Morto​—Un Realidad Teribel!

E HISTORIADO Britanico Arnold Toynbee a skirbi: “For di momento cu un hende nace e posibilidad t’ei constantemente cu e por muri un ora pa otro. Anto inevitablemente e posibilidad aki ta bai bira un realidad.” Ki un tristesa morto ta causa nos ora cu un miembro di famia stima of un amigo intimo muri!

Pa miles di aña caba morto ta un realidad teribel pa humanidad. Nos ta sinti nos completamente impotente ora cu un ser keri muri. E tristesa aki ta asota hende sin haci distincion di persona. Ni un hende no ta scapa di morto. Un escritor di siglo 19 a skirbi: “Tristesa ta haci nos tur mucha atrobe; e ta destrui tur diferencia cu tin den intelecto. Esnan di mas sabi no sa nada.” Nos ta bira manera mucha chikito, impotente, sin cu nos por cambia e situacion. Rikesa ni poder no por anula e perdida. E hendenan sabi y intelectual no tin contesta. Esnan fuerte ta yora mescos cu esnan debil.

Rei David di Israel di antiguedad a experencia e tipo di angustia aki ora cu su yiu homber Absalon a muri. Ora David a haya e noticia di morto, el a cuminsa yora y sclama: “O mi yiu Absalon, mi yiu, mi yiu Absalon! Mihor ta ami a muri na bo luga, o Absalon, mi yiu, mi yiu!” (2 Samuel 18:33) Figura bo, unico cos cu un rei poderoso cu a domina enemigonan potente por a haci tawata di desea cu mihor ‘morto, e delaster enemigo’, a mata e na luga di su yiu.—1 Corintionan 15:26.

Tin un solucion pa morto? Si ta asina, ki speransa tin pa e mortonan? Nos lo mira nos sernan keri algun dia bek? E siguiente articulo ta duna contestanan biblico riba e preguntanan aki.