Pregunta di Lector

Kico apostel Pablo tawata kiermen ora cu el a declara cu hende mohe mester “keda keto den e iglesianan”?

Pablo a skirbi na e congregacion cristian na Corinto: “Manera den tur e iglesianan di e santonan, laga e mohenan keda keto den e iglesianan; pasobra no ta permiti pa nan papia.” (1 Corintionan 14:33, 34) Pa nos por compronde esaki corectamente, ta bon pa nos considera e contexto di Pablo su conseho.

Na 1 Corintionan capitulo 14, Pablo a trata asuntonan relaciona cu reunionnan di e congregacion cristian. El a describi kico mester considera na e reunionnan ei y a recomenda con mester conduci nan. (1 Corintionan 14:1-6, 26-34) Ademas, el a enfatisa e proposito di reunionnan cristian, esta, “pa e iglesia por ricibi edificacion.”—1 Corintionan 14:4, 5, 12, 26.

Pablo su instruccion pa “keda keto” ta aparece tres biaha den capitulo 14 di 1 Corintionan. Cada biaha e instruccion tawata dirigi na un otro grupo den e congregacion, pero tur e biahanan el a ser duna pa e mesun motibo, esta pa “tur cos sosode corectamente y na un manera ordena.”—1 Corintionan 14:40.

E prome biaha, Pablo a bisa: “Si tin hende ta papia den lenga, laga esei sosode pa dos of di mas tanto tres, y cada un na su turno, y laga un duna interpretacion; ma si no tin interprete, lag’e keda keto den iglesia; y lag’e papia cu su mes y cu Dios.” (1 Corintionan 14:27, 28) Esaki no tawata kiermen cu un persona asina nunca no tawatin mag di papia na reunion, sino mas bien cu tawatin biaha cu e mester a keda keto. No lubida cu lo no a cumpli cu e proposito di e reunion, esta, di edifica otro, si el a papia na un idioma cu ningun hende no a compronde.

E di dos biaha, Pablo a declara: “Laga dos of tres profeta papia, y laga e otronan husga [of, “discerni e nificacion”, NW]. Ma si un revelacion wordo duna na un otro cu ta sinta einan, laga esun prome keda keto.” Esaki no a nifica cu e prome profeta mester a keda sin papia na reunion, sino mas bien cu tawatin biaha cu e mester a keda keto. E ora ei e persona cu a haya e revelacion milagroso por a papia cu e congregacion, y e proposito di e reunion—pa “tur por  wordo exhorta”—lo a ser logra.—1 Corintionan 14:26, 29-31.

E di tres biaha, Pablo a papia solamente cu hende mohe cristian, y a bisa: “Laga e mohenan keda keto den e iglesianan; pasobra no ta permiti pa nan papia, ma laga nan somete nan mes.” (1 Corintionan 14:34) Dicon Pablo a duna e mandamento aki na rumannan mohe? Pa mantene ordo den e congregacion. El a bisa: “Y si nan ta desea di siña algo, laga nan puntra nan mes esposonan na cas; pasobra ta para mahos pa un mohe papia den iglesia.”—1 Corintionan 14:35.

Podise tawatin algun ruman mohe cu a cuestiona loke tawata ser bisa den e congregacion. Pablo su conseho a yuda rumannan mohe evita tal actitud desordena y humildemente acepta nan posicion denter di Yehova su areglo di hefatura, particularmente relaciona cu nan esposo. (1 Corintionan 11:3) Ademas, door di keda keto, rumannan mohe lo a mustra cu nan no tawata aspira pa ta maestro den e congregacion. Ora Pablo a skirbi Timoteo, el a mustra cu lo ta inapropiado pa un hende mohe asumi e papel di maestro den e congregacion. El a bisa: “Mi no ta permiti hende mohe siña hende homber ni eherce autoridad riba hende homber, ma pa keda keto.”—1 Timoteo 2:12.

Acaso esaki kiermen cu un hende mohe cristian nunca no tin mag di papia durante un reunion di congregacion? No, no ta esei e kiermen. Den tempo di Pablo tawatin ocasion cu mohenan cristian, kisas motiva pa spirito santo, a haci oracion of profetisa den e congregacion. Na ocasionnan asina, nan a reconoce nan posicion door di bisti algo pa tapa nan cabes. * (1 Corintionan 11:5) Ademas, tanto den tempo di Pablo como awe, rumannan mohe hunto cu rumannan homber ta ser urgi pa haci declaracion publico di nan speransa. (Hebreonan 10:23-25) Fuera di haci esaki den e ministerio di veld, rumannan mohe ta declara nan speransa y ta anima otro rumannan durante reunionnan di congregacion. Nan ta haci asina door di duna comentarionan bon pensa ora invita nan pa haci esei y door di acepta asignacionnan pa participa den demostracion of den e partinan di studiante den e Scol di Ministerio Teocratico.

Pues anto, mohenan cristian ta “keda keto” door di no purba asumi e papel di un hende homber y instrui e congregacion. Nan no ta haci preguntanan pa proboca discusion cu lo por cuestiona e autoridad di e rumannan cu ta instrui den e congregacion. Door di cumpli cu nan debido papel den e congregacion, rumannan mohe cristian ta contribui masha hopi na un ambiente di pas den cua “tur cos [na reunionnan di congregacion ta] wordo haci pa edificacion.”—1 Corintionan 14:26, 33.

[Nota]