta na Latin, obviamente copia door di un escriba cu no tawata mucho cuidadoso. Pero door di compar’e cu e mesun texto
inclui den cuater manuscrito di siglo 11 y 12, por a cai riba algun di su fayonan.Na Ki Tempo A Skirbie?
Pero, kisas bo ta puntra bo mes na ki tempo e informacion den e Fragmento di Muratori a ser skirbi originalmente. Ta parce cu e texto original a ser redacta na Griego hopi siglo prome cu e texto di e Fragmento, locual ta un traduccion Latin di e Griego. At’aki un clave cu por yuda nos haya sa e fecha di esun original. E Fragmento ta menciona un buki no biblico, Wardador, y ta declara cu un homber cu yama Hermas a skirbie “hopi resien, den nos tempo, den e stad di Roma.” Eruditonan ta calcula cu Hermas a caba di skirbi su Wardador entre aña 140 pa 155 di nos era. Pues, asina bo por mira pakico e texto original na Griego di e Fragmento di Muratori na Latin ta data entre aña 170 pa 200 di nos era.
E referencianan direct y indirect na Roma ta indica cu lo e por a ser skirbi den e stad ei. Pero ainda no a keda definitivamente estableci ken tawata e escritor. Entre e posibel autornan cu a ser menciona tin Clemente di Alehandria, Meliton di Sardis y Policrates di Efeso. Sinembargo, mayoria erudito ta kere cu e autor tawata Hipolito, un autor creativo kende a skirbi na Griego y kende tawata biba na Roma den e periodo cu e Fragmento di Muratori probablemente a ser skirbi. Aunke kisas bo no ta haya esei asina interesante, probablemente lo bo kier sa mas di su contenido cu ta hacie asina balioso.
Su Contenido
E texto no ta djis un lista di buki di e Scritura Griego Cristian. E ta duna comentario tambe riba e bukinan y nan respectivo escritornan. Ora bo lesa e texto, lo bo mira cu e ta falta e prome liñanan di e manuscrito, y tambe cu e ta parce di yega na un fin abrupto. E ta cuminsa na menciona e Evangelio di Lucas, y e documento ta declara cu e escritor di e buki di Bijbel aki tawata un docter. (Colosensenan 4:14) E ta declara cu Lucas ta e di tres Evangelio, pues bo por mira cu e parti inicial cu ta falta probablemente a haci referencia na e Evangelionan di Mateo y Marco. Si esei ta bo conclusion, lo bo haya apoyo den e Fragmento di Muratori, cu ta bisa cu e di cuater Evangelio ta esun di Huan.
Lucas 1:3; Echonan 1:1) Despues e ta menciona e lista di cartanan cu apostel Pablo a skirbi na e Corintionan (dos), na e Efesionan, na e Filipensenan, na e Colosensenan, na e Galationan, na e Tesalonicensenan (dos), na e Romanonan, na Filemon, na Tito y na Timoteo (dos). E carta di Hudas y dos carta di Huan tambe ta ser menciona como bukinan inspira. Ya el a referi caba na apostel Huan su prome carta, hunto cu su Evangelio. Apocalipsis, of Revelacion, ta conclui e lista di buki cu ta ser considera como inspira.
E Fragmento ta confirma cu esun cu a skirbi e buki di Echonan di Apostelnan pa e “excelentisimo Teofilo” tawata Lucas. (Ta interesante pa nota cu e Fragmento ta menciona un Apocalipsis di Pedro pero ta agrega cu algun hende a pensa cu no tawata bon pa cristiannan les’e. E escritor di e Fragmento ta spierta cu den su tempo ya caba tawatin scrituranan falso ta circula. E Fragmento di Muratori ta splica cu no mester a acepta esakinan, “pasobra no ta bon pa mescla gal cu honing.” Tambe e documento ta menciona otro textonan cu no mester a inclui den e scritura santo. Esei ta pasobra sea nan a ser skirbi despues di e periodo di e apostelnan, manera e Wardador di Hermas, of pasobra nan a ser skirbi pa sostene doctrina falso.
Kisas bo a ripara cu e carta na e Hebreonan, Pedro su dos cartanan y esun di Santiago no ta ser menciona den e catalok aki di bukinan autentico di Bijbel. Sinembargo, manera dr. Geoffrey Mark Hahneman a remarca despues cu el a referi na capasidad di e escriba cu a copia e manuscrito, ta “rasonabel pa bisa cu e Fragmento lo por tawata contene otro referencianan cu aworaki ta perdi, y cu Santiago y Hebreonan (y 1 Pedro) lo tawata den nan.”—The Muratorian Fragment and the Development of the Canon.
Pues e Fragmento di Muratori ta confirma cu mayoria di e bukinan cu aworaki ta den e Scritura Griego Cristian tawata wordo considera caba como parti di e canon biblico den siglo 2 di nos era. Claro cu no ta e echo cu e bukinan di Bijbel ta ser menciona den un ke otro lista di antiguedad ta determina si nan ta autentico, esta, cu nan tin derecho di ser inclui den Bijbel. Loke ta duna evidencia cu e bukinan di Bijbel ta producto di spirito santo ta nan contenido. Nan tur ta na harmonia y ta confirma cu e autor ta Yehova Dios. E harmonia y balansa di e 66 bukinan canonico di Bijbel ta duna prueba cu nan tur hunto ta forma un totalidad. Pues, ta bon pa bo acepta nan pa loke nan ta realmente, e berdad inspira di e Palabra di Yehova, conserva te den nos tempo.—1 Tesalonicensenan 2:13; 2 Timoteo 3:16, 17.
[Plachi na pagina 13]
Ludovico Antonio Muratori
[Plachi na pagina 14]
Biblioteca Ambrosiano
[Plachi na pagina 15]
Fragmento di Muratori
[Reconocemento]
Diritti Biblioteca Ambrosiana. Vietata la riproduzione. Aut. No. F 157 / 05
[Reconocemento pa Potret na pagina]
Fragmentonan: Diritti Biblioteca Ambrosiana. Vietata la riproduzione. Aut. No. F 157 / 05; Muratori, based on line art: © 2005 Brown Brothers