Storia di Bida

Sa Loke Ta Corecto, Anto Hacie

SEGUN E RELATO DI HADYN SANDERSON

Hesus a yega di bisa su apostelnan: “Si boso sa e cosnan aki, boso ta bendiciona si boso haci nan.” (Huan 13:17) Si, talbes nos sa loke ta corecto, pero tin biaha hacie ta e cos! Pero, awor cu mi tin mas cu 80 aña di edad, di cua 40 mi a sirbi como misionero, mi ta combenci cu Hesus su palabranan ta cierto. Esun cu ta haci loke Dios ta bisa lo ta berdaderamente felis. Laga mi splica dicon.

NA 1925, tempo mi tawatin tres aña, mi mayornan a asisti na un discurso biblico den nos stad, Newcastle, Australia. E discurso, “Miyones di Hende na Bida Awor Lo No Muri Nunca”, a combence mi mama cu el a haya e berdad, y el a cuminsa asisti na e reunionnan cristian regularmente. Pero e interes di mi tata si a mengua rapidamente. El a opone mi mama su fe nobo y a menasa di bai for di cas si mi mama no a renuncia su fe. Mi mama tawata stima mi tata y kier a mantene nos famia hunto. No obstante, e tawata sa cu obediencia na Dios tawata mas importante cu esei, y e tawata determina pa haci loke ta corecto den Su bista. (Mateo 10:34-39) Mi tata a bai laga nos, y despues mi tawata mir’e solamente de bes en cuando.

Mirando bek, mi ta admira mi mama su lealtad na Dios. Su decision a hiba na un bida di bendicion spiritual tanto pa ami como mi ruman mohe mas grandi, Beulah. Ademas, el a siña nos un les importante: ora nos sa loke ta corecto, nos tin cu haci esfuerso pa hacie.

Pruebanan di Fe

E Studiantenan di Bijbel, manera Testigonan di Yehova tawata wordo yama e tempo ei, a yuda nos famia masha tanto. Mi wela a bin biba serca nos y e tambe a acepta e berdad di Bijbel.  E cu mi mama a bira compañeranan inseparabel den e trabou di predica. Nan aparencia digno y amabilidad a gana e respet di hopi hende.

Mientrastanto, ruman hombernan cristian mas grandi a tuma mi bou di nan hala y a duna mi entrenamento balioso. Mi a siña lihe con pa uza carchi di testimonio pa duna presentacionnan simpel na cas di hende. Tambe mi tawata presenta discursonan biblico graba riba un tocadisco portatil y tawata participa den marchanan cu pancarta den e caya principal di stad. Esaki no tawata facil pasobra mi tawatin miedo di hende. Sinembargo, mi tawata sa loke tawata corecto y mi tawata determina pa hacie.

Despues cu mi a caba scol, mi a cuminsa traha na un banco. Mi trabou a pone cu mi tawatin cu bishita varios sucursal di e banco rond e estado di New South Wales. Aunke tawatin masha poco Testigo den e parti ei di e pais, e formacion cu mi a haya a yuda mi mantene mi fe bibo. Mi mama tawata skirbi mi cartanan di animacion y eseinan a fortalece mi spiritualmente.

E yudansa cu mi a haya via di e cartanan ei a yega net na tempo. Segundo Guera Mundial a cuminsa, y autoridadnan a manda yama mi pa drenta servicio militar. E gerente di banco tawata un fiel baido di misa y un comandante militar di e area ei. Ora mi a splic’e mi posicion neutral como cristian, el a duna mi un ultimatum—sea sali for di mi religion of perde mi trabou na banco! Cosnan a yega na un punto culminante ora mi a raporta na e centro local di reclutamento pa e ehersito. E gerente tawata presente y a wak cu hopi interes ora mi a acerca e mesa di registracion. Na momento cu mi a nenga di firma e papelnan di registracion, e oficialnan a rabia pisa. Tawata un momento di hopi tension, pero mi tawata determina pa haci loke ta corecto. Cu yudansa di Yehova, mi a keda calmo y dicidido. Ora mi a haya sa despues cu algun hende violento tawata busca mi problema, mi a paketa mi cosnan lihe y cohe e siguiente trein pa sali for di e stad!

Despues cu mi a regresa Newcastle, autoridadnan a hiba mi corte hunto cu shete otro ruman homber cu a nenga di drenta servicio militar. E hues a sentencia nos na tres luna di prizon cu trabou forsa. Aunke prizon tawata un experencia desagradabel, e echo cu mi a haci loke tawata bon a trece su bendicionnan. Despues cu nos a sali liber, Hilton Wilkinson, un otro Testigo cu tawata sera den cel hunto cu mi, a invita mi pa traha p’e den su studio di saca y laba potret. Ei mi a topa mi futuro esposa, Melody, kende tawata traha na e negoshi como recepcionista. Un poco despues cu nos a sali liber, mi a batisa como simbolo di mi dedicacion na Yehova.

Mi A Pone e Meta di Sirbishi di Tempo Completo

Despues cu nos a casa, ami cu Melody a habri nos mes studio na Newcastle. Den poco tempo nos tawata haya asina tanto trabou cu nos salud y condicion spiritual a cuminsa bai atras. Rond di e tempo ei, Ted Jaracz, kende tawata sirbi na e sucursal di Testigonan di Yehova na Australia y kende awor ta miembro di e Cuerpo Gobernante di Testigonan di Yehova, a papia cu nos tocante nos metanan spiritual. Despues di e combersacion ei, nos a dicidi di bende nos negoshi y simplifica nos bida. Na 1954 nos a cumpra un trailer chikito, muda bai e stad di Ballarat den e estado di Victoria y cuminsa sirbi como pionero, of predicado di tempo completo.

Yehova a bendiciona nos esfuersonan pa sirbi den e congregacion chikito na Ballarat. Den  18 luna, e cantidad di personanan cu tawata asisti na e reunionnan a aumenta di 17 pa 70. Despues nos a haya un invitacion pa cuminsa e trabou di sircuito, of di superintendente biahero, den e estado di Sur Australia. Pa e siguiente tres añanan nos tawatin e trabou agradabel di bishita congregacionnan den e stad di Adelaide y den e regionnan di produccion di biña, y lamunchi cu apelsina banda di Riu Murray. Tur esei a nifica un cambio grandi den nos bida! Nos tawata contento di por a sirbi den compania di rumannan amoroso. Y e echo cu nos a haci loke segun nos tawata corecto a resulta den un berdadero bendicion!

Asignacion Como Misionero

Na 1958 nos a informa e sucursal di Australia di nos intencion pa asisti na e Asamblea Internacional “Boluntad Divino” na New York mas laat den e aña ei. Nan a contesta nos door di manda formularionan di aplicacion pa e scol di Galad pa misionero na Merca. Siendo cu nos tawatin 30 y pico aña, nos a pensa cu nos tawata mucho bieu pa asisti na Galad. Asina mes nos a manda nos aplicacionnan y nos a haya e invitacion pa asisti na e di 32 klas. Na mitar di e curso, nos a ricibi nos asignacion como misionero, locual tawata India! Apesar cu na principio nos tawatin poco miedo, nos kier a haci loke tawata corecto y gustosamente a acepta nos asignacion.

Un mainta tempran na 1959, nos a yega Bombay (awor Mumbai) cu barco. Tawatin cientos di obrero drumi den aire liber tur plama riba waf, y nos a sinti un holo straño. Ora solo a sali, nos a haya un idea di loke nos por a spera. Nunca prome nos a sinti tanto calor asina! Un pareha misionero, Lynton y Jenny Dower, cu a traha como pionero hunto cu nos na Ballarat, a bin ricibi nos. Nan a hiba nos na e sucursal y Cas di Betel di India, cu tawata consisti di un apartamento chikito parti ariba, situa pega cu centro di ciudad. Einan tawata biba seis trahado boluntario di Betel. Ruman Edwin Skinner, kende a sirbi como misionero na India for di 1926, a conseha nos pa cumpra dos maleta di paña di lona prome cu nos a sigui pa nos asignacion. Casi tur hende cu tawata biaha den e treinnan na India tawatin e maletanan aki y nan tawata util durante nos biahenan mas despues.

Despues di un biahe di dos dia den trein, nos a yega nos asignacion na Tiruchchirappalli, un stad den e estado sur di Madras (awor Tamil Nadu). Ei nos a join tres pionero special di India cu tawata predica den un poblacion di 250.000 hende. E condicionnan di bida tawata simpel. Un biaha nos a sobra menos di 4 dollar den nos saco. Pero ora e placa ei a caba, Yehova no a laga nos na caya. Un persona cu tawata studia Bijbel a fia nos placa pa huur un cas apropiado pa tene e reunionnan. Un dia cu nos no tawatin mucho cuminda, un biciña tawatin e bondad di trece cuminda cu el a prepara cu curry pa nos. Mi a gust’e, pero e tawatin asina hopi picante cu el a pone mi hik!

Den Sirbishi di Veld

Aunke algun hende na Tiruchchirappalli tawata papia Ingles, e mayoria tawata papia Tamil. Pesei, nos a haci hopi esfuerso pa siña un presentacion simpel pa sirbishi di veld den e idioma ei. Cu esei nos a gana e respet di hopi hende local.

Nos a disfruta cabalmente di e sirbishi di cas pa cas. Di naturalesa e hendenan di India ta hospitalario, y mayoria tawata invita nos drenta pa come of bebe algo. Siendo cu e temperatura hopi biaha tawata den careda di 40 grado Celsius, nos tawata masha gradicido pa nan hospitalidad. Prome cu nos presenta nos mensahe, nos tawatin cu mustra bon manera door di papia di nos bida personal. Hopi bes e doñonan di cas tawata puntra ami cu mi casa: “Di unda boso ta? Boso tin yiu? Pakico no?” Riba e punto aki, hopi bes nan tawata ofrece pa recomenda nos un bon docter! E combersacionnan ei a permiti nos introduci nos mes y splica e importancia di nos obra di siña hende tocante Bijbel.

Mayoria hende cu nos tawata predica na dje tawata di e religion hindu. Nan creencianan ta hopi distinto for di cristianismo. En bes di debati riba e siñansanan complica di filosofia hindu,  nos tawata simplemente predica e bon nobo di e Reino di Dios, anto cu bon resultado. Den seis luna, casi 20 persona a cuminsa asisti na e reunionnan na nos cas di misionero. Un di e personanan aki tawata un ingeniero civil cu yama Nallathambi. Despues, e cu su yiu homber Vijayalayan a yuda rond di 50 persona bira sirbido di Yehova. Vijayalayan a sirbi pa un tempo tambe na e sucursal di India.

Constantemente di Biahe

Nos no tawatin ni seis luna na India dia nan a invita mi pa sirbi como e prome superintendente di districto permanente di e pais. Esei a nifica biaha rond India, organisa asamblea y traha hunto cu nuebe diferente grupo di idioma. Tawata un trabou duro. Nos a paketa nos pañanan y ekipo pa seis luna den tres falis di hero y nos maletanan confiabel di paña di lona y a sali cu trein for di e stad di Madras (awor Chennai). Siendo cu e teritorio cu e districto a abarca tawatin un omtrek di mas o menos 6.500 kilometer, nos tawata biaha constantemente. Na un ocasion, nos a caba cu un asamblea den e stad sur di Bangalore riba diadomingo. Despues nos a biaha direccion nort pa Darjeeling na pia di e seronan di Himalaya pa sirbi na un otro asamblea e siguiente siman. E biahe pa yega Darjeeling tawata mas o menos 2.700 kilometer y nos a cambia trein cinco biaha.

Durante e biahenan di e temponan ei, nos tawata gusta pasa e pelicula E Sosiedad di Mundo Nobo den Accion. E obra aki a laga e hendenan conoce e actividadnan y alcanse di Yehova su organisacion aki riba tera. Na varios ocasion, hopi hende tawata asisti na e presentacionnan aki. Un biaha nos a presenta e pelicula na un grupo di hende cu a reuni canto di un caminda. Mientras e pelicula tawata pasando a forma un mal tempo y nubianan carga tawata biniendo hopi lihe den nos direccion. Ya cu un biaha caba un multitud a cuminsa haci bochincha ora nos a para e pelicula, mi a dicidi di sigui cu e presentacion pero na un speed mas halto. Afortunadamente, e pelicula a caba sin incidente na momento cu e prome piknan di awa a cuminsa cai.

Den e siguiente añanan, ami cu Melody a bishita mayoria parti di India. Siendo cu cada region tawatin su cuminda, bisti, idioma y paisahenan tipico, ta como si fuera nos tawata biaha di un pais pa otro. E variedad den Yehova su creacion ta berdaderamente maraviyoso! Esaki ta conta tambe pa animalnan den e naturalesa di India. Un biaha, mientras nos tawata campa den e mondinan di Nepal, nos a haya un bon bista di un tiger enorme. Tawata un animal impresionante. E bista aki a duna nos mas deseo ainda pa biba den Paradijs, caminda finalmente lo tin pas entre hende cu bestia.

Mehoracionnan Organisatorio

E temponan aya tawatin e necesidad pa e rumannan na India pega mas na Yehova su areglonan di organisacion. Den algun congregacion, e hombernan tawata sinta na un banda di  e sala di reunion mientras e mohenan tawata sinta na e otro banda. Rara bes e reunionnan tawata cuminsa na tempo. Na un luga, nan tawata bati bel pa yama e publicadonan di Reino na reunion. Den otro areanan, publicadonan tawata cana drenta un pa un ora solo a alcansa un cierto posicion den shelo. Asambleanan y bishitanan di superintendentenan biahero tawata iregular. E rumannan tawata dispuesto pa haci loke tawata corecto, pero mester a entrena nan.

Na 1959, e organisacion di Yehova a institui e Scol di Ministerio di Reino. E programa mundial di entrenamento aki a yuda superintendentenan di sircuito, pioneronan special, misioneronan y ancianonan di congregacion cumpli cu nan responsabilidadnan biblico na un manera mas eficas. Ora e scol a cuminsa na India na december 1961, ami tawata e instructor. Gradualmente, e congregacionnan rond e pais a cuminsa sinti e efectonan di e scol aki, y nan a progresa rapidamente. Unabes e rumannan tawata sa loke ta corecto, e spirito di Dios a motiva nan pa aplica loke nan a siña.

Congresonan grandi tambe a anima y unifica e rumannan. Un asamblea cu a sobresali tawata e Asamblea Internacional “Bon Nobo Eterno” na New Delhi teni na 1963. Testigonan for di tur parti di India a biaha miles di kilometer pa asisti na e asamblea ei. Hopi di nan a gasta tur loke nan tawatin gespar pa haci esei. Siendo cu tawatin 583 delegado di 27 otro pais tambe presente, tawata pa prome bes cu e Testigonan local por a reuni y asocia cu un gran cantidad di ruman bishitante.

Na 1961, ami cu Melody a ser invita pa bira parti di e famia di Betel na Bombay, caminda despues mi a sirbi como miembro di e Comite di Sucursal. Mi a haya mas privilegio. Pa hopi aña, mi a sirbi como superintendente di zona den varios parti di Asia y Medio Oriente. Siendo cu e trabou di predica tawata prohibi den hopi di e paisnan aki, e publicadonan local mester tawata “cauteloso manera colebra y inocente manera paloma.”—Mateo 10:16.

Expansion y Cambionan

Na 1959, ora nos a yega India pa prome biaha, tawatin 1.514 publicado activo den e pais. Awe, e cantidad ei a aumenta te na mas cu 24.000. Pa acomoda e crecemento aki, nos a muda dos biaha bai un Betel nobo na Bombay of den cercania di dje. Anto, na maart 2002, e famia di Betel a bolbe muda—e biaha aki pa un compleho nobo construi banda di Bangalore, den sur di India. Actualmente tin 240 miembro di Betel ta biba den e facilidad moderno aki y un grupo di nan ta traduci literatura biblico na 20 idioma.

Aunke ami cu Melody tawata ansioso pa muda pa Bangalore, na 1999 enfermedad a obliga nos regresa Australia. Awor nos ta sirbi como miembro di e famia di Betel na Sydney. Aunke nos a bandona India, e amor cu nos tin pa nos amigonan stima y yiunan spiritual den e pais ei ta keda fuerte. Ta hopi dushi pa ricibi carta for di nan!

Mirando bek na e mas cu 50 aña di sirbishi di tempo completo, ami cu Melody ta sinti nos ricamente bendiciona. Un tempo nos tawata traha pa conserva imagen di hende riba potret, pero nos escohencia pa traha pa conserva hende na bida den e memoria di Dios tawata mucho mas mihor. E decision di pone e boluntad di Dios na prome luga den nos bida a trece experencianan precioso! Si, hende cu ta haci loke Dios ta bisa ta corecto en berdad lo ta felis!

[Mapa na pagina 15]

(Pa e texto den su formato completo , wak e publicacion)

INDIA

New Delhi

Darjeeling

Bombay (Mumbai)

Bangalore

Madras (Chennai)

Tiruchchirappalli

[Plachi na pagina 13]

Hadyn cu Melody na 1942

[Plachi na pagina 16]

E famia di Betel na India, 1975