E Palabra di Yehova Ta Bibo

Puntonan Sobresaliente di e Buki di Job

E PATRIARCA Job tawata biba na e tera di Uz, cu awe ta keda na Arabia. Un cantidad grandi di Israelita tawata biba na Egipto e tempo ei. Aunke Job mes no tawata un Israelita, e tawata un adorado di Yehova Dios. Bijbel ta bisa di dje: “No tin ningun hende manera e riba tera, un hende perfecto [“di conducta ireprochabel”, BPK] y recto, cu ta teme Dios y cu ta aparta su mes for di maldad.” (Job 1:8) Esaki mester tawata e periodo despues di Yosef (of Hose, yiu di Yacob) y prome cu profeta Moises, dos sirbido sobresaliente di Yehova.

Moises, esun cu supuestamente a skirbi e buki di Job, probablemente a tende tocante Job tempo cu el a biba 40 aña na Madian, cu a keda pega cu e tera di Uz. Tocante e ultimo añanan di Job, Moises lo por a tende di esei ora cu e Israelitanan tawata pega cu Uz, casi na final di nan estadia di 40 aña den desierto. * E experencia di Job ta skirbi cu palabranan asina bunita cu e ta ser considera como un obra maestra literario. Sinembargo mas cu esei, e ta contesta preguntanan manera: Dicon bon hende ta sufri? Dicon Yehova ta permiti maldad? Hende imperfecto por mantene nan integridad na Dios? Como parti di e Palabra inspira di Dios, e mensahe di e buki di Job ta bibo y ta eherce poder te awe.—Hebreonan 4:12.

“LAGA E DIA RIBA CUAL MI A NACE PERECE”

(Job 1:1–3:26)

Un dia Satanas ta cuestiona dilanti di Dios e integridad di Job. Yehova ta acepta e desafio y ta permiti Satanas trece un serie di calamidad riba Job. Pero Job ta nenga di “maldiciona Dios.”—Job 2:9.

Tres compañero di Job ta bin pa “consol’e.” (Job 2:11) Nan ta sinta hunto cu ne sin papia ni un pia di palabra te ora cu Job mes ta kibra e silencio bisando: “Laga e dia riba cual mi a nace perece.” (Job 3:3) E ta desea di ta “manera yiuchi cu nunca a mira lus”, es decir, manera yiu cu a nace morto.—Job 3:11, 16.

Contesta Riba Pregunta Biblico:

1:4—Job su yiunan tawata celebra hacimento di aña? No. Na e idioma original e palabra pa “dia” y esun pa “hacimento di aña” ta distinto, y cada un tin su propio nificacion. (Genesis 40:20) Job 1:4 ta uza e palabra “dia”, indicando un periodo di tempo di ora solo sali te ora solo baha. E shete yiu hombernan di Job aparentemente tawata tene un biaha pa aña un fiesta di famia di shete dia. Cada yiu, “riba su dia”, tawata anfitrion di e bankete cu a ser teni na su cas.

1:6; 2:1—Ken tawatin mag di presenta dilanti di Yehova? Entre esnan cu a presenta dilanti di Yehova tawatin Dios su Yiu unigenito, e Palabra; e angelnan fiel; y e ‘yiunan di Dios’ angelical desobediente, incluso Satanas e Diabel. (Huan 1:1, 18) Ta te poco despues di aña 1914 numa Satanas y su demoñonan a ser saca for di shelo, despues cu e Reino di Dios a keda estableci. (Revelacion 12:1-12) Yehova a permiti nan presenta dilanti dje y asina a pone dilanti di tur criatura spiritual e desafio di Satanas y e cuestionnan cu esei a lanta.

1:7; 2:2—Yehova a papia directamente cu Satanas?  Bijbel no ta duna masha detaye di e manera cu Yehova ta comunica cu criaturanan spiritual. Sinembargo, profeta Micaias tawatin un vision den cua el a mira un angel comunica directamente cu Yehova. (1 Reinan 22:14, 19-23) Pesei ta parce cu Yehova a papia cu Satanas sin uza un mediado.

1:21—Den ki manera Job lo por a bolbe na ‘bariga di su mama’? Siendo cu Yehova Dios a forma hende for “di e stof di tera”, e expresion “mama” ta ser uza aki figurativamente pa referi na tera.—Genesis 2:7.

2:9—Den ki estado mental e esposa di Job lo tawata ora cu el a bisa su esposo pa maldiciona Dios y muri? Job su esposa a sufri e mesun perdidanan cu su esposo. Lo mester tawata hopi doloroso p’e pa mira su esposo, cu antes tawata asina activo, sufriendo di un malesa repugnante. E esposa a perde su yiunan stima. Lo e por tawata asina angustia debi na tur esaki cu el a perde for di bista loke tawata realmente importante, esta nan relacion cu Dios.

Les pa Nos:

1:8-11; 2:3-5. Manera a keda demostra den e caso di Job, integridad ta rekeri fuera di accion y abla corecto, e motivacion corecto pa sirbi Yehova.

1:21, 22. Door di keda fiel na Yehova tanto bou di circunstancianan faborabel como desfaborabel, nos ta duna prueba cu Satanas ta un mentiroso.—Proverbionan 27:11.

2:9, 10. Mescos cu Job, nos mester keda firme den fe asta si miembronan di famia no ta balora nos actividadnan spiritual of ta presiona nos pa compromete of renuncia nos fe.

2:13. E compañeronan di Job no tawatin nada consolador di bisa tocante Dios y su promesanan pasobra nan no tawata mira cos for di Dios su punto di bista.

“LO MI NO BANDONA MI INTEGRIDAD”!

(Job 4:1–31:40)

E punto basico cu e tres compañeronan di Job ta enfatisa den nan discursonan ta cu Job mester a haci algo hopi malo pa ricibi un castigo asina pisa for di Dios. Elifaz ta duna e prome discurso. Bildad ta sigui Elifaz, uzando un lenguahe mas sarcastico. Esun di Zofar ta asta mas pica ainda.

Job no ta acepta e rasonamento falso di su bishitantenan. Como cu e no por compronde dicon Dios a permiti su sufrimento, e ta bira demasiado interesa den hustifica su mes. Pero asina mes, Job ta stima Dios y ta declara: “Te na mi morto lo mi no bandona mi integridad”!—Job 27:5.

Contesta Riba Pregunta Biblico:

7:1, NW; 14:14, NW—Kico Job kiermen cu “trabou obligatorio” of “sirbishi obligatorio”? Job su sufrimento tawata asina severo cu el a mira bida como un trabou obliga, pisa y agotador. Na Job 10:17 por traduci “dificultad tras dificultad” tambe como “un tanda di trabou obligatorio tras di otro.” Ya cu e tempo cu un hende ta pasa den Seol—for di ora e muri te na su resureccion—ta un periodo obliga, Job a compara esei tambe como sirbishi obligatorio.

7:9, 10; 10:21; 16:22—E declaracionnan aki ta indica cu Job no a kere den resureccion? Esakinan ta comentario relaciona cu Job su futuro inmediato. Pues, kico e tawata kiermen? Un posibilidad ta cu si e mester muri, ningun di su contemporaneonan lo a mir’e mas. Tambe Job lo por tawata kiermen cu ningun hende no por bin bek for di Seol riba su mes. For di Job 14:13-15 ta bisto cu Job tawatin speransa den un futuro resureccion.

10:10—Den ki sentido Yehova a ‘basha Job manera lechi, y lag’e cuaha manera keshi’? Esaki ta un descripcion poetico di e manera cu Job a ser forma den bariga di su mama.

19:20, NW—Kico Job tawata kiermen cu e expresion “mi ta scapa cu e cuero di mi djente”? Door di bisa cu el a scapa cu e cuero di algo cu aparentemente no tin cuero, Job lo tawata kiermen cu el a scapa cu casi nada.

 Les pa Nos:

4:7, 8; 8:5, 6; 11:13-15. Nos no mester ta mucho lihe pa asumi cu un persona den problema, ta cosechando loke el a sembra y no tin e aprobacion di Dios.

4:18, 19; 22:2, 3. Nos conseho mester ta basa riba e Palabra di Dios, no riba opinion personal.—2 Timoteo 3:16.

10:1. Amargura a ciega Job di manera cu e no a considera otro posibel motibonan pa su sufrimento. Nos no mester bira amarga ora nos ta sufri, specialmente door cu nos ta compronde bon cla kico ta e cuestionnan envolvi.

14:7, 13-15; 19:25; 33:24. Durante cualkier prueba cu Satanas por trece riba nos, e speransa di resureccion por sostene nos.

16:5; 19:2. Nos palabranan mester anima y fortalece otro hende, no irita nan.—Proverbionan 18:21.

22:5-7. Conseho duna a base di acusacionnan pa cua no tin evidencia solido, no tin ningun balor y ta perhudicial.

27:2; 30:20, 21. Pa mantene integridad un hende no mester ta perfecto. Job a critica Dios ekibocadamente.

27:5. Job no a bisa: ‘Lo mi no laga boso kibra mi integridad!’ E tawata sa cu su integridad a depende di dje y di su amor pa Yehova. Pesei nos mester cultiva un amor fuerte pa Yehova pa nos por mantene nos integridad.

28:1-28. Hende sa unda e tesoronan di e tera ta. Segun cu e ta busca nan, su ingeniosidad ta hib’e na camindanan bou di tera cu ningun parha di rapiña cu bon bista pa wak leu no por mira. Pero sabiduria divino ta bin di teme Yehova.

29:12-15. Di buena gana nos mester mustra bondad amoroso na hende den necesidad.

31:1, 9-28. Job ta un bon ehempel pa nos door cu el a evita flirtmento, adulterio, tratamento di hende na un manera inhusto y sin misericordia, materialismo y idolatria.

MI “TA REPENTI DEN STOF Y SHINISHI”

(Job 32:1–42:17)

Un observado hoben cu yama Eliu, cu pasenshi a sinta scucha e debate. Awor e ta expresa su mes cu curashi. E ta corigi Job y e tresnan cu a torment’e.

Asina cu Eliu a caba di papia, Yehova ta contesta for di un warwaru. E no ta duna splicacion pa Job su sufrimento. Pero door di plantia un serie di pregunta, e Todopoderoso ta haci Job conciente di Su poder impresionante y Su gran sabiduria. Job ta admiti cu el a papia sin comprondemento y ta bisa: “Mi ta hala mi palabranan atras, y ta repenti den stof y shinishi.” (Job 42:6) Segun cu Job su pruebanan ta termina, su integridad ta ser recompensa.

Contesta Riba Pregunta Biblico:

32:1-3—Ki ora Eliu a yega? Ya cu Eliu a tende tur e discursonan, lo e mester a bin sinta den bicindario, caminda e por a scucha e combersacionnan, un poco prome cu Job a cuminsa papia y asina a pone fin na e silencio di shete dia di su tres compañeronan.—Job 3:1, 2.

34:7—Den ki sentido Job tawata manera un homber cu “ta bebe menosprecio manera awa”? Den su condicion angustia, Job tawata inclina na tuma e bofon di su tres bishitantenan como si fuera nan a dirigi e palabranan ei na dje, aunke en realidad ta contra Dios nan tawata papia. (Job 42:7) Pues, e tawata bebe menosprecio mescos cu un hende ta bebe awa cu smak.

 Les pa Nos:

32:8, 9. Djis pasobra un persona ta mas bieu no kiermen cu e ta sabi. Sabiduria ta rekeri comprondemento di e Palabra di Dios y guia di su spirito santo.

34:36. Integridad por ser demostra solamente si den un manera of otro nos ser “proba te na extremo.”

35:2. Eliu a scucha cuidadosamente y a determina spesificamente e berdadero cuestion prome cu el a papia. (Job 10:7; 16:7; 34:5) Prome cu ancianonan cristian duna conseho, nan tin cu scucha cuidadosamente, pone nan mes na haltura di e detayenan, y compronde bon cla e cuestionnan cu ta al caso.—Proverbionan 18:13.

37:14; 38:1–39:30. Meditando riba Yehova su obranan maraviyoso—cuanan ta un expresion di su poder y sabiduria—ta haci nos humilde y ta yuda nos mira cu e vindicacion di su soberania ta mas importante cu cualkier un di nos interesnan personal.—Mateo 6:9, 10.

40:1-4. Ora nos ta sinti nos inclina pa keha contra e Todopoderoso, nos mester ‘pone nos man riba nos boca.’

40:15–41:34. Ki un poder Behemot (e hipopotamo) y Leviatan (e crocodil) tin! Pa persevera den Dios su sirbishi, nos tambe tin mester di forsa for di e Creador di e bestianan poderoso aki. E ta duna nos e fortalesa ei.—Filipensenan 4:13, NW.

42:1-6. Ora Job a tende e palabra di Yehova y a ser recorda di e manifestacionnan di su poder, esei a yud’e “mira Dios”, es decir, mira e berdad tocante Dios. (Job 19:26) Esaki a ahusta su manera di pensa. Ora nos ser corigi for di Bijbel, nos mester ta cla pa reconoce nos eror y haci ahuste.

Cultiva “e Perseverancia di Job”

E buki di Job ta mustra bon cla cu Dios no ta responsabel pa sufrimento humano. Ta Satanas ta responsabel. E echo cu Dios a permiti maldad riba tera ta duna nos e oportunidad di mustra personalmente unda nos ta para relaciona cu e cuestion di Yehova su soberania y e cuestion di nos integridad.

Mescos cu Job, tur hende cu ta stima Yehova lo ser poni na prueba. E relato di Job ta duna nos e confiansa cu nos por persevera. E ta recorda nos cu nos problemanan lo no dura pa semper. Santiago 5:11 ta bisa: “Boso a tende di e perseverancia di Job y a mira e fin cu Señor tawatin na bista.” Yehova a recompensa Job pasobra el a mantene su integridad. (Job 42:10-17) Ki un speransa magnifico tin nos dilanti, esta bida eterno den Paradijs riba tera! Pesei, mescos cu Job, laga nos ta determina pa mantene nos integridad.—Hebreonan 11:6.

[Nota]

[Plachi na pagina 16]

Kico nos por siña di “e perseverancia di Job”?