“Un Drama Simbolico” Cu Ta di Balor pa Nos

KI DIFICIL lo tawata pa compronde e pleno nificacion di cierto relatonan biblico si otro partinan di Bijbel no a clarifica nan pa nos! Nos por acepta relatonan historico den e Palabra di Dios manera nan ta. Pero algun di nan ta contene berdadnan mas profundo cu no ta bisto mesora. Un ehempel ta e relato di dos mohe den e cas di patriarca Abraham. Apostel Pablo a yama e relato “un drama simbolico.”—Galationan 4:24, NW.

E drama aki ta merece nos atencion pasobra e realidadnan cu e ta representa ta di importancia fundamental pa tur hende cu ta desea di haya e bendicion di Yehova Dios. Prome cu nos bai analisa dicon ta asina, laga nos considera e circunstancianan cu a motiva Pablo pa revela e nificacion di e drama.

Tawatin un problema entre e cristiannan di prome siglo na Galacia. Algun di nan tawata masha stricto den “warda dianan y lunanan y temporadanan y añanan”, cosnan cu e Lei di Moises a manda. E personanan aki tawata pretende cu creyentenan mester a obedece e Lei pa nan tin Dios su aprobacion. (Galationan 4:10; 5:2, 3) Sinembargo, Pablo tawata sa cu tal practicanan no tawata necesario pa cristiannan. Pa proba esaki, el a referi na un relato conoci pa tur hende di antecedente Hudiu.

Pablo a recorda e Galationan cu Abraham, tata di e nacion Hudiu, a procrea Ismael y Isaak. El a haya Ismael cu e señora esclabo Agar, y Isaak el a haya cu e señora liber Sara. E cristiannan na Galacia cu tawata promove obediencia na e Lei di Moises, sin duda tawata conoce e relato con Sara na prome instante tawata steril y cu el a duna su cria Agar na Abraham pa e haya un yiu na luga di Sara. Tambe nan lo tawata sa cu unabes Agar a sali na estado di Ismael, el a cuminsa desprecia su shon, Sara. Pero, manera Dios a priminti, Sara finalmente  a duna lus na Isaak den su biehes. Mas despues, Abraham a manda Agar cu Ismael bai pasobra Ismael a maltrata Isaak.—Genesis 16:1-4; 17:15-17; 21:1-14; Galationan 4:22, 23.

Dos Hende Mohe, Dos Aliansa

Pablo a duna splicacion di e personahenan di e “drama simbolico” aki. El a skirbi: “E mohenan aki ta dos aliansa, un procedente di Sero Sinai, cu ta haya yiu pa sclabitud; esaki ta Agar. . . . Y ta coresponde na e Herusalem djawo, pasobra e ta den sclabitud cu su yiunan.” (Galationan 4:24, 25) Agar a representa Israel literal, cu tawatin Herusalem como su capital. E nacion Hudiu tawata mara na Yehova pa medio di e pacto of aliansa di Lei cu a ser inaugura na Sero Sinai. Bou di e aliansa di Lei, e Israelitanan constantemente a ser recorda cu nan tawata catibo di pica y tawatin mester di redencion.—Yeremias 31:31, 32; Romanonan 7:14-24.

Ta ken “e mohe liber” Sara cu su yiu homber, Isaak, a representa anto? Pablo a indica cu Sara, e “mohe steril”, a simbolisa Dios su esposa, esta, e parti celestial di Dios su organisacion. E mohe celestial aki tawata steril den e sentido cu prome cu Hesus a bin na mundo e no tawatin “yiunan” ungi pa spirito santo riba tera. (Galationan 4:27; Isaias 54:1-6) Sinembargo, na Pentecoste di aña 33 di nos era, spirito santo a ser drama riba un grupo di hende homber y mohe kendenan di e manera ei a nace di nobo como yiunan di e mohe celestial aki. Dios a adopta e yiunan cu e organisacion aki a produci como su yiunan y nan a bira coheredero cu Hesucristo bou di un aliansa nobo. (Romanonan 8:15-17) Apostel Pablo, siendo un di e yiunan aki, por a skirbi: “E Herusalem djariba ta liber; e ta nos mama.”—Galationan 4:26.

Yiunan di e Dos Hende Mohenan

Segun e relato biblico, Ismael a persigui Isaak. Den mesun manera, durante e prome siglo di nos era, e yiunan di Herusalem esclabisa a haci bofon di e yiunan di Herusalem djariba y a persigui nan. Pablo a splica: “Mescos cu den e temponan aya esun cu a nace segun carni [Ismael] a persigui esun cu a nace segun spirito [Isaak], asina ta awor tambe.” (Galationan 4:29) Ora cu Hesucristo a presenta riba tera y a cuminsa anuncia e Reino, e lidernan religioso Hudiu a comporta nan mes mescos cu Agar su yiu homber Ismael a  comporta su mes pa cu Isaak, e berdadero heredero di Abraham. Nan a haci bofon di Hesucristo y a persigui e, evidentemente pasobra nan a considera nan mes como e heredero legitimo di Abraham y Hesus nan a mira como e intruso.

Poco prome cu e gobernantenan di Israel natural a laga mata Hesus, el a bisa: “Herusalem, Herusalem, abo cu ta mata e profetanan y ta piedra esnan cu ta wordo manda serca dje! Cuanto biaha mi no tawata kier a hunta bo yiunan, manera un galiña ta hunta su puyitonan bou di su halanan, y boso no tawata kier. Mira, boso cas ta keda desola pa boso!”—Mateo 23:37, 38.

E registro inspira di susesonan cu a tuma luga den prome siglo ta mustra cu e nacion carnal representa door di Agar no a produci automaticamente yiunan cu lo tawata coheredero cu Hesus. Yehova a rechasa of core cu e Hudiunan cu orguyosamente a kere cu nan tawatin derecho riba e herencia ei djis pasobra nan a nace den e nacion. Claro cu algun Israelita natural individual si a bira coheredero cu Cristo. Sinembargo, nan a haya e privilegio ei a base di nan fe den Hesus y no djis debi na nan desendencia carnal.

E identidad di un cantidad di e coherederonan aki cu Cristo a bira bisto na Pentecoste di aña 33. Segun cu tempo a pasa, Yehova a ungi mas hende como yiunan di Herusalem djariba.

Pablo a splica e “drama simbolico” aki pa ilustra e superioridad di e aliansa nobo riba e aliansa di Lei di cua Moises tawata e mediado. Ningun hende no por a haya Dios su aprobacion door di haci e obranan di e Lei di Moises, pasobra tur hende ta imperfecto y e Lei simplemente a enfatisa nan sclabitud na pica. Sinembargo, manera Pablo a splica, Hesus a bin pa asina “e por a redimi [of, libra] esnan cu tawata bou di Lei.” (Galationan 4:4, 5) Pues, fe den e balor di Cristo su sacrificio a hiba na libertad for di e Lei di condenacion.—Galationan 5:1-6.

E Drama Su Balor pa Nos

Pakico nos lo mester ta interesa den Pablo su splicacion inspira di e drama aki? Un motibo ta cu e ta duna nos un comprondemento mas penetrante di nificacion di cosnan biblico cu di otro manera lo a keda vago. E splicacion ta fortalece nos confiansa den e unidad y harmonia di Bijbel.—1 Tesalonicensenan 2:13.

Ademas, e realidadnan simbolisa den e drama aki ta esencial pa nos felicidad den futuro. Si no tawata pa e aparicion di e yiunan di Herusalem djariba, nos unico speransa lo tawata sclabitud na pica y morto. Sinembargo, bou di e supervision amoroso di Cristo y di su coherederonan di e promesa cu Dios a haci na Abraham, “tur e nacionnan di e tera lo ta bendiciona.” (Genesis 22:18) Esaki lo sosode ora cu nan ser libra pa semper di e efectonan di pica, imperfeccion, tristesa y morto. (Isaias 25:8, 9) Ki un tempo glorioso esei lo ta!

[Plachi na pagina 11]

E aliansa di Lei a ser inaugura na Sero Sinai

[Reconocemento]

Pictorial Archive (Near Eastern History) Est.

[Plachi na pagina 12]

Kico ta e nificacion di e “drama simbolico” cu apostel Pablo a menciona?