“Conta Nos Mas!”

NA E stad Nezlobnaya, Rusia, un klas di scol secundario tawata studia e obranan di e autor Ruso Mikhail Bulgakov durante les di literatura. Entre e obranan literario tawatin un novela cu ta describi Hesucristo den un manera denigrante, mientras e ta presenta Satanas como un heroe. Despues di a papia di e buki cu e klas, e docente a duna e klas un proefwerk basa riba e novela aki. Sinembargo, un di e alumnonan, un Testigo di Yehova di 16 aña cu yama Andrey, cortesmente a pidi pa no lag’e traha e proefwerk ei pasobra su consenshi no ta permitie studia e tipo di literatura aki. El a ofrece pa na luga di e proefwerk e skirbi un opstel den cua lo e splica con e ta mira Hesucristo. E docente a bai di acuerdo.

Andrey a splica den su opstel cu aunke e ta respeta opinion di otro hende, el a descubri cu e mihor manera pa siña tocante Hesus ta door di lesa un di e cuater relatonan di Evangelio. Haciendo esei, “bo ta siña tocante Hesus su bida y siñansanan a base di loke testigonan ocular a conta.” Andrey a agrega: “Un otro factor precupante ta e manera cu Satanas ta ser describi. Tin hende kisas ta haya pret pa lesa un buki den cua Satanas ta un heroe, pero pa ami si no.” El a splica cu en realidad Satanas ta un criatura spiritual malbado y poderoso cu a rebela contra Dios, y a trece maldad, afliccion y sufrimento pa humanidad. Andrey a conclui su opstel asin’aki: “Mi no ta kere cu lesamento di e novela aki lo beneficia mi. Claro cu mi no tin nada contra di Bulgakov como escritor. Pero personalmente, mi ta prefera di lesa Bijbel pa siña e berdad historico tocante Hesucristo.”

Andrey su docente a keda asina contento cu e opstel cu el a pidie prepara un spreekbeurt tocante Hesucristo. Gustosamente Andrey a bai di acuerdo pa haci esei. Durante nan siguiente les di literatura, Andrey a presenta su informe dilanti di henter e klas. El a splica dicon e ta haya cu Hesus ta e homber di mas importante cu a yega di biba. Caba el a lesa un capitulo tocante Hesus su morto for di e buki biblico di Mateo. Como cu e tempo asigna pa su spreekbeurt tawata cabando, Andrey kier a conclui su presentacion, pero su compañeronan di klas a insisti: “Conta nos mas! Kico a pasa despues?” Pues, el a sigui lesa for di e relato di Mateo tocante Hesus su resureccion.

Ora cu Andrey a termina, su compañeronan di klas a hacie hopi pregunta tocante Hesus y Yehova. Andrey a conta: “Mi a haci oracion pidi Yehova duna mi sabiduria, y el a contesta mi oracion. Mi por a contesta tur e preguntanan cu nan a haci!” Despues di e les, Andrey a duna su docente un ehemplar di e buki E homber mas importante cu hamás a biba, * y e docente a acept’e cu smak. Andrey a comenta: “El a duna mi un bon punto pa mi spreekbeurt y a elogia mi pasobra mi tin mi propio conviccionnan y mi no tin berguensa di nan. Tambe el a bisa mi cu e ta di acuerdo cu algun di mi creencianan.”

Andrey ta masha contento cu el a dicidi di sigui su consenshi biblicamente entrena door di no lesa informacion cu ta deshonra Yehova y su Yiu, Hesucristo. E posicion firme ei no solamente a proteh’e pa e no ser afecta door di puntonan di bista antibiblico, sino tambe esaki a dun’e e oportunidad maraviyoso pa por a comparti berdadnan biblico sumamente importante cu otro hende.

[Nota]