Pakico Acudi na Bijbel pa Haya Guia?

“Tur Scritura ta inspira pa Dios y ta util pa siñansa, pa reprendemento, pa coreccion.”—2 Timoteo 3:16.

NA UNDA bo ta acudi pa haya guia den bo bida? Awe tin un superabundancia di conseho disponibel riba casi tur topico cu bo por imagina. Pero toch hopi hende ta acudi na e scrituranan antiguo di Bijbel pa haya guia.

Sinembargo, mayoria hende ta considera Bijbel como di poco balor, specialmente den e era aki di informacion y di tecnologia moderno. Algun educado y cientifico respeta ta di opinion cu Bijbel ta ouderwets. Acaso nan tin rason? Tumando na cuenta e tantisimo fuentenan di guia cu tin awe, dicon un hende lo mester acudi na Bijbel?

Un Buki Cu Ta Contene e Berdad

Na un ocasion Hesucristo tawata sosega banda di un pos y e tawatin un combersacion cu un señora Samaritano. El a bisa e señora: “Dios ta spirito, y esnan cu ta ador’e mester adora den spirito y berdad.” (Huan 4:24) E palabranan aki ta mustra cu tin un forma di adoracion cu ta aceptabel pa Dios. Pa nos adora Dios cu berdad, nos adoracion mester ta na harmonia cu loke Dios a revela tocante su mes den Bijbel. E Palabra di Dios ta contene e berdad.—Huan 17:17.

Sinembargo, tin hopi religion cu ta declara cu nan ta kere den Bijbel, y toch ta parce cu cada un ta siña un cos diferente. Como resultado, tin hopi confusion encuanto kico Bijbel ta siña realmente. Hesus ta Dios, of e ta Yiu di Dios? Tin bida despues di morto of no? Fierno ta un luga cu ta existi di berdad caminda hende ta ser tormenta despues di morto? Satanas ta un persona cu ta existi di berdad? Kico ser un cristian ta nifica? Dios ta realmente interesa den kico nos ta haci y kico nos ta pensa? Amor berdadero ta un motibo valido pa tene relacion sexual prome cu casa? Ta malo pa bebe bebida alcoholico? Varios religion ta pretende cu nan ta siña e berdad tocante e asuntonan aki. Pero doctrinanan religioso hopi bes ta na conflicto cu otro. Nan tur no por ta berdad.—Mateo 7:21-23.

Con anto bo por haya sa e berdad tocante Dios y cua ta e forma di adoracion cu ta agrad’e? Supone cu bo haya sa cu bo mester haci un operacion pa soluciona un problema medico serio. Kico lo bo haci? Si ta posibel, lo bo keda busca te ora bo haya e mihor ciruhano cu tin pa e tipo di operacion ei. Lo bo analisa su credencialnan y su experencia, drenta den contacto cu ne y papia cu ne. Por ultimo, despues cu bo keda combenci a base di evidencia cu e ta e mihor cu tin, lo bo pone bo confiansa den dje y lag’e opera bo. Otro hende kisas tin un otro opinion di dje. Pero bo fe den e ciruhano aki awor ta bon funda.

Den mesun manera, si bo haci un analisis honesto y cabal di e evidencia cu tin, bo por desaroya fe den Dios y den Bijbel. (Proverbionan 2:1-4) Ora di busca contesta pa preguntanan tocante ki tipo di adoracion ta aceptabel pa Dios, bo tin un choice. Bo por acudi na hende su siñansa- y opinionnan cu ta na conflicto cu otro, of bo por considera e punto di bista di Bijbel.

Exacto y Practico

Un analisis cuidadoso di Bijbel lo duna bo basta prueba cu “tur Scritura ta inspira pa  Dios y ta util.” * (2 Timoteo 3:16, 17) Por ehempel, Bijbel tin masha hopi profecia detaya. Anto historia ta duna prueba di nan cumplimento. (Isaias 13:19, 20; Daniel 8:3-8, 20-22; Mikeas 5:2) Aunke Bijbel no ta un buki di instruccion cientifico, e ta cientificamente exacto. E ta contene echonan tocante naturalesa y salud cu a ser skirbi miles di aña prome cu cientificonan por a yega na mesun conclusion.—Levitico 11:27, 28, 32, 33; Isaias 40:22.

Ademas, Bijbel ta yuda nos tuma decisionnan sabi. E tin un abundancia di conseho practico relaciona cu bida di famia, nos bienestar fisico y emocional, negoshi y otro asuntonan di bida diario. Proverbionan 2:6 y 7 ta bisa: “SEÑOR ta duna sabiduria; for di su boca ta sali conocemento y comprondemento. E ta warda sabiduria sano pa esnan cu ta recto.” Door di acudi na Bijbel pa haya guia, bo por entrena bo mente “pa discerni loke ta bon y loke ta malo.”—Hebreonan 5:14.

Tambe e Palabra di Dios ta yuda nos compronde e proposito di bida. (Huan 17:3; Echonan 17:26, 27) E ta splica e nificacion di e condicionnan mundial. (Mateo 24:3, 7, 8, 14; 2 Timoteo 3:1-5) Dios ta mustra nos den su Palabra con lo e elimina maldad for di riba tera y haci posibel pa humanidad gosa di salud perfecto y bida eterno.—Isaias 33:24; Daniel 2:44; Revelacion 21:3, 4.

Miyones di hende a experencia personalmente cu Bijbel di berdad ta un fuente confiabel di sabiduria practico.

[Nota]

BO A YEGA DI PUNTRA BO MES?

• Cua forma di adoracion ta aceptabel pa Dios?—Huan 4:24.

• Kico bo mester haci pa beneficia di e sabiduria di Dios?—Proverbionan 2:1-4.

• Den ki manera Bijbel ta un fuente di sabiduria practico?—Hebreonan 5:14.