E Unico Solucion!

EHOMBER Lazaro hunto cu su ruman mohenan, Marta y Maria, tawata biba na Betania, un pueblito cu a keda mas o menos tres kilometer pafo di Herusalem. Riba un dia, ora cu nan amigo Hesus no tawat’ei, Lazaro a bira hopi malo. Su ruman mohenan tawata hopi precupa p’e. Nan a manda un mensahe pa Hesus. Poco despues di a tende e noticia, Hesus a sali pa bai mira Lazaro. Na caminda, Hesus a informa su disipelnan cu e ta bai serca Lazaro pa lant’e for di soño. Na prome instante e disipelnan a compronde Hesus robes, pero e ta clarifica e asunto, bisando: “Lazaro a muri.”—Huan 11:1-14.

Ora Hesus a yega na e graf di Lazaro, el a manda nan kita e piedra cu a sera e entrada di e graf. Despues di haci oracion na bos halto, el a ordena: “Lazaro, bin pafo!” Anto Lazaro a bin pafo. E homber cu tawatin cuater dia morto a ser resusita.—Huan 11:38-44.

E relato tocante Lazaro ta mustra cu resureccion ta e solucion sigur pa morto. Pero kisas tin hende ta puntra: E milager di trece Lazaro bek na bida ta un cos cu a pasa di berdad? Bijbel ta present’e como un echo. Lesa Huan 11:1-44, y lo bo mira con bibo e detayenan di e relato aki ta. Bo por nenga cu esei a sosode? Haciendo esei lo por duna bo motibo pa duda di tur e milagernan cu tin para skirbi den Bijbel, incluso e resureccion di Hesucristo mes. Anto Bijbel ta bisa cu “si Cristo no a wordo lanta, boso fe ta sin balor.” (1 Corintionan 15:17) E resureccion ta un siñansa fundamental di Bijbel. (Hebreonan 6:1, 2) Pero, kico e palabra “resureccion” kiermen?

Kico Bijbel Kiermen cu “Resureccion”?

Den e Scritura Griego Cristian, e palabra “resureccion” ta aparece mas cu 40 biaha. E ta ser traduci for di un palabra Griego cu literalmente ta nifica “lanta para atrobe.” E expresion Hebreo cu ta coresponde cu ne ta nifica “rebibamento di e mortonan.” Despues cu un persona muri, ta kico ta ser resusita? No por ta e curpa, pasobra esei ta putri y bolbe na stof. Loke ta ser resusita no ta e mesun curpa sino e mesun persona cu a muri. Pues, resureccion ta encera restauracion di e patronchi di bida di un persona: e caracteristicanan di su personalidad, e cosnan cu el a haci durante di su bida y tur e detayenan di su identidad.

Yehova Dios su memoria ta perfecto, y p’e no ta un problema pa corda e patronchi di bida di e hendenan cu a muri. (Isaias 40:26) Siendo cu Yehova ta e Originador di bida, facilmente e por resusita e mesun persona den un curpa nobo. (Salmo 36:9) Ademas, Bijbel ta declara cu Yehova Dios ta “anhela”—es decir, e tin un deseo fuerte y sinsero—pa resusita e mortonan. (Job 14:14, 15) Nos por ta hopi contento cu Yehova no solamente por trece un persona bek na bida, sino tambe cu e kier hacie!

Hesucristo tambe ta hunga un papel importante den resureccion di e mortonan. Un poco mas cu un aña despues cu Hesus a cuminsa cu su ministerio, el a bisa: “Mescos cu e Tata ta lanta e mortonan y ta duna nan bida, asina e Yiu tambe ta duna bida na esun cu e kier.” (Huan 5:21) E experencia di Lazaro no ta mustra bon cla cu Hesucristo tin e poder y tambe e deseo di resusita e mortonan?

Kico di e idea cu den nos tin algo cu ta sigui biba despues cu nos muri? En realidad, e siñansa di resureccion y e idea cu hende tin un alma of spirito inmortal, ta incompatibel. Si tin algo den nos ta keda na bida ora nos muri,  pakico nos lo tin mester di un resureccion? Lazaro su ruman mohe Marta no a kere cu ora su ruman homber a muri, el a sigui existi den un region di spirito. Marta tawatin fe den e resureccion. Ora Hesus a sigur’e: “Bo ruman homber lo lanta”, Marta a bisa: “Mi sa cu e lo lanta den e resureccion riba e ultimo dia.” (Huan 11:23, 24) Anto ora Lazaro a resusita, e no a conta ningun experencia di un bida despues di morto. E tawata morto. Bijbel ta bisa: “E mortonan no sa nada . . . No tin ni actividad ni planificacion ni sabiduria den Seol [e graf comun di humanidad], caminda bo ta bai.”—Eclesiastes 9:5, 10.

Pues anto, segun Bijbel e unico solucion pa morto ta resureccion. Pero di tur e hendenan cu a muri, ta ken lo ser resusita y na unda?

Ken Lo Ser Resusita?

Hesus a bisa: “E ora lo yega den cual tur cu ta den graf [“conmemorativo”, NW] lo tende [Hesus] su bos, y lo sali.” (Huan 5:28, 29) Segun e promesa aki, esnan den graf conmemorativo—esta, esnan den Yehova su memoria—lo ser resusita. Pues anto, e pregunta ta: Di tur e hendenan cu a muri, ken realmente ta den Dios su memoria sperando un resureccion?

E buki biblico di Hebreonan capitulo 11 ta menciona pa nomber hende homber y mohe cu a sirbi Dios fielmente. Nan, hunto cu e fiel sirbidonan di Dios cu a muri den añanan resien, lo ta entre esnan resusita. Kico di e hendenan cu no a cumpli cu Dios su normanan di husticia, podise pa falta di conocemento? Nan tambe ta den Dios su memoria? Si, hopi di nan ta den su memoria, pasobra Bijbel ta priminti: “Lo tin un resureccion di tanto e hustonan como e malbadonan.”—Echonan 24:15.

Sinembargo, no ta tur hende cu a yega di biba lo haya un resureccion. Bijbel ta declara: “Si nos sigui peca boluntariamente despues di a ricibi e conocemento di e berdad, no ta keda sacrificio pa pica mas, sino un cierto expectativa teribel di huicio.” (Hebreonan 10:26, 27) Tin hende a comete picanan pa cua no tin pordon. Nan no ta den Hades  (e graf comun di humanidad) sino den Gehena, un luga simbolico di destruccion eterno. (Mateo 23:33, NW) Pero nos tin cu tene cuidou pa nos no cuminsa specula si un cierto persona lo ser resusita of no. Ta Dios lo husga esaki. E sa ken ta den Hades y ken ta den Gehena. Di nos parti, lo ta bon pa nos hiba nos bida segun e boluntad di Dios.

Ken Lo Ser Resusita pa Biba den Shelo?

E resureccion di mas remarcabel tawata esun di Hesucristo. El a ser “mata den e carni, ma haci bibo den e spirito.” (1 Pedro 3:18) Ningun hende prome cu ne no a yega di haya un resureccion asina. Hesus mes a bisa: “Ni un hende no a subi na shelo, sino esun cu a baha for di shelo, esta, e Yiu di hende.” (Huan 3:13) Si, e Yiu di hende tawata e prome cu a ser lanta como un persona spiritual. (Echonan 26:23, BPK) Anto tawatin mas hende pa haya un resureccion asina. E Scritura ta bisa: “Cada un segun su mes orden: Cristo e prome fruta, despues di esei, esnan cu ta di Cristo na su binida.”—1 Corintionan 15:23.

Un grupo chikito di persona—“esnan cu ta di Cristo”—lo ser resusita pa bida celestial pa un proposito special. (Romanonan 6:5) Nan lo ‘reina cu Cristo riba tera.’ (Revelacion 5:9, 10) Ademas, nan lo sirbi como sacerdote den e sentido cu nan lo yuda elimina e efectonan di pica cu humanidad a hereda for di e prome homber, Adam. (Romanonan 5:12) Esnan cu ta goberna hunto cu Cristo como rei y sacerdote ta un total di 144.000 persona. (Revelacion 14:1, 3) Ki tipo di curpa nan lo haya ora nan ser resusita? Bijbel ta bisa “un curpa spiritual.” Esaki ta haci posibel cu nan por biba den shelo.—1 Corintionan 15:35, 38, 42-45.

Ki tempo e resureccion celestial ta tuma luga? Prome Corintionan 15:23 [NW] ta contesta cu ta ‘durante Cristo su presencia.’ Susesonan mundial for di aña 1914 ta mustra bon cla cu tanto Cristo su presencia como “e fin di tempo” a cuminsa e aña ei. (Mateo 24:3-7) Pues nos tin motibo pa conclui cu e resureccion di cristiannan fiel pa bida celestial a cuminsa caba, pero claro cu hende no por a mira esei tuma luga. Esaki ta nifica cu e apostelnan y e cristiannan di prome ya a ser lanta pa bida celestial. Kico di cristiannan cu ta biba awe y cu tin e speransa sigur, duna door di Dios, di reina cu Cristo den shelo? Nan ta ser lanta “den un frega di wowo”, es decir, asina cu nan muri. (1 Corintionan 15:52) Siendo cu resureccion di e grupo chikito aki di 144.000 persona ta prome cu esun di e cantidad grandi di hendenan cu lo ser resusita pa biba riba tera, e ta ser yama “e resureccion mas tempran”, y “e prome resureccion.”—Filipensenan 3:11, NW; Revelacion 20:6.

Ken Lo Ser Resusita pa Biba Riba Tera?

Segun e Scritura, e gran mayoria di mortonan lo ser lanta bek pa biba riba tera. (Salmo 37:29; Mateo 6:10) Apostel Huan a describi un vision magnifico cu el a haya relaciona cu esnan cu lo ser resusita. El a skirbi: “Lama a entrega e mortonan cu tawata den dje, y morto y Hades a entrega e mortonan cu tawata den nan; y nan a wordo husga, cada un di nan segun nan obranan. Y morto y Hades a wordo tira den e lago di candela. Esaki ta e di dos morto, e lago di candela.” (Revelacion 20:11-14) E mortonan den Hades, of Seol—e graf comun di humanidad—ta den Dios su memoria. Delaster un di nan lo ser libra for di e gara di morto. (Salmo 16:10; Echonan 2:31) Anto cada un di nan lo ser husga a base di nan comportacion despues di nan resureccion. Kico lo pasa e ora ei cu morto y Hades? Nan lo ser tira den “e lago di candela.” Esaki ta nifica cu nunca mas hende lo muri debi na e pica cu nan a hereda di Adam.

 Pensa un rato ki un speransa felis e promesa di resureccion ta duna esnan cu a perde un ser keri! Ora Hesus a resusita e unico yiu di e biuda di Nain, ki un goso e mama lo mester a sinti! (Lucas 7:11-17) Y relaciona cu e mayornan di un mucha di 12 aña cu Hesus a resusita, Bijbel ta bisa: “Umbes nan tawata for di nan mes di gran excitacion.” (Marco 5:21-24, 35-42, NW; Lucas 8:40-42, 49-56) Den Dios su mundo nobo priminti, lo ta un goso di por ricibi sernan keri bek.

Ki impacto e echo cu nos sa e berdad tocante resureccion por tin riba nos awor? The World Book Encyclopedia ta bisa: “Mayoria hende tin miedo di morto y ta purba evita di pensa riba dje.” Dicon? Pasobra pa mayoria hende, morto ta un misterio, un cos desconoci cu nan tin miedo di dje. Pero e echo cu nos sa e berdad tocante e condicion di e mortonan y nos tin e speransa di resureccion, por duna nos curashi si nos haya nos confronta cu ‘e delaster enemigo, morto.’ (1 Corintionan 15:26) Tambe e conocemento aki ta yuda nos soporta e dolor cu nos ta sinti ora un amigo intimo of un miembro di famia muri.

Ki tempo e resureccion riba tera lo cuminsa? Awe e tera ta yen di violencia, conflicto, dramamento di sanger y contaminacion. Si e mortonan mester resusita riba un mundo yen di e cosnan aki, nan felicidad sigur lo ta di corto duracion. Sinembargo, e Creador a priminti cu pronto lo e trece un fin na e mundo actual cu ta bou di control di Satanas. (Proverbionan 2:21, 22; Daniel 2:44; 1 Huan 5:19) Dios su proposito pa e tera ta serca di cumpli. Anto e ora ei, den Dios su mundo nobo di pas, miles di miyones di hende cu awor ta drumi den morto lo habri nan wowo.

[Plachi na pagina 7]

Mayoria di e mortonan lo ser resusita pa biba riba tera