Con pa Cumpli cu e Rekisitonan pa Bautismo Cristian
Con pa Cumpli cu e Rekisitonan pa Bautismo Cristian
“Kico ta stroba pa mi wordo batisa?”—ECHONAN 8:36.
1, 2. Con Felipe a cuminsa un combersacion cu un funcionario di Etiopia, y kico ta duna prueba di e inclinacion spiritual di e homber aki?
UN PAR di aña despues di e morto di Hesus, un funcionario di gobierno tawata biahando den direccion suit riba e caminda for di Herusalem pa Gaza. E tawatin su dilanti un biahe agotador den garoshi. Un biahe cu lo a abarca un distancia di podise mas cu 1.500 kilometer. E homber deboto aki a biaha for di Etiopia te Herusalem pa adora Yehova. Riba e caminda largo pa cas, e tawata haciendo bon uzo di su tempo door di lesa e Palabra di Dios; esaki tawata prueba di su fe. Yehova a tuma nota di e homber sinsero aki, y pa medio di un angel el a dirigi disipel Felipe pa bai predica na dje.—Echonan 8:26-28.
2 Tawata facil pa Felipe cuminsa un combersacion cu ne pasobra e funcionario di Etiopia tawata lesa na bos halto, manera tawata e custumber den e tempo ei. Pues, Felipe por a tende cu e tawata lesando for di e rol di Isaias. Un simpel pregunta di Felipe a lanta e homber su interes: “Bo ta compronde loke bo ta lesa?” Esaki a hiba na un combersacion tocante Isaias 53:7 y 8. Despues di esei, Felipe a “predic’e” e bon nobo tocante Hesus.—Echonan 8:29-35.
3, 4. (a) Dicon Felipe a batisa e homber di Etiopia mesora? (b) Ki preguntanan nos lo bai considera awor?
3 Den un corto tempo, e Etiope a compronde e papel cu Hesus ta hunga den Dios su proposito, y tambe cu ta necesario pa bira un disipel batisa di Cristo. Ora el a mira un luga cu tawatin suficiente awa el a puntra Felipe: “Kico ta stroba pa mi wordo batisa?” Claro cu esaki tawata un circunstancia special. Aki tawata trata di un homber di fe cu ya caba tawata adora Dios como un proselito Hudiu. Probablemente lo a dura basta prome cu e haya un otro chens di batisa. Mas importante ainda, e homber aki a compronde kico Dios a rekeri di dje, y e kier a cumpli cu ne completamente. Felipe gustosamente a bai di acuerdo cu su peticion, y despues di a ser batisa e Etiope “a sigui su caminda, regocihando.” Sin duda el a bira un predicado entusiasma di e bon nobo den su pais.—Echonan 8:36-39.
4 Nos no mester considera dedicacion y bautismo como algo di menos importancia ni dal e pasonan ei sin pensa bon prome. Pero di otro banda, e ehempel di e funcionario di Etiopia ta mustra cu tawatin ocasionnan cu hende a batisa poco despues cu nan a tende e berdad di e Palabra di Dios. * Pues, ta na su luga pa considera e siguiente preguntanan: Con un hende mester prepara pa bautismo? Te na ki grado mester tuma edad di un persona na cuenta? Ki progreso spiritual mester ta bisto prome cu un persona batisa? Mas cu tur cos, dicon Yehova ta rekeri pa su sirbidonan dal e paso aki?
Un Promesa Solem
5, 6. (a) Con e pueblo di Dios den pasado a reacciona riba Yehova su amor? (b) Ki relacion intimo cu Dios nos por tin unabes nos batisa?
5 Despues cu Yehova a libra e Israelitanan for di Egipto, el a ofrece pa acepta nan como su “tesoro peculiar”, of propiedad special, pa stima nan, proteha nan y haci nan “un nacion santo.” Pero, pa e pueblo por a haya e bendicionnan ei nan mester a reacciona riba Dios su amor na un manera concreto. Nan a haci esaki door di bai di acuerdo pa haci ‘tur loke Yehova a bisa’ y sera un pacto cu ne. (Exodo 19:4-9) Den prome siglo, Hesus a manda su siguidonan haci disipel di hende di tur nacion, y esnan cu a acepta su siñansa a ser batisa. Un bon relacion cu Dios a depende di fe den Hesucristo, sigui despues pa bautismo.—Mateo 28:19, 20; Echonan 2:38, 41.
6 E relatonan biblico aki ta mustra cu Yehova ta bendiciona esnan cu solemnemente ta priminti di sirbie y ta cumpli cu nan promesa. Pa cristiannan, dedicacion y bautismo ta pasonan necesario cu ta hiba na Yehova su bendicion. Nos ta determina pa cumpli cu su normanan y busca su guia. (Salmo 48:14) Yehova na su turno ta cohe nos man tene, na moda di papia, y ta dirigi nos den e caminda cu nos mester cana.—Salmo 73:23; Isaias 30:21; 41:10, 13.
7. Dicon dedicacion y bautismo mester ta un decision personal?
7 Loke tin cu motiva nos pa dal e pasonan aki mester ta amor pa Yehova y e deseo di sirbie. Ningun persona no mester batisa djis pasobra un hende ta bis’e cu el a studia suficiente caba of pasobra su amigonan ta bai batisa. Naturalmente, mayornan y otro cristiannan maduro por curasha un persona pa pensa riba dedicacion y bautismo. Por ehempel, apostel Pedro a urgi e hendenan cu a scuch’e na Pentecoste pa nan “batisa.” (Echonan 2:38) Sinembargo, nos dedicacion ta un asunto personal, y ningun otro hende no por hacie pa nos. E decision di haci Dios su boluntad ta un decision cu nos mes mester tuma.—Salmo 40:8.
Preparacion Adecuado pa Bautismo
8, 9. (a) Dicon bautismo di baby no ta na harmonia cu e Scritura? (b) Ki progreso spiritual hobennan lo mester a haci prome cu nan batisa?
8 Muchanan por haci un dedicacion basa riba conocemento? E Scritura no ta duna un edad minimo pa bautismo. Sinembargo, un baby sigur no por a bira creyente, eherce fe of haci un dedicacion na Dios. (Echonan 8:12) Relaciona cu e cristiannan di prome siglo, historiado Augustus Neander a declara den su buki General History of the Christian Religion and Church (Historia General di e Religion y Iglesia Cristian): “Na principio ta adultonan so tawata wordo batisa, pasobra hende tawatin e custumber di mira bautismo y fe como dos cos estrechamente liga cu otro.”
9 Den caso di hobennan, tin di nan na un edad relativamente jong por compronde cosnan basico tocante Dios y su proposito y cultiva un deseo pa actua na harmonia cu loke Dios ta rekeri, mientras cu otronan ta tuma mas tempo pa haci esei. Sinembargo, prome cu un hoben batisa e mester tin un relacion personal cu Yehova, un conocemento exacto di e cosnan fundamental di e Scritura, y un comprondemento bon cla di kico dedicacion ta encera, mescos cu den caso di adultonan.
10. Ki pasonan un persona mester dal prome cu dedicacion y bautismo?
10 Hesus a instrui su disipelnan pa siña hende nobo tur e cosnan cu el a ordena. (Mateo 28:20) Pues prome cu tur cos, hende nobo tin cu haya un conocemento exacto di e berdad, locual na su turno lo yuda nan desaroya fe den Yehova y den su Palabra. (Romanonan 10:17; 1 Timoteo 2:4; Hebreonan 11:6) Anto ora cu berdad biblico touch un persona su curason, esei ta motiv’e pa arepenti y bira for di su estilo di bida anterior. (Echonan 3:19) Por ultimo, e persona ta yega na un punto caminda e kier dedica su mes na Yehova y ser batisa, manera Hesus a manda.
11. Dicon ta importante pa nos participa cu regularidad den e trabou di predica prome cu bautismo?
11 Un otro paso importante den e progreso rumbo pa bautismo ta di participa den e predicacion di e bon nobo di e Reino. Esaki ta e trabou di mas importante cu Yehova a asigna su pueblo durante e ultimo dianan aki. (Mateo 24:14) Pues asina publicadonan no batisa por tin e goso di papia tocante nan fe cu otro hende. Tumando parti den e obra aki ta prepara nan tambe pa sigui participa cu regularidad y celo den sirbishi di veld despues di nan bautismo.—Romanonan 10:9, 10, 14, 15.
Tin Algo Ta Stroba Bo di Batisa?
12. Kico kisas ta pone cu algun persona no kier batisa?
12 Cierto personanan kisas no kier batisa pasobra nan no ta masha dispuesto pa acepta e responsabilidad cu esei ta trece cu ne. Nan ta realisa cu pa nan cumpli cu Yehova su normanan, nan lo tin cu haci cambionan importante den nan bida. Of kisas nan tin miedo cu lo ta dificil pa cumpli cu e rekisitonan di Dios despues di bautismo. Tin di nan kisas asta ta rasona: “Podise algun dia lo mi haci algo malo y nan ta expulsa mi for di e congregacion.”
13. Den tempo di Hesus, kico a stroba algun hende di bira su siguido?
13 Tempo cu Hesus tawata riba tera, algun hende a laga interesnan personal y lasonan familiar stroba nan di bira su disipel. Un escriba a declara cu lo e sigui Hesus na unda cu Hesus bai. Pero Hesus a splica cu hopi biaha e no tawatin ni sikiera un caminda pa pasa anochi. Ora Hesus a invita un otro oyente pa bira su siguido, e homber aki a contesta cu prome lo e tin cu bai “dera” su tata. Probablemente, el a prefera di keda cas warda te dia cu su tata a muri, cu sigui Hesus y atende cu e responsabilidad di dera su tata ora cu e tempo a yega di berdad. Por ultimo, un di tres persona a bisa cu prome cu e sigui Hesus, e tawatin cu “despedi” di su hendenan di cas. Hesus a describi tal posponemento como ‘wakmento patras.’ Pues, ta parce cu hende cu eigenlijk no kier sigui Hesus, semper lo por haya excuse pa evita di cumpli cu nan responsabilidad cristian.—Lucas 9:57-62.
14. (a) Con Pedro, Andres, Santiago y Huan a reacciona ora Hesus a invita nan pa bira piscado di hende? (b) Dicon nos no mester basila pa acepta e yugo di Hesus?
14 Di otro banda, e ehempel di Pedro, Andres, Santiago y Huan ta un contraste masha grandi. Ora Hesus a invita nan pa siguie y bira piscado di hende, Bijbel ta declara cu “mesora nan a laga e redanan para y a siguie.” (Mateo 4:19-22) Door di tuma mesora e decision di sigui Hesus, nan a experencia personalmente loke Hesus a bisa nan despues: “Tuma mi yugo riba boso, y siña di mi, pasobra mi ta manso y humilde di curason; y boso lo haya sosiego pa boso alma. Pasobra mi yugo ta suave y mi carga ta lihe.” (Mateo 11:29, 30) Aunke ta berdad cu bautismo ta bin cu un yugo di responsabilidad, Hesus ta sigura nos cu e yugo ei ta suave y tolerabel, un yugo cu lo refresca nos masha hopi.
15. Con e ehempel di Moises y di Yeremias ta mustra cu nos por confia cu nos lo haya Yehova su sosten?
15 Claro cu ta normal pa sinti cu nos lo no por carga e responsabilidad cu ta bin despues di bautismo. Tanto Moises como Yeremias na prome instante a sinti cu nan no tawata capasita pa cumpli cu e asignacion cu Yehova a duna nan. (Exodo 3:11; Yeremias 1:6) Con Dios a trankilisa nan? El a bisa Moises: “Lo mi ta cu bo.” El a priminti Yeremias: “Ami ta cu bo pa libra bo.” (Exodo 3:12; Yeremias 1:8) Nos tambe por tin confiansa den Dios su sosten. Amor pa Dios y confiansa den dje por yuda nos vence dudanan persistente tocante si nos lo por actua di acuerdo cu nos dedicacion. Apostel Huan a skirbi: “Amor no conoce miedo; ma amor perfecto ta core cu miedo.” (1 Huan 4:18) Un mucha chikito kisas tin miedo ora e tin cu cana su so, pero e ta cana cu confiansa ora e tin man di su tata teni. Asina tambe, si nos ta confia den Yehova cu henter nos curason, e ta priminti cu lo e ‘dirigi nos bereanan’ segun cu nos ta cana banda di dje.—Proverbionan 3:5, 6.
Un Ocasion Digno di Respet
16. Dicon bautismo ta encera baimento completamente bou di awa?
16 Normalmente, prome cu e acto di bautismo mes tin un discurso biblico cu ta splica e importancia di bautismo cristian. Na final di e discurso aki, e orado ta pidi e candidatonan pa haci un declaracion publico di nan fe door di contesta e dos preguntanan di bautismo. (Romanonan 10:10; wak e cuadro na pagina 22.) Caba ta bai batisa e candidatonan den awa, di acuerdo cu e patronchi cu Hesus mes a pone. Bijbel ta mustra cu despues cu Hesus a batisa, el a “sali for di awa.” (Mateo 3:16; Marco 1:10) Pues ta bisto cu Huan Bautista a hinca Hesus completamente bou di awa. * E baimento completamente bou di awa ta simbolisa e cambio drastico cu nos a haci den nos bida; ta como si fuera nos a muri pa cu nos forma anterior di biba y a cuminsa un bida nobo den e sirbishi di Dios.
17. Con tanto e candidatonan pa bautismo como e observadonan por contribui na e dignidad di e ocasion?
17 Bautismo ta un ocasion serio y alabes gososo. Bijbel ta indica cu Hesus tawata haciendo oracion ora cu Huan a batis’e den Riu Yordan. (Lucas 3:21, 22) Na harmonia cu Hesus su ehempel, candidatonan pa bautismo awe mester comporta nan mes cu respet. Anto como cu Bijbel ta urgi nos pa bisti decente den nos bida diario, cuanto mas nos tin cu obedece e conseho aki riba e dia di nos bautismo! (1 Timoteo 2:9) Observadonan tambe por demostra e debido respet door di scucha cu atencion na e discurso di bautismo y door di para wak e bautismo na un manera ordena.—1 Corintionan 14:40.
Bendicionnan Cu Disipelnan Batisa Ta Disfruta di Dje
18, 19. Ki privilegio y bendicion bautismo ta trece cu ne?
18 Unabes nos a dedica nos mes na Dios y a batisa, nos ta bira parti di un famia unico. Na prome luga, Yehova ta bira nos Tata y nos Amigo. Prome cu nos a batisa, nos tawata aleha for di Dios; awor nos a reconsilia cu ne. (2 Corintionan 5:19; Colosensenan 1:20) Mediante e sacrificio di Cristo, nos a hala serca Dios y e ta hala serca nos. (Santiago 4:8) Profeta Malakias a describi con Yehova ta presta atencion y ta scucha e hendenan cu ta uza y carga su nomber, y e ta inclui nan nomber den su buki di memoria. Dios ta bisa: “Nan lo ta di mi ... y lo mi spar nan manera un homber ta spar su mes yiu homber cu ta sirbie.”—Malakias 3:16-18.
19 Tambe bautismo ta haci posibel cu nos por bira parti di un hermandad mundial. Ora cu apostel Pedro a puntra kico ta e bendicionnan cu e disipelnan di Cristo lo haya pa e sacrificionan cu nan a haci, Hesus a priminti: “Tur hende cu a bandona casnan of ruman hombernan of ruman mohenan of tata of mama of yiunan of cunucunan pa causa di mi nomber, lo ricibi hopi bes mas tanto, y lo hereda bida eterno.” (Mateo 19:29) Añanan despues, Pedro a skirbi tocante “rumannan den henter mundo.” Pedro personalmente a experencia e sosten y bendicion di un hermandad amoroso, y nos tambe por experenci’e.—1 Pedro 2:17; 5:9.
20. Ki speransa maraviyoso bautismo ta duna nos?
20 Ademas, Hesus a indica cu esnan cu siguie lo “hereda bida eterno.” Si, dedicacion y bautismo ta duna nos e speransa di “gara loke ta bida berdadero”, esta, bida eterno den Dios su mundo nobo. (1 Timoteo 6:19) Tin un fundeshi mas mihor cu nos lo por edifica pa nos mes y pa nos famia? E speransa maraviyoso aki lo capasita nos pa ‘cana den e nomber di Yehova nos Dios pa semper y semper.’—Mikeas 4:5.
[Nota]
^ par. 4 E tres mil Hudiunan y proselitonan cu a scucha e discurso di Pedro na Pentecoste tambe a batisa mesora. Claro cu nan tambe, mescos cu e eunuco di Etiopia, tawata conoce e siñansanan y principionan basico di e Palabra di Dios caba.—Echonan 2:37-41.
^ par. 16 E palabra Griego bá·pti·sma (bautismo) ta nifica “e proceso di bai den awa, bai bou di awa y sali for di awa”, segun Vine su Expository Dictionary of New Testament Words.
Bo Por Splica?
• Con nos mester reacciona riba Yehova su amor, y dicon?
• Ki progreso spiritual mester tuma luga prome cu bautismo?
• Dicon nos no mester laga miedo di fracasa of ser indispuesto pa acepta responsabilidad stroba nos di batisa?
• Ki bendicionnan unico disipelnan batisa di Hesucristo por disfruta di dje?
[Preguntanan di Estudio]
[Plachi na pagina 26]
“Kico ta stroba pa mi wordo batisa?”
[Plachi na pagina 29]
Bautismo ta un ocasion serio y alabes gososo