Storia di Bida

Determina pa Sirbi Yehova

SEGUN E RELATO DI RAIMO KUOKKANEN

Na aña 1939, Segundo Guera Mundial a cuminsa na Europa, y Union Sovietico a ataca mi pais natal, Finlandia. Mi tata a bai bringa den e ehersito Finlandes. Poco despues, avion di guera Ruso tawata tira bom riba e stad caminda nos tawata biba, y mi mama a manda mi bai biba serca mi wela na un area mas safe.

NA AÑA 1971, mi tawata sirbi como misionero na Uganda, Oost Africa. Un dia, segun cu mi tawata predica di cas pa cas, yen di hende morto spanta a core pasa mi voorbij. Mi a tende zonido di bala y mi a saca careda bai den direccion di cas. Ora e tiramento a yega mas serca, mi a bula den un roi cu tawatin canto di caminda. Segun cu bala tawata skeiro riba mi cabes, mi a gatia den e roi bai mi cas.

Mi no por a haci mucho cos pa evita e efectonan di Segundo Guera Mundial, pero pakico ami cu mi casa lo tawata dispuesto pa risca nos bida y pasa den disturbionan civil na Oost Africa? E contesta ta estrechamente liga cu nos determinacion pa sirbi Yehova.

Un Simiña di Determinacion Ta Ser Planta

Mi a nace na aña 1934 na Helsinki, Finlandia. Mi tata tawata ferfdo, y un dia e mester a ferf e edificio cu a acomoda e sucursal di Testigonan di Yehova na Finlandia. E Testigonan a cont’e tocante nan reunionnan di congregacion. Ora el a yega cas, el a conta mi mama tocante e reunionnan  ei. Mi mama no a asisti na e reunionnan e tempo ei, pero despues el a cuminsa combersa tocante topiconan biblico cu un colega cu tawata Testigo. No a dura hopi cu Mama a tuma na serio loke el a siña, y na 1940 el a batisa como un Testigo di Yehova.

Un poco prome cu esei, mi wela a tuma mi na su cas den cunucu caminda mi a keda te na fin di Segundo Guera Mundial. For di Helsinki, mi mama a cuminsa skirbi su mama y su ruman mohe mas chikito tocante loke Testigonan di Yehova tawata kere. Nan tur dos a mustra interes y tawata comparti cu mi loke nan a siña. Representantenan biahero di Testigonan di Yehova tawata bishita Wela su cas y tawata anima nos, pero ainda ami no tawata determina pa sirbi Dios.

Entrenamento Cu A Yuda Mi Sirbi Dios

Ora cu guera a caba na 1945, mi a bai bek Helsinki, y Mama a cuminsa hiba mi e reunionnan di Testigonan di Yehova. Tin biaha na luga di bai reunion mi tawata bai cine. Pero despues Mama tawata conta mi tocante e discurso cu el a tende na reunion, y bes tras bes el a enfatisa e mesun punto: Armagedon ta hopi serca. Mi a bira combenci di esei y a stop di falta reunion. Segun cu mi aprecio pa berdad biblico a crece, mi deseo pa participa den tur e actividadnan di e congregacion tambe a crece.

Un cos cu mi tawata gusta hopi ta asisti na asamblea y congreso. Na 1948, mi a asisti na e congreso di districto cu tawatin serca di cas di mi wela, caminda mi tawata pasando mi vakantie grandi. Un amigo di mi tawata bai batisa na e congreso ei, y el a invita mi pa haci mescos. Mi a bis’e cu mi no a bin cu zwembroek, pero el a sugeri cu ora e caba di batisa, lo mi por a uza su zwembroek. Mi a bai di acuerdo cu ne y asina mi a batisa dia 27 di juni 1948, tempo cu mi tawatin 13 aña.

Despues di e congreso, algun amigo di mi mama a cont’e cu mi a batisa. Ora nos a topa otro, e kier a sa dicon mi a tuma un paso asina importante sin consulta cu ne. Mi a splic’e cu mi a compronde e siñansanan basico di Bijbel y cu mi tawata sa cu mi ta responsabel na Yehova pa mi comportacion.

Mi Determinacion Ta Crece

E rumannan den congregacion a yuda mi fortalece mi determinacion pa sirbi Yehova. Nan tawata compaña mi den sirbishi di cas pa cas y casi tur siman nan tawata duna mi parti den reunion. (Echonan 20:20) Na edad di 16 aña mi a duna mi prome discurso publico. Poco despues, mi a ser nombra como sirbido di estudio di Bijbel den nos congregacion. Tur e actividad spiritual ei a yuda mi madura, pero ainda mi tawatin cu vence mi miedo di hende.

E tempo ei, nos tawata anuncia e discurso publico di e congreso di districto cu borchinan grandi. Cada un di e borchinan aki a consisti di dos pancarta conecta cu strep cu a pasa over di e persona su scouder y cu a tapa e parti dilanti y patras di su curpa. Pesei tawatin hende cu a yama nos sandwich.

Un biaha, mi tawata para na skina di un caya keto cu mi borchi di sandwich ora cu mi a mira un grupo di mi compañeronan di klas ta bin stret den mi direccion. Segun cu nan a pasa mi, e manera cu nan a wak mi a pone mi krimp di miedo. Mi a pidi Yehova den oracion pa duna mi curashi y a keda para keto cu e borchi. E echo cu mi a vence miedo di hende e tempo ei a prepara mi pa e test mas grandi di mantene neutralidad cristian.

Cu tempo, gobierno a duna ordo pa ami cu un cantidad di otro Testigo hoben raporta pa servicio militar. Nos a bai na e base militar manera nan a ordena nos, pero respetuosamente nos a nenga di bisti uniform. E oficialnan a detene nos, y poco despues un corte a sentencia nos na seis luna di prizon. Ademas, nan a encarsela nos pa e ocho lunanan cu nos lo mester a pasa den servicio militar. Di manera cu nos a pasa un total di 14 luna den prizon debi na nos posicion neutral.

Den e baraknan di prizon, nos tawata reuni hunto tur dia pa considera Bijbel. Durante e  lunanan ei, hopi di nos a lesa e Bijbel completo dos biaha. Ora nos a termina nos sentencia, mayoria di nos a sali for di prizon mas determina cu nunca pa sirbi Yehova. Te cu awe, hopi di esnan cu tawata den e grupo ei di Testigonan hoben ta sirbi Yehova fielmente.

Despues cu mi a sali for di prizon, mi a bolbe bai biba serca mi mayornan. Poco despues, mi a sera conoci cu Veera, un Testigo celoso, resien batisa. Nos a casa na 1957.

Un Anochi Cu A Cambia Nos Bida

Un anochi nos tawata di bishita serca algun ruman cu ta carga responsabilidad na sucursal, y un di nan a puntra nos si nos lo tin gana di bai den e trabou di sircuito. Despues di a haci oracion henter anochi, mi a bel sucursal y a bisa nan cu si. Aceptando e ministerio di tempo completo a nifica cu mi mester a laga mi trabou cu tawata paga bon, pero nos tawata determina pa pone e Reino na prome luga den nos bida. Mi tawatin 23 aña y Veera tawatin 19 aña, ora cu nos a cuminsa cu e trabou biahero na december 1957. Durante tres aña nos a disfruta di bishita y anima e congregacionnan di e pueblo di Yehova na Finlandia.

Den e ultimo parti di aña 1960, mi a haya un invitacion pa e Scol Biblico di Galad di Watchtower na Brooklyn, New York. Nos tres di Finlandia lo mester a asisti na un curso special di dies luna pa haya entrenamento di e manera cu un sucursal ta funciona. Nos esposanan a keda Finlandia y a traha na sucursal.

Un poco prome cu e curso a termina, nan a pidi mi pa pasa na e oficina di Nathan H. Knorr, kende e tempo ei tawata supervisa e obra mundial di Testigonan di Yehova. Ruman Knorr a ofrece ami cu mi casa un asignacion como misionero na e Republica di Malagasia, conoci awor como Madagascar. Mi a skirbi Veera pa puntr’e si e ta haya cu nos mester acepta e asignacion ei, y mesora el a contesta: “Si.” Ora mi a regresa Finlandia, umbes nos a cuminsa prepara nos mes pa bai biba na Madagascar.

Goso y Decepcion

Na januari 1962 nos a bula bai Antananarivo, capital di e pais, cu sombre di lana y cu jas masha diki bisti, ya cu na Finlandia tawata winter ora cu nos a sali. Den e clima tropical di Madagascar, nos a cambia nos estilo di bisti rapidamente. Nos prome cas di misionero tawata un cas chikito cu un solo cuarto. Tawatin un otro pareha misionero einan caba, pues ami cu Veera tawata drumi den porch.

Nos a cuminsa siña Frances, un di e idiomanan oficial di Madagascar. Esaki tawata basta dificil pasobra nos dos no tawata papia e mesun idioma cu nos instructor, Ruman Carbonneau. E ruman mohe aki a uza Ingles pa siña nos Frances, pero Veera no tawata papia Ingles. Pues, ami tawatin cu traduci Ruman Carbonneau su instruccionnan na Finlandes pa Veera. Pero despues nos a realisa cu Veera tawata compronde conceptonan tecnico mas mihor na Sueco, pues, mi tawata splic’e e gramatica Frances na Sueco. Den poco tempo nos a haci bon progreso den Frances y a cuminsa siña Malagasia, e idioma local.

Mi prome estudio di Bijbel na Madagascar tawata cu un homber cu tawata papia Malagasia so. Mi tawata busca e versiculonan biblico  den mi Bijbel Finlandes, caba nos a busca e versiculonan ei den su Bijbel Malagasia. Mi no por a dun’e masha splicacion di e textonan biblico, pero toch den poco tempo berdad biblico a crece den e homber ei su curason y el a progresa te na bautismo.

Na 1963, Milton Henschel di e sede di Testigonan di Yehova na Brooklyn a bishita Madagascar. Poco despues, nan a establece un sucursal nobo na Madagascar, y mi a keda nombra como superintendente di sucursal. Esei tawata banda di mi trabou como superintendente di sircuito y di districto. Mientrastanto, Yehova tawata bendiciona nos ricamente. Di aña 1962 pa 1970, e cantidad di publicadonan di Reino na Madagascar a subi di 85 pa 469.

Un dia na 1970, ora nos a yega cas for di sirbishi di veld, nos a haya un nota pega na nos porta cu a ordena tur misionero di Testigonan di Yehova pa raporta na e oficina di minister di asuntonan interno. Einan un funcionario a bisa nos cu gobierno a duna ordo pa nos bandona e pais inmediatamente. Ora mi a puntr’e ki crimen mi a comete cu nan mester a deporta mi, e funcionario a bisa: “Señor Kuokkanen, bo no a haci nada malo.”

Mi di cu ne: “Nos tin ocho aña akinan. Esaki ta nos cas. Nos no por bai gewoon asina.” Apesar di nos esfuerso, tur e misioneronan mester a sali denter di un siman. Gobierno a sera e sucursal, y un Testigo local a cuminsa supervisa e trabou di sirbishi. Prome cu nos a bai laga nos rumannan stima na Madagascar, nos a haya un asignacion nobo, Uganda.

Cuminsando di Nobo

Un par di dia despues cu nos a sali for di Madagascar, nos a yega Kampala, capital di Uganda. Mesora nos a cuminsa siña Luganda, un idioma bunita cu un tono melodioso pero masha dificil pa siña. Otro misioneronan a yuda Veera siña Ingles prome, y nos por a predica cu bon resultado na Ingles.

Kampala su clima cayente y humedo a afecta Veera su salud. Pues, nos a haya un asignacion na Mbarara, un pueblito na Uganda cu tin un clima mas suave. Nos tawata e prome Testigonan einan, y riba nos prome dia den sirbishi, nos a ser bendiciona cu un bon experencia. Mi tawata papiando cu un homber den su cas ora cu su casa a sali for di cushina. E señora su nomber  tawata Margaret, y el a scucha mi presentacion na su casa. Veera a cuminsa un estudio di Bijbel cu Margaret, y el a haci excelente progreso spiritual. El a batisa y a bira un publicado di Reino celoso.

Bringamento Riba Caya

Na 1971, guera civil a pone fin na nos pas na Uganda. Un dia a start un bataya rond di nos cas di misionero na Mbarara. Ta e dia ei mi a pasa door di loke mi a describi na comienso di e relato aki.

Veera tawata den e cas di misionero caba ora cu mi a yega despues di a gatia un pida basta largo den e roi, for di bista di e soldanan. Den un skina di e cas, nos a traha un “baluarte” di matras y mueble. Un siman largo nos a keda paden, purbando di haya informacion for di radio. Tawatin biaha cu bala tawata dal contra muraya segun cu nos tawata sconde den nos baluarte. Anochi nos no tawata sende lus, pa hende no sa cu nos tawata den e cas. Un biaha, soldanan a bin na porta y a grita. Nos a keda keto keto, haciendo oracion na Yehova silenciosamente. Despues cu e bringamento a pasa, nos biciñanan a bin y a gradici nos cu nan a keda sano y salvo. Segun nan, ta Yehova a proteha nos tur, y nos tawata di acuerdo cu nan.

E situacion a keda trankil te ora cu un mainta nos a tende na radio cu gobierno di Uganda a prohibi e actividad di Testigonan di Yehova. E anunciado a bisa cu tur Testigo di Yehova mester bai bek na nan religion anterior. Mi a purba rasona cu funcionarionan gubernamental pero sin exito. Despues mi a bai na e oficina di presidente Idi Amin y a pidi pa haya un cita cu ne. E recepcionista a bisa mi cu e presidente ta druk. Mi a bai bek hopi biaha, pero nunca mi no a logra papia cu e presidente. Finalmente, na juli 1973 nos tawatin cu bandona Uganda.

Un Aña Ta Para Bira Dies

Ora cu nos mester a bai laga nos rumannan stima di Uganda, nos a bolbe sinti e mesun tristesa cu ora nos a ser deporta for di Madagascar. Prome cu nos a cuminsa cu nos asignacion nobo na Senegal, nos a bai Finlandia. Einan, nos asignacion na Senegal a ser cansela, y nos a tende cu nos mester keda Finlandia. Tawata parce cu nos trabou como misionero a termina. Na Finlandia, nos a sirbi como pionero special y despues nos a bai atrobe den e trabou di sircuito.

Pa aña 1990, oposicion contra e obra na Madagascar a mengua, y e sede na Brooklyn a sorprende nos door di puntra nos si nos lo kier a bai einan pa un aña. Nos kier a bai pero nos tawata confronta dos reto grandi. Mi tata tawata di edad avansa y tawatin mester di cuido, y ademas Veera a sigui cu problema cu su salud. E morto di mi tata na november 1990 a haci mi tristo, pero Veera su salud a mehora, y esei a duna nos speransa di regresa na e trabou di misionero. Nos a regresa Madagascar na september 1991.

Nos asignacion na Madagascar tawata pa un aña, pero el a dura dies. Durante e tempo ei, e cantidad di publicadonan a aumenta di 4.000 pa 11.600. Mi a disfruta masha hopi di sirbi como misionero. Sinembargo, tawatin biaha cu mi a sinti mi desanima, pensando cu podise mi tawata neglisha e necesidadnan fisico y emocional di mi kerida esposa. Pero Yehova a duna nos tur dos e fortalesa pa sigui padilanti. Finalmente, na aña 2001 nos a regresa Finlandia, caminda nos ta trahando na sucursal. Ainda nos ta hopi celoso den nos trabou pa sostene e Reino di Dios, y te ainda nos ta disfruta di nos dushi recuerdonan di Africa. Nos ta determina pa haci e boluntad di Yehova na unda cu e asigna nos.—Isaias 6:8.

[Mapa na pagina 12]

(Pa e texto den su formato completo , wak e publicacion)

FINLANDIA

EUROPA

[Mapa na pagina 14]

(Pa e texto den su formato completo , wak e publicacion)

AFRICA

MADAGASCAR

[Mapa na pagina 15]

(Pa e texto den su formato completo , wak e publicacion)

AFRICA

UGANDA

[Plachi na pagina 14]

Dia cu nos a casa

[Plachi na pagina 14, 15]

Di trabou di sircuito na Finlandia, 1960 ...

... pa trabou di misionero na Madagascar, 1962

[Plachi na pagina 16]

Ami cu Veera awe