‘Bai y Haci Disipel, y Batisa Nan’

“Bai y haci tur e nacionnan disipel di mi, y batisa nan ..., y siña nan pa cumpli cu tur loke mi a ordena boso.” —MATEO 28:19, 20.

1. Ki decision e nacion di Israel a tuma na pia di Sero Sinai?

ROND di 3.500 aña pasa, henter un nacion a haci un promesa solem na Dios. Para na pia di Sero Sinai, e Israelitanan a declara publicamente: ‘Tur loke Yehova a bisa, nos lo haci!’ For di e momento ei en adelante, Israel a bira un pueblo dedica na Dios, su “tesoro peculiar”, es decir, su propiedad special. (Exodo 19:5, 8; 24:3) Cu gran anticipacion nan a spera di haya Dios su proteccion y di biba pa generacion tras di generacion den un tera cu “tin lechi y miel na abundancia.”—Levitico 20:24.

2. Ki relacion cu Dios hende por tin awe?

² Sinembargo, manera salmista Asaf a reconoce, e Israelitanan “no a warda e aliansa di Dios, y a nenga di cana den su lei.” (Salmo 78:10) Nan no a cumpli cu e promesa solem cu nan antepasadonan a haci na Yehova. Cu tempo, e nacion a perde e relacion unico ei cu nan tawatin cu Dios. (Eclesiastes 5:4; Mateo 23:37, 38) Pesei Dios “a dirigi su atencion na e nacionnan pa e saca for di nan un pueblo pa su nomber.” (Echonan 15:14, NW) Anto den e ultimo dianan aki, e ta reuniendo hunto “un multitud grandi cu ningun hende no por . . . conta, di tur nacion y tur tribu y pueblo y lenga.” Yen di goso e multitud ei ta reconoce: “Salbacion ta di nos Dios, kende ta sinta riba e trono, y di e Lamchi.”—Revelacion 7:9, 10.

3. Ki pasonan un hende mester dal pa e por tin un relacion personal cu Dios?

³ Pa un hende por ta entre esnan cu tin e relacion precioso ei cu Dios, e mester haci un dedicacion na Yehova y simbolisa esei publicamente door di batisa den awa. Haciendo esaki e ta obedece e mandamento cu Hesus personalmente a duna su disipelnan: “Bai y haci tur e nacionnan disipel di mi, y batisa nan den nomber di e Tata y di e Yiu y di e spirito santo, y siña nan pa cumpli cu tur loke mi a ordena boso.” (Mateo 28:19, 20) E Israelitanan a  scucha Moises ora cu el a lesa “e buki di aliansa.” (Exodo 24:3, 7, 8) Pues, nan tawata na haltura di nan obligacionnan pa cu Yehova. Awe ta mescos, prome cu un hende dal e paso di bautismo ta esencial pa e tin un conocemento exacto di e boluntad di Dios manera nos ta hay’e den su Palabra, Bijbel.

4. Kico un hende mester haci pa e cualifica pa bautismo? (Inclui e cuadro ariba.)

⁴ Ta bisto cu Hesus tawata kier pa su disipelnan tin un fundeshi solido pa nan fe prome cu nan a batisa. El a instrui su siguidonan no solamente pa bai y haci disipel sino tambe pa ‘siña nan cumpli cu tur loke el a ordena.’ (Mateo 7:24, 25; Efesionan 3:17-19) Pesei, personanan cu ta cualifica pa bautismo por lo general a studia Bijbel pa lunanan of asta un of dos aña, di manera cu nan decision no ta uno tuma lihe ni sin cu nan ta bon informa. Na e ocasion di bautismo mes, esnan cu ta bai batisa ta contesta “si” riba dos pregunta fundamental. Siendo cu Hesus a enfatisa cu ‘nos Si mester ta Si, nos No, No’, lo ta bon pa nos tur pa repasa cuidadosamente kico e dos preguntanan aki di bautismo ta nifica.—Mateo 5:37.

Arepentimento y Dedicacion

5. Cua dos paso fundamental e prome pregunta di bautismo ta enfatisa?

⁵ E prome pregunta di bautismo ta puntra e candidato si el a arepenti di su manera di biba anterior y a dedica su bida na Yehova pa haci su boluntad. E pregunta aki ta enfatisa dos paso sumamente importante cu un persona mester dal prome cu bautismo, esta, arepentimento y dedicacion.

6, 7. (a) Dicon arepentimento ta necesario pa tur candidato pa bautismo? (b) Ki cambionan un hende mester haci despues cu el a arepenti?

⁶ Dicon un persona mester arepenti prome cu e batisa? Apostel Pablo ta splica: “Nos tur tambe tawata biba antes . . . den e pasionnan di nos carni.” (Efesionan 2:3) Prome cu nos a haya un conocemento exacto di e boluntad di Dios, nos tawata biba na harmonia cu mundo, segun e norma- y balornan di mundo. Nos manera di biba tawata controla pa e dios di e mundo aki, Satanas. (2 Corintionan 4:4) Sinembargo, despues cu nos a siña e boluntad di Dios, nos a tuma e decision firme cu nos ‘no ta biba mas conforme e pasionnan di hende, sino conforme e boluntad di Dios.’—1 Pedro 4:2.

⁷ E manera nobo di biba aki ta trece hopi beneficio. Riba tur cos, e ta habri caminda pa nos por tin un relacion precioso cu Yehova, locual David a compara cu un invitacion pa ta den Dios su “tabernakel” y riba su “sero santo.” Esaki en berdad ta un privilegio grandi. (Salmo 15:1) Yehova logicamente lo no a invita ken cu ta, sino solamente esnan “cu ta cana den rectitud y ta haci husticia, y ta papia berdad den [nan] curason.” (Salmo 15:2) Dependiendo di nos circunstancia prome cu nos a siña e berdad, kisas nos lo tin cu haci cierto cambionan pa nos por actua di acuerdo cu e rekisitonan den e texto biblico aki. E cambionan  aki lo por ta tanto den nos conducta como den nos personalidad. (1 Corintionan 6:9-11; Colosensenan 3:5-10) Loke ta motiva nos pa haci e cambionan ei ta arepentimento, es decir, un duele profundo pa e manera cu nos tawata biba na antes y un determinacion firme pa agrada Yehova. Esaki ta hiba na un cambio completo, nos ta comberti, kiermen, nos ta bandona un estilo di bida egoista y mundano, y ta sigui un rumbo cu ta agrada Dios.—Echonan 3:19.

8. Con nos ta haci nos dedicacion, y ki conexion e tin cu bautismo?

⁸ E di dos parti di e prome pregunta di bautismo ta puntra e candidatonan si nan a dedica nan mes na Yehova pa haci su boluntad. Dedicacion ta un paso esencial cu mester tuma luga prome cu bautismo. Nos ta hacie den un oracion caminda nos ta expresa e deseo sinsero di entrega of dedica nos bida na Yehova mediante Cristo. (Romanonan 14:7, 8; 2 Corintionan 5:15) Yehova ta bira e ora ei nos Shon y Doño, y mescos cu den caso di Hesus, pa nos ta un delicia pa haci Dios su boluntad. (Salmo 40:8; Efesionan 6:6) Ta un biaha so nos ta haci e promesa solem aki na Yehova. Sinembargo, como cu nos ta haci nos dedicacion den priva, riba e dia di bautismo nos ta haci un declaracion publico ora nos contesta e preguntanan di bautismo. Asina nos ta laga tur hende sa cu nos a haci e dedicacion solem aki na nos Tata celestial.—Romanonan 10:10.

9, 10. (a) Hacimento di Dios su boluntad ta encera kico? (b) Con asta funcionarionan nazi a reconoce nos dedicacion?

⁹ Sigui Hesus su ehempel den hacimento di Dios su boluntad ta encera kico? Hesus a bisa su disipelnan: “Si un hende kier bin mi tras, lag’e nenga su mes y tuma su staca di tormento y sigui mi continuamente.” (Mateo 16:24, NW) Aki Hesus a spesifica tres cos cu nos tin cu haci. Prome, nos tin cu “nenga” nos mes. Cu otro palabra, nos ta rechasa of bisa no na nos inclinacionnan egoista y imperfecto y ta obedece Dios su conseho y instruccion. Di dos, nos tin cu ‘tuma nos staca di tormento.’ Den tempo di Hesus, un staca di tormento tawata un simbolo di berguensa y sufrimento. Como cristian, nos ta acepta e echo cu tin biaha nos tin cu sufri pa motibo di e bon nobo. (2 Timoteo 1:8) Mescos cu Cristo, nos no ta “haci caso di berguensa”, aunke mundo kisas ta haci bofon di nos of ta reprocha nos. Nos ta keda felis di sa cu nos ta agrada Dios. (Hebreonan 12:2) Por ultimo, nos ta sigui Hesus “continuamente.”—Salmo 73:26; 119:44; 145:2.

¹⁰ Un punto interesante ta cu asta algun opositor ta reconoce e dedicacion cu Testigonan di Yehova a haci na Dios pa sirbie exclusivamente. Por ehempel, na e campo di consentracion di Buchenwald den tempo di Alemania nazi, Testigonan cu a nenga di renuncia nan fe mester a firma e siguiente declaracion imprimi: “Ainda mi ta un fiel Studiante di Bijbel y nunca lo mi no kibra e huramento cu mi a haci na Yehova.” Esaki sigur ta expresa bon cla e actitud di tur fiel sirbido dedica di Dios!—Echonan 5:32.

Identifica Como un Testigo di Yehova

11. Ki privilegio e persona cu batisa ta haya?

¹¹ E di dos pregunta di bautismo ta puntra e candidato, na prome luga, si e ta compronde  cu su bautismo ta sirbi pa identific’e publicamente como un Testigo di Yehova. Despues di su bautismo, e ta bira un minister ordena cu ta carga e nomber di Yehova. Esaki ta un gran privilegio y alabes un responsabilidad serio. Tambe e persona batisa ta bin na remarca pa haya salbacion eterno, basta cu e keda fiel na Yehova.—Mateo 24:13.

12. Ki obligacion ta bin cu e honor di carga e nomber di Yehova?

¹² Un cos ta sigur, ta un honor extraordinario di por carga e nomber di e Dios todopoderoso, Yehova. Profeta Mikeas a bisa: “Tur e pueblonan ta cana cada un den e nomber di su dios, ma pa loke ta nos, nos si lo cana den e nomber di [“Yehova”, NW] nos Dios pa semper y semper.” (Mikeas 4:5) Sinembargo, e honor aki ta bin cu un obligacion. Nos tin cu haci esfuerso pa hiba nos bida na un manera cu ta trece honor na e nomber cu nos ta carga. Manera Pablo a recorda e cristiannan na Roma, si un hende no ta practica loke e ta predica, e nomber di Dios lo ser “blasfema”, es decir, lo perde su bon reputacion.—Romanonan 2:21-24.

13. Dicon sirbidonan dedica di Yehova tin e responsabilidad di duna testimonio tocante nan Dios?

¹³ Ora un persona bira un Testigo di Yehova, e ta acepta tambe e responsabilidad di duna testimonio tocante su Dios. Yehova a invita e nacion di Israel cu tawata dedica na dje pa nan ta su testigonan afin di duna testimonio di su Divinidad eterno. (Isaias 43:10-12, 21) Pero e nacion no a cumpli cu e responsabilidad aki, y cu tempo nan a perde Yehova su aprobacion completamente. Awe, cristiannan berdadero ta orguyoso di por tin e privilegio di duna testimonio tocante Yehova. Nos ta haci esei pasobra nos stim’e y ta anhela pa su nomber sea santifica. Con nos por keda keto ora cu nos sa e berdad tocante nos Tata celestial y su proposito? Nos ta sinti mescos cu apostel Pablo ora el a bisa: “Ta mi obligacion; pasobra ai di mi si mi no predica evangelio!”—1 Corintionan 9:16.

14, 15. (a) Ki papel Yehova su organisacion ta hunga den nos crecemento spiritual? (b) Ki percuracionnan tin disponibel pa yuda nos spiritualmente?

¹⁴ E di dos pregunta di bautismo ta recorda e candidato tambe di su responsabilidad di coopera cu Yehova su organisacion dirigi pa spirito santo. No ta nos so ta sirbi Dios, y nos tin mester di e yudansa, sosten y animacion di “henter e asociacion di rumannan.” (1 Pedro 2:17, NW; 1 Corintionan 12:12, 13) Dios su organisacion ta hunga un papel sumamente importante den nos crecemento spiritual. E ta percura un abundancia di publicacion biblico cu ta yuda nos crece den conocemento exacto, cu ta yuda nos actua sabi ora cu nos ta confronta problema y ademas ta yuda nos cultiva un relacion intimo cu Dios. Mescos cu un mama cu ta haci sigur cu su yiu ta bon alimenta y cuida, asina “e esclabo fiel y prudente” ta percura un abundancia di cuminda spiritual oportuno di manera cu nos por mehora nos relacion cu Yehova.—Mateo 24:45-47; 1 Tesalonicensenan 2:7, 8.

¹⁵ Yehova su pueblo ta haya na nan reunionnan semanal e entrenamento y animacion necesario pa nan por ta fiel Testigonan di Yehova. (Hebreonan 10:24, 25) E Scol di Ministerio Teocratico ta siña nos papia den publico, y e Reunion di Sirbishi ta entrena nos pa presenta nos mensahe na un manera efectivo. Tanto na nos reunionnan como mediante nos estudio personal di publicacionnan biblico, nos por  mira con Yehova su spirito santo ta obra y ta dirigi su organisacion. Pa medio di e percuracionnan regular aki, Dios ta spierta nos pa peligernan cu tin, ta entrena nos pa nos ta ministernan efectivo y ta yuda nos keda spiritualmente lanta.—Salmo 19:7, 8, 11; 1 Tesalonicensenan 5:6, 11; 1 Timoteo 4:13.

E Motibo Tras di e Decision

16. Kico ta motiva nos pa dedica nos mes na Yehova?

¹⁶ E dos preguntanan di bautismo pues ta recorda e candidatonan pa bautismo di e nificacion di e bautismo den awa y di e responsabilidadnan cu ta bin cu ne. Kico anto mester motiva nan pa tuma e decision di batisa? Nos ta bira disipelnan batisa pasobra Yehova ta ‘hala’ nos; no pasobra un hende ta forsa nos. (Huan 6:44) Siendo cu “Dios ta amor”, e ta goberna universo pa medio di amor, no door di uza forsa. (1 Huan 4:8) Loke ta hala nos na Yehova ta su cualidadnan bondadoso y e manera cu e ta trata cu nos. Yehova a duna nos su Yiu unigenito y ta ofrece nos e mihor futuro cu tin. (Huan 3:16) Nos, na nos turno, ta sinti nos motiva pa ofrec’e nos bida, esta, pa dedica nos bida na dje.—Proverbionan 3:9; 2 Corintionan 5:14, 15.

17. Na kico nos no ta dedica?

¹⁷ Nos no ta dedica nos mes na un causa ni na un obra, sino na Yehova mes. E asignacion of obra cu Dios tin pa su pueblo lo cambia, pero nan dedicacion na dje ta keda mescos. Por ehempel, loke Yehova a bisa Abraham haci tawata hopi distinto for di loke el a bisa Yeremias haci. (Genesis 13:17, 18; Yeremias 1:6, 7) Sinembargo, nan tur dos a cumpli cu e tarea spesifico cu Dios a duna nan pa haci pasobra nan tawata stima Yehova y kier a haci su boluntad fielmente. Durante e tempo di fin aki, tur siguido batisa di Cristo ta haci esfuerso pa cumpli cu Cristo su mandamento di predica e bon nobo di Reino y haci disipel. (Mateo 24:14; 28:19, 20) Haciendo e trabou ei di curason ta un excelente manera pa demostra cu nos ta stima nos Tata celestial y cu nos ta realmente dedica na dje.—1 Huan 5:3.

18, 19. (a) Ki declaracion publico nos ta haci mediante nos bautismo? (b) Kico nos lo considera den e siguiente articulo?

¹⁸ Sin duda, bautismo ta habri caminda pa hopi bendicion, pero e no ta un paso cu nos mester dal sin cu prome nos a pensa seriamente riba dje. (Lucas 14:26-33) E ta expresa un determinacion cu mester ta mas importante cu tur otro responsabilidad. (Lucas 9:62) En realidad, ora nos batisa nos ta haciendo e declaracion publico aki: “E Dios aki ta nos Dios, pa semper y semper; e lo guia nos te na morto.”—Salmo 48:14.

¹⁹ E siguiente articulo lo analisa mas pregunta cu lo por lanta en conexion cu bautismo den awa. Acaso tin motibonan valido pa un persona keda sin batisa? Lo mester tuma na cuenta e edad di un persona? Con tur hende por contribui na e dignidad di e ocasion di bautismo?

Bo Por Splica?

• Dicon cada cristian tin cu arepenti prome cu e batisa?

• Kico dedicacion na Dios ta encera?

• Ki responsabilidadnan ta bin cu e honor di carga e nomber di Yehova?

• Kico mester motiva nos pa tuma e decision di batisa?

[Preguntanan di Estudio]

[Cuadro/​Plachi na pagina 22]

E Dos Preguntanan di Bautismo

A base di e sacrificio di Hesucristo, bo a arepenti di bo picanan y a dedica bo mes na Yehova pa haci su boluntad?

Bo ta compronde cu bo dedicacion y bautismo ta identifica bo como un Testigo di Yehova den asociacion cu Dios su organisacion dirigi pa spirito santo?

[Plachi na pagina 23]

Dedicacion ta un promesa solem na Yehova haci den oracion

[Plachi na pagina 25]

Nos trabou di predica ta demostra nos dedicacion na Dios